22-02-2023, 00:35
Putin nüvə sazişinin ləğviylə bağlı qanun layihəsini Dumaya təqdim edib
Rusiya prezidenti Vladimir Putin ABŞ-la imzalanan nüvə sazişinin ləğv edilməsi barədə qanun layihəsini Dövlət Dumasına təqdim edib. Bu barədə Kreml məlumat yayıb. “Rusiya Federasiyası ilə Amerika Birləşmiş Ştatları arasında strateji hücum silahlarının daha da azaldılması və məhdudlaşdırılması tədbirləri haqqında Müqavilənin fəaliyyətinin Rusiya Federasiyası tərəfindən dayandırılması haqqında” qanun layihəsi Dövlət Dumasında müzakirə olunacaq. Qeyd edək ki, Putin bu gün parlamentdə çıxışı zamanı Rusiyanın müqaviləni tərk edəcəyini açıqlayıb.
22-02-2023, 00:32
Bayden Vaşinqton və G7-nin ərzaq böhranındakı rolundan danışdı
ABŞ prezidenti Co Bayden Varşavada çıxışı zamanı Vaşinqton və G7-nin (Böyük Britaniya, Almaniya, İtaliya, Kanada, Fransa, Yaponiya və ABŞ) ərzaq böhranı ilə mübarizədə rolundan danışıb. O, bu ölkələrin ərzaq tədarükünü artırdığını bildirib. ABŞ lideri qeyd edib ki, Ukrayna taxılının ixracında çətinliklər yarandığından, onlar ərzaq tədarükünün həcmini artırmaq qərarına gəliblər. Baydenin sözlərinə görə, qlobal ərzaq böhranı xüsusilə Afrika və yoxsul ölkələrdə daha da pisləşib. "ABŞ, G7 və digər tərəfdaşlar böhranı həll etmək və ərzaq tədarükünün həcmini artırmaq qərarına gəliblər", - ABŞ prezidenti bildirib. O qeyd edib ki, həyat yoldaşı Cil Bayden ərzaq böhranı ilə mübarizə çərçivəsində bu həftə Afrikaya səfər edəcək. AFP xəbər verir ki, xanım Bayden fevralın 22-dən 26-dək Namibiya və Keniyaya səfər edəcək.
22-02-2023, 00:29
Bayden Moldovaya dəstək dolu çıxış etdi
Moldova vətəndaşları qətiyyətlidirlər, demokratiyaya doğru irəliləmək, Avropa ölkələrinə qoşulmaq istəyirlər. Bunu Varşavada çıxışı zamanı ABŞ prezidenti Co Bayden deyib. "Moldova vətəndaşları qətiyyət nümayiş etdirirlər. Bu ölkədə insanlar azad olmaq istəyirlər”, - Bayden bildirib. ABŞ lideri qeyd edib ki, Moldova Prezident Maya Sandu bu mübarizəyə rəhbərlik edir. "O, bu gün buradadır. Mən sizi və azadlıqsevər Moldova xalqını dəstəkləməkdən qürur duyuram", - ABŞ prezidenti deyib.
22-02-2023, 00:25
Bayden Putinə və rus xalqına müraciət ünvanladı
ABŞ prezidenti Co Baydenin Varşavada çıxış edib. Bu barədə Ağ Ev məlumat yayıb. Bayden çıxışı zamanı Rusiya prezidenti Vladimir Putinə və rus xalqına müraciət ünvanlayıb. O, çıxışının əvvəlində Rusiyanın Ukraynadakı hərbi əməliyyatının ABŞ, Avropa İttifaqı və NATO üçün sınaq olduğunu bildirib.
[media=https://youtu.be/H98gJ1OruBo]
22-02-2023, 00:21
Rusiya XİN nümayəndəsindən Ermənistandakı Aİ missiyasına etiraz
Rusiyanın xarici işlər nazirinin müavini Mixail Qaluzin Avropa İttifaqının (Aİ) Cənubi Qafqaz üzrə xüsusi nümayəndəsi Toivo Klaarla telefon danışığı aparıb. Bu barədə TASS agentliyi məlumat yayıb. Telefon danışığı zamanı Cənubi Qafqazdakı vəziyyət müzakirə olunub. Rusiya rəsmisi bildirib ki, Brüsselin Ermənistanda missiya yerləşdirmək qərarı regionda vəziyyəti normallaşdırmağa kömək etmir. Həmçinin qeyd olunub ki, Bakı və İrəvan arasında bu təşəbbüslə bağlı konsensus yoxdur.
22-02-2023, 00:18
Azərbaycan Türkiyəyə 25 milyon manat humanitar yardım ayırıb
Azərbaycan zəlzələdən sonra Türkiyəyə 25 milyon manata yaxın maddi yardım ayırıb. Bu barədə Azərbaycan Xarici İşlər Nazirliyi məlumat yayıb. Eyni zamanda, təcili tibbi yardım, yanğınsöndürmə, Fövqəladə Halların İdarə Olunması Agentliyi (AFAD) və rəsmi axtarış-xilasetmə maşınları pulsuz yanacaqla təmin edilib.
22-02-2023, 00:14
Ukraynada ölən dinc əhalinin sayı 8 mini keçib
Ukraynada müharibə başlayandan bəri 8000-dən çox dinc sakin ölüb. Bu barədə BMT-nin hesabatında qeyd olunub. Bildirilib ki, Rusiyanın zərbələri nəticəsində 13 000-dən çox insan yaralanıb. BMT-nin məlumatına görə, bu rəqəm yalnız sənədləşdirilmiş ölümlərdir, amma reallıqda mülki itkilər daha çoxdur. Belə ki, hələ də Rusiya qoşunlarının işğalı altında olan Mariupolda öldürülənlərlə bağlı təşkilatda heç bir məlumat yoxdur.
22-02-2023, 00:10
Çin liderinin Rusiyaya səfəri gözlənilir
Çin lideri Si Cinpin Rusiyaya səfər etməyi planlaşdırır. Bu barədə "The Wall Street Journal" qəzeti öz mənbələrinə istinadən məlumat yayıb. Bildirilib ki, Çin lideri Moskvada Rusiya prezidenti Vladimir Putinlə görüşəcək. Səfər yaxın aylarda baş tutacaq.
22-02-2023, 00:07
Türkiyədə zəlzələ qurbanlarının sayı 42 mini keçdi
Türkiyədə zəlzələ nəticəsində həlak olanların sayı 42 310 nəfərə çatıb. Bu barədə Fövqəladə Halların İdarə Olunması Agentliyi (AFAD) məlumat yayıb. Bildirilib ki, indiyədək zəlzələ bölgəsindən 448 018 vətəndaş təxliyə olunub. Məlumata görə, Kahramanmaraş və Hatay zəlzələlərindən sonra 7242 afterşok qeydə alınıb. Xatırladaq ki, fevralın 6-da yerli vaxtla saat 04:17-də Türkiyənin Kahramanmaraş vilayətinin Pazarcık rayonunda 7,7 bal, saat 13:24-də isə Elbistan rayonunda 7,6 bal gücündə iki zəlzələ baş verib. Dərinliyi 7 kilometr olan zəlzələ 10 vilayətdə ciddi dağıntılara səbəb olub. Zəlzələdən zərər çəkmiş 10 vilayətdə üç ay müddətinə fövqəladə vəziyyət rejimi elan olunub.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Zəngilanın dirçəliş
və qayıdış dövrü
Azərbaycan tarixinin ən şanlı səhifəsi olan Vətən müharibəsi bizə təkcə torpaqlarımızı deyil, ləyaqətimizi, qürurumuzu qaytardı. Həmin qürurun ən parlaq ünvanlarından biri də Zəngilandır. 2020-ci il sentyabrın 27-də başlanan Zəfər yürüşü zamanı şərqdən, Cəbrayıl istiqamətindən düşmənə vurulan sarsıdıcı zərbələr nəticəsində Azərbaycan Ordusu 30-dan çox yaşayış məntəqəsini azad edərək Zəngilanın inzibati hüdudlarına çatdı. Oktyabrın 18-də rayonun tam azad edilməsi uğrunda genişmiqyaslı əməliyyata start verildi və cəmi iki gün sonra, oktyabrın 20-də Müzəffər Ali Baş Komandan, Prezident İlham Əliyev xalqa müraciətində Havalı, Zərnəli, Məmmədbəyli, Həkəri, Şərifan, Birinci Muğanlı kəndlərinin və Zəngilan şəhərinin işğaldan azad edildiyini elan etdi. Beləliklə, Zəngilan döyüşləri nəticəsində 1 şəhər, 4 qəsəbə və 49 kənd düşmən tapdağından xilas edildi və bununla da 132 kilometrlik Azərbaycan-İran dövlət sərhədi tam bərpa olundu. İşğalın bitməsindən dərhal sonra sərhəd boyunca zəruri istehkam və mühafizə işlərinə başlanıldı.
Qərbi zəngəzurlular Zəngilan şəhidliyində
Bu tarixi qələbənin əbədiləşdirilməsi üçün 2020-ci il noyabrın 26-da “Zəngilanın azad olunmasına görə” medalı təsis edildi və 6974 hərbi qulluqçumuz bu medalla təltif olundu. Prezidentin 31 iyul 2023-cü il tarixli Sərəncamı ilə isə 20 oktyabr tarixi Zəngilan şəhəri günü kimi rəsmiləşdirildi. Zəngilanın azad olunması Böyük Qayıdışın başlanğıcı oldu. Bu gün dövlətin ən böyük hədəfi həmin torpaqları yenidən həyatla doldurmaqdır. 2026-cı il 1 oktyabr tarixinə olan məlumata görə, Zəngilan şəhərində 84 ailə, yəni 339 nəfər, Ağalı kəndində 234 ailə, yəni 1017 nəfər, Məmmədbəyli kəndində isə 179 ailə, yəni 903 nəfər öz doğma ocağına qayıdıb. Köçürülən ailələr peşə və bacarıqlarına uyğun olaraq müxtəlif dövlət qurumlarında, tikinti şirkətlərində, tikiş fabrikində və digər sahələrdə işlə təmin edilirlər.Bu qayıdışın dünyaya nümunə olan simvolu isə Ağalı kəndidir. Ağalı təkcə Azərbaycanda deyil, dünyanın ən müasir kəndlərindən biri hesab olunur. Burada “ağıllı kənd” konsepsiyası tam şəkildə tətbiq edilib. Dayanıqlı inkişafın təmin olunması üçün sosial-iqtisadi xidmətlər ən yüksək texnologiyalarla qurulub. Kəndin enerji təminatı ekoloji cəhətdən tam təmizdir, Həkəri çayı üzərində 3 turbindən ibarət Arximed tipli su elektrik stansiyası və gücü 325 kilovat olan günəş panelləri quraşdırılıb. Evlərdə istilik xərclərini azaltmaq üçün kombinə edilmiş sistemlər, mətbəx sobası və yüksək səmərəli elektrod boilerlər var. Suyun isidilməsi üçün günəş kollektorlarından, çirkab suların təmizlənməsi üçün bioloji təmizləmə qurğularından istifadə olunur.
Kənddə GPON texnologiyası ilə yüksək sürətli internet, İP TV, video müşahidə kameraları, ağıllı işıq dirəkləri və avtomatik hava müşahidə stansiyaları var. Əhalinin rahatlığı üçün Tele-səhiyyə, E-təhsil və digər elektron xidmətlər, ASAN, DOST, məktəb, bağça, tibb məntəqəsi, kiçik və orta biznesə dəstək mərkəzləri fəaliyyət göstərir. Ümumi sahəsi 2 hektardan çox olan park salınıb. Bütün bunlar onu göstərir ki, Ağalı kəndi sadəcə yaşayış məntəqəsi deyil, gələcəyin kənd modelidir. Nazirlər Kabinetinin 30 oktyabr 2023-cü ildə təsdiq etdiyi Baş Plana əsasən şəhərin 2040-cı ilədək inkişafı üçün böyük vəsait ayrılıb. 2022-ci ildə təməli qoyulan 104 mənzilli ilk yaşayış kompleksinin açılışı 2026-cı ildə olub. Kompleksin ərazisi 2 hektardan artıqdır və burada 12 bina, o cümlədən 4 ədəd üçmərtəbəli 60 mənzilli və 8 ədəd ikimərtəbəli 44 mənzilli evlər tikilib.
Azad Zəngilanın qonaqları
Zəngilan Beynəlxalq Hava Limanı bu bölgənin inkişafı üçün mühüm faktora çevrilib. Zəngəzur dəhlizinin hava infrastrukturu ilə gücləndirilməsi baxımından hava limanı strateji əhəmiyyət daşıyır. Eyni zamanda Horadiz-Zəngilan-Ağbənd dəmir yolunun inşası da böyük strateji əhəmiyyətə malikdir. Bu yol azad edilmiş torpaqlara həm vətəndaşların qayıdışı, həm də yüklərin daşınması üçün tarixi imkan yaradır. Artıq yolun birinci mərhələsi üzrə böyük hissə tamamlanıb və Araz İqtisadi Zonası Sənaye Parkına yüklər daşınır. Horadiz-Cəbrayıl-Zəngilan-Ağbənd avtomobil yolunun uzunluğu 126,3 kilometrdir, illik buraxılış qabiliyyəti 15 milyon tondur və layihənin 2026-cı ilin ikinci yarısında yekunlaşdırılması nəzərdə tutulur. İşğal dövründə tövlə kimi istifadə olunan XIX əsrə aid Zəngilan şəhər məscidi Heydər Əliyev Fondu tərəfindən bərpa olunub. Bərpa-tikinti işləri çərçivəsində tarixi məscid konservasiya edilib və onun yanında düzbucaqlı planlı, iki minarəli yeni məscid inşa edilib. Yeni məsciddə 220 və 100 nəfərlik ibadət zalları yaradılıb. Rayonun gələcəyi üçün turizm və kənd təsərrüfatı da unudulmayıb. 2024-cü il mayın 18-də Ağalı kəndində, Həkəri çayı vasitəsilə yaradılmış süni gölün sahilində “Ağalı” hoteli açılıb. Zəngilan İstirahət Kompleksində 111 nömrəli hotelin təməli 2023-cü il mayın 4-də qoyulub. 2026-cı il mayın 10-da isə “Zəngilan City Park Hotel”in təməli qoyulub. Kənd təsərrüfatı sahəsində isə “Dost Aqropark” layihəsi həyata keçirilir. Azərbaycan və Türkiyə şirkətlərinin birgə layihəsi olan bu kompleks tam başa çatdıqda 500 nəfəri işlə təmin edəcək və 100 milyon dollar sərmayə qoyulacaq. Layihənin birinci mərhələsində 5200 kvadratmetr qapalı, 113 min kvadratmetr açıq tipli heyvandarlıq kompleksləri, sosial obyektlər, kafe, kinoteatr tikilib.
Beləliklə, Zəngilan bu gün sadəcə işğaldan azad edilmiş bir rayon deyil, Azərbaycan dövlətinin qüdrətinin, iradəsinin və gələcəyə olan inamının canlı rəmzidir. Burada hər daş, hər tikilən ev, hər qayıdan ailə 30 illik həsrətin sonu və Böyük Qayıdışın əbədi başlanğıcıdır.
Mahnur Hüseynova
Xırdalan şəhər 8 nömrəli tam orta ümumtəhsil məktəbinin direktoru
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!