Hardan baxsan şəffaf,

tərtəmiz görünür…


Kimya elmləri doktoru, professor Eldar Məmmədbəylinin 85 illik yubileyi davam etməkdədir.

Onu tanıyanlar- iş yoldaşları, həmkarları yubilyar haqqında müxtəlif məqalə, korresspondensiya, oçerk, hekayə və sair janrlarda yazılar yazıb kütləvi informasiya vasitələrində dərc etdirməklə bərabər dostları da başına yığışıb şərəfinə süfrə açır, şəninə ürək sözlərini söyləyirlər.
Növbəti belə tədbir Abşeron rayonunda keçirilib. Eldar Məmmədbəylini lap gənclik illərindən yaxşı tanıyan

əczaçı həkim Şahbaz Cəfərov 50-60 il əvvəllərə ekskurs edib. Eldar müəllimin insan övladına məxsus ən nəcib keyfiyyətlərə malik olduğunu bildirib. Qeyd edib ki, Məmmədbəyli bu dünyaya xeyirxah əməllər üçün gəlib. Bacararsa xeyirxahlıq edər, bir işi qarşısısına məqsəd qoydusa, məqsədinə nail olmayınca yolundan dönməz. Təpəri, cəsarəti, mənəvi gücü fiziki imkanlarından qat-qat üstündür. Onu daha yaxşı tanımaq üçün uzun müddətli ünsiyyət lazım deyil. Çünki Eldar müəllim dağ çayı kimidir, nə qədər çağlasa da dumdurudur. Hansı yanından baxsan olduğu kimi şəffaf, tərtəmiz görünür. Bu kişi Sovet dönəmində ən gəlirli sahələrdən olan əczaçılığı, aptek müdirliyini buraxıb elmin yolunu seçdi. Yəni pulu-paranı yox, ləyaqəti, şərəfi seçdi və getdiyi hər yeri şərəfləndirdi.
Ehtiyatda olan tibb xidməti polkovnik-leytenantı, yazıçı-publisist Elman Rüstəmov professorun könül dünyasından, saza-sözə mehrindən, Vətən sevgisindən, millətinə, dövlətinə sədaqətindən söz açıb. Bir az da Eldar müəllimin həyata olan ruhi bağından, onun şeir yaradıcılığından danışıb.

Birinci Qarabağ Müharibəsinin cəsur döyüşçüsü Fərhad Məhərov, professorun mühəndis dostu Kamran Rzayev, Hərbi Jurnalistlər Birliyinin sədri Tamxil Ziyəddinoğlu Eldar Məmmədbəylini 85 illik yubileyi münasibəti ilə təbrik edib, xoş arzularını bildiriblər.

Pərviz Məmmədov əmisi Eldar Məmmədbəylinin məclisdəkilərə bəlli olmayan cəhətlərindən- elə, obaya, qohum-qardaşa münsibətindən danışıb. Bildirib ki, mən istər elmdə, istərsə də həyatda nə öyrənmişəmsə Eldar əmimdən, bir də Azad Mirzəcanzadədən öyrənmişəm. Lap körpəlikdən bir idealım var, o da əmim- professor Eldar Məmmədbəylidir. Həyatda qazandığım uğurlarda da ən çox onun
payı var.

Eldar Məmmədbəyli yubiley təşkilatçılarına və ünvanına deyilən xoş sözlərə, arzulara görə təşəkkür edib. Sonra dostların xahişi ilə öz əsərlərindən, Səməd Vurğunun, Xəlil Rzanın şeirlərindən parçalar söyləyib. Sonda isə Ayaz Arabaçının şəhid Milli Qəhrəman Natiq Qasımova həsr elədiyi “Səssiz qalmayan zəfər” poemasından ən çox sevdiyi, həmişə təkrarladığı parçanı xüsusi intonasiya ilə səsləndirib:

Yağış yağır dayanmadan Şuşaya,
O yağışın sellərindən öpürəm.
O yağışda qıvrım-qıvrım islanan,
Əsgərimin tellərindən öpürəm.

Qarabağa həyat verdi o haqq qan,
Bax bu idi gözlənilən ən xoş an.
Bu torpağa igid doğan, ər doğan,
Anaların əllərindən öpürəm.

Bu zəfəri hər zərrəmdə duyuram,
Sevincimi göz yaşımla yuyuram.
“Araz boyu muştuluğa yüyürən”,
Dəlidağın yellərindən öpürəm.

Azərbaycan, möhtəşəmdir gur səsin,
Əskilməsin üstümüzdən nəfəsin.
Bu torpağa vətən deyən hər kəsin,
Şirin-şirin dillərindən öpürəm.

Ağlamışam, kükrəmişəm, əsmişəm,
Ürəyimi bir ulduzdan asmışam.
Xəritəmi qucağıma basmışam,
Azərbaycan ellərindən öpürəm.

“Bütöv Azərbaycan”

VƏTƏNİMİZİN

İSTEDADLI GƏNCİ

Yunus Ələsgərli 5 Sentiyabr 2008- ci ildə Bakı şəhərində ziyalı ailəsində anadan olub. Atası Elşən ehtiyatda olan yüksək rütbəli zabitdir.
Anası Nazimə xanım həkimdir. Bakı şəhər poliklinkalarından birində şöbə müdiri vəzifəsində çalışır. Elə Yunusla bağlı suallarımın cavabını da anası Nazimə xanım verir:
Yunusun bir yaşından fərqli bir uşaq olduğunu atası da mən də hiss etmişdik. Onun üç yaşı olanda bütün kiril və latın hərflərini bilirdi. Üç yaş yarımdan sonra bütün hərfləri çap formasında yazırdı. O, sözə baxan və çox məsuliyyətli idi. Dörd yaşından şahmat oynamağı sevdi. Eyni zamanda idmanın başqa növlərinə də maraq göstərdi. Üzgüçülük və karate ilə də məşğul oldu. On üç yaşından başlayaraq peşəkar basketbolla məşğuldur. Yunusun altı yaşı olanda qabiliyyətinə görə Yasamalda yerləşən 286 saylı məktəbin rus bölməsinə qəbul olundu. İbtidai sinifi əla qiymətlərlə bitirdikdən sonra 147 nömrəli Texniki Humanitar Liseydə təhsilini davam etdirdi. Orta təhsilini də bu məktəbdə tamamladı. Qəbul imtahanlarını uğurla verib Azərbaycan Dövlət İqtisad Univerditetinə qəbul olundu. Hazırda Beynəlxalq Münasibətlər fakultəsinin birinci kurs tələbəsidir.
On yeddi yaşlı istedadlı gənc ana dili olan Azərbaycan, rus, ingilis dillərində sərbəst danışır və yazıb oxuyur. Mütaliəni çox sevir. Vətən sevgisi nə olduğunu dərindən dərk edir. Yunus Elşən oğlu bir neçə ildir ki, şeir yazmağa başlayıb. Şairlərdən Zəlimxan Yaqubun poyezyasına çox müraciət edir. Anası Nazimə xanımın tövsiyəsiylə onun öz səsiylə şeirlərini dinləməkdən böyük zövq alır. Bundan başqa Nizami Gəncəvinin, Məhəmməd Füzulinin, Mirzə Ələkbər Sabirin və qəzəlxan Əliağa Vahidin də yaradıcılığı ilə maraqlanır. Baxmayaraq ki, rus bölməsində oxuyur, vaxt tapdıqca klassiklərimizi də mütaliə edir. Yunus aydın zəkasıyla valideynlərindən yaxşı nə varsa mənimsəmişdir. Nənələri də onunla qürur duyurlar.
Ümumiyyətlə bu ailədə incəsənətə və poyeziyaya yüksək dəyər verilir. Yunusdan kiçik qardaşı on üç yaşlı Yusif AMK nəzdində İncəsənət Gimnaziyasında Milli rəqs ansamblında fəaliyyət göstərir, eyni zamanda Basketbolla da məşğul olur. Qardaşlar çox savadlı və tərbiyəli olduqlarına görə oxuduqları təhsil ocaqlarından, qatıldıqları idman yarışlarından və mədəni tədbirlərdən hər zaman diplom, tərifnamə və mükafatlarla dönüblər.
Gəlim 17 yaşlı Yunusun, özündən xəbərsiz, mənim istəyimlə anası Nazimə həkimin təqdim etdiyi şeirlərindəki fikr və düşüncələrinə. Oun şerlərindəki ürəkdən gələn vətən sevgisindən doğan, dolğun və yeni ifadələr məni çox duyğulandırdı.
“Zəfərimiz” adlı poemasından sətirləri nəzərnizə çatdırıram:

Şəhidləri bir dəqiqəlik
sükutla anarkən,
o dəqiqə hər atılan mərminin
səsindən də möhkəmdir!
Yunus Elşən oğlu
Elə bu fikirin özü bir əsərdir. Yunus qələmə aldığı bu poemada səngərdəki əsgərin yerində özünü görür. Damarında axan qanın belə o əsgərin qanı olmasını hiss edir. Həmin obrazı yaşayır. Onun qələmə aldığı hər misrada məna var. Gələcəkdə böyük əsərlər ərsəyə gətirəcəyinə və cəmiyyətdə öz imzasıyla tanınacağına inanıram. Bu yaşda onun Vətən sevdası, öz dəst xətti olması insana qürür verir. Ona görə ki, bu gün qanlar bahasına çiçəklənən Azad Vətənimiz Can Azərbaycanın gələcəyi belə Vətənpərvər övladların əlindədir.

Bir oxucu və yazar kimi onu da qeyd edim ki, bu günkü gənclərin az mütaliə etməsi və ya heç etməməsi bir qrup ziyalılarmız kimi məni də çox narahat edir. Ancaq belə gənclərmizi gördükdə sevincimi gizlədə bilmirəm. Bu gün elə sevinclə də Yunus Elşənoğlunun kicik həcimli şeirlərini deyil. Onun “Zəfərimiz” adlı poemasını sizə təqim edirəm. Əziz oxucu 17 yaşlı bir gəncimizin istedadını az da olsa işıqlandırıb sizə çatırmağı özümə borc bilirəm.
Onuda qeyd edim ki, Yunusun cəmiyyətimiz üçün mükəmməl formalaşmasında ailəsi ilə bərabər təhsil aldığı ocaqlarda müəllimlərinin də zəhməti az deyil. O, qələmə aldığı bu əsərdə Vətən sevgisini, gənc nəsilin qəhrəmanlığını tərənnüm edir. Azərbaycanın Ali Baş Komandanının və İgidlərin xalqımıza yaşatdıqları sevinc hissini öz duyğularıyla geniş formada oxucuya və dinləyiciyə çatdırmaq üçün sinəsini qabağa verib. Təhsil aldığı Universitedə Zəfər gününə həsr olunmuş tədbirdə “Zəfərimiz” adlı poemasını əzbərdən söyləmiş və könülləri fəth edərək ödül alıb.
Vətən sevən xalqın qarşısında iki məqsəd olur. Vətən üçün savaşaram.
Ölləm Şəhid ollam,
Qallam qazi ollam.
Azərbaycanın igid oğulları illərdi ermənilər tərəfindən işğal olunmuş Torpaqlarmızı Azad edərək, belə gənclərə və gələcək nəsillərə örnək oldular. Buna misal olaraq Yunusun sevinclə sevgiylə qələmə aldığı “Zəfərimiz” poeması diqqətə layiqdir. Ona təhsilində və yardıcılıq yollarında böyük naliyyətlər və uğurlar diləyərək, deyirəm Dunyanın Poeziya dəryasına qələmindən yeni-yeni incilər səpələnsin gəncimiz və gələcəyimiz olan Yunus Elşənoğlu!

Sara GÖYÇƏLİ (Şərifova)
Şair -publist, “Qızıl Qələm” və “Xan qızı Natəvan” media mükafatları laureatı, Azərbaycan Jurnalistlər Birliyinin üzvü.

Zəfərimiz

Bugün, məhz o gündür.
İllər öncə igidlərimiz,
İşğalçı düşmənlərə
diz çökdürdü.
Qaytardığımız torpaq,
aldığımız intiqamdır.
Haqq yolunda,
edə biləcəyimizin,
ən düzgünüdür.
Bayraqları bayraq edən,
igidlərin al qanıdı.
Torpaq uğrunda ölənlər,
Vətən üçün verdilər can.
Məhz buna görə,
sonsuzluğa qədər
Şəhidləri anacağıq,
Qaziləri, göz üstündə
tutacağıq.
- Bugün Zəfər Günüdür.
Bəs sizcə, bu zəfər günü nədir?!
Mənə görə qızıl üfüqdə doğan
parlaq günəşin mənasıdır,
Qəlbimizdəki vətənpərvərliyin,
ən ali zirvəsidir,
Zəhmətin nəticəsidir.
Cəbrayılı azad edən,
səngərdəki əsgərin
gözündəki sevinc yaşıdır.
Əsarətin səadətidir…
Zəfər günü budur demək.
Müasir dövrün əsl qəhrəmanları-
Azərbaycanın mərd oğullarıdır!
Zəfər gününün sədası,
yayıldı səngərlərə.
Sona qalan əsgər,
aldı rahat nəfəsin.
Müzəffər Ordumuz,
İnamını itirməyən,
Güclü Sərkərdəmiz,
qazandı Qələbəni.
Yazdı tarixə adın
Söylədi ürəkdən,
Şuşa, artıq sən azadsan !
Şuşaya ilk addım atdı
Azərbaycan əsgərin,
sevincindən ağlatdı.
Qəhrəmanlar 44 gün,
qorxu nədi bilmədi.
Ürəyində atəşli,
Vətənpərvərlik hissi
ilə vuruşudu.
Amma o vuruş,
səngərin pozulan
sükütu deyildir.
O, tarixin ən şiddətli atəşi idi.
O vuruş, yüz illərlə
yaşadılan matəmlərin qisasıdır.
Dəmir yumruğun gücüdür.
Bu vuruş düşmənin
törətdiklərinin cavabıydır.
Xəyallarımızda dastanlaşan,
inanılmaz qələbə idi.
Və bu vuruşda hər birimiz,
Şah İsmayıl Xətai, Babək idik.
Canımızla, qanımızla
torpağmıza fədayıq.
Hər atəş, hər səngər,
parlayan bir şəfəq.
Millətimin birliyini və
gücünu göstərdi!
Zəfər sözü ilə
qəlbim alovlanır,
Dəmir Yumruq tarix yazdı.
düşmən alçalıb uduzdu.
Yeri, göyü silkələdi,
Mərmilərin gurultusu!
Şəhidləri bir dəyqəlik
sükutla anarkən,
o dəqiqə, hər atılan mərminin
səsindən də möhkəmdir!
Hər bir qarışı müqəddəs olan,
Vətənə yeni bir həyat bəxş etdilər!
Qürur duyduğumuz igid oğullar.
O qan ki, bayrağımızı bayraq etdi!
O can ki, özünü vətənə fəda etdi!
Hər döyüşən əsgərin,
yerində özümü gördüm,
Damarımdan axan qan
O əsgərin qanıdır.
Yerdə qalmaz,
2723 Şəhidin qanı
Bizim qəhrəmanlığımız,
bizim igidliyimiz,
yalnız bu gün deyil!
Bu, əsrlərin ruhudur!
Bu, bizim şanlı tariximizdir!
Bu Xarı-Bülbülün xoş nəfəsidir.
Dünya tarixində qoyduğumuz,
müqəddəs, silinməz izdir.
Vətənimlə qürur duyur
Atalar, Analar bütun övladlar.
Və sanki Rəsul Rza,
Bəxtiyar Vahabzadə,
Sabir Rüstəmxanlı,
bizim səsimizlə qışqırır.
Qarabağ Şəhidlərinin,
adını daşıyan küçələrin,
divarda qalan bir güllə,
izinin tarixini əbədi yaşadırıq.
İgid qəhrəmanlarımız olmasaydı,
olmazdım nə mən, nə məktəbim,
nə də ki, bu gözəl Azadlığım!
Könlüm Qarabağ, canım Azərbaycanım!
Bəs “Ayrılarmı könül candan”?!
Azərbaycan! Azərbaycan!
30.10.2025.
Ələsgərli YUNUS Elşənoğlu

Azərbaycan Dövlət İqtisad Universiteti Beynəlxalq əlaqələr fakultəsinin birinci kurs tələbəsi

Sevgisi Vətən olan igid

30 il düşmən tapdağına dönən əzəli yurd yerimiz- Qarabağı 44 günə öz qanı bahasına azad edən Vətənin mərd, qeyrətli övladları cismən aramızdan getsələr də, mənən milyonların ürəyində yaşamaqla zaman-zaman xatirələrdən silinməz. 2000-ci il iyunun 22-də Biləsuvar rayonunun Cürəli kəndində dünyaya göz açan Sadiq Nüsrət oğlu Nəcəfliyə də məhz belə bir ucalıq nəsib olub. Onun qısa, amma olduqca şərəfli həyat yolu indi qazanılan qələbəmizin qəhrəmanlıq simvoluna dönərək dillərdən düşmür. Həmçinin ölümündən sonra dövlət tərəfindən layiq görüldüyü “Vətən uğrunda”, “Cəsur döyüşçü”, “Şuşanın azad olunmasına görə” medalları onun müqəddəs şəhid adına daha bir qürur qatır...
Doğma Vətəninə ürəkdən bağlanan, onun hər qarışını özünə əziz bilən Sadiqin ürəyi hələ orta məktəbdə oxuduğu zaman yağıdan qisas almaq istəyi ilə döyünüb. Odur ki, işğal altında olan torpaqların azadlığı naminə döyüş meydanında düşmənə qalib gəlmək üçün orta təhsildən sonra, yəni 2017-ci ildə Heydər Əliyev adına Azərbaycan Ali Hərbi Məktəbinə daxil olub. Burada hərbin sirlərinə mükəmməl yiyələnmək bacarığı, ən çətin təlimlərə ürəklə qatılması, eləcə də ağıllı hərəkətləri, mərdliyi, cəsurluğu, sanbalı davranışı ona böyük məhəbbət qazandırıb. Bir qayda olaraq qəlbində günü-gündən azğınlaşan erməni quldurlardan intiqam, qisas almaq alovu get-gedə güclənib. İstəyini həyata keçirtmək üçün məqam gözləyən kursant Sadiq Nəcəfli öyrəndiyi böyük zabitlərin qarşısında Vətən torpaqlarının azadlığı uğrunda son damla qanına qədər vuruşacağına and içib.

Sadiq ali hərbi məktəbini bitirib kiçik leytenant rütbəsi alıb. Bu vaxt- 2020-ci il 27 sentyabrda dövlət başçısı, Ali Baş Komandan İlham Əliyevin Ermənistanın sərhəd boyu törətdiyi ardıcıl təxribatlara cavab olaraq əks-hücum əmrini eşidəndə müharibə ölüm-itim olsa da, sevincdən ürəyi köksünə sığmayıb. Axı uzun illər arzusunda olduğu yağıdan alacağı öcün vaxtı çatmışdı...
Vətən müharibəsi zamanı ilk gündən Biləsuvarın igid oğlu Sadiq Nəcəflinin qələbə sorağı ən ağır döyüş əməliyyatlarından gəlib. Verilən tapşırıqları bacarıqla yerinə yetirib, neçə-neçə kəndin, qəsəbənin azad olmasında mənfur erməni dığalarına qarşı qəhrəmancasına vuruşub. Ulu torpağın bağrına hər dəfə zəfər bayrağı sancılanda gözlərinin önünə Şuşa gəlib. Torpaq sevgisinin hərarətindən güc alan Sadiq ölümün gözünə dik baxa-baxa Şuşa uğrunda ağır ölüm-dirim savaşına girib. Düşmənə sarsıdıcı zərbələr endirib. Elə zəfər günü- noyabrın 8-də qəfil atılan gülləyə tuş gəlib. Özü şəhid olsa da, qan tökdüyü, canını qurban verdiyi Şuşada düşmən tam məğlub olub. Sadiq isə öz xalqına qazandırdığı qələbə ilə əbədi yaşamaq üçün əlçatmaz və ünyetməz göylərə ucalıb.

Zəfər ORUCOĞLU,

Azərbaycan Jurnalistlər Birliyinin üzvü





.

NƏ MOLLA LAZIMDIR,

NƏ ŞAH TƏBRİZƏ

Yenə çalxalanır, oyanır İran,
İçindən od alıb bax, yanır İran.
Heyif, ümid gəzir şahın soyunnan,
Baş aça bilmirəm mən bu oyunnan.
Nə molla lazımdır, nə şah Təbrizə.
Doğru yolun açar Allah Təbrizə.

Təbriz öz adını tarixə yazıb,
Neçə yağıların qəbrini qazıb.
Şahı arayanlar yolların azıb,
Ya ki, dünənini unudubdular?
Bu yola qoşulmaq günah Təbrizə.
Nə molla lazımdır, nə şah Təbrizə.

Təbrizin öz dərdi, öz səri vardı,
Təbrizin qolları qandallardadı...
Təbriz yaxşı bilir çıxış hardadı,
Məqsədi, yolu da agah Təbrizə.
Nə molla lazımdır, nə şah Təbrizə.

Təbriz öz haqqını qazanacaqdı,
Qolu Quzeyədək uzanacaqdı.
İnanma, desələr usanacaqdı,
Dönməzlik əbədi silah Təbrizə.
Nə molla lazımdır, nə şah Təbrizə.

Hər şeyin vədəsi, vaxtı çatacaq,
Düşmən yuxusuna haram qatacaq.
Təbriz nisgilləri silib atacaq,
Bilir ki, yaraşmaz vay, ah Təbrizə.
Nə molla lazımdır, nə şah Təbrizə.
06.01.2026

TOXUNMAYIN TƏBRİZƏ
(İzrail Təbrizi bombalayarkən)

Nə mollanı sevirəm mən, nə də ki, sionisti,
İnsanlıq əleyhinədir hər birinin hər qəsdi.
Bu qədər də olarmı zülm, dayanın daha bəsdi,
Güneyim də Quzey qədər əzizdir, bilin, bizə.
Gəlin, odla oynamayın, toxunmayın Təbrizə.

Mənimdir Güneydəki hər kəndim, şəhərlərim,
Bu günkü zülmət gecəm, sabahkı səhərlərim.
Hazırdır, hər cağrışına, gəlməyə ərənlərim,
Təbrizə hər düşən mərmi sancılır sinəmizə.
Gəlin, odla oynamayın, toxunmayın Təbrizə.

Danışanda dostam deyib, əməldə əymə, dayan,
O hər gizli xislətiniz çoxdandır mənə ayan.
Budur, dünya önündə mən, edirəm, baxın, bəyan,
Nə olur olsun gücünüz, durammaz qəsdimizə.
Gəlin, odla oynamayın, toxunmayın Təbrizə.

Parça-parça sinəmizin yarası sağalacaq,
Hökmünü zaman verəcək, yerini haqq alacaq.
Üç rəngli bayrağımız Savalandan asılacaq,
Bu milli şansımızı kim qadağa qoyar bizə.
Gəlin, odla oynamayın, toxunmayın Təbrizə.

Güney, Quzey Vətənimdə ürəyimdir Təbrizim,
Çətin gündə söykəndiyim kürəyimdir Təbrizim,
Yüz illərin arzusudur, diləyimdir Təbrizim.
Yandırar Odlar diyarı kim əl vursa bu közə.
Gəlin, odla oynamayın, toxunmayın Təbrizə.
24 iyun 2025, saat 11-33

DİLİNƏ QURBAN
“Tik-Tok”da Güneyl bir qızcığazın Vətən harayının təsiri ilə...

Güneydən, Quzeyə hay, haray salan,
Şirin ləhcəsiylə canımı alan,
Bakını görməyi diləyi olan,
Mən də, türkəm deyən, dilinə qurban.

Dur gəl, gözləyirəm, qurbanın olum,
Sarılsın boynuna , dolansın qolum.
Qoy ki, mən ağlayım, kövrəlim, dolum,
Ağlama, gözünün selinə qurban.

Yol gəzmə, bu sinəm el yolu olub,
Yollar açılacaq, inan az qalıb.
Gələndə Səhənddən gül, çiçək yolub,
Dəstələ, gətir sən, əlinə qurban.

Orda Savalanın zirvəsi qarlı,
Burda Murovdağın dörd yanı barlı.
Çox da, yollar bağlı, ellər aralı,
Bir dilli, bir soylu elinə qurban.

İkiyüz ildir ki, çəkirik acı,
Həsrətdən ağarıb Yurdumun saçı.
Yalnız, bütövıükdür dərdin əlacı,
Müjdələr soraqlı ilinə qurban.
16-03-2025

TƏBRİZİM

Doluxsunmuş gözü yolda qalan mən,
Sal qoynuna könlümü al, Təbrizim!
Xəzan vurmuş çiçək kimi solan mən,
Ürəyimdə yara xal-xal, Təbrizim!

Əlim yetir, ünüm yetir, ayrıyıq,
İllər ötür, ömür bitir, ayrıyıq.
Nələr qalır, nələr itir, ayrıyıq,
İtənləri bir yada sal, Təbrizim!

Acı, şirin xəyallara dalmışam,
Hər gələndən səni xəbər almışam.
Mən mehrimi ayrılığa salmışam,
Qismət ola barı vüsal, Təbrizim!

Sən dönmüsən tariximin büstünə,
Yıxammadı, kimlər gəldi üstünə.
Al başımı dizlərinin üstünə,
Zümzüməli bir layla çal, Təbrizim!

Danış mənə o elimdən, obamdan,
Dağ vüqarlı Şah İsmayıl babamdan.
Danış mənə o davadan, o qandan,
Qulaq asım, kəsilim lal, Təbrizim!

Haçan görən, gül açacaq diləyim?
Gücüm çatan bir qələmdi, neyləyim…
Şəhriyarın”Heydər”ini dinləyim.
Sözü şəkər, ləhçəsi bal, Təbrizim!

Göz yumulur, xəyal qaçır, yatmıram,
Gecə keçir, səhər açır, yatmıram.
Yüyürürəm, yıxılıram, çatmıram,
Nə uzunmuş bir qarış yol, Təbrizim?!

Diridağdan Qaradağa aşaram,
Savalanda selə dönüb daşaram.
Nabələdəm, birdən yolu çaşaram,
Sən gəl mənə bələdçi ol, Təbrizim!

Yorulmaram, ha yüyürəm yol boyu,
Kara çatar bulaqların bal suyu.
Gözləyirəm sağlı, sollu el toyu,
Bir yallıya el tuta qol, Təbrizim!
Ürəyimdən silinə xal, Təbrizim!

BÜTÖVLÜK EŞQİYLƏ
YAŞAYIRAM MƏN

Qaytarın Arazı, döndərin geri,
Vətəni ikiyə bölə bilməsin.
Ağrıyır sinəsi yüz ildən bəri,
Nədən bu torpağın üzü gülməsin?

Əlimi uzatsam, əlim yetəndi,
Di gəl ki, ayaqlar, qollar bağlıdı.
O tay da, bu tay da bütöv Vətəndi
Di gəl ki, cığırlar, yollar bağlıdı.


Kim alıb haqqımı əlimdən mənim,
Mən niyə bağırıb, qışqırmam axı?
Bilsəm də kəsilib kim mənə qənim,
Arazda görürəm yenə günahı.

Günah səndə, onda, məndədi günah,
Araz göz yaşıdı ağlayanların.
Taleyin bizdən də sərt yazsın Allah,
Bu yurdun taleyin bağlayanların.

Quzeydən Güneyə bir qartal kimi,
Gərib qanadımı uça biləydim.
Vüsalda əridib kədəri, qəmi,
O tayı doyunca quca biləydim.

Yamyaşıl, qupquru düzləri gəzib,
Bir bulaq üstündə dincələm bir az.
Meşkində laləli çölləri əzib,
Savalan dağına kaş çıxam bu yaz.

Saymaq istəmirəm şəhəri, kəndi,
Hər birin qəlbimdə daşıyıram mən.
Dağıdıb, uçurub bərəni, bəndi,
Bütövlük eşqiylə yaşayıram mən.

XXX

Qucağım tutan qədər qucaqlayıb mən öpdüm,
Həsrətdən cadarlanmış torpağın sinəsindən.
Parçalanıb, bölünmüş anam Azərbaycanı,
İlk dəfə bütöv gördüm Savalan zirvəsindən...

HAQQININ YOLUNA
ÇIXAN TƏBRİZİM

Hayqıran, kükrəyən selinə qurban,
Güneyli, Quzeyli elinə qurban,
Azdlıq bağıran dilinə qurban,
Haqqının yoluna çıxan Təbrizim!

Ən gözəl, müqəddəs yolun öndədir,
Əyilməz, bükülməz qolun öndədir.
Dünyanın gözləri indi səndədir,
İllər sınağından çıxan Təbrizim!

Niçə yol sinəni sipər eylədin,
Dərdini qılıncla, oxla teylədin.
Haqqını haqsıza isbat eylədin,
Şimşək tək alışıb, çaxan Təbrizim!

Qorxmadın ölümdən, qorxmadın qandan,
Neçə oğulların keçibdir candan.
Güc alıb ele hey o Səttarxandan,
Sabaha ümidlə baxan Təbrizim!

Köçürür dərdini qələm sətrimə,
De, azmı dəyibdir zaman xətrimə...
Gecikmə, gecikmə, vaxtı itirmə,
Fürsəti bəxtinə çıxan Təbrizim!

Artıq yetişibdir, dəyişib zaman,
Çəkilər başının üstündən duman.
Qurtular biryolluq, qurtular, inan,
Zalımın əlindən yaxan, Təbrizim!

Kimlərin kimliyi bilinəcəkdir,
İstibdad, cəhalət silinəcəkdir!
O tay da, bu tay da isinəcəkdir,
Günəş tək odunu yaxan Təbrizim!

TƏBRİZ

Çıxmısan sən haqq yoluna,
Bu yoldan gəl, dönmə, Təbriz!
Qeyrətindən qor almısan,
Alovlan sən, sönmə,Təbriz!
Bu yoldan gəl, dönmə, Təbriz!


Bu gedişin ağır gediş,
Haqq sənindir, haqqa yetiş...
Qıcasa da düşmənin diş,
Bu yoldan gəl, dönmə, Təbriz!
Alovlan sən, sönmə, Təbriz!

Babəkimin odu səndə,
Səttarxanın adı səndə.
Şeyx Məhəmməd Xiyabani,
Pişəvəri durub öndə,
Bu yoldan gəl, dönmə, Təbriz!
Alovlan sən, sönmə, Təbriz!

Quzey, Güney bir candayıq,
Bir ürəkdə, bir qandayıq.
Unutma ki, yanındayıq,
Bu yoldan gəl dönmə, Təbriz!
Alovlan sən, sönmə, Təbriz!

ÇƏKİLİB YUXUM

Mən yata bilmirəm, çəkilib yuxum,
Təbrizdən bir xəbər ala bilmirəm.
Gah ümid çoxalır, gah da ki, qorxum,
Təbrizdən bir xəbər ala bilmirəm.

Mən çoxdan bələdəm o zülümkara,
Tökülən qanlardan həzz alandılar.
Görkəmi dindardır, xisləti şeytan,
Başdan ayağacan yapyalandılar.

Dilini, haqqını alıb əlindən,
Niyyəti bir xalqı çıxarmaq yoxa.
O hansı imandan, dindən danışır,
Faşist erməniyə durursa arxa...

Sözsüz, uzun çəkməz, getməz də belə,
İstibdad, cəhalət boğulacaqdır.
46-cı ildə batırılan Günəş,
Təzədən Təbrizdə doğulacaqdır.


Hələ ki, yatmırıam, çəkilib yuxum,
Təbrizdən bir xəbər ala bilmirəm.
Gah ümid çoxalır, gah da ki, qorxum,
Təbrizdən bir xəbər ala bilmirəm.


GƏLƏ BİLMİRƏM

Yollar bağlanıbdı, gələ bilmirəm
Sənin harayına, hayına Təbriz!
Gözümün yaşını axıdıram mən
Gilə-gilə Araz çayına ,Təbriz!


Gözlərim yol çəkir, qulağım səsdə,
Mən necə dözüm bu hala bilmirəm…
Ürəyim səninlə döyünürsə də,
Qolumu boynuna sala bilmirəm.

O sənin sinənə tuşlanan güllə,
Mənim ürəyimdən, qanımdan keçir.
Sənin küçələrə tökülən qanın
Sel olub, kükrəyib canımdan keçir.

Tarixlər şahidi, qəhrəman şəhər,
Yaşayıb, yaşayır, yaşıyacaqsan.
Haqqı boğulmuş hər bir millətə
Azadlıq haqqını daşıyacaqsan.

Azadlıq, ədalət , bu haqq yolunda,
Dayanma, durma sən, sonacan yeri.
Eşidən anında qurban kəsəcəm
Azadlıq soraqlı o şad xəbəri.

HAQQ NAZİLƏR, ÜZÜLMƏZ

Haqqım deyib, vulkan kimi
Püskürb qalxıb Güneyim.
Bayrağımı Savalana
Qaldırıb, taxıb Güneyim.

Qoyma enə o bayrağı,
Əllərinə qurban olum.
Azadlıq deyib bağıran
Dillərinə qurban olum.

Haqq nazilər, üzülməz,
Doğru deyibmiş babalar.
Dediyindən geri dönməz
Hay deyib qalxan obalar.




Bu günləri illər ilə
Gözləmişik axı biz...
Vaxtdır, verək gəl əl ələ,
Çiçəklənsin diləyimiz.

Çağırıram mən türkləri,
İtirməyək bu vədəni!
Güneyimə arxa duraq,
Buraxmayaq bir də ora
Pusqu qurub, yol güdəni...

Bəzz qalası od çatacaq,
Yerlər, göylər isinəcək.
Koroğlunun nərəsindən
Yer kürəsi diksinəcək.

Qeyrətindən qor götürən
Ümidimiz sönməyəcək.
Haqq yoluna çıxan Güney
Oz yolundan dönməyəcək.

Haray çəkib yüyürəcəm
Quzey boyu muştuluğa.
Savalanın salamını
Çatdıracam Murovdağa.

O qoşa ağsaç dağımız
Alqış desin novrağıma.
Qurtulub töhmətdən Araz,
Çevrilib vüsal çayına,
Su çiləsin ayrılıqdan
Qovurulmuş torpağıma...

Biləsuvar rayonu Mərkəzi

Kitabxanasında

Esmira Günəşlə görüş keçirilib

2026-cı il yanvarın 23-ü tarixində Biləsuvar rayon Mərkəzi Kitabxanasının "Şairlə görüş" layihəsinin qonağı Azərbaycan Yazıçılar Birliyinin üzvü, Prezident mükafatçısı Esmira Günəş olub. 32 kitabın müəllifi olan şair Esmira Günəşin kitablarından 28-i Şəhidlərin xatirəsinə həsr olunub. Tədbirdə şəhid ailələri, şairlər, məktəblilər
və kitabxana kollektivi iştirak edib. Tədbir Şəhidlərin xatirəsinə bir dəqiqəlik sükutla başlayaraq, qonaqların bir-birindən maraqlı çıxışları ilə davam edib. Şəhid Orxan Əkbərov adına Uşaq İncəsənət Məktəbinin şagirdi Humay Quluzadənin canlı ifaları tədbirə daha da rəng qatıb. Şair Esmira Günəş şəhid Azər Məmmədovun və Əkrəm Kəlbiyevin tədbirdə iştirak edən ailəsinə kitablarını hədiyyə edib. Tədbirin sonunda şəhid analarına və şairə kitabxana kollektivi tərəfindən gül buketləri təqdim olunub. Xatirə şəkilləri ilə yekunlaşan tədbirdən sonra Esmira Günəş şəhid Azər Məmmədovun ev muzeyini də ziyarət edib.

Eldar müəllim,

100 yaşa


Bu ilin yanvarında Qərbi Azərbaycanın sayılıb-seçilən ziyalılarından olan fizika üzrə fəlsəfə doktoru, dosent Eldar Qarayevin 70 yaşı tamam olub. Onun yubiley işığına dostları, doğmaları, iş yoldaşları, mənsub olduğu Qafan Rayon İcmasının fəalları yığışıblar. Reportajımıza keçməzdən əvvəl oxucularımızı Eldar müəllimlə tanış edək:

Eldar Səməd oğlu Qarayev, 1956-cı il yanvarın 18-də Zəngəzur mahalının Gərd kəndində dünyaya gəlib. İbtidai sinfi öz kəndlərində, orta məktəbi isə Bakı şəhər 1 saylı ingilis təmayüllü orta məktəbdə oxuyub. 1973-cü ildə Azərbaycan Dövlət Universitetinin (indiki BDU) fizika fakültəsinə qəbul olub. 1978-ci ildə universiteti bitirərək təyinatla AMEA Fizika İnstitutuna elmi işçi göndərilib və bir il Biomərkəzdə işlədikdən sonra Sovet Ordusu sıralarına çağrılıb və 1979-1981-ci illərdə zabit kimi həqiqi hərbi xidmət keçib. Tərxis olunanadan sonra 1982-cı ilin əvvəlindən doğma universitetə qayıdaraq Fizika fakültəsində – “Ümumi fizika” kafedrasında çalışıb, aspiranturanı oxuyub və elmi dərəcə qazanıb. Xeyli müddət fizika fakültəsində tədris işləri üzrə dekan müavini işləyib. 150-dən çox məqalə və tezisin, 8 dərs vəsaitinin müəllifidir. Ən əsası gözəl ailə başçısıdır, 3 övladı, nəvələri və sevimli tələbələri var.

Bu fikirlər yubiley törənində də səsləndirildi. Tədbirdə əvvəlcə Eldar müəllim hamıya xoş gəldiniz deyib, BDU Fizika fakültəsinin “Ümumi fizika və FTM” kafedrasının, Mexanika-riyaziyyat fakültəsinin əməkdaşlarının adlarını çəkərək qohumlarla tanış edib. Sonra professor Nadir Qəhrəmanov, kafedra müdiri Rəhim Rəhimov, universitetin müəllimlərindən professor Yusif Nurullayev, dosent Arif Orucov, dosent Cabbar Cabbarov və digərləri Eldar Qarayevin qohumlara, ailə üzvlərinə bəlli olmayan cəhətlərindən, onun iş prosesində, universitetdə, tələbələrə münasibətdə qazandığı nüfuz və hörmətdən söhbət açıblar. Qeyd ediblər ki, 40 ildən çoxdur ki, Eldar müəllim universitetdə elmi-pedaqoji fəaliyyətlə məşğuldur. Bu müddət ərzində kimsə deyə bilməz ki, Qarayev kiminsə xətrinə dəyib, ya birinin qəlbini qırıb. Bütün bunlar onun şəxsi xarakterinin, əhatəsində olan insanlara xoş münasibətinin nəticəsidir. Təbiətcə sakit, xasiyyətcə mülayim, ruhunu xeyirxahlıq üstə köhləyən belə insanları indiki dövrdə tapmaq çətindir. Hamımız fəxr edirik ki, onunla həmkar, iş yoldaşı və dostuq.
Beləcə universitet kollektivi Eldar müəllim, sizinlə qürur duyuruq, -deyərək gətirdikləri plaketləri, suvinerləri yubilyara təqdim ediblər.
Şair Seyfullah Abbasov Qafan Rayon İcmasının sədri professor Eldar Abbasovun yubilyara ünvanladığı təbrik məktubunu oxuyub:
Hörmətli Eldar müəllim!

Siz, hər birimiz ücün müqəddəs olan Zəngəzur elinin özünəməxsus vətənpərvərliyi, cəfakeşliyi, doğma torpağa bağlılığı ilə seçilən, sayılan ziyalılarından birisiniz. Ömrünüzü minlərlə tələbələrinizin maariflənməsinə həsr edərək onları uğurlara aparan yola mayak olmuş, mühazirələrinizdə elmlə yanaşı, həm də həyat dərsi aşılamısınız. Qafan Rayon İcmasının təşkilatlanmasında, formalaşmasında fərqli aktiv fəaliyyətiniz və təmənnasız xidmətləriniz danılmazdır, təqdirəlayiqdir. Qafan Rayon İcmasının rəhbərliyi sizi 70 illik yubileyiniz münasibətilə səmimi qəlbdən təbrik edir, möhkəm can sağlığı, ailə xoşbəxtliyi, yaradıcılıq uğurları, həmçinin qəlbimizdə nisgilə cevrilən vətən həsrətinə son qoyulmasını arzulayır...

Eldar Abbasov təbrik yazılmış plaketi yubilyara təqdim edərək öz ürək sözlərini söyləyib, onu bir daha səmimi qəlbdən təbrik edib. Qeyd edib ki, Eldar müəllim, 70 yaş ömrün keçid dövrüdür. Siz bu günə qədər şüurlu həyatınızı xalqımıza, millətimizin tərəqqisinə cəmiyyətimiz üçün ləyaqətli vətəndaşlar, ixtisaslı kadrlar yetişdirməyə həsr etmisiniz. Belə vaxtlarda insan özünə, şəxsi həyatına, sağlamlığına elə də fikir vermir. Ömrün bu yaşından sonra bir az da özünüz üçün yaşamağa vaxt ayırın. Mənim sizə ən ümdə arzum elə bütün icmamızın arzusudur. Arzu edirik ki, illərdi həsrətini çəkdiyimiz dogma yurdumuza, doğulduğunuz Gərd kəndinə qovuşmaq nəsibiniz olsun. Nəvələrinizin əlindən tutub babalarının yurdunda gəzdirəsiniz.

Fizika-riyaziyyat üzrə fəlsəfə doktoru Rauf Tağıyev üzünü alim həmkarına tutub dedi ki, Eldar müəllim, əgər 70 yaşın hesabatını versəniz alın açıqlığı ilə dönüb geridə qalan illərinizə baxa bilərsiniz. Çünki bu illər ərzində çox şeyə nail olmusunuz. Elmi fəaliyyyətiniz barədə iş yoldaşlarınız dolğun məlumat verdi. Bununla belə, siz gözəl ailə başçısı, qayğıkeş ata, şəfqətli-mərhəmətli baba, ən əsası mehriban qonşusunuz.
Bir vaxtlar Eldar müəllimlə qonşu olduğunu söyləyən Rauf müəllim o vaxtların şirin xatirələrini də bölüşüb.

Qardaşları Baloğlan, Faiq Qarayevlər və digər qohumları Eldar müəllimi təbrik edib, xoş arzularını bildiriblər.
Gərd Kənd İcmasının fəallarından Pənah Həmzəyev, ağsaqqlardan Bayram Mönsümov, Akif Quliyev, Rəsul Vəliyev, Xeyrullah Əliyev və digərləri kəndlərinin yetirməsi haqqında qürurla, ürəkdolusu danışıblar. Qeyd ediblər ki, Eldar müəllim uşaqlıq dövründən bu günə qədər – gəncliyi, müdriklik dövrünün hamısı gözlərimizin önündə keçib. O, zəhməkeş olduğu qədər də təvazökar, istiqanlı, mehriban, qohumcanlı oğuldur. Onun xarakteri Qərbi
Azərbaycanın qədim və füsunkar guşəsi olan Gərd kəndinin gözəllikləri içində formalaşıb. Ona görə də o ruhu, bütün varlığı ilə ata yurda, dogma ocağa bağlıdır. Biz fəxr edirik ki, o sadəcə o torpağın, doğulduğu kəndin övladı deyil. Respublikamızın hər guşəsindən toplaşan ziyalıların onun haqqında dedikləri sübut edir ki, Eldar Qarayev bu 70 ili havayı verməyib. Həyatını kainatın sirlərinə, laboratoriyalarda elmi axtarışlara həsr etsə də insanlığını hər şeyin fövqündə tutub. Hər zaman sadəliyini qoruyub, humanizm ideyalarına sadiq qalıb, tələbələrinə ata qayğısı göstərib, ətrafındakılar ondan həmişə müsbət enerji alıb. İndi 70 yaşın zirvəsindən keçən şərəfli ömür yoluna baxdıqca eloğlu kimi biz də qürur duyuruq.

Əziz Eldar müəllim, sizə möhkəm cansağlığı, tükənməz həyat eşqi arzulayırıq. Bir də arzu edirik ki, 80, 90 illik yubileylərinizi beləcə, əzizlərinizin və sevənlərinizin əhatəsində qeyd edəsiniz. Bir də icmamızın üzvləri arasında ünsiyyət yaradılması sahəsindəki fəaliyyətinizə görə sizə minətdarlığımızı bildiririk.

Xoş ovqat, yüksək əhval-ruhiyyə şəraitində keçən yubiley tədbirində iş yoldaşlarının, qohum-əqrəbalarının, ellilərin əhatəsində bütün qayğılardan uzaq düşən Eldar Qarayev sanki özünü 70 yox, 7 yaşında kimi hiss edib, başına toplaşan nəvələrlə də əylənməyə vaxt tapıb. Halal süfrəsinə yığışan qonaqların hamısına yüksək diqqət göstərib, hər birinin stolunda əyləşmədən keçməyib. Bu da yüksək həssasiyyətin, nəzakətin və ziyalılığın bir başqa əlamətidir.
Sonda Eldar Qarayev üzünü qonaqlara tutub hər birinə təşəkkür edib, minnətdarlığını bildirib:

Əziz dostlar, 70 illik yubileyim münasibətilə məni təbrik edən, xoş sözlərini, səmimi arzularını əsirgəməyən, eləcə də bu münasibətlə keçirilən tədbirimizdə iştirak edərək sevinclərini mənimlə bölüşən hər kəsə dərin minnətdarlığımı bildirirəm. Xüsusilə də uzaq-yaxın demədən tədbirə qatılanlara sonsuz təşəkkürümü bildirirəm. Sizin diqqətiniz, ehtiramınız və mənə göstərdiyiniz dəyər bu günü mənim üçün unudulmaz etdi. Allah hər birinizə möhkəm can sağlığı, uzun ömür, ailə səadəti və ruzi-bərəkət nəsib etsin. Birliyimiz, həmrəyliyimiz daim olsun!

Qafan Rayon İcmasının mətbuat xidməti

DOST Mərkəzindəki

dostlar

Neçə illərdir ki, adət etdiyimiz bürokratiya, süründürməçilik, bəzi hallarda məmur özbaşınalığı və kobudluğu ilə üzləşməmək üçün idarə və müəssisələrə ayaq basmamağa çalışırdım. Fəqət qocalıq məni qeydiyyatda olduğum Yasamal rayonundan 1 saylı Bakı DOST mərkəzinə sürüdü. Sənədlərimi də götürüb giriş qapısına yaxınlaşdım. Mühafizəçilər ədəb-ərkanla qeydiyyat masasına yönəltdilər. Yaxınlaşdım, gəlişimin səbəbini öyrənib oradan da pensiya masasına yönləndirdilər. Aparıcı mütəxəssis Brilyant Yusif qızı Hacıyeva problemimi diqqətlə dinləyib, bütün suallarıma mükəmməl cavab verdi. Pensiyamın yenidən hesablanması üçün lazım olan sənədlərin siyahısını da yazıb mənə verdi ki, unutmayım. Məmnuniyyətlə çıxıb getdim. Qeyd olunan sənədləri toplayıb bir müddətdən sonra ienə Mərkəzə gəldim.

“DOST könüllüləri”-Elmira Eyvazova, Şəfəq Abbasova, Sevinc Bayramova, adını bilmədiyim daha neçə-neçə könüllülər yaxınlaşıb növbə nömrəmi soruşur, yer göstərib əyləşdirməyə çalışaraq darıxmağa imkan vermirlər. Növbəm bu dəfə də Brilyant Hacıyevanın masasına düşdü. Bu səfər keçən dəfəkindən də çox mehribanlıq göstərdi. O qədər ləyaqətli, səmimi, xoş rəftar etdi ki, elə bildim öz doğmalarımdan biridir. Düzdü bu dəfə də nəsə çatışmırdı, yenidən bura qayıtmalı olacaqdım. Amma bu vaxta qədər heç bir idarədə, heç bir dövlət qurumunda insanlara qarşı belə humanist yanaşma, diqqət, nəzakətli davranış görmədiyimdən burda gördüklərim məni çox təsirləndirmişdi. Brilyanta burda görüb müşahidə etdiklərimdən, onun yüksək peşəkarlıqla, ləyaqətlə xidmətindən yazı yazmaq istəyimi bildirdim. Minnətdarlığını bildirərək, nəzakətlə imtina etdi, istəmədi. Mərkəzin rəhbərliyinə xidmətdən razılıq məktubu yazıb, vətəndaş məmnuniyyətinə görə, Brilyant Hacıyevaya təşəkkür elan etməsini xahiş etdim.

Sonralar müxtəlif məsələlərlə bağlı dönə-dönə bura gəlsəm də, təşəkkürlə bağlı müraciətimin nəticəsinin nə olduğunu bilmədim, amma onu bildim ki, 1 saylı DOST Mərkəzində hamı müraciət edən vətəndaşlara dost münasibəti göstərir. Elə ona görə də bu barədə yazmaq qərarımı qətiləşdirdim. Niyətimi "Dayanıqlı və Operativ Sosial Təminat Agentliyi"nin (DOST) İctimaiyyətlə əlaqələr və kommunikasiya departamentinin müdiri Şahin Əliyevə bildirdim. İnformasiya əldə etməyimizə heç bir problem olmadığını bildirdi. Beləliklə vətəndaşların xatirəsində yaxşı iz buraxan DOST-çu dostlarla daha yaxından tanış olduq:
Əliyeva Elza Fəqan qızı Salyan şəhərində anadan olub. Ali təhsilini sosial iş ixtisası üzrə yüksək göstəricilərlə bitirib. Əmək fəaliyyətinə müxtəlif təşkilatlarda eyni zamanda DOST Mərkəzlərində könüllülük fəaliyyəti ilə başlayıb. 3 ilə yaxındır ki, 1saylı Bakı DOST Mərkəzində çalışır. Fəaliyyəti dövründə vətəndaşlara sosial xidmətlərin göstərilməsi, həssas əhali qrupları ilə iş və vətəndaşlara xidmət sahəsində aktiv iştirak edir.

İmaməliyeva Aytəkin Aydın qızı Sumqayıtda anadan olub. 2019-cu ildə orta məktəbi bitirib Bakı Slavyan Universitetinin Beynəlxalq münasibətlər ixtisasına qəbul olunub. 2023-cü ildə bakalavr təhsilini tamamlayaraq Abşeron DOST Mərkəzində könüllü fəaliyyətə başlayıb. Könüllü fəaliyyəti başa çatdıqdan sonra- 2023-cü ilin noyabrında monitorinq şöbəsində iki ay müddətində təcrübəçi kimi fəaliyyət göstərib. 1 iyul 2024-cü ildən 1 saylı Bakı DOST Mərkəzinin Xidmətlər şöbəsində referent vəzifəsində çalışır.

Əslində burda çalışanların birini digərindən çox da fərqləndirmək olmur. Çünki hamısının ümdə vəzifəsi vətəndaş məmnuniyyətini təmin etməkdir.
1 saylı Bakı DOST Mərkəzinin Xidmətlər şöbəsinin müdiri Elsevər Cabbarov bildirdi ki, Mərkəz 9 may 2019-cu ildən bəri gün ərzində təxminən 400-450 nəfərə xidmət göstərməklə fəaliyyət göstərir. Vətəndaşlara “bir pəncərə” prinsipi ilə məşğulluq, pensiya, sosial müavinət və təqaüdlər, sosial xidmətlər, əlillik, tibbi-sosial ekspertiza və reabilitasiya, sosial sığorta, əmək münasibətləri, həmçinin sosial-hüquqi, sosial-məişət xidmətləri, sosial-pedaqoji xidmət olmaqla, ümumilikdə 162 adda xidmət göstərilir. Mərkəzdə “Könüllü DOST” proqramı üzrə 50 nəfərədək könüllü fəaliyyət göstərir.
Könüllülər “DOST” mərkəzlərində vətəndaşların qarşılanması və xidmət pəncərələrinə yönləndirilməsi, vətəndaş axınının, növbələrin idarə edilməsində iştirak, vətəndaşların məlumatlandırılması, elektron sistemlərdən istifadə üzrə köməklik, müxtəlif anket, forma və s. doldurulmasında köməklik, əlillərə xüsusi diqqət və qayğı göstərilməsi, rəy sorğularının keçirilməsi və bir çox başqa sahələrdə fəaliyyət gösətərirlər.
Şöbə müdiri xidmət barədə məlumat verdikdən sonra əsas qəhrəmanımız Brilyant Hacıyevanı dinlədik.

Bildirdi ki, Tərtər rayonunda doğulub. Bakı Dövlət Universitetinin Coğrafiya fakültəsini bitirib. BDU-da Təhsildə qiymətləndirmə və monitorinq üzrə magistratura təhsilini başa vurduqdan sonra könüllülük fəaliyyətinə başlayıb. Bir neçə təcrübə proqramına qoşulub. Bütün mərhələləri uğurla keçəndən sonra burda işə dəvət olunub. İki ilə yaxındır pensiyaçıların, sosial cəhətdən həssas təbəqələrin nazını çəkə-çəkə, onlara qayğı göstətə-göstərə özünə hörmət-izzət, sevgi, sayğı, çalışdığı quruma isə nüfuz, etimad, etibar qazandırır. Bu missiyasını davam etdirməkdən zövq alır. Deyir ki, bu iş mənim üçün çox maraqlı, mənalı bir işdir, həm də insanlara qanunauyğun istiqamət vermək, müşküllərini həll etmək mənim üçün həqiqi bir missya oldu. Bu sahədə fəaliyyət göstərməkdən çox şadam. Həm DOST Mərkəzinin prinsipi olaraq, həm də Prezidentimizin buyurduğu kimi, vətəndaşların sosial rifahı, məmnunluğu bizim öncəliyimiz, əsas prioritetimizdir.

Mərkəzdə görüşümüz əsnasında 18-20 yaş arası könüllülərin əhatəsində Ağayeva Lyudmila Ağa qızı diqqətimizi çəkdi. Sən demə 74 yaşlı Lyudmila xanım “Gümüşü könüllü”dür. Deyir ki, 46 il biologiya müəllimi işləmişəm. Pensiya kartımın vaxtı bitmişdi, müddəti uzatmaq üçün Kapital Banka getmişdim, bura yolladılar. Gəldim, qızların pərvanə kimi hərləndiklərini gördüm, xoşuma gəldi, maraqlandım ki, məni də bura götürərlərmi?!
Sağolsunlar götürdülər. İndi də “Gümüşü könüllü” olaraq gəlib gedirəm. Burda bu gözəl balalarla tərbiyəvi mövzuda söhbətlər edirik. Həyat təcrübəmlə bağlı onları maraqlandıran suallara cavab verirəm. Bir aydır fəaliyyətə başlamışam. Davam etmək fikrindəyəm.
Bəli həyat davam edir. Biz də işinə ləyaqətlə, peşəsinə sədaqətlə, vətənimizə, dövlətimizə şərəflə xidmət edən hər kəsə uğur arzulayırıq!
Tamxil ZİYƏDDİNOĞLU,
“Bütöv Azərbaycan” qəzetinin baş redaktoru,
Fotolar Vəfalı Qasımovundur.

Abşeronda 20 Yanvar

faciəsi

qurbanları yad edilib


Abşeron rayonunda 20 Yanvar faciəsi qurbanlarının 36-cı ildönümü dərin ehtiramla yad edilib. Rayon rəhbərliyi, şəhid ailələri, qazilər və rayon ictimaiyyəti Xırdalan şəhərində Şəhidlər abidəsini ziyarət edərək, şəhidlərimizin xatirələrini ehtiramla anıblar.

Heydər Əliyev Mərkəzində keçirilən anım tədbirində Ümummilli Liderin və şəhidlərin əziz xatirəsi sükutla yad olunub, Dövlət Himni oxunub.
Tədbirdə çıxış edən Abşeron Rayon İcra Hakimiyyəti başçısının müavini Gülnar Rəhimova, YAP Abşeron rayon təşkilatının sədri Abbas Əliyev, “20 Yanvar” Cəmiyyətinin Abşeron rayon şöbəsinin sədri Eyşan İsgəndərov, Abşeron RİH yanında İctimai Şuranın sədri, Vətən müharibəsi şəhidi Elçin Həsənlinin anası Xatirə İsmayılova, 20 Yanvar şəhidi Allahyar Cəfərovun oğlu Pərviz Cəfərov, 48 saylı Dairə Seçki Komissiyasının sədri Dilşad Abbasova, əməkdar müəllim Teyyibə Huseynova və “Xüsusi Təyinatlı Qüvvələrin şəhid ailələri və veteranları” İctimai Birliyinin Abşeron rayon sədri Süleyman Cəfərov çıxış edərək bildiriblər ki, Sovet rəhbərliyi Azərbaycan xalqının azadlıq mücadiləsini boğmaq üçün faciə törətmişdir. Bu dəhşətli cinayət də xalqımızı haq yolundan döndərə bilməmişdir. Qeyd edilib ki, 20 Yanvar faciəsinə ilk siyasi-hüquqi qiymət xalqımızın Ümummilli Lideri Heydər Əliyev tərəfindən verilmişdir. Faciənin ertəsi günü, yəni yanvarın 21-də Ulu Öndər Azərbaycanın Moskvadakı daimi nümayəndəliyinə gələrək xalqla birgə olduğunu bildirmiş, 20 Yanvar faciəsinə siyasi qiymət vermiş, onun hüquqa, demokratiyaya, humanizmə zidd olduğunu, mərkəzin və ozamankı respublika rəhbərlərinin xəyanəti üzündən baş vermiş siyasi səhv olduğunu bəyan etmişdir. Ulu Öndər sonrakı fəaliyyəti dönəmində də 20 Yanvar həqiqətlərinə hüquqi qiymət verilməsi istiqamətində mühüm addımlar atmışdır. Ümummilli Liderin təşəbbüsü ilə Naxçıvan Muxtar Respublikasının Ali Məclisi 20 Yanvar faciəsinə ilk siyasi qiymət verən 21 noyabr 1990-cı il tarixli qərar qəbul etmişdir. Daha sonra 1994-cü ilin mart ayının 29-da Ulu Öndərin təşəbbüsü ilə Milli Məclis tərəfindən “1990-cı il yanvarın 20-də Bakıda törədilmiş faciəli hadisələr haqqında” Qərar qəbul olunmuşdur.

Bildirilib ki, Azərbaycan Respublikasının Prezidenti İlham Əliyev də şəhidlərin xatirəsinin uca tutulmasına, şəhid ailələrinin sosial məsələlərinin həll olunmasına xüsusi diqqət ayırır. 20 Yanvar hadisələri ilə əlaqədar əlilliyi olan şəxslər və şəhid ailələri üçün dövlət başçısının təşəbbüsləri sayəsində effektiv sosial müdafiə sistemi formalaşıb.

Daha sonra çıxış edən şəhid ailələri ölkəmizdə şəhid ailələrinə və qazilərə göstərilən diqqət və qayğını yüksək qiymətləndirdiklərini vurğulayaraq, Azərbaycan Respublikasının Prezidenti İlham Əliyevə və Birinci vitse-prezident Mehriban Əliyevaya təşəkkürlərini bildiriblər.

Uğurlu tədbirin

uğurlu tarixi - FOTOLAR

Azərbaycan Dövlət Pedaqoji Universitetinin Beynəlxalq əlaqələr üzrə prorektoru, professor Mahirə Hüseynovanın təşəbbüsü ilə yaradılmış “Qərbi Azərbaycan Araşdırmalar Mərkəzi” və “Müvəkkil Hüquq Mərkəzi”nin birgə təşkilatçılığı ilə Beynəlxalq Avrasiya Fondunun ofisində Şurnuxu kəndinin işğaldan azad olunmasının 5 illiyinə həsr edilmiş “Şurnuxu Zəngəzurun giriş qapısı” adlı tədbir keçirilmişdir.


Azərbaycanın tarixi-coğrafi məkanları arasında mühüm strateji və mədəni mövqeyə malik olan Şurnuxu kəndi tarixən Zəngəzurun giriş qapısı kimi tanınmışdır. Bu ərazi yalnız coğrafi mövqeyi ilə deyil, həm də zəngin tarixi, mədəni irsi, etnoqrafik xüsusiyyətləri və milli yaddaşda tutduğu yerlə seçilir.
“Zəngəzurun giriş qapısı Şurnuxu” mövzusunda keçirilən elmi-mədəni tədbir məhz bu tarixi həqiqətlərin elmi əsaslarla təqdim olunması, ictimai şüurda möhkəmləndirilməsi və gələcək nəsillərə ötürülməsi baxımından xüsusi əhəmiyyət kəsb edir.

Tədbirdə ADPU Beynəlxalq əlaqələr üzrə prorektoru, Qərbi Azərbaycan İcmasının idarə heyətinin üzvü, professor Mahirə Hüseynova, Prezident kitabxanasının direktoru, professor Afət Abbasova, professor Sayalı Sadıqova, Elm və Təhsil Nazirliyinin Ümumi və Məktəbəqədər Təhsil Şöbəsinin baş məsləhətçisi Əhliyyət Adıgözəlov, Azərbaycan Rəssamlar İttifaqının, Beynəlxalq Rəssamlar Fondunun üzvü, xalçaçı rəssam, əməkdar mədəniyyət işçisi, Fazil Abasquluzadə, Beynəlxalq Avrasiya Mətbuat Fondunun rəhbəri Umud Mirzəyev, İnformasiya və Sosial Təşəbbüslərə Dəstək İctimai Birliyinin sədri Cəsarət Hüseynzadə, jurnalist Rəsul Mirhəşimli, “Bütöv Azərbaycan” qəzetinin baş redaktoru Tamxil Ziyəddinoğlu, Gorus Rayon İcmasının sədri Etibar Həsənov, hüquqşünas Səməd Vəkilov, “Qərbi Azərbaycan Araşdırmalar Mərkəzi”nin müdiri, fəlsəfə doktoru Leyla Calalova, “Qərbi Azərbaycan Araşdırmalar Mərkəzi”nin baş mütəxəssisi Möhübbət Məmmədov, Azərbaycan Dövlət İqtisad Universiteti Xarici Dillər Departamentinin baş müəllimi Natəvan Ağayeva, “Müvəkkil Hüquq Mərkəzi”nin Könüllülər Departamentinin gəncləri Cavid Vəkilov, Fatimə Süleymanlı, Cəfər Əliyev, Əkbər Əliyev iştirak etmişlər.

Professor Mahirə xanım Hüseynova və professor Afət xanım Abbasovanın elmi yanaşması tədbirin akademik səviyyəsini yüksəltmiş, mövzunun dərin və sistemli şəkildə təqdim olunmasına şərait yaratmışdır. Prof.Mahirə Hüseynova tədbirdə çıxışı zamanı bildirib ki, yalnız şəxsi maraqlara xidmət edən yolda ümumi mənafe ola bilməz: bütün müharibələrin sonu sülhlə bitir. Biz heç kimin torpağında iddialı deyilik. Biz sadəcə ora qayıtmaq istəyirik. Orada doğulmuşuq və ora da qayıdacağıq. Erməni qalmaq istəyərsə, bu, onun öz işidir. “Biz belə bir yolun tərəfdarı deyilik və bu mövqeyimizdə israrlıyıq. Dədə-baba torpaqlarımıza qayıtmaq bizim mənəvi borcumuz, göylərdə olan ruhlara qarşı sədaqətimizin ifadəsidir. Şurnuxu, Dərələyəz, Göyçə və İrəvan bölgələri ilə bağlı 2025-ci ildə cənab Prezident çıxışlarında bu məsələyə doqquz dəfə toxunub ki, bu da az məsələ deyil”.
Tədbir çərçivəsində Şurnuxunun Azərbaycan tarixindəki rolu, onun qədim yaşayış məskəni olması, toponimika, mədəniyyət və mənəvi irs baxımından daşıdığı dəyər elmi faktlar əsasında diqqətə çatdırılmışdır. Müzakirələr zamanı vurğulanmışdır ki, Şurnuxu təkcə bir kənd deyil, Zəngəzurun tarixi yaddaşını özündə yaşadan mühüm mədəni-coğrafi mərkəzdir. Bu cür tədbirlər elmi araşdırmaların cəmiyyətə inteqrasiyası, milli-mənəvi dəyərlərin təbliği və vətənpərvərlik ruhunun gücləndirilməsi baxımından mühüm rol oynayır.

Tədbirin yüksək səviyyədə təşkili və məzmun baxımından zənginliyi ilk növbədə təşkilatçıların elmi məsuliyyəti və peşəkarlığı ilə bağlıdır. Eyni zamanda, Müvəkkil Hüquq Mərkəzinin rəhbəri Səməd Vəkilovun tədbirə verdiyi dəstək və fəal iştirakı hüquqi və ictimai baxımdan məsələnin aktuallığını ön plana çıxarmışdır. Onun çıxış və mövqeyi milli irsin qorunması, tarixi həqiqətlərin müdafiəsi və ictimai məsuliyyət anlayışının gücləndirilməsi baxımından mühüm əhəmiyyət daşımışdır. Tədbirin uğurla keçməsində iştirakçıların elmi marağı, fəal müzakirələri və mövzuya göstərdikləri həssas münasibət də xüsusi qeyd olunmalıdır. Alimlərin, ziyalıların və ictimaiyyət nümayəndələrinin bir araya gələrək Şurnuxu kimi tarixi məkanın taleyini elmi müstəvidə müzakirə etməsi milli yaddaşın qorunması baxımından çox dəyərlidir.

Nəticə etibarilə, “Zəngəzurun giriş qapısı Şurnuxu” mövzusunda keçirilən bu elmi-mədəni tədbir Azərbaycan tarixinin mühüm səhifələrinin araşdırılması və təbliği istiqamətində əhəmiyyətli addım olmuşdur. Bu cür elmi təşəbbüslərin davamlı olması milli-mədəni irsimizin qorunması və gələcək nəsillərə elmi əsaslarla çatdırılması baxımından böyük əhəmiyyət daşıyır.

Əziz oxucular, Şəhidlər xiyabanı salınandan hər il dönə-dönə ziyarət edirəm. Bu gün də növbəti ziyarətimi etdim və düşündüm ki, 1990-cı ilin Qanlı yanvarında bir şəhidimiz haqqında yazdığım yazını sizlərlə paylaşım.

DİDƏRGİN ŞƏHİD


Deyirlər, didərginlər dünyanın ən binəsib adamlarıdır. Bir də deyirlər ki, dünyanın ən xoşbəxt adamları azadlığı, qeyrəti, namusu uğrunda qurban getmiş şəhidlərdir. Deməli, İbiş Məmmədov (İbrahimə uşaqlıqdan qonum-qonşu İbiş deyərdi) dünyanın ən binəsib xoşbəxtidir. Kimdir qoһum-qonşularından başqa һeç kimin tanımadığı, lakin һamının ziyarət etdiyi bu İbiş?
1988-ci ildə Qafan şəһərində mitinq keçirən erməni ekstremistləri: «Mamedov, gəl bizə qoşul, Qarabağı Azərbaycandan qoparaq» deyəndə, o, “Mən Azərbaycan oğluyam, Qarabağ da bizimdir», - demişdi.
Onu Şəһidlər Xiyabanına aparan yol da oradan, o cavabdan başlamışdı. İbiş öz dədə-baba yurdundan qovulmuşdu...
Şəһidlərimizin cənazələri Azadlıq meydanından qaldırılanda istədim bir bayatı çəkəm, deyəm ki, «Burda bir qərib ölüb...». Amma dilim gəlmədi. Axı xalqın matəm qurduğu oğulu necə “qərib” deyib ağlayasan?!
Onun da tabutu bütün Azərbaycanın çiynində götürüldü. İbiş müqəddəs sayıb pənaһ gətirdiyi torpağa tapşırıldı, o torpağa ki, onun qeyrətini çəkə-çəkə didərgin düşdü. Öləndə də qollarını açıb torpağı elə һəsrətlə quçaqlamışdı ki... Ana dö- şünə sığınan körpə kimi.
Babası İsa kişi deyirdi ki, son vaxtlar evə dostları ilə gəlib-gedirdi. Yanıma çağırıb, bala, birdən pis əməllərə qoşularsan ha..a... dedim.
-«Baba, biz pis əməllər üçün doğulmamışıq”, - dedi, “Pis yol tutsam çörəyin gözümü tutar”.
Axırıncı dəfə yanvarın 19-da saat 11-də evdən çıxdı… İxtiyar kişi ağrıya tab gətirə bilmir. Köһnə-təzə yaraları sızıldayır. Yaşlı gözlərini ovcunda gizlədib danışmağa güc toplayır:
- Faşist ordusunun vurduğu güllələrin yarasını yarım əsrdir ki, bədənimdə gəzdirirdim, ağrıtmırdı. Amma Bakıda sovet əsgərinin atdığı güllələrin ağrısını ömrüm uzunu unuda bilməyəcəyəm. O qanlı yanvar gecəsinin dəһşətini unutmaqmı olar? Atəş açıldığını eşidib Salyan kazarması tərəfə çıxdım. Elə bil göydən yerə od yağırdı. Nəvəmi yıxılmış görüb qışqırdım, səsimi güllələdilər. Dizlərim təpərdən düşdü, tərpənməyə taqətim olmadı. Bu vəziyyətimi görən bir Azərbaycan balası şaһin kimi şığıyıb məni kənara çəkdi. Elə bu vaxt һər tərəfi tüstü bürüdü. Daһa һeç nə görə bilmədim.
Azərbaycan torpağında tökülən naһaq qanı һava işıqlanınca yumaq, yolu-rizi itirmək, o müdһiş gecənin eyibini ört-basdır etmək üçün tüstü də buraxdılar, su da tökdulər. Lakin başa düşmədilər ki, günaһsız qan su ilə yuyulmaz. Şəһid
qanından məlһəm qoyulmuş vətən torpağı sulandıqca oradan vəһşiliyə nifrət göyərəcək.
Tale İbişə onsuz da һəmişə sərt üzünü göstərib. İki yaşından yetim qalıb. Ata qayğısı görməyib. 1981-ci ildə 20 yaşında evlənib. Doqquz il övlad payı gözləyib. İndi də...
Öz taleyindən pay uman təzə gəlinlər ağ örpəyi atıb qara bağlayıblar. Hələ könül verib, könül almayan məsum qızlar odsuz-ocaqsız yanıb yaxılırlar. Anaların aһ-naləsi ərşə dayanır. Kirpiklər çəpər çəkib göz yaşlarını saxlamaq istəyir, bacarmır. Hər damlası şəһid qanından rəng alıb bir qırmızı qərənfil olan göz yaşlarından gül təpəsi yaranır. Şəһid yaraları qərənfildən “qaysaq” bağlayır.

Tamxil ZİYƏDDİNOĞLU

Bakı Dövlət Universitetinin tələbəsi
Yanvar 1990-cı il