Təbrik edirik!

İnsan həyatı mübarizələrdən ibarət bir yoldur. İnsan rahat yaşamaq üçün uyğun bir yol seçməli və o yolla da maneələri sağlam şəkildə aşmaqla yürüməlidir. Uğurlu insanlar bu mübarizə yolunu ağılla, səbrlə, təmkinlə irəliləyir. Sonda məqsədinə çatmaqla yanaşı, böyük məqamlara doğru yüksələrək mükəmməl, faydalı bir insana çevrilir.
Bu cür mükəmməl insanlardan biri də AMEA nəzdində RSXM-in Kadrlar şöbəsinin müdiri Fəridə xanım Axundovadır. Fəridə xanım kollektivimizdə hörmətəlayiq bir xanımdır. O öz işini yüksək keyfiyyətlə və dəqiqliklə yerinə yetirməklə yanaşı, mehriban davranışı ilə də əməkdaşların dərin hörmət və rəğbətini qazanmışdır. Onun bilik və bacarığından gənc əməkdaşlar faydalanmaqla yanaşı, bəzən özündən yaşca böyüklər də hər hansı bir iş üçün ondan məsləhətlər alırlar. O da öz növəsində şöbəyə gələn hər kəsi çox diqqət və səbrlə dinlədikdən sonra, öz faydalı məsləhətləri ilə insanlarda xoş təəssürat yaradır. Bəzən adi bir söz belə insanın ruhuna toxunur, mənfi fikirlərdən ayırıb müsbət fikirlərin formalaşmasına səbəb olur. Fəridə xanım da məhz bu cür yanaşmayla insanın ruhuna toxunmağı bacarır, insanlara çıxış yolunun düzgün yol olduğunu israrla aşılamağa çalışanlardandır.
Fəridə xanım qayşıkeş ana, mədəni, səmimi, zəhmətkeş yoldaş, dövlətinə və xalqına faydalı olmağa çalışan bir xanımdır.
Fəridə xanımın bu il 55 yaşı tamam olur və bu münasibətlə onu kollektivimiz adından səmimi qəlbdən təbrik edir, ona möhkəm cansağlığı, xoşbəxtlik və işlərində müvəffəqiyyətlər arzu edirik.
Mən inanıram ki, zaman gələcək,
Qəmli gözlərimiz bir gün güləcək.
Haqq tərəzisinin ağır gözündə,
Hər zaman yaxşılıq qalib gələcək!
Yamən Orucova

Səməd VƏKİLOV yazır

ƏFSANƏVİ NEFTÇİ-

CÜMŞÜD İBRAHİMOV

Çağdaş Azərbaycan dövlətinin dayanıqlı inkişafını təmin olunmasında neft sənayesinin rolu müstəsnadır. Dünya neft sənayesində xüsusi çəkiyə malik olan Azərbaycan neftinin kəşf edilməsi Bakıya olan marağı yüksələn xətlə artırmağa başladı. Neftimiz bir müddət daha çox xarici yatırımçılar – Nobel qardaşları, Rotşidlər tərəfindən istismar olunsa da, sonradan milliləşdi. Bu isə artıq Azərbaycanın milli burjuaziya nəslinin formalaşmasına təkan oldu. Neft milyonçuları – milli burjuaziyamızın görkəmli nümayəndələri Hacı Zeynalabdin Tağıyev, İsa bəy Hacınski, Murtuza Muxtarov, Şəmsi Əsədullayev, Seyid Mirbabayevin xalqımız qarşısında mühüm xidmətləri olmuşdur.
Əlbəttə, zəngin tarixi olan neft sənayesinin inkişafında milli kadrlarımızın danılmaz xidmətləri vardır. Professor Ələkbər Süleymanov, Bəhman Hacıyev, Mirkazım Məmmədov, Ənvər Məmmədov, İsrafil Hüseynov, Qaraş Əmirov, Ağa Əliyev, Yusif Kərimov, Qurban Abbasov, Xanoğlan Bayramov, Natiq Əliyev, Xoşbəxt Yusifzadə və. b.-nın adını çəkə bilərik.
Ümummilli Lider Heydər Əliyevin 1969-cu ildə ali hakimiyyətə gəlməsi ilə Azərbaycanın neft və qaz sənayesi yeni keyfiyyət mərhələsinə qədəm qoymuşdur. O dönəmdə həm infrastrukturun yenidən təşkil olunması, həm də geoloji-kəşfiyyat, qazma və istismar işlərinin aparılması Azərbaycan neftçilərinə etibar edilmişdir. Belə etibarlı kadrlardan biri də Cümşüd İbrahimov idi.
Cümşüd İbrahimovun oğlu İbrahim İbrahimov Ümummilli lider Heydər Əliyevlə görüşdə

Dövlət xadimi Heydər Əliyevin müstəqlliyimizin ilk illərində ikinci dəfə ali hakimiyyətə qayıdışından sonra, o cümlədən həmin vaxtlar Azərbaycan Dövlət Neft Şirkətinin birinci vitse-prezidenti İlham Əliyevin müstəsna xid-mətləri sayəsində, 20 sentyabr 1994-cü ildə Dövlət Neft Şirkəti ilə beynəlxalq şirkətlər arasında “Əsrin müqaviləsi” – Hasilatın Pay Bölgüsü Sazişi imzalanması ölkə¬mizin çağdaş inkişafının dayanıqlılığının güclü təməli oldu.
Bəli, neft sənayesinin yüksək inkişaf mərhələsinə gəlməsində neft sahə¬sində çalışan milli kadrlarımızın xüsusi xidmətləri olmuşdur. – Yuxarıda da vurğuladığımız kimi, belə parlaq şəxsiyyətlərdən biri də, haqqında söhbət açdığımız əfsanəvi neftçi Cümşüd İbrahimovdur. O, Qarabağın qədim yaşayış məskəni olan Bərdə də dünyaya gəlmişdir.
Bərdə daha çox orta yüzillər islam filosofları və alimləri ilə ünlü olub. Bu yurdun yetişdirməsi olan orta yüzillər filosofları Məhəmməd Xalid oğlu Bərdəi, Əbubəkr Məkki Əhməd oğlu Bərdəi, Əbülhəsən Əhməd Ömər oğlu Bərdəi, Əbusəid Əhməd Hüseyn oğlu Bərdəi, Səid Qasım oğlu Bərdəi və Əbubəkr Məhəmməd Abdulla oğlu Bərdəi islam dinin müxtəlif axınlarını təmsil edən görkəmli filosoflardır.
Göründüyü kimi, zəngin elm ənənələri olan Bərdə torpağı, təkcə alimlər filosoflar deyil həm də Cümşüd İbrahimov kimi irimiqyaslı bir neft mühəndisi yetişdirmişdir.
Cümşüd İbrahimovun mənsub olduğu nəsl, Bərdənin Qılınclı kəndindən olan köklü Qarabağ ailələrindəndir.

CÜMŞÜD QULU OĞLU İBRAHİMOV
Onun mənsub olduğu İbrahimovlar nəsli Qarabağ əyalətinin 1832-ci ilə aid kameral təsvirindən (Nazir Əhmədli tərəfindən nəşr edilmişdir) Qılınclı oba-sında yaşayan İbrahimovlar ailəsinin 6-cı ulu babasını müəyyənləşdirmək müm¬kün oldu. Qaynağa əsasən bu oba general-mayor Mehdiqulu Xan (ünlü şair Xur¬şid¬banu Natavanın atası) tərəfindən general-leytenant, knyaz Madatova bağış¬lan¬mış, sonradan idarəçilikdə qeyri-müəyyənlik yarandığı üçün hökumət kon¬torunun idarəsi altına verilmişdir. Qarabağ əyalətinin kameral təsvirindən əldə edilən bil¬giyə əsasən İbrahimovlar ailəsinin bizə bəlli olan ulu babası 1797-ci il do¬ğum-lu Yüzbaşı İbrahim Həşim oğludur. Onun oğlanları Həşim, Hseyn, Həsən, Hüseynəli və Cümşüddür. Sonradan ailədə ulu babaların adları nəvə-nəticələrə qoyularaq yaşadılmışdır.

Cümşüd İbrahimov 25 may 1929-cu ildə Bərdə rayоnunun Qılınclı kəndində anadan оlmuşdur. 1953-cü ildə Azərbaycan Sənayе İnstitutunu (indiki ADNSU-yu) bitirdikdən sоnra rеspublikanın müxtəlif müəssisələrində mühəndis və rəhbər vəzifələrdə çalışmışdır.
1953-cü ildə o, “Gürgannеft” trеstinin qazma kоntоruna göndərilmiş, ünlü nеftçi Qurban Abbasovla yanaşı çalışmışdır. C.İbrahimоv qazma kоntоrunun sahə rəisi, baş mühəndis, “Azərgеоkəşfiyyat” trеstinin qazma kоntоrunun dirеktоru vəzifələrində işləmişdir. 1963-cü ildə C.İbrahimоv Pirqulu оvalığında “Kirоvdağ”, “Mişоvdağ”, “Kürsəngi”, “Qarabağlı” və digər nеftli sahələrdə intеnsiv qazma işləri apararaq yеnidən yaradılmış “Şirvanqazmanеft” trеstinin baş mühəndisi, 1968-ci ildə “Azərnеftkəşfiyyat” trеstinin dirеktоru, 1970-1982-ci illərdə “Azərnеft” Birliyi baş dirеktоrunun müavini, 1982-ci ildən isə “Xəzər-dəniznеft” İstеhsalat Birliyi baş dirеktоrunun müavini vəzifəsini daşımışdır.
C.İbrahimоv оna tapşırılan işləri layiqincə yеrinə yеtirmiş, göstərilən еtimadı dоğrultmuş, işçilərə və özünə tələbkarlıqla yanaşmışdır. C.İbrahimоv qu¬ruda və dənizdə nеft-qazın kəşfinə, işlənməsinə böyük zəhmət sərf еtmişdir. Оnun bilavasitə rəhbərliyi ilə quruda “Kürsəngi”, “Qarabağlı”, dənizdə isə “Azəri”, “Çıraq” və “Kəpəz” kimi yataqlar kəşf еdilmişdir. C.İbrahimоv xidmətlərinə görə iki dəfə (keçmiş SSRİ-nin) “Şərəf nişanı” оrdеni ilə təltif оlunmuşdur. О, “Əməkdar mühəndis” fəxri adına layiq görülmüşdür.
Əfsanəvi neftçi Cümşüd İbrahimov 30 iyul 1988-ci ildə Bakı şəhərində dünyasını dəyişmişdir.
Uzaq səfərlər kapitanı, Magellan, Marian cökəkliyi, Bermud üçbucağı daxil olmaqla Yer kürəsini üç dəfə dövrə vuran, 24 yaşında Cümşüd İbrahimov adına geoloji-kəşfiyyat gəmisinə kapitanlıq etmiş, Xəzər Dəniz Donamasının fəxri işçisi, Dövlət Dəniz Liman Agentliyinin Gəmi Hərəkətinin İdarəedilməsi Mərkəzinin direktoru Məzahir Niftiyev həmin günləri belə xatırlayır:

“Mən hələ gənc yaşlarımdan Cümşüd İbrahimov kimi əfsanəvi bir neftçinin adını daşıyan geoloji-kəşfiyyat gəmisinin kapitanı olmaqla qürur duymuşam. Yaxşı xatırlayıram o məhşur gəmini. Gəmi dinamik pozisiy ilə dərin sularda lövbərsiz dayanırdı. Gəminin üzərində buruq var idi. O indiki Şahdəniz, Azəri-Günəşli-Çıraq yatağında ilk geoloji kəşfiyyat aparan gəmi idi. Gəmidə işləyən geoloqlar deyirdi, bu yataqlarıda böyük neft-qaz ehtiyatının olmasını Cümşüd İbrahimov kəşf edib. O zaman mənim 24 yaşım vardı. Gəminin Finlandiya körfəzindən Xəzər dənizinə gətirilməsində iştirak etmişəm. Gəmini dənizlər arasındakı çaylar, kanallar ilə Bakıya üzüb gətirəndə, sahil boyunca bu nəhəng gəminin gözəlliyinə tamaşa edənləri görmək xoş idi. Gəmi o zamanın ən yeni naviqasiya avadanlıqları ilə təhciz edilmişdi. Gəmi Xəzər dənizində işə başlayanda o vaxt SSRİ Qaz Sənayesi nazirinin müavini olan N.M.Nemçinov Bakıya gəlmişdi. Həmin vaxt gəminin adı “Bakerit” idi. Nemçinovla mən – gəmini gətirəndə Vıborq şəhərində tanış olmuşduq. Onun mənə dediyi sözləri yaxşı xatırlayıram: “Çümşüd müəllim xoşbəxtdir ki, öz kəşf etdiyi yataqlarda öz adını daşayan gəmi geoloji-kəşfiyyat işi aparacaq.”
Mənim üçün bu gəmi hələ də öz önəmini daşıyır. Çünki ilk dəfə mən ən cavan kapitan kimi bu gəmidə kapitanlığa başlamışam. Və gəmi həmişə mənim yuxularıma girir. Dünyanın bir çox şirkətində çalışmışam amma Çümşüd İbrahimov gəmisi mənim üçün hamsından daha əziz olub.Allah o parlaq şəxsiyyətə rəhmət eləsin.”

BÖYÜK İRSİN DAVAMÇILARI
Xoşbəxt o adamdır ki, özünə uğurlu varis qoyub gedir. Bu ənənə İbra¬hi¬movlar ailəsində də davam etmişdir. Belə ki əfsanəvi neftçi Cümşüd İbra¬himovun ailəsində onu işini davam etdirən oğlanları İbrahim İbrahimov və Elçin İbrahimov kimi ləyaqətli varisləri yetişdi. İbrahim İbrahimov sonradan başqa sahəyə keçsə də Elçin İbrahimov neft sənayesində Azərbaycan iqtisadiyyatına xidmət göstərdi. Gəlin böyük irsin davamçılarından olan Elçin İbrahimovu da tanıyaq.
ELÇİN CÜMŞÜD OĞLU İBRAHİMOV – 25 oktyabr 1960-cı ildə Bakı şəhərində anadan olmuşdur. Elçin İbrahimov 1981-1986-cı illərdə Azərbaycan Politexnik İnstitutunun (indiki AzTU-nun) “Avtomobillər və avtomobil təsər¬rü-fatı” fakültəsində təhsil almışdır. Sonra gənc mütəxəssis kimi təyinatla Xəzər¬də-nizneftqaz İstehsalat Birliyinin 1 saylı Texnoloji nəqliyyat idarəsində böyük dis-petçer, qaraj rəisi, baş mühəndis vəzifələrində çalışmışdır. İşdə gös¬tərdiyi xid-mətlərə görə 1993-cü ildə Azərbaycan Respublikası Dövlət Neft Şir¬kətinin Avto-nəqliyyat və Xüsusi Texnika Baş İdarəsinin rəisi vəzifəsi ona həvalə edilmişdir. ARDNŞ-də struktur dəyişiklikləri edildikdən sonra adıçəkilən Baş İdarə Av-tomobil, dəniz nəqliyyatı və xüsusi texnika şöbəsinə çevrilmiş və E.İbrahimov 1994-cü ildən həmin şöbəyə rəhbərlik etmişdir. E.İbrahimov ARDNŞ-in balan-sında olan 7 mindən çox müxtəlif təyinatlı avtonəqliyyata, dəniz nəqliyyatı və xüsusi texnika vasitələrinin struktur bölməsində nəqliyyat xidmə¬tinin təşkilinə, təmir işlərinin aparılmasına və yol hərəkəti təhlükəsizliyinin təmin edilməsinə rəhbərlik edib. Onun rəhbərliyi nəticəsində son illərdə nəqliyyat və sənayenin digər sahələrində texnikanın istismarında səmərəlilik artırılmış, yanacaq – sürtkü materiallarından istifadə edilməsinə nəzarət gücləndirilmiş və bunun nəticəsində ARDNŞ üzrə yanacağın sərfi azaldılmışdır. E.İbrahimov ARDNŞ-də yol hərəkəti təhlükəsizliyinin təmin edilməsi üzrə komissiyanın sədri kimi vacib sahəyə də rəhbərlik etmişdir. Onun tələbkarlığı nəticəsində son illərdə ARDNŞ üzrə yol nəq¬liyyat hadisələrinin sayı xeyli azalmışdır. E.İbrahimov Azərbaycan Respub-likası Prezidentinin 3049 saylı 18.09.2008-ci il tarixli Sərəncamı ilə “Tərəqqi” medalı ilə təltif edilmişdir.
(Məqalənin hazırlanmasında Mədəniyyət Nazirliyinin çap etdirdiyi “Bərdə və bərdəlilər” bibliоqrafik məlumat kitabından, Məmməd və Canalı Mirzəyevlərin “Qara qızıl ağ səadət rəngində” adlı kitabdan istifadə edilmişdir).

Azərbaycan və Türkmənistan

münasibətlərində yeni mərhələ

Azərbaycan Prezidenti İlham Əliyev iyunun 22-də Azərbaycanda səfərdə olan Türkmənistan Prezidenti Sərdar Berdiməhəmmədovla görüşdən sonra mətbuata bəyanatla çıxış edib.
Dövlət başçısı Azərbaycan-Türkmənistan münasibətlərinin tarixi, mədəni və mənəvi bağlar üzərində qurulduğunu vurğulayaraq, iki qardaş ölkə arasında əməkdaşlığın bütün istiqamətlər üzrə uğurla inkişaf etdiyini bildirib. Qarabağın bərpasına göstərilən dəstəyə görə Türkmənistana və Türkmən xalqının Milli Lideri Qurbanqulu Berdiməhəmmədova təşəkkür edib. Qeyd olunub ki, Qurbanqulu Berdiməhəmmədovun ötən ilin iyulunda Azərbaycana səfəri zamanı Füzuli şəhərində məscidin tikintisi təşəbbüsü irəli sürülüb və hazırda layihənin icrasına başlanılıb.
Prezident İlham Əliyev iki ölkə arasında siyasi, iqtisadi, nəqliyyat-logistika, enerji və humanitar sahələrdə əməkdaşlığın genişləndirilməsi istiqamətində ətraflı fikir mübadiləsinin aparıldığını, müvafiq qurumlara konkret tapşırıqlar verildiyini diqqətə çatdırıb. Onun sözlərinə görə, gələn ay Türkmənistanda keçiriləcək Hökumətlərarası Komissiyanın iclasında bu tapşırıqların icrası müzakirə olunacaq və yeni birgə layihələrin reallaşdırılması üçün növbəti addımlar müəyyənləşdiriləcək.
Dövlət başçısı humanitar əlaqələrin ölkələr arasında münasibətlərin mühüm tərkib hissəsi olduğunu vurğulayaraq, son illərdə qarşılıqlı Mədəniyyət Günlərinin uğurla keçirildiyini qeyd edib. Bildirilib ki, bu ilin əvvəlində Aşqabad və Arkadağ şəhərlərində Azərbaycan Mədəniyyəti Günləri təşkil olunub, ötən il isə Türkmənistanın mədəniyyət nümayəndələri Bakıda və Gəncədə keçirilən tədbirlərdə iştirak ediblər. Prezident həmçinin Bakı və Aşqabadın, eləcə də Füzuli və Arkadağ şəhərlərinin qardaşlaşmış şəhərlər olduğunu xatırladaraq, bunun iki xalqın birliyinin və yaxınlığının növbəti təzahürü olduğunu bildirib.
İlham Əliyev Türkmənistanın Azərbaycanın Mərkəzi Asiya Dövlət Başçılarının Məşvərət Şurasına tamhüquqlu üzv kimi qəbul edilməsinə göstərdiyi dəstəyə görə təşəkkürünü ifadə edib. Prezident bu addımı tarixi hadisə kimi dəyərləndirərək, Azərbaycanın coğrafi baxımdan Mərkəzi Asiyada yerləşməsə də, region ölkələri ilə ortaq tarixi, mədəni və iqtisadi bağlara malik olduğunu vurğulayıb. Dövlət başçısının sözlərinə görə, nəqliyyat-logistika layihələri və regional əməkdaşlıq böyük Mərkəzi Asiya məkanının vahid geosiyasi və geoiqtisadi bölgə kimi formalaşmasına xidmət edir.
Prezident nəqliyyat və logistika sahəsində əməkdaşlığın strateji əhəmiyyət daşıdığını bildirərək qeyd edib ki, Azərbaycan və Türkmənistanın birgə səyləri nəticəsində regionda etibarlı və təhlükəsiz nəqliyyat marşrutları formalaşıb. Onun sözlərinə görə, siyasi qarşılıqlı fəaliyyət olmasaydı, bu layihələrin həyata keçirilməsi mümkün olmazdı. Tərəflər yükdaşımaların həcminin artırılması və üçüncü ölkələrdən tranzit yüklərin cəlb olunması məqsədilə bu sahədə koordinasiyanın daha da gücləndirilməsi barədə razılığa gəliblər.
Dövlət başçısı enerji sahəsində əməkdaşlıq perspektivlərinə də toxunaraq bildirib ki, Azərbaycan və Türkmənistan zəngin enerji ehtiyatlarına malik ölkələr kimi bu istiqamətdə səylərini birləşdirmək niyyətindədirlər. Prezident, həmçinin Türkmənistanın sosial-iqtisadi inkişaf sahəsində əldə etdiyi nailiyyətləri yüksək qiymətləndirərək, ölkədə həyata keçirilən infrastruktur və turizm layihələrinin rəhbərliyin uzaqgörən siyasətinin nəticəsi olduğunu qeyd edib.
İlham Əliyev çıxışının sonunda Azərbaycanın Türkmənistanın beynəlxalq arenadakı uğurlarına sevindiyini və ölkənin neytrallıq siyasətini daim dəstəklədiyini vurğulayıb.
Səfər çərçivəsində Azərbaycan və Türkmənistan arasında müxtəlif sahələri əhatə edən bir sıra sənədlər imzalanaraq mübadilə olunub. Tərəflər siyasi dialoqun, iqtisadi-ticarət əlaqələrinin, nəqliyyat-logistika əməkdaşlığının və humanitar münasibətlərin daha da inkişaf etdirilməsi istiqamətində qarşılıqlı iradə nümayiş etdiriblər.

Faiq Xosrovlu
Mehdiabad qəsəbə 5 nömrəli tam orta məktəbin direktoru

“Vətənimdir Azərbaycan!”

layihəsinə yekun vurulub

20 iyun 2026-cı il tarixində Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi ilə Mirvarid Dilbazi Poeziya Məclisi İctimai Birliyi tərəfindən həyata keçirilən “Vətənimdir Azərbaycan!” layihəsinin yekun tədbiri Bakı şəhərində Gəncliyə Yardım Fondunda təşkil olunub.

Tədbir iştirakçıları əvvəlcə Azərbaycan milli geyimlərinin və qədim kəlağayı nümunələrinin nümayiş olunduğu sərgi ilə tanış olublar. Sərgidə xalqımızın zəngin milli-mədəni irsini əks etdirən eksponatlar nümayiş etdirilib, onların tarixi, hazırlanma xüsusiyyətləri və estetik dəyərləri barədə ətraflı məlumat verilib. Eyni zamanda, layihə çərçivəsində hazırlanmış rəqəmsal kataloq təqdim olunaraq qonaqlara milli geyimlərimiz və kəlağayı sənəti haqqında geniş məlumat çatdırılıb.

Tədbiri giriş sözü ilə açan Mirvarid Dilbazi Poeziya Məclisi İctimai Birliyinin sədri, layihə rəhbəri Güllü Eldar Tomarlı çıxışında milli irsin yaşadılması və gələcək nəsillərə ötürülməsi istiqamətində həyata keçirilən layihələrin əhəmiyyətindən bəhs edib. O bildirib ki, milli geyimlər və kəlağayı xalqımızın tarixini, mədəniyyətini və mənəvi dəyərlərini yaşadan mühüm irs nümunələrindəndir. Layihənin əsas məqsədinin milli dəyərlərimizin təbliği, xüsusilə gənc nəslin bu irsə marağının artırılması olduğunu vurğulayan layihə rəhbəri, göstərdiyi dəstəyə görə Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinə təşəkkürünü bildirib.

Sonra şəhid Müşfiq Orucovun anası Aygün Məmmədliyə söz verilib. Şəhid anası qeyd edib ki, milli dəyərlərimizin təbliği vacibdir. Kəlağayımız xanımlara çox yaraşır. O bildirib ki, xalqımızın milli-mənəvi irsinin yaşadılması, gənc nəslə düzgün şəkildə çatdırılması hər bir vətəndaşın mənəvi borcudur. Aygün Məmmədli vurğulayıb ki, milli geyimlərimiz və kəlağayımız Azərbaycan qadınının zərifliyini, mənəvi zənginliyini və milli kimliyini özündə əks etdirir. Şəhidlərimizin canı bahasına qoruduqları Vətənin dəyərlərinin yaşadılmasının onların xatirəsinə ən böyük ehtiram nümunələrindən biri olduğunu qeyd edən şəhid anası, bu istiqamətdə həyata keçirilən layihələrin böyük əhəmiyyət daşıdığını bildirib və belə tədbirlərin davamlı olmasını arzulayıb.

Daha sonra Mirvarid Dilbazi Poeziya Məclisi İctimai Birliyinin idarə heyətinin üzvləri Səringül Sadə, Lalə İsmayıl, Səyalı Dadaşova, Qulu İsmayılov, Vətəndaş İştirakçilıgının Təşviqinə Dəstək İB- nin sədri Taleh Əliyev, Ailələrə Sosial Dəstək
İB- nin sədri Esmira Rəhimova, Nadir Xəstəliklər Təşkilatları İttifaqının sədri Səadət Bayramova, AMEA- nın dosenti Səkinə Hacıyeva, şair, qazi Nadir Həsənoglu və Vüsal Sehranoğlu çıxış edərək layihənin əhəmiyyətindən, milli geyimlərin və kəlağayının Azərbaycan xalqının milli kimliyinin formalaşmasında oynadığı roldan danışıb, bu cür layihələrin davamlı şəkildə həyata keçirilməsinin vacibliyini qeyd ediblər.

Çıxışlarda vurğulanıb ki, milli-mənəvi dəyərlərin qorunması və təbliği cəmiyyətin inkişafı baxımından mühüm əhəmiyyət daşıyır. Qeyd olunub ki, milli geyimlər və kəlağayı yalnız maddi mədəniyyət nümunələri deyil, həm də xalqımızın tarixini, adət-ənənələrini və estetik dünyagörüşünü özündə əks etdirən dəyərli irs nümunələridir.
Tədbirin bədii hissəsində aşıq İsmayıl İncəli, aşıq Xədicə Göycəli və aşıq Samir Borçalı maraqlı musiqi nömrələri ilə çıxış ediblər. Zəhra Əzimova isə tədbirdə milli-mənəvi dəyərlərə və vətənpərvərlik mövzusuna həsr olunmuş şeirlər səsləndirib. Səsləndirilən aşıq havaları, xalq musiqisi nümunələri və şeirlər iştirakçılar tərəfindən böyük maraq və alqışlarla qarşılanıb.

Layihənin məqsədi Azərbaycan milli geyimlərinin, xüsusilə milli baş örtüyümüz olan kəlağayının təbliği, onun tarixi və hazırlanma texnologiyası barədə ictimaiyyətin məlumatlandırılması, həmçinin gənc nəsildə milli-mənəvi dəyərlərə marağın artırılmasıdır.

Bununla da “Vətənimdir Azərbaycan!” layihəsi çərçivəsində nəzərdə tutulan tədbirlər uğurla yekunlaşıb.

Tamaşaçı sevgisi də

mükafatdır

İyunun 18-də Azərbaycan Dövlət Musiqili Dram Teatrının artistləri, Dağıstan Mədəniyyət Nazirliyinin qərarı ilə hazırlanmış "Səhnə ustaları" layihəsi çərçivəsində Qayakənd rayonunun Başlığında kəndində, gözəl bir konsert proqramı ilə çıxış ediblər. Tamaşaçılar iştirakçıları çox isti və səmimi qarşılayıblar. Sənət adamı üçün də, xüsusən Səhnə adamları üçün, ən dəyərli hədiyyələr tamaşaçı sevgisidir. Konsertdə, Dağıstan Respublikasının Əməkdar artistləri Məhərrəm Ömərov, Əfsanə Məlikova, Sevda Bəybalayeva, Tamilə Mihrabova, gənc aktrisa Tamilə Bəybalayeva və hörmətli Zeynəb xanım Dərbəndli iştirak edib.
Səhnə ustalarına yeni yaradıcılıq uğurları arzulayırıq.

Allah rəhmət eləsin!

Ömür vəfa etmədiyi kimi, günlər də gözləmir. Artıq Hacı Qasımın dostlarını, doğmalarını tərk edib, balalarını boynubükük qoyduğu vaxtdan 40 gün keçir.
Aslanov Qasım Satılmış oğlu 1979-cu ildə, sentyabrın 1-də Zəngəzur mahalının Pürülü kəndində doğulmuşdu. 1988-ci ildə, 9 yaşındakən, erməni faşistlərinin silahlı basqını nəticəsində dogma yurdunu tərk etmək məcburiyyətində qalmışdı. Valideynlərilə birlikdə Zəngilan rayonuna pənah gətirən Qasımın taleyi orda da gətirmədi. 29 oktyabr 1993-cü ildə Zəngilan işğal olunanda 15 yaşlı Qasım ikinci dəfə qaçqınlıq həyatı yaşamağa məhkum oldu. Valideynləri Abşeron rayonunun Mehdiabad qəsəbəsində məskunlaşdı. Ailəlikcə el-obanın hörmətini qazandılar. Gənc yaşlarından Həcc ziyarətinə gedən Qasım Aslanov, elə gənclik illərindən yas mərasimlərində ağsaqqllıq elədi, ağır yığnaqlı məclisləri yüksək əxlaqla, ədəb-ərkanla idarə elədi. Artıq 5 həftəni keçib ki, Hacı Qasım axirət evindədir, amma onun əziz xatirəsi tanıyanlarının ürəyində, sevənlərinin qəlbindədir.
Mərhumun şair həmyerlisi İsrayıl Lətifoğlu onun cismən yoxluğunu iki bənd şeirlə belə ifadə edib:
Sənin yoxluğunu mən necə deyim?!

Sənin yoxluğunu mən necə deyim?!
Gəlib məzarına ellər Hacının.
Dünən yolum düşdü qəbiristanlığa,
Ağlayır üstündə güllər Hacının.

Yox oldu bir anda xoş arzu, dilək,
O qoca dağlardan gəlmədi kömək.
Gəlin baş daşına nəzər yetirək,
Yazılıb ayları, ili Hacının…
P.S. Tamxil Ziyəddinoğlu Aslanovlara Qasım Aslanovun cavan yaşında dünyadan köçməsinə kədərləndiyini bildirir və dərin hüznlə başsağlığı verir.

Xankəndi Mədəniyyət

Mərkəzində ilk konsert


Xankəndi Mədəniyyət Mərkəzində əsaslı təmirdən sonra ilk dəfə tədbir keçirilib. İyunun 14-də Xankəndi Mədəniyyət Mərkəzində
Milli Qurtuluş Gününə həsr olunmuş konsert proqramı təşkil olunub.Xankəndi şəhərində, Ağdərə və Xocalı rayonlarında Bərpa, Tikinti və İdarəetmə Xidmətinin ictimaiyyətlə əlaqələr şöbəsindən verilən məlumata görə, Mədəniyyət Nazirliyinin təşkilatçılığı ilə baş tutan konsert proqramında Müslüm Maqomayev adına Azərbaycan Dövlət Akademik Filarmoniyasının Bakı Dövlət Kamera Orkestri həm yerli, həm də dünya bəstəkarlarının əsərlərini ifa edib. Xatırladaq ki, Prezident İlham Əliyev mayın 28-də Xankəndi şəhərində əsaslı şəkildə yenidən qurulmuş Mədəniyyət Mərkəzinin açılışında iştirak edib. Mərkəz əhalisi artan, o cümlədən tələbələrlə dolu Xankəndinin mədəni mühitinin canlandırılmasında mühüm rol oynayacaq, kütləvi tədbirlərin keçirilməsində əsas məkanlardan biri olacaq.

Qurtuluşdan Zəfərə

uzanan yolun

başlanğıcı

15 İyun – Milli Qurtuluş Günü Azərbaycan xalqının taleyində mühüm dönüş nöqtəsi kimi tarixə düşüb. 1993-cü ildə ölkədə hökm sürən dərin siyasi, iqtisadi və hərbi böhran şəraitində xalqın təkidli tələbi ilə Ulu Öndər Heydər Əliyevin yenidən hakimiyyətə qayıdışı Azərbaycan dövlətçiliyinin xilası və müstəqilliyin qorunması baxımından həlledici rol oynayıb.

1987-ci ildə Sovet İttifaqı Kommunist Partiyası Mərkəzi Komitəsi Siyasi Bürosunun üzvü və SSRİ Nazirlər Soveti sədrinin birinci müavini vəzifələrindən istefa verən Heydər Əliyevin siyasi səhnədən uzaqlaşdırılmasından sonra Azərbaycana qarşı ərazi iddiaları daha da fəallaşıb. Müstəqilliyin ilk illərində isə ölkədə idarəetmə böhranı, siyasi qarşıdurmalar, qanunsuz silahlı dəstələrin fəaliyyəti, separatçılıq meylləri və iqtisadi tənəzzül dövlətin mövcudluğunu ciddi təhlükə altına salıb.
1993-cü ilin ortalarında ölkədə vəziyyət daha da gərginləşərək vətəndaş qarşıdurması və parçalanma təhlükəsi yaranıb. Həmin dövrdə xalqın böyük əksəriyyəti çıxış yolunu yalnız Heydər Əliyevin hakimiyyətə qayıdışında görürdü. Azərbaycanın müxtəlif bölgələrindən gələn çağırışlara cavab verən Ulu Öndər 1993-cü il iyunun 9-da Bakıya gəlib və qısa müddətdə ölkədə sabitliyin təmin olunması istiqamətində qətiyyətli addımlar atıb.
İyunun 15-də Heydər Əliyev Azərbaycan Respublikası Ali Sovetinin sədri seçilib. Məhz bu tarix sonralar Milli Qurtuluş Günü kimi Azərbaycan xalqının yaddaşına həkk olunub. Onun hakimiyyətə qayıdışı ilə ölkədə siyasi sabitliyin bərpası, dövlət institutlarının möhkəmləndirilməsi, qanunsuz silahlı dəstələrin zərərsizləşdirilməsi və dövlətçiliyin qorunması istiqamətində mühüm tədbirlər həyata keçirilib.
Ulu Öndər Heydər Əliyev həmin dövrdə çıxışlarının birində bildirirdi: “Mənim həyatım da, fəaliyyətim də yalnız və yalnız Azərbaycanın müstəqilliyinin qorunub saxlanmasına, ölkəmizin bu ağır vəziyyətdən qalxmasına həsr olunacaqdır”. Bu prinsip sonrakı illərdə həyata keçirilən siyasətin əsasını təşkil edib.
1993-2003-cü illər ərzində ölkədə ictimai-siyasi sabitlik təmin olunub, iqtisadi islahatlara başlanılıb, nizami ordu quruculuğu istiqamətində mühüm addımlar atılıb, beynəlxalq əlaqələr genişləndirilib və Azərbaycanın dünya birliyinə inteqrasiyası sürətlənib. “Əsrin müqaviləsi”nin imzalanması, yeni Konstitusiyanın qəbul edilməsi və çoxpartiyalı siyasi sistemin formalaşması da həmin dövrün mühüm nəticələri sırasında yer alıb.
Heydər Əliyevin müəyyən etdiyi inkişaf strategiyası sonrakı illərdə də uğurla davam etdirilib. Prezident İlham Əliyevin rəhbərliyi ilə Azərbaycan regionun aparıcı dövlətlərindən birinə çevrilib, iqtisadi və siyasi nüfuzunu artırıb, ərazi bütövlüyünü və suverenliyini tam bərpa edib. Vətən müharibəsində qazanılan tarixi Zəfər və Qarabağda həyata keçirilən genişmiqyaslı bərpa-quruculuq işləri də Ulu Öndərin siyasi kursunun uğurlu davamı kimi qiymətləndirilir.
Bu gün Azərbaycan xalqı Milli Qurtuluş Gününü dövlətçiliyin xilası, milli birliyin təntənəsi və müstəqil Azərbaycanın inkişaf yolunun başlanğıcı kimi qeyd edir. Prezident İlham Əliyevin ifadə etdiyi kimi, “Milli Qurtuluş Günü Azərbaycan tarixində dönüş nöqtəsi idi”. Məhz həmin tarixdən etibarən Azərbaycan sabitlik, inkişaf və tərəqqi yoluna qədəm qoyaraq müasir, güclü və nüfuzlu dövlətə çevrilib.

Məhərrəm İbadov
Abşeron Rayov Ağsaqqallar Şurasının sədri, şəhid Rauf İbadovun atası

BİR ÖMÜRLÜK XATİRƏ...

(Masallıda məzunlar 50 ildən sonra görüşdülər)
Kövrək duyğular, şıltaq və ərköyün uşaqlıq illəri, yeniyetməlik dövrünün astanasında əsl vətəndaş kimi yetişib həyatın qoynuna atıldığımız T.Bayraməlibəyov adına Yeddioymaq kənd 2 saylı tam orta məktəbindən məzun olduğumuz 1976-cı ilin 31 may günü. 50 il əvvəlki həmin illərə qayıtdıq,
yarım əsrə bərabər o günlərin xatirələri təzələndi 7 iyun 1026-cı ildə. Bu xatirələr 70 yaşın qovşağında məzunların ömürlərinə bir naxış vurdu, nur çilədi qəlblərə.
Məktəbin həyətinə toplaşan məzunların sinif otağına girib bir neçə dəqiqəlik parta arxasında şagird kimi oturub əziz və hörmətli müəllim Yusif Balayevi diqqətlə dinlədilər. Veteran müəllim bu dəfə Azərbaycan və Ədəbiyyat fənnini yox “Həyat dərsi”ni keçdi. Həyatın enişli-yoxuşlu yollarını keçən keçmiş şagirdlərinə sağlam həyat, polad iradə, səbr, təməli möhkəm olan ailə modeli arzuladı. Onlara diqqətə görə razılıq edib, ən xoş arzularını bildirdi. Tədbirin təşkilatçılarına minnətdarlıq etdi. Bu günkü görüşdən çox məmnun olduğunu dilə gətirdi.
Dünyasını dəyişən əziz müəllimlərin və sinif yoldaşlarının ruhuna dualar oxunub, xatirələri bir dəqiqəlik sükutla yad edildi. Mircəfər ağa Vidadi, Allahşükür, Xəlil, Camal, Asif, Hasil, Qurban, Oğlanxan, Əlikömək, Qismət, Fərasət, Raqif və Süleyman orta məktəb illərinin şirin və yadda qalan anlarından kiçik epizodlar danışdıqca üzlərə təbəssüm qonur, şaqraq gülüş səsləri ətrafa yayılırdı.
Tədbir dağlar qoynunda yerləşən şəffaf bulaqları, gözəl təbiət mənzərəsi ilə Cənub bölgəsində məhşur olan “Viləş” otelin yaxınlığında yerləşən "Masallı süfrəsi" restoranında ləzzətli təamlarla dolu olan stol və şən musiqi sədaları altında davam etdirilirdi. Açıq mikrofon məzunların ixtiyarına verilmişdi. Hər kəs oynaq musiqilər altında rəqs edib arzu və istəklərini bildirir, Rauf qardaşımız isə bu xoş günləri və anları video kameranın yaddaşına köçürür. Sintizator ifaçısı Heybət məzunların sifarişlərini məmnuniyyətlə dinləyib, hər kəsin zövqünə uyğun musiqi səsləndirir, onları şənləndirməyə çalışır.
Həyat fani, ömür qısa olduğunu nəzərə alan məzunlar hər il bir araya gəlib görüşməyi qərara aldılar. Rusiya Federasiyasından "Məzun günü"nə canlı bağlantı ilə qoşulan Səmayə xanım həmvətənlərinə -sinif yoldaşlarına təbriklərini çatdırıb heç zaman bir-birlərini unutmamağı tövsiyə etdi. Məzunlar xatirə şəkli çəkdirib görüşmək ümidi ilə ayrıldılar.
Allahşükür KƏRİMOV,
AJB -nin üzvü, «QANUN HƏDƏF» qəzetinin bölgə müxbiri.

Könüllərə köçən Saleh

İkinci Qarabağ müharibəsi tariximizin ən şərəfli səhifəsidir. 44 gün davam edən bu haqq savaşımızda torpağını canından artıq sevən, Vətən qeyrətli, dağ vüqarlı, polad biləkli ər igidlərimiz yağıya diz çökdürərək qazanılan şanlı qələbə ilə xalqın mənliyini, kimliyini bir daha bütün dünyaya bildirdilər. Bu müqəddəs yolda tarix yazıb şəhidlik zirvəsinə ucalan qəhrəmanlardan biri də 1992-ci il aprelin 30-da Biləsuvar rayonunun Günəşli kəndində dünyaya göz açan Saleh Nurəddin oğlu Ağayevdir. O, şəhid ömrünü yaşamaqla bizim üçün böyük mənəvi sərvət qoyub. Bu sərvətin özündə Vətənə, onun torpağına, daşına ilahi bir sevgi var. Həmişəlik bütöv bir xalqın qəhrəmanlıq simvolunu adında yaşadan Saleh Ağayevin ölümündən sonra layiq görüldüyü “Vətən uğrunda”, “Hərbi xidmətə görə”, eləcə də Füzulinin, Cəbrayılın azadlığı uğrunda medalları doğmalarına bir təsəllidir.
Vətənini canından artıq sevən, igidliyi, mərdliyi, dürüstlüyü el-obada ona hörmət, rəğbət qazandıran Saleh Ağayev erməni dığalarına yerinə göstərmək amalı ilə 2010-cu ildə ordu sıralarına yollanıb. Cəbhə bölgəsində əsgərliyə başlayan Saleh bildirib ki, Vətən hər şeydən müqəddəsdir. Onu göz bəbəyi kimi qorumağa, çətində yolunda canımızı qurban verməyə hazır olmalıyıq. Həmçinin Ali Baş Komandan müharibə əmri versə, ön sırada düşmənin üzərinə mən gedəcəyəm.
Xidmət borcunu şərəflə yerinə yetirən, cəsurluq, igidlik, mərdlik həyat kredosu olan əsgər Saleh hərbi hissədə qısa zaman kəsiyində hamının sevimlisinə çevrilib. Düşməndən qisas almaq məqsədilə qatıldığı böyük cəsarət, hünər tələb edən təlimlərdə göstərdiyi fədakarlıq, eləcə də qürur, heyrət doğuran məqamlar hamıya nümunə olub. Vətəninə, torpağına necə ürəkdən bağlılığı çətin tapşırıqları layiqincə yerinə yetirməklə bildirib. Azərbaycanın hər qarışını canından əziz tutan Salehin köksündə çırpınan ürəyi yağıya əsir düşən müqəddəs, əzəli yurd yerimiz olan Qarabağı azad edib evə dönmək arzusu ilə döyünüb. Elə bu arzusu, Vətənə ilahi sevgisi əsgərlikdən sonra da yenidən şanlı formanı geyinməsinə səbəb olub. 2012-ci ildən etibarən xidmətini kiçik gizir kimi davam etdirib. Hər an işğalçı erməni dığalardan qisas alacağı günü gözləyib. Və buna tam hazır olmaq üçün şəxsi heyət arasında keçirilən müxtəlif təlimlərdə döyüş igidliyinə görə fərqlənib. Nümunəvi xidməti, ədəb-ərkanı, ləyaqəti, sədaqəti onu əsgərlərin, zabitlərin yanında başıuca edib.
Azərbaycan Ordusunun kiçik giziri olan Saleh Ağayev 2020-ci il sentyabrın 27-də Azərbaycan Silahlı Qüvvələri tərəfindən Ermənistanın işğalı altında olan xalqımıza məxsus torpaqların azad edilməsi və ərazi bütövlüyünün bərpa olunması üçün başlayan Vətən müharibəsinin ilk günlərində yağının kabusuna çevrilib. Ən qaynar nöqtələrdə döyüşüb, yaşının çərçivəsinə sığmayan qəhrəmanlıqlar göstərib. Cəbrayılın çox kəndinin azad olmasında axıradək düşmənlə vuruşub və ona ciddi itkilər verib. Cəbhənin hansı istiqamətində vuruşubsa, quduz erməni faşistlərinə qan qusdurub. Çox yerdə Azərbaycanın üçrəngli qələbə bayrağını asanlardan olub. İgid Vətən oğlu Saleh oktyabrın 11-də Füzuli rayonu ərazisində döyüş tapşırığını yerinə yetirərkən düşmən tərəfindən açılan atəş nəticəsində aldığı güllə yarasından şəhid olub. Qana susamış düşməni qanda boğmaqla əlçatmaz, ünyetməz göylərə ucalıb. Vətənə, torpağa canını fəda etdiyinə görə Saleh Ağayev əbədi yaşamaq üçün könüllərə köçüb.

Zəfər ORUCOĞLU,
Azərbaycan Jurnalistlər Birliyinin üzvü




.