26-03-2026, 14:02
Temperatur aşağı enəcək, daşqın və sel olacaq - XƏBƏRDARLIQ
Milli Hidrometeorologiya Xidmətinin məlumatına əsasən Bakıda və Abşeron yarımadasında martın 27-si səhərdən 29-dək arabir yağış yağacağı , bəzi yerlərdə intensiv xarakterli olacağı gözlənilir.
Yarımadanın ayrı-ayrı yerlərində gözlənilən qısamüddətli güclü yağıntılarla əlaqədar bəzi ərazilərdə subasma halları istisna olunmur.
Azərbaycanın bəzi rayonlarında martın 27-dən 31-dək hava şəraitinin fasilələrlə intensiv xarakterli yağıntılı olacağı, dağlıq ərazilərdə qar yağacağı gözlənilir.
Martın 27-28-də ayrı-ayrı yerlərdə Quba-Qusar (Siyəzən, Şabran, Xızı, Quba, Qusar, Xaçmaz), Dağlıq Şirvan (Şamaxı, Ağsu, Qobustan) Mərkəzi Aran (Hacıqabul, Neftçala, Sabirabad, Salyan), Qarabağ və Şərqi-Zəngəzur (Ağdam, Xankəndi, Şuşa, Cəbrayıl, Kəlbəcər, Qubadlı, Laçın, Zəngilan) bölgəsində yağıntıların güclü olacağı, şimşək çaxacağı, dolu düşəcəyi ehtimalı var.
Çaylarda sululuğun artacağı, bəzi dağ çaylarında, xüsusilə Quba-Qusar, Dağlıq Şirvan, Qarabağ və Şərqi Zəngəzur bölgələri ərazisindən axan çaylarda qısamüddətli daşqın və sel hadisələrinin baş verəcəyi ehtimal olunur.
Qeyri-sabit hava şəraiti ilə əlaqədar havanın temperaturu ötən günlərlə müqayisədə 3-5 dərəcə aşağı enəcək.
Gecə və səhər bəzi dağlıq ərazilərdə yolların buz bağlama ehtimalı var.
26-03-2026, 13:13
Ermənistan təyyarələrimizin uçuşuna qadağa qoyub? - AÇIQLAMA
Ermənistanın Mülki Aviasiya Komitəsi ölkənin hava məkanının istifadəsi ilə bağlı yayılan iddialara münasibət bildirib.
Qurumdan verilən açıqlamada qeyd olunub ki, Ermənistan heç bir ölkə, o cümlədən Azərbaycanın mülki təyyarələri üçün hava məkanından istifadə ilə bağlı məhdudiyyət tətbiq etməyib.
Bildirilib ki, son dövrlərdə Ermənistan üzərindən həyata keçirilən tranzit uçuşlarla bağlı əsassız spekulyasiyalar və dezinformasiya yayılır.
“Beynəlxalq mülki aviasiya haqqında Çikaqo Konvensiyasına əsasən, ICAO-ya üzv heç bir dövlət öz hava məkanından istifadədə ayrı-seçkilik tətbiq edə bilməz”, – deyə Komitədən vurğulanıb.
26-03-2026, 12:54
Sabah Bakıda yağış, bölgələrdə qar yağacaq
Sabah Azərbaycanda hava necə olacaq?
Martın 27-də gözlənilən hava proqnozu açıqlanıb.
Bakıda və Abşeron yarımadasında hava necə olacaq?
Milli Hidrometeorologiya Xidmətindən verilən xəbərə görə, Bakıda və Abşeron yarımadasında arabir yağış yağacağı, bəzi yerlərdə intensiv olacağı gözlənilir.
Yarımadanın ayrı-ayrı yerlərində gözlənilən qısamüddətli güclü yağıntılarla əlaqədar bəzi ərazilərdə subasma halları istisna olunmur.
Gecə və səhər bəzi yerlərdə duman olacaq.Mülayim şimal-qərb küləyi arabir güclənəcək.
Havanın temperaturu gecə 7-9° isti, gündüz 11-13° isti olacaq. Atmosfer təzyiqi 754 mm civə sütunundan 749 mm civə sütununa enəcək. Nisbi rütubət 90-95 % təşkil edəcək.
Azərbaycanın rayonlarında hava necə olacaq?
Azərbaycanın rayonlarında bəzi yerlərdə arabir yağıntılı olacağı, dağlıq ərazilərdə qar yağacağı gözlənilir. Ayrı-ayrı yerlərdə intensiv və güclü olacağı, şimşək çaxacağı, dolu düşəcəyi ehtimalı var. Gecə və səhər bəzi yerlərdə arabir duman olacaq. Qərb küləyi bəzi yerlərdə arabir güclənəcək.
Havanın temperaturu gecə 7-10° isti, gündüz 12-16° isti, dağlarda gecə 0-3° isti, gündüz 3-5° isti olacaq.
26-03-2026, 12:13
Sahibə Qafarova: Dialoq və əməkdaşlıq artıq zərurətə çevrilib
Milli Məclisin sədri Sahibə Qafarova Çin Xalq Respublikasına işgüzar səfəri çərçivəsində Asiya üçün Boao Forumunun İllik Konfransında çıxış edib.
Spiker çıxışında ilk olaraq Boao Forumunun əhəmiyyəti barədə fikirlərini bölüşüb. O bildirib ki, artan geosiyasi gərginliklər, dərinləşən bərabərsizliklər və qlobal çağırışlar fonunda dialoq və əməkdaşlıq artıq seçim deyil, zərurətə çevrilib. Bu baxımdan, Forum kollektiv düşüncə və əlaqələndirilmiş fəaliyyət üçün mühüm platforma rolunu oynayır.
Sahibə Qafarova qeyd edib ki, 25 ildən artıq müddətdə Boao Forumu liderlərin və ekspertlərin bir araya gəldiyi, praktik həll yollarının müzakirə olunduğu və beynəlxalq əməkdaşlığın təşviq edildiyi nüfuzlu platforma kimi özünü təsdiqləyib.
Spiker çıxışında müasir beynəlxalq arenada Çinin artan roluna da diqqət çəkib. O vurğulayıb ki, Çin iqtisadi, sosial və texnoloji inkişaf sahələrində əldə etdiyi nailiyyətlərlə qlobal miqyasda mühüm və konstruktiv rol oynayır.
Çıxış zamanı Azərbaycan-Çin münasibətlərinə toxunan Sahibə Qafarova bildirib ki, ortaq baxışlar iki ölkəni daha da yaxınlaşdırır. Onun sözlərinə görə, gələn il Azərbaycan ilə Çin arasında diplomatik münasibətlərin qurulmasının 35 illiyi qeyd olunacaq və bu münasibətlər artıq yeni mərhələyə yüksəlib.
Spiker əlavə edib ki, son illərdə yüksək səviyyəli qarşılıqlı səfərlər, o cümlədən Prezident İlham Əliyevin Çinə səfərləri, eləcə də strateji tərəfdaşlığa dair imzalanan sənədlər ölkələr arasında siyasi dialoqun və qarşılıqlı etimadın gücləndiyini göstərir.
Sahibə Qafarova diqqətə çatdırıb ki, Azərbaycan beynəlxalq hüquqa uyğun olaraq ərazi bütövlüyünü və suverenliyini bərpa etdikdən sonra bu prinsiplərə xüsusi önəm verir. O qeyd edib ki, Prezident İlham Əliyevin müəyyən etdiyi milli inkişaf baxışı sülh, əməkdaşlıq və qarşılıqlı hörmətə əsaslanır.
Spiker çıxışında Azərbaycanın qlobal təşəbbüslərdə fəal iştirak etdiyini də vurğulayıb. O bildirib ki, Qoşulmama Hərəkatına sədrliyi dövründə Azərbaycan Qlobal Cənubun maraqlarını təşviq edib və bu platformanın institusional inkişafına töhfə verib.
Bununla yanaşı, Azərbaycanın COP29-a ev sahibliyi çərçivəsində qlobal iqlim gündəliyinə verdiyi töhfələr və müxtəlif beynəlxalq platformalarda fəal iştirakı da xüsusi qeyd olunub.
Çıxışda həmçinin Azərbaycanın enerji təhlükəsizliyi və nəqliyyat sahəsində strateji rolu vurğulanıb. Bildirilib ki, ölkə geniş regionda enerji təhlükəsizliyinin təmin olunmasında mühüm rol oynayır və yaşıl enerji sahəsinə yatırımlar bu rolu daha da gücləndirir.
Qeyd edilib ki, Azərbaycan Avrasiya üzrə əsas nəqliyyat qovşaqlarından birinə çevrilib və “Bir kəmər, bir yol” təşəbbüsünün fəal iştirakçılarından biridir. Orta Dəhlizin Avropa ilə Asiyanı birləşdirən ən optimal və təhlükəsiz marşrutlardan biri olduğu diqqətə çatdırılıb.
Sahibə Qafarova çıxışının sonunda bildirib ki, Azərbaycanın həyata keçirdiyi layihələr yalnız iqtisadi fayda deyil, həm də sabitlik və qarşılıqlı etimadın gücləndirilməsinə xidmət edir.
26-03-2026, 11:58
Moped sürənlərdən bu gündən vəsiqə tələb olunur
Azərbaycanda mopedlərin idarə olunması ilə bağlı yeni tələblər qüvvəyə minib.
“Yol hərəkəti haqqında” Qanuna 9 dekabr 2025-ci ildə edilən dəyişikliklər martın 26-dan etibarən tətbiq olunur.
Yeniliyə əsasən, artıq moped idarə etmək üçün sürücülük vəsiqəsi tələb ediləcək.
Bununla yanaşı, mopedlər dövlət qeydiyyatına alınacaq və rəsmi şəkildə uçota götürüləcək. Qanunda moped anlayışı daha dəqiq şəkildə müəyyənləşdirilib və onların istismarı ilə bağlı tələblər konkretləşdirilib.
Eyni zamanda, əvvəlki qaydalardan fərqli olaraq, mopedlərin yalnız yolun sağ kənar zolağı ilə hərəkət etməsi tələbi ləğv olunub.
Yeni dəyişikliklərə əsasən, motosiklet və mopedlə daşınan yükün ölçülərinə də məhdudiyyət qoyulub. Belə ki, nəqliyyat vasitəsinin uzunluğu və ya eni üzrə qabaritlərindən 0,5 metrdən artıq kənara çıxan və ya idarəetməyə mane olan yüklərin daşınması qadağan edilir.
26-03-2026, 11:31
Qəbələdə 62 yaşlı kişi yanaraq öldü
Qəbələ rayonunda bədbəxt hadisə ölümlə nəticələnib.
Hadisə rayon ərazisində baş verib. Şəhər sakini, 62 yaşlı Əzim Heydər oğlu Hüseynov məişət tullantılarını yandırarkən ehtiyatsızlıqdan alovun üzərinə düşüb.
Məlumata görə, kişi ağır yanıq xəsarətləri alıb və hadisə yerində həyatını itirib.
Faktla bağlı hüquq-mühafizə orqanları tərəfindən araşdırma aparılır.
26-03-2026, 00:17
Arda Gülərdən YENİ REKORD
İspaniyanın “Real Madrid” klubunun türkiyəli yarımmüdafiəçisi Arda Gülərin “Elçe”yə qarşı matçda vurduğu qol La Liqada mart ayının ən yaxşısı seçilib.
21 yaşlı futbolçu meydanın mərkəzindən rəqib qapısını dəqiq nişan alıb.
Çempionatın 28-ci turunda “Santyaqo Bernabeu”da keçirilən qarşılaşmanın 89-cu dəqiqəsində qeydə alınan bu qol həm də rəsmi rekord kimi tarixə keçib. Belə ki, Arda Gülər 55 metrlik məsafə ilə İniqo Martinesə məxsus olan “La Liqanın ən uzaq məsafədən vurulan qolu” rekordunu 13 metr yeniləyib.
Xatırladaq ki, görüş Madrid təmsilçisinin 4:1 hesablı qələbəsi ilə bitib.
25-03-2026, 23:00
Millimiz məğlubiyyətlə başladı
Azərbaycanın 19 yaşadək futbolçulardan ibarət millisi Avropa çempionatının seçmə mərhələsinə məğlubiyyətlə başlayıb.
B Liqasının 6-cı qrupunda yer alan U-19 ilk görüşünü meydan sahibi Litva seçməsinə qarşı keçirib.
Kaunasdakı "Raudondvario" stadionunda keçirilən qarşılaşma meydan sahiblərinin qələbəsi ilə başa çatıb - 4:0.
Qeyd edək ki, U-19 növbəti görüşünü martın 28-də Şimali İrlandiyaya qarşı keçirəcək.
25-03-2026, 20:41
Xaçmazda meşədə gənc oğlan meyiti tapıldı
Xaçmazda meşədə meyit tapılıb.
Hadisə şəhər ərazisində qeydə alınıb.
Xudat şəhər sakini, 25 yaşlı Şükür Rəsul oğlu Musayevin meyiti Xaçmaz şəhəri ərazisindəki meşəlik sahədə aşkarlanıb. Onun hansı səbəblə öldüyü bilinmir.
Araşdırma aparılır.
25-03-2026, 19:56
Zərdabda maşın kanala düşdü: 3 ölü, 4 yaralı - YENİLƏNİB
Bu gün Zərdabda yol qəzasında xəsarət alan 4 nəfərdən biri dünyasını dəyişib.
Xəsarət alan Mütəllim Mütəllimov həkimlərin səyinə baxmayaraq, Zərdab Rayon Mərkəzi Xəstəxanasında ölüb.
***
10:50
Zərdabda yol qəzası olub, ölən ve xəsarət alan var.
Hadisə rayonunun Əlvəd kəndi ərazisində qeydə alınıb.
Belə ki, “Hyundai Santa Fe” markalı avtomobil idarəetmədən çıxaraq su kanalına aşıb.
Hadisə nəticəsində 2 nəfər - Nəsibov Rasim Yaqub oğlu və Nəsibova Paket Kamran qızı ölüb, 4 nəfər - Vidadi Nəsibov, Vəkil Abışov, Ramilə Baxışova ve Umud Mütəllimov isə xəsarət alıb.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Zəngilanın dirçəliş
və qayıdış dövrü
Azərbaycan tarixinin ən şanlı səhifəsi olan Vətən müharibəsi bizə təkcə torpaqlarımızı deyil, ləyaqətimizi, qürurumuzu qaytardı. Həmin qürurun ən parlaq ünvanlarından biri də Zəngilandır. 2020-ci il sentyabrın 27-də başlanan Zəfər yürüşü zamanı şərqdən, Cəbrayıl istiqamətindən düşmənə vurulan sarsıdıcı zərbələr nəticəsində Azərbaycan Ordusu 30-dan çox yaşayış məntəqəsini azad edərək Zəngilanın inzibati hüdudlarına çatdı. Oktyabrın 18-də rayonun tam azad edilməsi uğrunda genişmiqyaslı əməliyyata start verildi və cəmi iki gün sonra, oktyabrın 20-də Müzəffər Ali Baş Komandan, Prezident İlham Əliyev xalqa müraciətində Havalı, Zərnəli, Məmmədbəyli, Həkəri, Şərifan, Birinci Muğanlı kəndlərinin və Zəngilan şəhərinin işğaldan azad edildiyini elan etdi. Beləliklə, Zəngilan döyüşləri nəticəsində 1 şəhər, 4 qəsəbə və 49 kənd düşmən tapdağından xilas edildi və bununla da 132 kilometrlik Azərbaycan-İran dövlət sərhədi tam bərpa olundu. İşğalın bitməsindən dərhal sonra sərhəd boyunca zəruri istehkam və mühafizə işlərinə başlanıldı.
Qərbi zəngəzurlular Zəngilan şəhidliyində
Bu tarixi qələbənin əbədiləşdirilməsi üçün 2020-ci il noyabrın 26-da “Zəngilanın azad olunmasına görə” medalı təsis edildi və 6974 hərbi qulluqçumuz bu medalla təltif olundu. Prezidentin 31 iyul 2023-cü il tarixli Sərəncamı ilə isə 20 oktyabr tarixi Zəngilan şəhəri günü kimi rəsmiləşdirildi. Zəngilanın azad olunması Böyük Qayıdışın başlanğıcı oldu. Bu gün dövlətin ən böyük hədəfi həmin torpaqları yenidən həyatla doldurmaqdır. 2026-cı il 1 oktyabr tarixinə olan məlumata görə, Zəngilan şəhərində 84 ailə, yəni 339 nəfər, Ağalı kəndində 234 ailə, yəni 1017 nəfər, Məmmədbəyli kəndində isə 179 ailə, yəni 903 nəfər öz doğma ocağına qayıdıb. Köçürülən ailələr peşə və bacarıqlarına uyğun olaraq müxtəlif dövlət qurumlarında, tikinti şirkətlərində, tikiş fabrikində və digər sahələrdə işlə təmin edilirlər.Bu qayıdışın dünyaya nümunə olan simvolu isə Ağalı kəndidir. Ağalı təkcə Azərbaycanda deyil, dünyanın ən müasir kəndlərindən biri hesab olunur. Burada “ağıllı kənd” konsepsiyası tam şəkildə tətbiq edilib. Dayanıqlı inkişafın təmin olunması üçün sosial-iqtisadi xidmətlər ən yüksək texnologiyalarla qurulub. Kəndin enerji təminatı ekoloji cəhətdən tam təmizdir, Həkəri çayı üzərində 3 turbindən ibarət Arximed tipli su elektrik stansiyası və gücü 325 kilovat olan günəş panelləri quraşdırılıb. Evlərdə istilik xərclərini azaltmaq üçün kombinə edilmiş sistemlər, mətbəx sobası və yüksək səmərəli elektrod boilerlər var. Suyun isidilməsi üçün günəş kollektorlarından, çirkab suların təmizlənməsi üçün bioloji təmizləmə qurğularından istifadə olunur.
Kənddə GPON texnologiyası ilə yüksək sürətli internet, İP TV, video müşahidə kameraları, ağıllı işıq dirəkləri və avtomatik hava müşahidə stansiyaları var. Əhalinin rahatlığı üçün Tele-səhiyyə, E-təhsil və digər elektron xidmətlər, ASAN, DOST, məktəb, bağça, tibb məntəqəsi, kiçik və orta biznesə dəstək mərkəzləri fəaliyyət göstərir. Ümumi sahəsi 2 hektardan çox olan park salınıb. Bütün bunlar onu göstərir ki, Ağalı kəndi sadəcə yaşayış məntəqəsi deyil, gələcəyin kənd modelidir. Nazirlər Kabinetinin 30 oktyabr 2023-cü ildə təsdiq etdiyi Baş Plana əsasən şəhərin 2040-cı ilədək inkişafı üçün böyük vəsait ayrılıb. 2022-ci ildə təməli qoyulan 104 mənzilli ilk yaşayış kompleksinin açılışı 2026-cı ildə olub. Kompleksin ərazisi 2 hektardan artıqdır və burada 12 bina, o cümlədən 4 ədəd üçmərtəbəli 60 mənzilli və 8 ədəd ikimərtəbəli 44 mənzilli evlər tikilib.
Azad Zəngilanın qonaqları
Zəngilan Beynəlxalq Hava Limanı bu bölgənin inkişafı üçün mühüm faktora çevrilib. Zəngəzur dəhlizinin hava infrastrukturu ilə gücləndirilməsi baxımından hava limanı strateji əhəmiyyət daşıyır. Eyni zamanda Horadiz-Zəngilan-Ağbənd dəmir yolunun inşası da böyük strateji əhəmiyyətə malikdir. Bu yol azad edilmiş torpaqlara həm vətəndaşların qayıdışı, həm də yüklərin daşınması üçün tarixi imkan yaradır. Artıq yolun birinci mərhələsi üzrə böyük hissə tamamlanıb və Araz İqtisadi Zonası Sənaye Parkına yüklər daşınır. Horadiz-Cəbrayıl-Zəngilan-Ağbənd avtomobil yolunun uzunluğu 126,3 kilometrdir, illik buraxılış qabiliyyəti 15 milyon tondur və layihənin 2026-cı ilin ikinci yarısında yekunlaşdırılması nəzərdə tutulur. İşğal dövründə tövlə kimi istifadə olunan XIX əsrə aid Zəngilan şəhər məscidi Heydər Əliyev Fondu tərəfindən bərpa olunub. Bərpa-tikinti işləri çərçivəsində tarixi məscid konservasiya edilib və onun yanında düzbucaqlı planlı, iki minarəli yeni məscid inşa edilib. Yeni məsciddə 220 və 100 nəfərlik ibadət zalları yaradılıb. Rayonun gələcəyi üçün turizm və kənd təsərrüfatı da unudulmayıb. 2024-cü il mayın 18-də Ağalı kəndində, Həkəri çayı vasitəsilə yaradılmış süni gölün sahilində “Ağalı” hoteli açılıb. Zəngilan İstirahət Kompleksində 111 nömrəli hotelin təməli 2023-cü il mayın 4-də qoyulub. 2026-cı il mayın 10-da isə “Zəngilan City Park Hotel”in təməli qoyulub. Kənd təsərrüfatı sahəsində isə “Dost Aqropark” layihəsi həyata keçirilir. Azərbaycan və Türkiyə şirkətlərinin birgə layihəsi olan bu kompleks tam başa çatdıqda 500 nəfəri işlə təmin edəcək və 100 milyon dollar sərmayə qoyulacaq. Layihənin birinci mərhələsində 5200 kvadratmetr qapalı, 113 min kvadratmetr açıq tipli heyvandarlıq kompleksləri, sosial obyektlər, kafe, kinoteatr tikilib.
Beləliklə, Zəngilan bu gün sadəcə işğaldan azad edilmiş bir rayon deyil, Azərbaycan dövlətinin qüdrətinin, iradəsinin və gələcəyə olan inamının canlı rəmzidir. Burada hər daş, hər tikilən ev, hər qayıdan ailə 30 illik həsrətin sonu və Böyük Qayıdışın əbədi başlanğıcıdır.
Mahnur Hüseynova
Xırdalan şəhər 8 nömrəli tam orta ümumtəhsil məktəbinin direktoru
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!