Abşeron rayonunda narkotiklərlə bağlı əməliyyat keçirilib.

Butov.az Teleqraf.com-a istinadən xəbər verir ki, Zəngilan rayon polis şöbəsi əməkdaşlarının həyata keçirdikləri əməliyyat-axtarış tədbirləri nəticəsində Bakı şəhər sakini, əvvəllər məhkum olunmuş Elnur Şalıyev 500 qram tiryəki Abşeron rayonu ərazisində 2000 manata satarkən tutulub.

Ətrafında aparılmış əməliyyat tədbirləri ilə onun narkotik vasitəni Masallı rayon sakini, əvvəllər məhkum olunmuş F.Həbibovdan alması müəyyən edilib.

Bundan başqa, Göyçay rayon polis şöbəsi əməkdaşlarının həyata keçirdikləri əməliyyat-axtarış tədbirləri nəticəsində Cəyirli kənd sakini Qüdrət Həmidovun evinə baxış zamanı 1 kiloqram 374 qram marixuana aşkar edilərək götürülüb.

Daha bir əməliyyatı Qaradağ rayon Polis İdarəsinin 11-ci polis bölməsinin əməkdaşları keçirib.

Əməliyyat-axtarış tədbirləri nəticəsində Qobustan qəsəbə sakini Nizam Mahmudova məxsus həyətyanı sahədən kultivasiya yolu ilə yetişdirilmiş 16 ədəd çətənə kolu aşkar edilərək götürülüb. Onun yanvarın 25-də törədilmiş quldurluq cinayətinin iştirakçısı olması da müəyyən edilib.

Bundan başqa, Lənkəran Şəhər-Rayon Polis Şöbəsi əməkdaşlarının həyata keçirdikləri əməliyyat-axtarış tədbirləri nəticəsində Şiləvar kəndinin meşə zolağında rayon sakini Anar Məmmədov tərəfindən kultivasiya yolu ilə yetişdirilmiş 268 ədəd çətənə kolu aşkar edilərək götürülüb və o, tutulub.