31-05-2023, 17:30
Vladimir Putin heç bir müharibəni uduzmayıb - Polşa Prezidenti
Rusiya Prezidenti Vladimir Putin müharibəni uduzmayıb. Bunu Polşa Prezidenti Anjey Duda "The Wall Street Journal"a müsahibəsində deyib. "Bu gün deyirlər ki, Vladimir Putin müharibəni uduzdu. Onun məğlubiyyəti isə Finlandiyanın NATO-ya qoşulmasıdır. Baxmayaraq ki, uzun illər fin xalqı neytrallıqdan əl çəkib-çəkməməkdə tərəddüd edirdi. Xanımlar və cənablar, Vladimir Putin heç bir müharibəni uduzmayıb", - deyə Duda bildirib. O, həmçinin vurğulayıb ki, Rusiya ordusu Ukraynanın beynəlxalq səviyyədə tanınmış sərhədlərindən kənara çıxarılanda Putin uduzacaq. "Bu arada Rusiya getdikcə daha çox səfərbər olur, iqtisadiyyatı hərbi müstəviyə keçir, təbliğat isə əhalini zombiləşdirir", - Prezident əlavə edib.
31-05-2023, 17:17
İranın Kərəc həbsxanasında 3 məhkum edam edildi
İranın Kərəc şəhərinin həbsxanasında 3 məhkum edam edilib. Bu barədə İran İnsan Haqları Təşkilatı məlumat yayıb. Edam edilən şəxslərin narkotik maddələrin alverində ittiham olunduğu bildirilir. Qeyd edək ki, son 1 ay ərzində İran həbsxanalarında 130-dan çox məhkum edam olunub.
31-05-2023, 17:03
Paşinyana andiçmə mərasimində iştrak üçün dəvət göndərilmədi
Növbəti dəfə Türkiyə Prezidenti seçilən Rəcəb Tayyib Ərdoğanın andiçmə mərasiminin iyunun 3-də keçirilməsi dəqiqləşib. Andiçmə mərasiminə Türk dövlətlərinin liderləri, Rusiya, ABŞ, Misir və Ukrayna daxil olmaqla bir sıra ölkələrin rəhbərləri dəvət olunub. Digər qonşu ölkələrdən fərqli olaraq, Ermənistanın Baş naziri Nikol Paşinyana mərasimdə iştirak üçün dəvət göndərilməyib. Bundan əlavə, Putin rəsmi dəvətlilər sırasında olsa da, onun Türkiyəyə andiçmədən sonra gedəcəyi bildirilir. Ukrayna Prezidenti Volodimir Zelenski isə Ərdoğanın dəvətini qəbul edərək, Ankaraya səfər edəcəyini təsdiqləyib. Qeyd edək ki, mayın 28-də keçirilən ikinci tur seçkilərində Rəcəb Tayyib Ərdoğan yenidən Türkiyə Prezidenti seçilib.
31-05-2023, 14:36
Ukrayna haqqında heç nə Ukraynasız danışılmamalıdır - Leyen
"Rusiya qoşunları çıxarılmadan Ukraynada atəşkəs sülh gətirə bilməz”. Bunu Avropa Komissiyasının prezidenti Ursula von der Leyen bildirib. "İndi sülh planları və atəşkəs ətrafında çox danışılır. Bunda ilk növbədə bir prinsip olmalıdır: Ukrayna haqqında heç nə Ukraynasız danışılmamalıdır. Biz Ukrayna ilə birlikdə ədalətli sülh istəyirik, bu sülh işğalçı üçün mükafat olmayacaq, lakin BMT Nizamnaməsinin prinsiplərinə və Ukrayna xalqının öz gələcəyinin sahibi olmaq hüququna uyğun olacaq. Münaqişəni donduran atəşkəs davamlı sülh gətirməyəcək. Biz bilirik ki, münaqişə hər an yenidən alovlana bilər. Ədalətli dünya Rusiya qoşunlarının Ukrayna ərazisindən çıxarılmasının nəticəsi olmalıdır”, - o vurğulayıb. Xatırladaq ki, ötən ilin 24 fevralında Rusiyanın Ukraynaya hücumu nəticəsində başlayan müharibə davam edir. Rusiya Ukraynanın Xerson və Zaporojye vilayətlərini, habelə qondarma "Donetsk XR" və "Luqansk XR" separatçı qurumlarını birtərəfli qaydada ilhaq etdiyini açıqlayıb.
31-05-2023, 13:53
İstənilən halda Rusiya lazımi səviyyədə təmsil olunacaq - Peskov
"Putinin ŞƏT sammitində iştirakının müxtəlif variantları hazırlanır, lakin istənilən halda Rusiya lazımi səviyyədə təmsil olunacaq". Bunu Kremlin sözçüsü Dmitri Peskov deyib. O, həmçinin bildirib ki, Kreml Kosovada vəziyyətin gərginləşməsindən narahatdır və hadisələrin inkişafını diqqətlə izləyir: "Rusiya Federasiyası Serbiyanı dəstəkləyir, hesab edir ki, Kosova serblərinin hüquq və mənafelərinə hörmət edilməlidir. Kosovada vəziyyətin gərginləşməsi ilə bağlı Putin və Vuçiç arasında təmas planları yoxdur, lakin diplomatik kanallar vasitəsilə əlaqə daim davam edir". "Kütləvi informasiya vasitələri Moskvaya hücum edən PUA sayı barədə əsas məlumat mənbəyi ola bilməz, siz Müdafiə Nazirliyinin məlumatlarına diqqət yetirməlisiniz", - sözçü əlavə edib. "Putin və Ərdoğan telefon danışığında yaxın gələcəkdə şəxsi görüş keçirmək niyyətlərini təsdiqləyiblər. Putinlə Ərdoğanın görüşünün tarixi və yeri razılaşdırılır", - Peskov qeyd edib.
31-05-2023, 13:47
Baş nazirin müavini İrəvana səfər etdi
Macarıstanın baş naziri Viktor Orbanın müavini Zolt Şeymen İrəvana səfər edib. Səfər çərçivəsində o, Ermənistanın baş naziri Nikol Paşinyanla görüş keçirib. Söhbət zamanı diplomatik münasibətlərin bərpası və ikitərəfli əməkdaşlığın genişləndirilməsinin vacibliyinə toxunulub. Bu kontekstdə İrəvan və Budapeşt arasında birbaşa uçuşların bərpasına yönəlmiş addımlara nəzər yetirilib. Görüşdə həmçinin regional və beynəlxalq problemlər, iqtisadiyyat, turizm, mədəniyyət və təhsil sahələrində əməkdaşlıq, Laçın dəhlizi ətrafındakı vəziyyət və Qarabağ məsələsi müzakirə olunub.
31-05-2023, 13:32
Türkiyə Prezidentinin yeni hökümət “siyahısı” saxta çıxdı
Türkiyə Prezidenti Rəcəb Tayyib Ərdoğanın yenidən formalaşdıracağı Nazirlər Kabinetinin kimlərdən ibarət olacağı ilə bağlı sosial şəbəkələrdə yayılan siyahı rezonans doğurub. Həmin siyahıda bəzi sürpriz adlar yer alıb. Müzakirə doğuran siyahı ilə bağlı Türkiyə Prezident Aparatının Kommunikasiya İdarəsi açıqlama yayıb. "Saxta infoqrafikalarla yayılan "kabinə siyahıları" həqiqətə uyğun deyil, bu cür xəbərlər dezinformasiyadan başqa bir şey deyil. Cəmiyyətin bu cür dezinformasiyalara inanmaması sağlam siyasi mühit üçün olduqca vacibdir", rəsmi məlumatda qeyd olunub.
31-05-2023, 13:29
Türkiyədə ticarət nümayəndəmiz təyin edildi
Dördüncü Sənaye İnqilabının Təhlili və Koordinasiya Mərkəzinin icraçı direktoru Tamerlan Tağıyev Azərbaycanın Türkiyədə ticarət nümayəndəsi təyin edilib. Tamerlan Tağıyev Bakı Dövlət Universitetinin Beynəlxalq hüquq və beynəlxalq əlaqələr fakültəsinin beynəlxalq hüquq ixtisası üzrə bakalavr və magistr pillələrində təhsil alıb. Bundan əlavə, Dövlət İqtisad Universitetinin biznesin idarəolunması proqramı üzrə MBA, həmçinin, ABŞ-ın Corcia Dövlət Universitetində dövlət idarəçiliyi üzrə magistr təhsili alıb. 2001-ci ildə əmək fəaliyyətinə başlayıb, müxtəlif özəl və dövlət qurumlarında çalışıb, o cümlədən Avropa Məhkəməsinə Müraciətetmə Mərkəzində və İqtisadi İnkişaf Nazirliyində işləyib. 2008-ci ildən İslam İnkişaf Bankı (İİB) Qrupunun Azərbaycandakı təmsilçisi vəzifəsini yerinə yetirib, 2021-ci ildən isə Azərbaycan, Albaniya və Orta Asiya ölkələrini İİB-in Direktorlar Şurasında icraçı direktor qismində təmsil edir. 2020-2021-ci illər ərzində Dünya İqtisadi Forumunun Rəqəmsal Ticarət Platforması çərçivəsində mübadilə proqramının iştirakçısı olub. 2021-2023-cü illərdə İqtisadiyyat Nazirliyinin tabeliyində Dördüncü Sənaye İnqilabının Təhlili və Koordinasiya Mərkəzinin icraçı direktoru vəzifəsində çalışıb. Dördüncü Sənaye İnqilabının Təhlili və Koordinasiya Mərkəzinin (4SİM) icraçı direktoru vəzifəsi Mərkəzin icraçı direktorunun müavini Fariz Cəfərova həvalə olunub. Fariz Cəfərov Azərbaycan Respublikasının Prezidenti yanında Dövlət İdarəçilik Akademiyasında dövlət idarəçiliyi üzrə bakalavr, Madrid və Milan politexnik universitetlərində dövlət xidmətlərində süni intellektin tətbiqi üzrə ikili magistr, “London Webster Graduate School” məktəbində biznesin idarə edilməsi, Dyuk Universitetinin Fuqua Biznes məktəbində adaptiv strateji idarəetmə və Corc Vaşinqton Universitetində layihələrin idarə edilməsi üzrə magistr təhsili alıb. 2019-2022-ci illərdə Fariz Cəfərov Azərbaycan Hökumətini Avropa Şurasının Süni İntellekt Komitəsində təmsil edib. Fariz Cəfərov dövlət sektorunda bir sıra istiqamətlər, xüsusilə dövlət xidmətlərinin rəqəmsallaşdırılması, kənd təsərrüfatı, turizm, tikinti və sosial xidmətlər üzrə on ildən artıq təcrübəyə malikdir. Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyi, Mərkəzi Bank və bir sıra özəl və dövlət qurumlarında rəhbər vəzifələrdə fəaliyyət göstərib. Son 5 ildə Elektron Hökumətin İnkişafı Mərkəzinin direktoru vəzifəsində çalışıb, ölkə üzrə 50-dən çox strateji əhəmiyyətli rəqəmsal layihəyə, o cümlədən ASAN Viza, ASAN Bridge, ASAN Ödəniş, “e-satınalma”, Elektron Hökumət və “MyGov” portalları, eləcə də digər layihələrə rəhbərlik edib.
31-05-2023, 13:20
Bu şəxslər ödənişli hüquqi xidmətdən azad olunur
Mülki Prosessual Məcəlləyə dəyişiklərlə bağlı qanun layihəsinə əsasən əlillər, insan alverinin qurbanları, valideyn himayəsindən məhrum olmuş şəxslər ödənişli hüquqi xidmətdən azad olunur. Bununla bağlı məsələ Milli Məclisin mayın 31-də keçirilən iclasının gündəliyinə daxil edilib. İkinci oxunuşda təqdim edilən qanun layihəsinə əsasən Mülki Prosessual Məcəllənin 67-1.2-ci maddəsində nəzərdə tutulmuş hallarda məhkəmə iddia tələbinin kifayət qədər əsaslılığına dair ilkin sübutların mövcudluğunu nəzərə alaraq, aşağıdakı şəxslərin vəkil tərəfindən göstərilən hüquqi yardım haqqını ödəməkdən azad edilməsi və ödəmənin Azərbaycan Respublikasının dövlət büdcəsi vəsaiti hesabına həyata keçirilməsi və ya bundan imtina barədə əsaslandırılmış qərardad qəbul edir:
- orqanizmin funksiyalarının 61-100 faiz pozulmasına görə əlilliyi müəyyən edilmiş və işləməyən, eləcə də 18 yaşınadək əlilliyi müəyyən edilmiş şəxslər;
- insan alverinin qurbanları, məişət zorakılığından zərər çəkmiş şəxslər;
- valideynini itirmiş və ya valideyn himayəsindən məhrum olunmuş uşaqlar;
- ünvanlı dövlət sosial yardımı alan ailələrin üzvləri;
- müvafiq icra hakimiyyəti orqanında işsiz kimi qeydiyyatda olan şəxslər;
- maddi vəziyyəti və orta aylıq gəlirinin cari il üçün yaşayış minimumundan əhəmiyyətli dərəcədə aşağı olması məhkəmə tərəfindən qiymətləndirilən digər şəxslər.
Qanun layihəsi səsvermədən sonra ikinci oxunuşda qəbul edilib.
31-05-2023, 13:03
İyunun ilk gününün hava proqnozu
Azərbaycanda iyunun 1-nə gözlənilən hava proqnozu açıqlanıb. Milli Hidrometeorologiya Xidmətindən verilən məlumata görə, sabah Bakıda və Abşeron yarımadasında hava şəraitinin dəyişkən buludlu olacağı, arabir tutulacağı, əsasən yağmursuz keçəcəyi gözlənilir. Lakin gecə bəzi yerlərdə qısamüddətli yağış yağacağı ehtimalı var. Mülayim şimal-qərb küləyi əsəcək. Havanın temperaturu gecə 16-21° isti, gündüz 23-28° isti olacaq. Atmosfer təzyiqi 757 millimetr civə sütunundan 761 millimetr civə sütununa yüksələcək. Nisbi rütubət gecə 70-80 faiz, gündüz 50-60 faiz olacaq. Azərbaycanın rayonlarının bəzi yerlərində fasilələrlə yağış yağacağı gözlənilir. Ayrı-ayrı yerlərdə leysan xarakterli, intensiv olacağı, şimşək çaxacağı, dolu düşəcəyi ehtimalı var. Gecə və səhər bəzi dağlıq rayonlarda duman olacaq. Qərb küləyi ayrı-ayrı yerlərdə arabir güclənəcək. Havanın temperaturu gecə 15-20°, gündüz 27-32° isti, dağlarda gecə 6-11°, gündüz 13-18° isti olacaq.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Zəngilanın dirçəliş
və qayıdış dövrü
Azərbaycan tarixinin ən şanlı səhifəsi olan Vətən müharibəsi bizə təkcə torpaqlarımızı deyil, ləyaqətimizi, qürurumuzu qaytardı. Həmin qürurun ən parlaq ünvanlarından biri də Zəngilandır. 2020-ci il sentyabrın 27-də başlanan Zəfər yürüşü zamanı şərqdən, Cəbrayıl istiqamətindən düşmənə vurulan sarsıdıcı zərbələr nəticəsində Azərbaycan Ordusu 30-dan çox yaşayış məntəqəsini azad edərək Zəngilanın inzibati hüdudlarına çatdı. Oktyabrın 18-də rayonun tam azad edilməsi uğrunda genişmiqyaslı əməliyyata start verildi və cəmi iki gün sonra, oktyabrın 20-də Müzəffər Ali Baş Komandan, Prezident İlham Əliyev xalqa müraciətində Havalı, Zərnəli, Məmmədbəyli, Həkəri, Şərifan, Birinci Muğanlı kəndlərinin və Zəngilan şəhərinin işğaldan azad edildiyini elan etdi. Beləliklə, Zəngilan döyüşləri nəticəsində 1 şəhər, 4 qəsəbə və 49 kənd düşmən tapdağından xilas edildi və bununla da 132 kilometrlik Azərbaycan-İran dövlət sərhədi tam bərpa olundu. İşğalın bitməsindən dərhal sonra sərhəd boyunca zəruri istehkam və mühafizə işlərinə başlanıldı.
Qərbi zəngəzurlular Zəngilan şəhidliyində
Bu tarixi qələbənin əbədiləşdirilməsi üçün 2020-ci il noyabrın 26-da “Zəngilanın azad olunmasına görə” medalı təsis edildi və 6974 hərbi qulluqçumuz bu medalla təltif olundu. Prezidentin 31 iyul 2023-cü il tarixli Sərəncamı ilə isə 20 oktyabr tarixi Zəngilan şəhəri günü kimi rəsmiləşdirildi. Zəngilanın azad olunması Böyük Qayıdışın başlanğıcı oldu. Bu gün dövlətin ən böyük hədəfi həmin torpaqları yenidən həyatla doldurmaqdır. 2026-cı il 1 oktyabr tarixinə olan məlumata görə, Zəngilan şəhərində 84 ailə, yəni 339 nəfər, Ağalı kəndində 234 ailə, yəni 1017 nəfər, Məmmədbəyli kəndində isə 179 ailə, yəni 903 nəfər öz doğma ocağına qayıdıb. Köçürülən ailələr peşə və bacarıqlarına uyğun olaraq müxtəlif dövlət qurumlarında, tikinti şirkətlərində, tikiş fabrikində və digər sahələrdə işlə təmin edilirlər.Bu qayıdışın dünyaya nümunə olan simvolu isə Ağalı kəndidir. Ağalı təkcə Azərbaycanda deyil, dünyanın ən müasir kəndlərindən biri hesab olunur. Burada “ağıllı kənd” konsepsiyası tam şəkildə tətbiq edilib. Dayanıqlı inkişafın təmin olunması üçün sosial-iqtisadi xidmətlər ən yüksək texnologiyalarla qurulub. Kəndin enerji təminatı ekoloji cəhətdən tam təmizdir, Həkəri çayı üzərində 3 turbindən ibarət Arximed tipli su elektrik stansiyası və gücü 325 kilovat olan günəş panelləri quraşdırılıb. Evlərdə istilik xərclərini azaltmaq üçün kombinə edilmiş sistemlər, mətbəx sobası və yüksək səmərəli elektrod boilerlər var. Suyun isidilməsi üçün günəş kollektorlarından, çirkab suların təmizlənməsi üçün bioloji təmizləmə qurğularından istifadə olunur.
Kənddə GPON texnologiyası ilə yüksək sürətli internet, İP TV, video müşahidə kameraları, ağıllı işıq dirəkləri və avtomatik hava müşahidə stansiyaları var. Əhalinin rahatlığı üçün Tele-səhiyyə, E-təhsil və digər elektron xidmətlər, ASAN, DOST, məktəb, bağça, tibb məntəqəsi, kiçik və orta biznesə dəstək mərkəzləri fəaliyyət göstərir. Ümumi sahəsi 2 hektardan çox olan park salınıb. Bütün bunlar onu göstərir ki, Ağalı kəndi sadəcə yaşayış məntəqəsi deyil, gələcəyin kənd modelidir. Nazirlər Kabinetinin 30 oktyabr 2023-cü ildə təsdiq etdiyi Baş Plana əsasən şəhərin 2040-cı ilədək inkişafı üçün böyük vəsait ayrılıb. 2022-ci ildə təməli qoyulan 104 mənzilli ilk yaşayış kompleksinin açılışı 2026-cı ildə olub. Kompleksin ərazisi 2 hektardan artıqdır və burada 12 bina, o cümlədən 4 ədəd üçmərtəbəli 60 mənzilli və 8 ədəd ikimərtəbəli 44 mənzilli evlər tikilib.
Azad Zəngilanın qonaqları
Zəngilan Beynəlxalq Hava Limanı bu bölgənin inkişafı üçün mühüm faktora çevrilib. Zəngəzur dəhlizinin hava infrastrukturu ilə gücləndirilməsi baxımından hava limanı strateji əhəmiyyət daşıyır. Eyni zamanda Horadiz-Zəngilan-Ağbənd dəmir yolunun inşası da böyük strateji əhəmiyyətə malikdir. Bu yol azad edilmiş torpaqlara həm vətəndaşların qayıdışı, həm də yüklərin daşınması üçün tarixi imkan yaradır. Artıq yolun birinci mərhələsi üzrə böyük hissə tamamlanıb və Araz İqtisadi Zonası Sənaye Parkına yüklər daşınır. Horadiz-Cəbrayıl-Zəngilan-Ağbənd avtomobil yolunun uzunluğu 126,3 kilometrdir, illik buraxılış qabiliyyəti 15 milyon tondur və layihənin 2026-cı ilin ikinci yarısında yekunlaşdırılması nəzərdə tutulur. İşğal dövründə tövlə kimi istifadə olunan XIX əsrə aid Zəngilan şəhər məscidi Heydər Əliyev Fondu tərəfindən bərpa olunub. Bərpa-tikinti işləri çərçivəsində tarixi məscid konservasiya edilib və onun yanında düzbucaqlı planlı, iki minarəli yeni məscid inşa edilib. Yeni məsciddə 220 və 100 nəfərlik ibadət zalları yaradılıb. Rayonun gələcəyi üçün turizm və kənd təsərrüfatı da unudulmayıb. 2024-cü il mayın 18-də Ağalı kəndində, Həkəri çayı vasitəsilə yaradılmış süni gölün sahilində “Ağalı” hoteli açılıb. Zəngilan İstirahət Kompleksində 111 nömrəli hotelin təməli 2023-cü il mayın 4-də qoyulub. 2026-cı il mayın 10-da isə “Zəngilan City Park Hotel”in təməli qoyulub. Kənd təsərrüfatı sahəsində isə “Dost Aqropark” layihəsi həyata keçirilir. Azərbaycan və Türkiyə şirkətlərinin birgə layihəsi olan bu kompleks tam başa çatdıqda 500 nəfəri işlə təmin edəcək və 100 milyon dollar sərmayə qoyulacaq. Layihənin birinci mərhələsində 5200 kvadratmetr qapalı, 113 min kvadratmetr açıq tipli heyvandarlıq kompleksləri, sosial obyektlər, kafe, kinoteatr tikilib.
Beləliklə, Zəngilan bu gün sadəcə işğaldan azad edilmiş bir rayon deyil, Azərbaycan dövlətinin qüdrətinin, iradəsinin və gələcəyə olan inamının canlı rəmzidir. Burada hər daş, hər tikilən ev, hər qayıdan ailə 30 illik həsrətin sonu və Böyük Qayıdışın əbədi başlanğıcıdır.
Mahnur Hüseynova
Xırdalan şəhər 8 nömrəli tam orta ümumtəhsil məktəbinin direktoru
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!