4-07-2023, 16:19
Azərbaycan və Pakistan nümayəndələri Fəaliyyət Planını imzaladı
Əmək və Əhalinin Sosial Müdafiəsi Nazirliyində ölkəmizdə səfərdə olan Pakistan İslam Respublikasının xaricdə yaşayan pakistanlılarla iş və insan resurslarının inkişafı naziri Sacid Hüsseyn Turinin rəhbərlik etdiyi nümayəndə heyəti ilə görüş olub. Nazirlikdən verilən məlumata görə, əmək və əhalinin sosial müdafiəsi naziri Sahil Babayev Azərbaycan və Pakistan arasında dostluq, qardaşlıq və strateji tərəfdaşlığa əsaslanan yüksək səviyyəli münasibətlərin olduğunu, iki ölkənin dövlət başçılarının səyləri ilə bu əlaqələrin daim inkişaf etdiyini vurğulayıb. Pakistanın Azərbaycanın ərazi bütövlüyünə daimi dəstəyindən, xüsusilə 44 günlük Vətən müharibəsində ölkəmizə, haqq savaşımıza ədalətli mövqedən göstərdiyi siyasi dəstəkdən məmnunluq ifadə olunub. İki ölkənin beynəlxalq təsisatlar çərçivəsində də sıx əməkdaşlıq etdiyi, Azərbaycan və Pakistan arasında sosial sahədə əlaqələrin genişlənməkdə olduğu diqqətə çatdırılıb. Ötən ilin may ayında Azərbaycanın Əmək və Əhalinin Sosial Müdafiəsi Nazirliyi ilə Pakistanın Xaricdə Yaşayan Pakistanlılarla İş və İnsan Resurslarının İnkişafı Nazirliyi arasında əmək, məşğulluq və sosial müdafiə sahələrində əməkdaşlıq haqqında Anlaşma Memorandumunun, həmçinin son illər Əmək Bazarı və Sosial Müdafiə Məsələləri üzrə Milli Observatoriya ilə Pakistanın Qlobal və Strateji Araşdırmalar Mərkəzi arasında əməkdaşlıq sənədinin imzalandığı bildirilib. Azərbaycanda son illər aparılan sosial islahatlar, DOST konsepsiyası, sosial sahədə rəqəmsal platformaların, proaktiv xidmətlərin yaradılması istiqamətində əldə olunan müsbət təcrübə barədə məlumat verilib. Əmək və sosial müdafiə sahəsində Pakistanla ikitərəfli əlaqələrin inkişafı, fəal təcrübə mübadiləsi üçün böyük potensial olduğu, DOST təcrübəsini Pakistanla bölüşməyə hazır olduğumuz vurğulanıb. İslam Əməkdaşlıq Təşkilatının Bakıda yaradılacaq Əmək Mərkəzinin Təşkilata üzv ölkələr, o cümlədən Azərbaycanla Pakistan arasında da əlaqələrin inkişafına mühüm töhfə verəcəyi qeyd olunub. S.H.Turi ölkəsinin Azərbaycanla əlaqələrin inkişafına böyük önəm verdiyini, ölkəmizə səfəri ilə bağlı xoş təəssüratlarını, əmək, məşğulluq, sosial müdafiə sahəsində ikitərəfli münasibətlərin genişləndirilməsinin əhəmiyyətini diqqətə çatdırıb. Görüşün yekunu olaraq Azərbaycanın Əmək və Əhalinin Sosial Müdafiəsi Nazirliyi və Pakistanın Xarici Pakistanlılar və İnsan Resurslarının İnkişafı Nazirliyi arasında əmək, məşğulluq və sosial müdafiə sahələrində əməkdaşlıq haqqında Anlaşma Memorandumunun həyata keçirilməsinə dair 2023-2024-cü illər üçün Fəaliyyət Planı imzalanıb. Sənəddə əmək bazarının monitorinqi və proqnozlaşdırılması, məşğulluq, qeyri-rəsmi məşğulluğun qarşısının alınması, əlilliyi olan şəxslərin sosial və məşğulluq problemlərinin həlli, onlar üçün xüsusi peşə hazırlığı və peşə istiqamətləri üzrə proqramların hazırlanması, əməyin mühafizəsi və əmək münasibətlərinin tənzimlənməsinə dair qanunvericiliyin tətbiqi, əmək, məşğulluq və sosial müdafiə sahələrində İKT-nin tətbiqi və s. istiqamətlərdə məlumat və təcrübə mübadilələrinin aparılması əksini tapır.
4-07-2023, 16:06
İdmançımız Avropa birinciliyində bir qızıl və iki gümüş medal qazandı
Azərbaycanın yeniyetmə ağırlıqqaldıranı Amin Osmanov Moldovanın paytaxtı Kişineuda 15-17 yaşlı oğlan və qızlar arasında keçirilən Avropa birinciliyində bir qızıl və iki gümüş medal qazanıb. Ağır Atletika Federasiyasından verilən məlumata görə, yaşı 17-yə qədər olan oğlanlar arasında 55 kq çəki dərəcəsində mübarizə aparan idmançı birdən qaldırma hərəkətində 99 kq nəticə göstərib və bütün rəqiblərini üstələyib. "Göyəzən" Ağır Atletika Klubunun təmsilçisi təkanla qaldırma hərəkətində də uğurlu çıxış edib. O, 117 kq-ı başı üzərinə qaldırıb və bu hərəkətdə gümüş medala sahib çıxıb. Toplam 216 kq (99+117) nəticə göstərən Osmanov yekun sıralamada da ikinci yeri tutub.
Qeyd edək ki, iyulun 10-dək davam edəcək yarışda 40-a yaxın ölkədən 356 atlet (165 qız və 191 oğlan) iştirak edəcək.
4-07-2023, 15:51
İrandakı səfirliyimizə hücumls bağlı istintaq tamamlandı
“Yanvar ayında Azərbaycanın Tehrandakı səfirliyinə hücum iki ölkə arasında dostluq münasibətlərini pozan əsassız, acı və bədbəxt hadisə idi”. Bu barədə İranın məhkəmə və ədliyyə sisteminin sözçüsü Məsud Satayşi mətbuat konfransında Azərbaycan səfirliyinə hücumla bağlı ədliyyə orqanlarının fəaliyyətindən danışarkən bildirib. Onun sözlərinə görə, hücumun əsas səbəbkarı və ya rolu olan hər hansı şəxs qəti, sərt və qanuna müvafiq qaydada cəzalandırılacaq. “Geniş araşdırmalardan sonra işin müxtəlif ölçülərinin müəyyənləşdiyi məqama gəldik və istintaq yekunlaşdı. İş Azərbaycan hökumətinin əməkdaşlığı ilə yekun qərara gətirib çıxaracaq. Sizi əmin edirik ki, ölkənin daxili təhlükəsizliyini pozmaq istəyən hər kəslə məhkəmə sistemi məşğul olacaq”, - deyə o bildirib.
4-07-2023, 15:22
Elza Seyidcahan Azərbaycan Yazıçılar Birliyinin üzv oldu
Müğənni-bəstəkar Elza Seyidcahan Azərbaycan Yazıçılar Birliyinin (AYB) üzvlüyünə qəbul edilib. Bu barədə Xalq yazıçısı, AYB-nin sədr müavini Çingiz Abdullayev məlumat verib. Onun sözlərinə görə, AYB-yə dəvət olunan E.Seyidcahana üzvlük bileti təqdim edilib. “Bu gün Elza Seyidcahan üzvlük vəsiqəsi alıb” - deyə Xalq yazıçısı yazıb.
4-07-2023, 15:03
Gürcü səfir Ukrayna XİN-ə çağırıldı
Gürcüstan səfiri Ukrayna Xarici İşlər Nazirliyinə (XİN) çağırılıb. Bu barədə Ukrayna XİN-in mətbuat xidməti məlumat yayıb. Bildirilib ki, bu gün səfir Georgi Zakaraşvili Gürcüstanın sabiq prezidenti Mixail Saakaşvilinin vəziyyətinin pisləşməsi ilə bağlı Ukrayna prezidentinin etirazının çatdırılması üçün XİN-ə dəvət olunub. Gürcü diplomatın diqqətinə çatdırılıb ki, Ukrayna vətəndaşı olan Saakaşviliyə qarşı belə münasibət qətiyyən yolverilməzdir. Həmçinin qeyd olunub ki, Gürcüstan hakimiyyəti Ukrayna vətəndaşına qarşı qeyri-insani hərəkəti dayandırmalıdır. Bununla əlaqədar Gürcüstanın Ukraynadakı səfiri Georgi Zakaraşvilinin mövcud vəziyyətin həlli yollarının tapılması istiqamətində məsləhətləşmələr aparmaq üçün Tbilisiyə getməsi tövsiyə olunub. Bundan əlavə, Kiyev Saakaşvilinin müalicəsi üçün Ukraynaya aparılması məsələsini təcili müzakirə etməyə hazır olduğunu açıqlayıb.
4-07-2023, 14:44
Hakan Fidan bir sıra məsələlərə münasibət bildirdi
"Stokholmda Qurani-Kərimə qarşı edilən alçaq hücumu və xəbərdarlıqlarımıza baxmayaraq, bu hücuma göz yumulmasını qətiyyətlə pisləyirik". Bunu Türkiyənin XİN başçısı Hakan Fidan deyib. İsrail-Fələstin münaqişəsi ilə bağlı o qeyd edib ki, bölgədə sülhün bərqərar olması üçün səylər davam etdiriləcək. "Türkiyə və Misir öz bölgələrində iki güclü qardaş ölkədir. Tarixi, coğrafi, mədəni və inanc bağlarına görə bir-birindən ayrı olması doğru deyil. Bu gün verdiyimiz ortaq qərarla qarşılıqlı səfir təyinatı gerçəkləşdirdik. İndi normallaşmanın mühüm mərhələsini geridə qoyuruq. Siyasi və iqtisadi sahədə əlaqələrimiz böyük sürətlə davam edəcək", - nazir vurğulayıb. "İsveçin münasibəti NATO-ya problemlər gətirən münasibətdir. “İsveçin NATO-ya üzvlüyü yükdür, yoxsa fayda” məsələsi indi daha çox müzakirələrə açıqdır. Terror təşkilatları küçələrdə hər cür aksiyalar edə, pul yığa, münaqişə zonalarında insan alveri edə bilər. İsveç ev tapşırığını edirsə, başqa alternativlər də var. Bununla belə, müqəddəs dəyərləri təhqir etməyə imkan verən atmosfer və İsveçin təhlükəsizliklə bağlı təxribatların qarşısını ala bilməməsi bizi daha çox düşündürür", - o əlavə edib.
4-07-2023, 14:21
İran Şanxay Əməkdaşlıq Təşkilatının üzvü oldu - Rəsmi
İran rəsmi şəkildə Şanxay Əməkdaşlıq Təşkilatının (ŞƏT) üzvlüyünə daxil olub. Bu barədə təşkilatın bu gün keçirilən virtual sammitində qərar qəbul edilib. Beləliklə, ŞƏT-ə üzv olan ölkələr Qazaxıstan, Hindistan, Çin, Qırğızıstan, Pakistan, Rusiya, Tacikistan, Özbəkistan və İrandır.
4-07-2023, 13:42
Ucqar kəndlərdə də elektron resept tətbiq olunacaq
Elektron reseptin proqram təminatının 95 %-i hazırdır. Bunu Milli Məclisin Səhiyyə komitəsinin iclasında iştirak edən səhiyyə nazirinin müavini Rasim İsmayılov bildirib. “İlk olaraq Bakı və bir neçə region sistemə qoşub. Bundan sonra ucqar kəndlərdə də bu tətbiqin istifadəsində israrlıyıq”, - deyə o vurğulayıb.
4-07-2023, 13:40
Prezident bu avtomobil yolunun tikintisiylə bağlı Sərəncam imzaladı
Prezident İlham Əliyev Zərdab rayonunun Ağabağı–Kəndəbil–Şıxbağı–Nəzəralılı avtomobil yolunun tikintisi ilə bağlı tədbirlər haqqında Sərəncam imzalayıb. Sərəncamla dörd min nəfər əhalinin yaşadığı 4 yaşayış məntəqəsini birləşdirən Ağabağı–Kəndəbil–Şıxbağı–Nəzəralılı avtomobil yolunun tikintisi məqsədilə Azərbaycan Respublikasının 2023-cü il dövlət büdcəsində nəzərdə tutulmuş Azərbaycan Respublikası Prezidentinin ehtiyat fondundan Azərbaycan Avtomobil Yolları Dövlət Agentliyinə 6,4 milyon manat ayrılıb.
4-07-2023, 13:27
Qiymətlər hər bir ölkəyə görə fərqli təyin olunur - Nazir müavini
Səhiyyə Nazirliyinin qarşıya qoyduğu bir neçə məsələ var. Bunu Milli Məclisin Səhiyyə komitəsinin iclasında çıxış edən səhiyyə nazirinin müavini Rasim İsmayılov deyib. “Bizim hədəfimiz Azərbaycandakı dərman vasitələrinin qiymətinin bütün dünya ölkələri ilə müqayisədə ən aşağı olmasıdırmı, yoxsa əlçatan olmasıdır? Qeyd edim ki, qiymətlər hər bir ölkəyə görə fərqli təyin olunur. Daxili istehsalı olan ölkəyə təyin edilən qiymətlər başqa olur. O zaman dərman vasitələrinin qiymətinin aşağı salınması ilə bağlı necə fikir demək olar? Bu kimi məsələlərə aydınlıq gətirilməlidir”, - deyə o bildirib.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Zəngilanın dirçəliş
və qayıdış dövrü
Azərbaycan tarixinin ən şanlı səhifəsi olan Vətən müharibəsi bizə təkcə torpaqlarımızı deyil, ləyaqətimizi, qürurumuzu qaytardı. Həmin qürurun ən parlaq ünvanlarından biri də Zəngilandır. 2020-ci il sentyabrın 27-də başlanan Zəfər yürüşü zamanı şərqdən, Cəbrayıl istiqamətindən düşmənə vurulan sarsıdıcı zərbələr nəticəsində Azərbaycan Ordusu 30-dan çox yaşayış məntəqəsini azad edərək Zəngilanın inzibati hüdudlarına çatdı. Oktyabrın 18-də rayonun tam azad edilməsi uğrunda genişmiqyaslı əməliyyata start verildi və cəmi iki gün sonra, oktyabrın 20-də Müzəffər Ali Baş Komandan, Prezident İlham Əliyev xalqa müraciətində Havalı, Zərnəli, Məmmədbəyli, Həkəri, Şərifan, Birinci Muğanlı kəndlərinin və Zəngilan şəhərinin işğaldan azad edildiyini elan etdi. Beləliklə, Zəngilan döyüşləri nəticəsində 1 şəhər, 4 qəsəbə və 49 kənd düşmən tapdağından xilas edildi və bununla da 132 kilometrlik Azərbaycan-İran dövlət sərhədi tam bərpa olundu. İşğalın bitməsindən dərhal sonra sərhəd boyunca zəruri istehkam və mühafizə işlərinə başlanıldı.
Qərbi zəngəzurlular Zəngilan şəhidliyində
Bu tarixi qələbənin əbədiləşdirilməsi üçün 2020-ci il noyabrın 26-da “Zəngilanın azad olunmasına görə” medalı təsis edildi və 6974 hərbi qulluqçumuz bu medalla təltif olundu. Prezidentin 31 iyul 2023-cü il tarixli Sərəncamı ilə isə 20 oktyabr tarixi Zəngilan şəhəri günü kimi rəsmiləşdirildi. Zəngilanın azad olunması Böyük Qayıdışın başlanğıcı oldu. Bu gün dövlətin ən böyük hədəfi həmin torpaqları yenidən həyatla doldurmaqdır. 2026-cı il 1 oktyabr tarixinə olan məlumata görə, Zəngilan şəhərində 84 ailə, yəni 339 nəfər, Ağalı kəndində 234 ailə, yəni 1017 nəfər, Məmmədbəyli kəndində isə 179 ailə, yəni 903 nəfər öz doğma ocağına qayıdıb. Köçürülən ailələr peşə və bacarıqlarına uyğun olaraq müxtəlif dövlət qurumlarında, tikinti şirkətlərində, tikiş fabrikində və digər sahələrdə işlə təmin edilirlər.Bu qayıdışın dünyaya nümunə olan simvolu isə Ağalı kəndidir. Ağalı təkcə Azərbaycanda deyil, dünyanın ən müasir kəndlərindən biri hesab olunur. Burada “ağıllı kənd” konsepsiyası tam şəkildə tətbiq edilib. Dayanıqlı inkişafın təmin olunması üçün sosial-iqtisadi xidmətlər ən yüksək texnologiyalarla qurulub. Kəndin enerji təminatı ekoloji cəhətdən tam təmizdir, Həkəri çayı üzərində 3 turbindən ibarət Arximed tipli su elektrik stansiyası və gücü 325 kilovat olan günəş panelləri quraşdırılıb. Evlərdə istilik xərclərini azaltmaq üçün kombinə edilmiş sistemlər, mətbəx sobası və yüksək səmərəli elektrod boilerlər var. Suyun isidilməsi üçün günəş kollektorlarından, çirkab suların təmizlənməsi üçün bioloji təmizləmə qurğularından istifadə olunur.
Kənddə GPON texnologiyası ilə yüksək sürətli internet, İP TV, video müşahidə kameraları, ağıllı işıq dirəkləri və avtomatik hava müşahidə stansiyaları var. Əhalinin rahatlığı üçün Tele-səhiyyə, E-təhsil və digər elektron xidmətlər, ASAN, DOST, məktəb, bağça, tibb məntəqəsi, kiçik və orta biznesə dəstək mərkəzləri fəaliyyət göstərir. Ümumi sahəsi 2 hektardan çox olan park salınıb. Bütün bunlar onu göstərir ki, Ağalı kəndi sadəcə yaşayış məntəqəsi deyil, gələcəyin kənd modelidir. Nazirlər Kabinetinin 30 oktyabr 2023-cü ildə təsdiq etdiyi Baş Plana əsasən şəhərin 2040-cı ilədək inkişafı üçün böyük vəsait ayrılıb. 2022-ci ildə təməli qoyulan 104 mənzilli ilk yaşayış kompleksinin açılışı 2026-cı ildə olub. Kompleksin ərazisi 2 hektardan artıqdır və burada 12 bina, o cümlədən 4 ədəd üçmərtəbəli 60 mənzilli və 8 ədəd ikimərtəbəli 44 mənzilli evlər tikilib.
Azad Zəngilanın qonaqları
Zəngilan Beynəlxalq Hava Limanı bu bölgənin inkişafı üçün mühüm faktora çevrilib. Zəngəzur dəhlizinin hava infrastrukturu ilə gücləndirilməsi baxımından hava limanı strateji əhəmiyyət daşıyır. Eyni zamanda Horadiz-Zəngilan-Ağbənd dəmir yolunun inşası da böyük strateji əhəmiyyətə malikdir. Bu yol azad edilmiş torpaqlara həm vətəndaşların qayıdışı, həm də yüklərin daşınması üçün tarixi imkan yaradır. Artıq yolun birinci mərhələsi üzrə böyük hissə tamamlanıb və Araz İqtisadi Zonası Sənaye Parkına yüklər daşınır. Horadiz-Cəbrayıl-Zəngilan-Ağbənd avtomobil yolunun uzunluğu 126,3 kilometrdir, illik buraxılış qabiliyyəti 15 milyon tondur və layihənin 2026-cı ilin ikinci yarısında yekunlaşdırılması nəzərdə tutulur. İşğal dövründə tövlə kimi istifadə olunan XIX əsrə aid Zəngilan şəhər məscidi Heydər Əliyev Fondu tərəfindən bərpa olunub. Bərpa-tikinti işləri çərçivəsində tarixi məscid konservasiya edilib və onun yanında düzbucaqlı planlı, iki minarəli yeni məscid inşa edilib. Yeni məsciddə 220 və 100 nəfərlik ibadət zalları yaradılıb. Rayonun gələcəyi üçün turizm və kənd təsərrüfatı da unudulmayıb. 2024-cü il mayın 18-də Ağalı kəndində, Həkəri çayı vasitəsilə yaradılmış süni gölün sahilində “Ağalı” hoteli açılıb. Zəngilan İstirahət Kompleksində 111 nömrəli hotelin təməli 2023-cü il mayın 4-də qoyulub. 2026-cı il mayın 10-da isə “Zəngilan City Park Hotel”in təməli qoyulub. Kənd təsərrüfatı sahəsində isə “Dost Aqropark” layihəsi həyata keçirilir. Azərbaycan və Türkiyə şirkətlərinin birgə layihəsi olan bu kompleks tam başa çatdıqda 500 nəfəri işlə təmin edəcək və 100 milyon dollar sərmayə qoyulacaq. Layihənin birinci mərhələsində 5200 kvadratmetr qapalı, 113 min kvadratmetr açıq tipli heyvandarlıq kompleksləri, sosial obyektlər, kafe, kinoteatr tikilib.
Beləliklə, Zəngilan bu gün sadəcə işğaldan azad edilmiş bir rayon deyil, Azərbaycan dövlətinin qüdrətinin, iradəsinin və gələcəyə olan inamının canlı rəmzidir. Burada hər daş, hər tikilən ev, hər qayıdan ailə 30 illik həsrətin sonu və Böyük Qayıdışın əbədi başlanğıcıdır.
Mahnur Hüseynova
Xırdalan şəhər 8 nömrəli tam orta ümumtəhsil məktəbinin direktoru
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!