18-07-2023, 15:30
31 partiya öz təşəbbüsü ilə ləğv olunmaları barədə bəyanat verdi
Azərbaycan Respublikasının Prezidenti İlham Əliyevin iradəsi ilə ölkəmizdə siyasi sistemin müasir çağırışlara və milli maraqlara uyğun təkmilləşdirilməsi, partiyalararası dialoq prosesinin dərinləşdirilməsi və bu sahədə münasibətlərin yeni konfiqurasiya şəraitində qurulması ilə bağlı ardıcıl tədbirlər görülür.
Ədliyyə Nazirliyindən verilən məlumata görə, bu məqsədlə beynəlxalq təcrübə öyrənilməklə siyasi partiyaların fəaliyyətini tənzimləyən yeni qanun layihəsi hazırlanıb və geniş ictimai müzakirələr keçirilməklə qəbul edilib.
“Siyasi partiyalar haqqında” Qanun ölkədə həyata keçirilən demokratik islahatların növbəti təzahürü olaraq siyasi partiyaların fəaliyyətinin səmərəli qurulmasına, daha sağlam siyasi mühitin formalaşmasına və siyasi qüvvələr arasında qarşılıqlı faydalı dialoqun genişləndirilməsinə xidmət edir.
Yeni Qanuna əsasən partiyanın azı 5.000 üzvü olmalıdır və onlar üzvlərinin reyestrini Ədliyyə Nazirliyinə təqdim etməlidirlər. Bununla əlaqədar nazirlik tərəfindən normativ hüquqi aktların yeni Qanuna uyğunlaşdırılması istiqamətində və digər aidiyyəti tədbirlər həyata keçirilib.
Qanunun qüvvəyə mindiyi tarixdən ötən müddətdə 31 partiya öz təşəbbüsü ilə ləğv olunmaları barədə bəyanat verib. Bəyanatlarda bu qərarların verilməsi Azərbaycan Respublikası Prezidentinin təşəbbüsü ilə ölkədə həyata keçirilən hərtərəfli uğurlu islahatlar, təşviq olunan siyasi dialoq, bərqərar olunmuş siyasi sabitlik və milli həmrəylik mühiti, həmçinin Vətən müharibəsində əldə olunmuş Qələbə nəticəsində torpaqlarımızın işğaldan azad edilməsi ilə əlaqələndirilib. Digər 27 siyasi partiya isə üzvlərinin adı, soyadı, atasının adı, doğulduğu tarix, qeydiyyat ünvanı, qeydiyyatda olduğu partiyanın yerli təşkilatı və əlaqə telefon nömrəsini əks etdirən reyestrini Ədliyyə Nazirliyinə təqdim edib.
Nazirlik tərəfindən “Siyasi partiyalar haqqında” Qanuna əsasən partiyaların üzvlərinin reyestrinin qanunvericiliyin tələblərinə uyğunluğunun yoxlanılması zamanı onların bəzilərində bir sıra qüsurlar, o cümlədən – üzvləri olmayan, vəfat etmiş şəxslərin reyestrə daxil edilməsi, bəzi şəxslərin adlarının təkrarlanması və sair müəyyən olunub.
Bununla bağlı partiyalara müvafiq məlumat verilib, reyestrdə aşkar olunmuş çatışmazlıqların qanunla müəyyən edilmiş müddətdə aradan qaldırılmasının zəruriliyi diqqətə çatdırılıb.
Eyni zamanda Ədliyyə Nazirliyi tərəfindən bu sahədə tədbirlər davam etdirilir və partiyalara müraciət edilərək qüsurların aradan qaldırılması üçün lazımi yardımın göstərilməsi məqsədilə onlarla görüşlərin keçirilməsinə hazır olduğu bildirilib.
18-07-2023, 15:03
Ona görə də Baxmutu geri qaytarmalıyıq - Sırski
"Ukraynanın danılmaz üstünlüyü var - hərbi rəhbərliyin birliyi və əsgərlərin bir-birinə inamı".
Bunu Ukrayna Silahlı Qüvvələrinin Quru Qoşunları komandiri Aleksandr Sırski BBC-yə müsahibəsində söyləyib.
"Ukrayna qoşunlarının irəliləməsi həqiqətən də davam edir, lakin istədiyimiz qədər sürətlə deyil. Tez nəticələr əldə etmək istərdik, lakin bu, demək olar ki, mümkün deyil. Hərbi rəhbərliyimizin birliyi və əsgərlərimizin bir-birinə olan inamı ordumuzun gücüdür. Bu, yüksək rütbəli zabitlər komandanlıqdan uzaqlaşdırıldığı üçün daxili çəkişmələrdən əziyyət çəkən Rusiya hərbi iyerarxiyasından tamamilə fərqlidir", - o qeyd edib.
"Baxmutun qaytarılması şərəf məsələsidir. Baxmutu müdafiə edərkən çoxlu qardaşlarımızı, əsgərlərimizi itirdik... Ona görə də sadəcə onu geri qaytarmalıyıq. Kasset bombalarının döyüş meydanındakı bütün problemlərimizi həll edəcəyini deyə bilmərəm. Amma sursat artıq Ukraynaya gəlib və bir neçə gün ərzində istifadəyə hazır olacaq. Şərqdə ərazi minalarla və müdafiə maneələri ilə doludur. Rusiya qoşunlarının çoxlu dayaqları var", - deyə Sırski əlavə edib.
18-07-2023, 14:19
Mirzoyan Vyanaya səfər etdi
Ermənistanın xarici işlər naziri Ararat Mirzoyan Avstriyanın paytaxtı Vyanaya səfər edib.
Bu barədə Ermənistan XİN-in mətbuat katibi Ani Badalyan məlumat verib.
Səfər Avstriyanın xarici işlər naziri Aleksandr Şallenberq ilə təkbətək söhbətlə başlayıb.
Ardınca geniş tərkibdə görüş keçirilib və tərəflər mətbuata bəyanatlarla çıxış edib.
18-07-2023, 14:08
Avropanın taxıl sazişiylə bağlı mövqeyi vicdansızlıqdır - Peskov
"Avropa ölkələrinin taxıl müqaviləsi ilə bağlı mövqeyini vicdansızlıq adlandırmaq lazımdır". Bunu Kremlin sözçüsü Dmitri Peskov deyib.
"Moskva Krım körpüsünə hücumu Kiyevin təşkil etdiyinə şübhə etmir. Krım körpüsünün təhlükəsizliyinin gücləndirilməsi təklifi hələ də hazırlanır", - Peskov bildirib.
O, həmçinin qeyd edib ki, Rusiya BMT baş katibi Antonio Quterreşin Avropanı taxıl müqaviləsi üzrə öhdəliklərini yerinə yetirməyə inandırmaq cəhdlərini yüksək qiymətləndirir.
"Rusiya taxıl sazişindən çıxdıqdan sonra ehtiyacı olan ölkələr üçün Ukrayna taxılını pulsuz əvəz etməyə hazırdır. Rusiyadan Afrikaya taxıl tədarükü iyulun sonunda Sankt-Peterburqda keçiriləcək sammitdə müzakirə olunacaq. Putin hələ Ərdoğanla təmasları planlaşdırmır", - Kreml sözçüsü vurğulayıb.
18-07-2023, 13:57
İranda havanın çirklənməsiylə bağlı dövlət qurumları fəaliyyətini dayandırdı
İranın Bocnurd və Məşhəd şəhərlərində havanın həddən artıq çirklənməsi səbəbindən dövlət qurumlarının fəaliyyəti dayandırılıb.
Bu barədə Şimali Xorasanın böhranların idarə edilməsi üzrə rəhbəri Qulam Rıza Şefik bildirib.
“Havanın çirkliliyinin 300 mikroqram/kubmetri keçməsi səbəbindən bu gündən etibarən Bocnurdda dövlət qurumlarının fəaliyyəti dayandırılacaq”, - o deyib.
Məşhəd şəhərində də havanın çirklənməsi ilə əlaqədar dövlət müəssisələri və məktəblər bağlanıb.
18-07-2023, 13:40
Prezident Bərzani ilə təkbətək görüşdü
İyulun 18-də Azərbaycan Respublikasının Prezidenti İlham Əliyevin ölkəmizdə işgüzar səfərdə olan İraq Kürdüstan Regionunun başçısı Neçirvan Bərzani ilə təkbətək görüşü olub.
Əvvəlcə birgə foto çəkdirildi.
Söhbət zamanı Prezident İlham Əliyev ilə Neçirvan Bərzani arasında bu ilin fevralında Münxendə keçirilən görüş xatırlandı. Həmin görüşdə əməkdaşlığın əsas istiqamətlərinin müəyyənləşdirilməsi ilə bağlı səmərəli müzakirələrin aparıldığı qeyd olundu, Neçirvan Bərzaninin səfərinin əməkdaşlığımızın dinamikasının artması işinə töhfə verəcəyi bildirildi.
Sonra görüş nümayəndə heyətlərinin iştirakı ilə davam etdi.
Görüşdə dövlətimizin başçısı İraq Prezidenti Əbdüllətif Camal Rəşidin Qoşulmama Hərəkatının Zirvə toplantısı çərçivəsində bu ilin martında Azərbaycana səfəri və ikitərəfli əlaqələrimizin inkişafına dair onunla apardığı müzakirələri, həmçinin İraq Baş nazirinin müavini, xarici işlər naziri Fuad Hüsseynin ölkəmizə səfəri zamanı keçirdiyi görüşü və əlaqələrimizin inkişafı ilə əlaqədar müzakirələri məmnunluqla xatırlatdı.
Söhbət zamanı İraq Kürdüstan Regionu ilə iqtisadi-ticari əlaqələrin genişləndirilməsi, sərmayələr, enerji sahəsində əməkdaşlıq, turizm imkanlarının artırılması, birbaşa aviareyslərin açılması və digər məsələlərlə bağlı müzakirələr aparıldı.
18-07-2023, 13:34
Hakan Fidan rusiyalı həmkarıyla telefon danışığı apardı
Türkiyənin xarici işlər naziri Hakan Fidanla Rusiyanın xarici işlər naziri Sergey Lavrov arasında telefon danışığı olub. Bu barədə "TRT Haber" məlumat yayıb.
Söhbət zamanı taxıl sazişinin gələcəyi və meşə yanğınlarında istifadə olunacaq yanğınsöndürmə təyyarələrinin Rusiyadan alınması müzakirə edilib.
Qeyd edək ki, ötən gün Rusiya Qara dəniz vasitəsilə Ukraynadan taxıl ixrac etməyə imkan verən sazişdə iştirakını dayandırıb. Kreml sazişin Rusiya ilə bağlı hissəsinin yerinə yetirilmədiyini iddia edib və bu səbəbdən sazişdən çıxdığını açıqlayıb. Bununla belə Rusiya prezidentinin mətbuat katibi Dmitri Peskov Moskvanın sazişə qayıtması şərtini açıqlayıb. Ötən gün mətbuata açıqlama verən Putinin sözçüsü deyib ki, sazişin Rusiya ilə bağlı hissəsi həyata keçirilən zaman Moskva dərhal taxıl sazişinə qayıdacaq.
18-07-2023, 13:12
Xocalı qatili həbsdən evə buraxıldı
Xankəndidəki qanunsuz rejimin “təhlükəsizlik şurasının keçmiş katibi” Vitali Balasanyan həbsdən evə buraxılıb. Bu barədə onun vəkili Rafael Martirosyan bildirib. Məlumata görə, Qarabağdakı qondarma məhkəmə Balasanyanın həbsi ilə bağlı vəsatəti rədd edib və onun azad olunmasına qərar verib.
Martirosyan bildirib ki, Balasanyan hazırda xəstəxanada müalicəsini davam etdirir.
Qeyd edək ki, iyulun 14-də Vitali Balasanyan və oğlu kredit dələduzluğunda ittiham olunaraq saxlanmışdı. Saxlanılan zaman döyülən erməni generalın səhhətində problemlər yaranmışdı.
Xatırladaq ki, Balasanyan bir müddət qondarma qurumun "təhlükəsizlik şurasının katibi" olub. O, Xocalı qatili kimi tanınır.
18-07-2023, 12:58
Ankarada 5 nəfərin xəsarətiylə nəticələnən partlayış baş verdi
Türkiyənin paytaxtı Ankara şəhərində partlayış baş verib. Bu barədə "TRT Haber" məlumat yayıb.
Belə ki, "Kayaş MKE"nin kapsula fabrikində naməlum səbəbdən partlayış olub. İlkin məlumatlara görə, hadisə nəticəsində 1-i ağır olmaqla, 4 nəfər xəsarət alıb.
Hazırda partlayışın səbəbləri araşdırılır.
18-07-2023, 12:49
Türkiyənin vilayətlərinə yayılan yanğın yatırıldı
Son günlər Türkiyədə davam edən və yüzlərlə hektar sahəyə yayılan meşə yanğınlarının bir hissəsi nəzarət altına alınıb. Bu barədə "Ihlas" agentliyi məlumat yayıb. Bildirilib ki, ölkənin şimal-qərbində yerləşən Çanakkaledə yanğının söndürülməsi 40 saata yaxındır davam edir. Yanğınsöndürmə əməliyyatına 20-dən çox aviasiya vasitəsi, onlarla xüsusi texnika və 500-dən çox yanğınsöndürən cəlb olunub. Digər məlumata görə, Türkiyənin Tekirdağ vilayətində baş verən yanğın artıq söndürülüb. Burada 300 hektardan çox meşə sahəsi yanıb. Hazırda Diyarbakır və Hatay vilayətlərində güclü meşə yanğınları davam edir. Hatayda isə yanğını iki sutkadan sonra nəzarət altına almaq mümkün olub. Bundan başqa, Mersin vilayətində də meşə yanğınları səngimək bilmir.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!