19-07-2023, 17:17
Ərdoğan qətərli həmkarına “TOGG” hədiyyə etdi
Türkiyə Prezidenti Rəcəb Tayyib Ərdoğanla Qətər əmiri Əl-Sani arasında ikitərəfli görüş olub.
Ərdoğan Qətər əmirinə Türkiyənin ilk yerli istehsalı olan elektrikli avtomobili TOGG hədiyyə edib.
Qeyd edək ki, TOGG 100 faiz Türkiyə tərəfindən layihələndirilib və bu layihə ölkənin sənaye mülkiyyətinə sahib qlobal marka yaratmaq məqsədi ilə həyata keçirilib.
Avtomobil daha öncə Azərbaycan Prezidenti İlham Əliyev, Özbəkistan Prezidenti Şavkat Mirziyoyev, Türkmənistan Prezidenti Serdar Berdiməhəmmədov və Səudiyyə Ərəbistanının vəliəhd şəhzadəsi Məhəmməd bin Salmana təqdim edilib.
19-07-2023, 17:03
Bolqarıstan Rusiyanın “Lukoil” şirkətində fəaliyyətini dayandırır
Bolqarıstan parlamenti Rusiyanın “Lukoil” şirkətinin Rosenets limanında fəaliyyətini dayandırmaq niyyətindədir.
Bu barədə ölkənin keçmiş baş naziri Kiril Petkov deyib.
O xatırladıb ki, Rusiya Bolqarıstanı “düşmən ölkə” elan edib.
"Biz "Lukoil"in Rosenets limanındakı konsessiyasına xitam verilməsi təklifi ilə çıxış edirik. Bu limana nəzarətlə bağlı həmişə şübhələr olub. Bizim məqsədimiz Şengenə qoşulmaqdır və bu, qeydolunan istiqamətdə böyük və aydın addımdır", - Petkov bildirib.
Qeyd edək ki, 2011-ci ildə Bolqarıstan və "Lukoil" şirkəti arasında Rosenets liman terminalının bir hissəsinin istifadəsinə dair müqavilə imzalanıb, 2022-ci ildə Bolqarıstanın müvəqqəti hökuməti konsessiya vaxtını 24 il uzadıb.
19-07-2023, 16:26
Erməni jurnalistlər Azərbaycana gələ bilərlər - XİN
Erməni əsilli jurnalistlərin Azərbaycana səfərinə məhdudiyyət qoyulmayıb.
Bunu Azərbaycan Xarici İşlər Nazirliyinin (XİN) Mətbuat xidməti idarəsinin rəisi Ayxan Hacızadə bildirib.
"Azərbaycan müxtəlif beynəlxalq tədbirlərə ev sahibliyi edir. Tədbirlər çərçivəsində müxtəlif media orqanlarında çalışan erməni əsilli jurnalistlərin ölkəmizə səfərləri təşkil olunub. Onların ölkəmizə səfəri növbəti mərhələlərdə də təşkil oluna bilər və heç bir məhdudiyyət qoyulmur. Bütün səfər edənlərin Azərbaycanın qanunlarına hörmət etməsi zəruri amillərdəndir. Bu istiqamətdə növbəti illərdə müsbət addımların atılması gözlənilir”, - deyə XİN rəsmisi qeyd edib.
Mətbuat Şurasının sədri Rəşad Məcid isə vurğulayıb ki, Ermənistan jurnalistləri Azərbaycana səfər etmək istəsələr, bu sahədə problem olmaz.
“Müxtəlif dövrlərdə Tbilisidə Azərbaycan və Ermənistan jurnalistlərinin görüşləri təşkil edilib. Azərbaycanda media azadlığı var və Azərbaycan qanunları çərçivəsində ölkəmizə gəlmək istəyən Ermənistan jurnalistləri üçün qapı açıqdır. Ermənistan jurnalistləri Azərbaycana səfər etmək istəsələr, problem olmaz”.
19-07-2023, 16:14
15-ə yaxın ölkədən 58 media nümayəndəsi siyahıdan silinib - XİN
Azərbaycanda yerli və xarici media nümayəndələrinin fəaliyyətinin təmin edilməsinə şərait yaradılır.
Bunu Azərbaycan Xarici İşlər Nazirliyinin (XİN) Mətbuat xidməti idarəsinin rəisi Ayxan Hacızadə bildirib.
“Bu, Azərbaycan Respublikasının qarşıya qoyduğu prioritetlərdən biridir. Amma buna baxmayaraq, müxtəlif illərdə bəzi xarici media nümayəndələri Azərbaycanın işğalda olmuş ərazilərinə səfərlər ediblər. Azərbaycan hökumətinin icazəsi olmadan onlar ərazilərimizə daxil olublar. Müxtəlif illərdə məlum olub ki, səfər bu şəxslərin məlumatsızlığı ilə bağlıdır. Həmin şəxslər Azərbaycan Respublikasının qanunvericiliyinə uyğun olaraq arzuolunmaz şəxs siyahısına daxil edilir. Amma bu il 15-ə yaxın ölkədən 58 media nümayəndəsi siyahıdan silinib", - deyə XİN rəsmisi vurğulayıb.
19-07-2023, 15:55
Macarıstan XİN-dən çağırış
Macarıstanın xarici işlər naziri Peter Siyarto kaset bombalarının Ukraynaya göndərilməsinə qarşı çıxıb.
O, bu barədə Ukraynanın “M1” kanalına müsahibəsində bildirib.
Nazirin sözlərinə görə, belə sursatlardan istifadə humanitar sahədə faciəvi nəticələrə səbəb ola bilər.
"Biz hamını kaset bombaları və hər hansı digər silahlar əvəzinə qonşu ölkəyə sülh gətirmək və insan həyatını xilas etmək üçün tədbirlər görməyə çağırırıq", - XİN rəhbəri qeyd edib.
19-07-2023, 15:29
İrilandiyanın Baş naziri Ukraynada səfərdədir
İrlandiyanın Baş naziri Leo Varadkar Ukraynada rəsmi səfərdədir.
O, Rusiya hərbi cinayətlərinin qurbanlarının xatirəsini yad etmək üçün Buçaya gedib.
Baş nazir Ukrayna Prezidenti Volodimir Zelenski ilə görüşəcək.
“İrlandiya hökumətinin başçısı Leo Varadkarı Ukraynada salamlayıram. Bu gün biz təhlükəsizlik, siyasi əməkdaşlıq, Ukrayna üçün ədalət və iqtisadi əməkdaşlıqla bağlı mühüm danışıqlar aparacağıq. İrlandiya neytral ölkə olsa da, bu neytrallıq biganəlik demək deyil və bu çox vacibdir. Bütün dəstəyə görə təşəkkür edirik!”, - V.Zelenski bildirib.
19-07-2023, 13:51
Bayden bizi III Dünya Müharibəsinə sürükləyir - Tramp
Yenidən ABŞ prezidenti seçilsəm, Ukraynaya hərbi dəstək üçün Avropa ölkələrindən silah ehtiyatlarının bərpasına görə təzminat ödənilməsində israrlı olacağam.
Bunu ABŞ-ın keçmiş prezidenti Donald Tramp deyib.
Tramp Avropa müttəfiqlərinin mərmi ehtiyatlarının tükənməsi səbəbindən Vaşinqtonun kasetli sursatları Ukraynaya ötürmək qərarını tənqid edib.
O bildirib ki, hakimiyyətdə olduğu dövrdə ABŞ ordusunu tamamilə yenidən qurub və ölkəsinin qlobal mövqeyini gücləndirib.
“İyirmi doqquz aydan sonra arsenallar boşaldı, ehtiyatlar tükəndi, xəzinə tükəndi, hərbi rütbələr boşaldı, ölkəmiz tamamilə alçaldıldı və korrupsioner, güzəştə getmiş prezidentimiz, fırıldaqçı Co Bayden bizi III Dünya Müharibəsinə sürükləyir",- deyə Tramp qeyd edib.
19-07-2023, 13:30
MİQ üzrə müsabiqənin imtahan nəticələri açıqlandı
Müəllimlərin işə qəbulu (MİQ) üzrə müsabiqənin test imtahanlarının nəticələri açıqlanıb.
Bu barədə Elm və Təhsil Nazirliyindən məlumat verilib.
Bildirilib ki, 11-15 iyul tarixlərində keçirilən müəllimlərin işə qəbulu (MİQ) üzrə müsabiqənin test imtahanlarının nəticələri namizədlərin şəxsi səhifələrinə göndərilib.
Qeyd edək ki, ümumi təhsil müəssisələrinə müəllimlərin işə qəbulu üzrə müsabiqənin bütün fənlər üzrə minimum tələbi 40 bal müəyyən olunub.
19-07-2023, 13:25
Fransa mindən çox etirazçını həbs etdi
Fransada iğtişaşlarda iştirak edən mindən çox şəxs həbs cəzasına məhkum edilib.
Bu barədə Fransanın ədliyyə naziri Erik Düpon-Moretti bildirib.
Onun sözlərinə görə, həbs cəzası verilən 1056 nəfərdən 742-si real müddətə məhkum edilib. Məhkəmədən sonra 600 nəfər cəzaçəkmə müəssisələrinə göndərilib.
DİN rəhbəri övladları iğtişaşlarda iştirak edən valideynlərin də cəzalandırılacağını diqqətə çatdırıb:
“Valideynlik hüququnu həyata keçirə bilən, lakin bunu etməyən insanlar uşaqların tərbiyəsini təhlükə altında qoyur. Cinayət məcəlləsində onları cəzalandırmaq imkanı verən maddə var”.
Qeyd edək ki, Fransada iyun ayının sonlarında və iyulun əvvəlində iğtişaşlar baş verib.
19-07-2023, 12:58
Vardanyan Avropa ölkələrinin birliyini tənqid etdi
Avropa İttifaqı Şurasının prezidenti Şarl Mişelin Qarabağ mesajı separatçıların ürəyincə olmayıb. Mişelin xüsusilə Ağdam-Xankəndi yolundan istifadə ilə bağlı Azərbaycanın təklifini dəstəkləməsi qondarma rejimi qıcıqlandırıb. Nəticədə arzuları puç olan təxribatçılar Mişeli və onun rəhbərlik etdiyi qurumu hədəf alaraq, hədyanlar yağdırmağa başlayıblar.
Qondarma rejimin “sabiq dövlət naziri”, Rusiyanın adamı kimi ad çıxaran Ruben Vardanyan twitter hesabında Avropa ölkələrinin birliyini "tənqid atəşinə" tutub.
Həddini aşan Vardanyan iddia edir ki, Avropa İttifaqı Azərbaycanın Ağdamdan keçən yoldan istifadə etmək təklifini bəyənməklə guya Qarabağın “blokada”sını qanuniləşdirir.
O, bir qədər də irəli gedərək, Mişelin mövqeyinin yeni problemlər yaradacağını, hətta hansısa "cinayətlərə" səbəb olacağını deyib.
Görünür, Ruben Vardanyanın Avropa İttifaqı ilə bağlı təxribatçı fikirlər səsləndirməsi Moskvanın tapşırığından irəli gəlir. Moskvanın Qarabağa göndərdiyi qondarma siyasətçinin bu cür destruktiv mövqe ortaya qoymaqla Brüssel danışıqlarına kölgə salmağı hədəflədiyi şübhə doğurmur. Məqsəd sülhü əngəlləmək, hazırki qeyri-müəyyən vəziyyətin davam etməsinə çalışmaq və Rusiya sülhməramlı qüvvələrinin Azərbaycan torpaqlarında qalmasına zəmin yaratmaqdır.
Rusiya Xarici İşlər Nazirliyi də bir neçə gün öncə təxminən eyni tezislərə əsaslanan bəyanat yaymışdı. Rusiya XİN-in açıqlamasına etirazını bildirən rəsmi Bakı Moskvanı üçtərəfli bəyanatın şərtlərinə əməl etməyə çağırıb.
"Rusiya Federasiyasının tərəf olduğu 2020-ci il üçtərəfli bəyanata zidd olaraq, Azərbaycan ərazisində mövcud olan erməni silahlı qüvvələrinin qalıqlarının hələ də tam olaraq çıxarılması təmin edilməyib. Bunun əksinə, bölgədə Rusiya sülhməramlı kontingentinin müşahidəsi altında erməni silahlı qüvvələrinə dəstək həyata keçirilir. Bununla yanaşı, Azərbaycanın qərb bölgələri ilə Naxçıvan Muxtar Respublikası arasında maneəsiz kommunikasiyaya müxtəlif bəhanələrlə maneçilik törədildiyi məlumdur", - XİN-nin məlumatında vurğulanıb.
Belə bir məqamda Vardanyan kimi uğursuz layihənin yenidən ortaya atılması təsadüfi hesab oluna bilməz. Erməni separatçılarının Avropaya dil uzatması yalnız Rusiyanın maraqlarına xidmət edə bilər. Odur ki, Rusiya rəhbərliyi Azərbaycan və Ermənistan arasında davam edən Brüssel sülh formatını "vurmaq" üçün öz əlaltısı olan Vardanyanı meydana çıxarıb.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Zəngilanın dirçəliş
və qayıdış dövrü
Azərbaycan tarixinin ən şanlı səhifəsi olan Vətən müharibəsi bizə təkcə torpaqlarımızı deyil, ləyaqətimizi, qürurumuzu qaytardı. Həmin qürurun ən parlaq ünvanlarından biri də Zəngilandır. 2020-ci il sentyabrın 27-də başlanan Zəfər yürüşü zamanı şərqdən, Cəbrayıl istiqamətindən düşmənə vurulan sarsıdıcı zərbələr nəticəsində Azərbaycan Ordusu 30-dan çox yaşayış məntəqəsini azad edərək Zəngilanın inzibati hüdudlarına çatdı. Oktyabrın 18-də rayonun tam azad edilməsi uğrunda genişmiqyaslı əməliyyata start verildi və cəmi iki gün sonra, oktyabrın 20-də Müzəffər Ali Baş Komandan, Prezident İlham Əliyev xalqa müraciətində Havalı, Zərnəli, Məmmədbəyli, Həkəri, Şərifan, Birinci Muğanlı kəndlərinin və Zəngilan şəhərinin işğaldan azad edildiyini elan etdi. Beləliklə, Zəngilan döyüşləri nəticəsində 1 şəhər, 4 qəsəbə və 49 kənd düşmən tapdağından xilas edildi və bununla da 132 kilometrlik Azərbaycan-İran dövlət sərhədi tam bərpa olundu. İşğalın bitməsindən dərhal sonra sərhəd boyunca zəruri istehkam və mühafizə işlərinə başlanıldı.
Qərbi zəngəzurlular Zəngilan şəhidliyində
Bu tarixi qələbənin əbədiləşdirilməsi üçün 2020-ci il noyabrın 26-da “Zəngilanın azad olunmasına görə” medalı təsis edildi və 6974 hərbi qulluqçumuz bu medalla təltif olundu. Prezidentin 31 iyul 2023-cü il tarixli Sərəncamı ilə isə 20 oktyabr tarixi Zəngilan şəhəri günü kimi rəsmiləşdirildi. Zəngilanın azad olunması Böyük Qayıdışın başlanğıcı oldu. Bu gün dövlətin ən böyük hədəfi həmin torpaqları yenidən həyatla doldurmaqdır. 2026-cı il 1 oktyabr tarixinə olan məlumata görə, Zəngilan şəhərində 84 ailə, yəni 339 nəfər, Ağalı kəndində 234 ailə, yəni 1017 nəfər, Məmmədbəyli kəndində isə 179 ailə, yəni 903 nəfər öz doğma ocağına qayıdıb. Köçürülən ailələr peşə və bacarıqlarına uyğun olaraq müxtəlif dövlət qurumlarında, tikinti şirkətlərində, tikiş fabrikində və digər sahələrdə işlə təmin edilirlər.Bu qayıdışın dünyaya nümunə olan simvolu isə Ağalı kəndidir. Ağalı təkcə Azərbaycanda deyil, dünyanın ən müasir kəndlərindən biri hesab olunur. Burada “ağıllı kənd” konsepsiyası tam şəkildə tətbiq edilib. Dayanıqlı inkişafın təmin olunması üçün sosial-iqtisadi xidmətlər ən yüksək texnologiyalarla qurulub. Kəndin enerji təminatı ekoloji cəhətdən tam təmizdir, Həkəri çayı üzərində 3 turbindən ibarət Arximed tipli su elektrik stansiyası və gücü 325 kilovat olan günəş panelləri quraşdırılıb. Evlərdə istilik xərclərini azaltmaq üçün kombinə edilmiş sistemlər, mətbəx sobası və yüksək səmərəli elektrod boilerlər var. Suyun isidilməsi üçün günəş kollektorlarından, çirkab suların təmizlənməsi üçün bioloji təmizləmə qurğularından istifadə olunur.
Kənddə GPON texnologiyası ilə yüksək sürətli internet, İP TV, video müşahidə kameraları, ağıllı işıq dirəkləri və avtomatik hava müşahidə stansiyaları var. Əhalinin rahatlığı üçün Tele-səhiyyə, E-təhsil və digər elektron xidmətlər, ASAN, DOST, məktəb, bağça, tibb məntəqəsi, kiçik və orta biznesə dəstək mərkəzləri fəaliyyət göstərir. Ümumi sahəsi 2 hektardan çox olan park salınıb. Bütün bunlar onu göstərir ki, Ağalı kəndi sadəcə yaşayış məntəqəsi deyil, gələcəyin kənd modelidir. Nazirlər Kabinetinin 30 oktyabr 2023-cü ildə təsdiq etdiyi Baş Plana əsasən şəhərin 2040-cı ilədək inkişafı üçün böyük vəsait ayrılıb. 2022-ci ildə təməli qoyulan 104 mənzilli ilk yaşayış kompleksinin açılışı 2026-cı ildə olub. Kompleksin ərazisi 2 hektardan artıqdır və burada 12 bina, o cümlədən 4 ədəd üçmərtəbəli 60 mənzilli və 8 ədəd ikimərtəbəli 44 mənzilli evlər tikilib.
Azad Zəngilanın qonaqları
Zəngilan Beynəlxalq Hava Limanı bu bölgənin inkişafı üçün mühüm faktora çevrilib. Zəngəzur dəhlizinin hava infrastrukturu ilə gücləndirilməsi baxımından hava limanı strateji əhəmiyyət daşıyır. Eyni zamanda Horadiz-Zəngilan-Ağbənd dəmir yolunun inşası da böyük strateji əhəmiyyətə malikdir. Bu yol azad edilmiş torpaqlara həm vətəndaşların qayıdışı, həm də yüklərin daşınması üçün tarixi imkan yaradır. Artıq yolun birinci mərhələsi üzrə böyük hissə tamamlanıb və Araz İqtisadi Zonası Sənaye Parkına yüklər daşınır. Horadiz-Cəbrayıl-Zəngilan-Ağbənd avtomobil yolunun uzunluğu 126,3 kilometrdir, illik buraxılış qabiliyyəti 15 milyon tondur və layihənin 2026-cı ilin ikinci yarısında yekunlaşdırılması nəzərdə tutulur. İşğal dövründə tövlə kimi istifadə olunan XIX əsrə aid Zəngilan şəhər məscidi Heydər Əliyev Fondu tərəfindən bərpa olunub. Bərpa-tikinti işləri çərçivəsində tarixi məscid konservasiya edilib və onun yanında düzbucaqlı planlı, iki minarəli yeni məscid inşa edilib. Yeni məsciddə 220 və 100 nəfərlik ibadət zalları yaradılıb. Rayonun gələcəyi üçün turizm və kənd təsərrüfatı da unudulmayıb. 2024-cü il mayın 18-də Ağalı kəndində, Həkəri çayı vasitəsilə yaradılmış süni gölün sahilində “Ağalı” hoteli açılıb. Zəngilan İstirahət Kompleksində 111 nömrəli hotelin təməli 2023-cü il mayın 4-də qoyulub. 2026-cı il mayın 10-da isə “Zəngilan City Park Hotel”in təməli qoyulub. Kənd təsərrüfatı sahəsində isə “Dost Aqropark” layihəsi həyata keçirilir. Azərbaycan və Türkiyə şirkətlərinin birgə layihəsi olan bu kompleks tam başa çatdıqda 500 nəfəri işlə təmin edəcək və 100 milyon dollar sərmayə qoyulacaq. Layihənin birinci mərhələsində 5200 kvadratmetr qapalı, 113 min kvadratmetr açıq tipli heyvandarlıq kompleksləri, sosial obyektlər, kafe, kinoteatr tikilib.
Beləliklə, Zəngilan bu gün sadəcə işğaldan azad edilmiş bir rayon deyil, Azərbaycan dövlətinin qüdrətinin, iradəsinin və gələcəyə olan inamının canlı rəmzidir. Burada hər daş, hər tikilən ev, hər qayıdan ailə 30 illik həsrətin sonu və Böyük Qayıdışın əbədi başlanğıcıdır.
Mahnur Hüseynova
Xırdalan şəhər 8 nömrəli tam orta ümumtəhsil məktəbinin direktoru
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!