24-06-2025, 00:30
Xamenei sükutu belə pozdu
"İran heç kimə təcavüz etməyib və heç bir
şəraitdə, heç vaxt özünə qarşı təcavüzə də yol verməyəcək".
Bunu İranın ali lideri Seyid Əli Xamenei "X" hesabında yazıb.
"Biz heç kimin təzyiqinə boyun əyməyəcəyik. Bu, İran millətinin məntiqidir", - Xamenei qeyd edib.
23-06-2025, 22:58
İranın hücumu simvolik imiş
İran ABŞ-ın Qətərdəki Əl-Üdeyd aviabazasına raket hücumunu Qətər rəsmiləri ilə koordinasiya edib və itkiləri minimuma endirmək üçün qabaqcadan xəbərdarlıq edib.
Bu barədə “New York Times” planlarla tanış olan üç İran rəsmisinə istinadla məlumat yayıb.
Rəsmilər bildiriblər ki, İran simvolik olaraq ABŞ-a cavab zərbəsi endirib.
Qeyd edək ki, 22 iyunda ABŞ-ın İrandakı nüvə obyektlərinə zərbələrinə cavab olaraq bu gün Amerikanın Qətər, İraq və digər Yaxın Şərq ölkələrindəki bazalarına hücum edib. Hücumum artıq başa çatması ilə bağlı SEPAH bəyanat yayıb.
Hücum zamanı hər hansı dağıntı və tələfatla bağlı məlumat yoxdur.
23-06-2025, 22:31
ABŞ təyyarələri İrana hücum zamanı Türkiyədən keçib? - Açıqlama yayıldı
İranın nüvə obyektlərinə hücum həyata keçirən ABŞ-a aid qırıcıların Türkiyənin hava məkanından istifadə etməsinə dair müxtəlif dairələrdə səsləndirilən iddialar dezinformasiyadır.
Bu barədə Türkiyənin Prezident Administrasiyasının Kommunikasiya İdarəsinin Dezinformasiya ilə Mübarizə Mərkəzi məlumat yayıb.
Qeyd olunub ki, İsrailin İrana hücumlarında Türkiyənin hava məkanından istifadə olunmadığı kimi, ABŞ tərəfindən İranda yerləşən nüvə obyektlərinə hücumlarda da Türkiyənin hava məkanından qətiyyən istifadə edilməyib:
"ABŞ-dan havaya qalxaraq, Cəbəllütariq boğazı istiqamətindən daxil olaraq, Aralıq dənizinin cənub hissəsindən İsrailə çatan təyyarələr İraqın üzərindən daxil olaraq İrana zərbələr endirib" - deyə açıqlamada bildirilib.
Qeyd edilib ki, bombardmançı təyyarələr hücumdan sonra eyni istiqamətdə də (Krit adasının Cənubundan) yanacaq doldurulması prosesindən sonra ABŞ ərazisinə geri qayıdıb.
Bəyanatda Türkiyənin Yaxın Şərqdə sülh və sabitliyin bərqərar edilməsinin tərəfdarı olmaqda davam etdiyi, Prezident Rəcəb Tayyib Ərdoğanın isə bu məqsədlə diplomatiyanın təmin olunması üçün göstərilən təşəbbüslərə üstünlük verdiyi, bunun əksinə istiqamətlənən hər cür iddia dezinformasiya olduğu açıqlanıb.
23-06-2025, 22:15
4 ölkə hava məkanını bağladı
Bəhreyn, BƏƏ, Küveyt və İraq hava məkanını müvəqqəti bağladığını elan edib.
Bölgədə vəziyyətin gərginləşməsi fonunda hava hərəkətinin müvəqqəti dayandırılması qərarı ehtiyat tədbiri kimi qəbul olunub.
Bundan əvvəl İranın Yaxın Şərqdəki ABŞ hərbi hədəflərinə cavab zərbələri endirməklə "Qələbə xəbərləri" əməliyyatına başladığı bildirilmişdi.
23-06-2025, 22:10
Hücumdan əvvəl qəribə paylaşım
Biz müharibəyə başlamadıq və onu istəmədik, lakin böyük İrana qarşı təcavüzü cavabsız qoymayacağıq.
Bunu Qətərə hücumdan əvvəl İran prezidenti Məsud Pezeşkian sosial şəbəkə hesabında yazıb.
“Bu əziz vətənin təhlükəsizliyini bütün varlığımızla müdafiə edəcəyik və İrana vurulan hər bir yaraya imanla, müdrikliklə və qətiyyətlə cavab verəcəyik”, – İran prezidenti bildirib.
23-06-2025, 21:24
İranın hücumuna görə Tramp təcili toplantı çağırdı
ABŞ prezidenti Donald Tramp İranın İraq və Qətərdəki ABŞ bazalarına endirdiyi zərbələrlə əlaqədar yüksək səviyyəli rəsmilərlə təcili toplantı çağırıb.
Qeyd edək ki, axşam saatlarında İran silahlı qüvvələri ABŞ-ın iyunun 22-də ölkənin nüvə obyektlərinə endirdiyi zərbələrə cavab olaraq “Qələbə müjdəsi” əməliyyatına başladığını elan edib.
İran Qətərdəki ABŞ Mərkəzi Komandanlığının qərargahının yerləşdiyi Əl Udeyd aviabazasına 10, İraqdakı Ayn əl-Əsəd hava bazasına isə bir raket atıb.
Qətərin Müdafiə Nazirliyi Əl Udeyd hava bazasına atılan bütün raketlərin ələ keçirildiyini bildirib. Nazirlik bildirib ki, İranın hücumu nəticəsində heç kim xəsarət almayıb. Nazirlik Qətərin qisas almaq hüququnu özündə saxladığını bildirib.
23-06-2025, 20:10
Xameneinin varis planı işə düşdü
İsrailin İrana hücumları və 86 yaşlı Ali Lider Ayətullah Əli Xameneinin öldürülməsi ilə bağlı hədələrdən sonra Tehranda onun varisini müəyyənləşdirmək üzrə gizli müzakirələr intensivləşib.
Məlumata görə, Xameneinin iki il əvvəl özü tərəfindən təyin olunmuş üç nəfərlik komitə artıq varis məsələsində fəal hazırlıq mərhələsinə keçib.
Xamenei hazırda ailəsi ilə birlikdə xüsusi mühafizə bölməsinin qoruması altında gizli yerdə saxlanılır və proseslərdən daim məlumatlandırılır.
Əgər Xamenei hərbi toqquşma nəticəsində həyatını itirərsə, rəsmi Tehran dərhal yeni lider elan edərək ölkədə sabitlik və davamlılıq siqnalı verməyə çalışacaq.
İndiyə qədər aparılan müzakirələrdə iki əsas namizəd ön plana çıxıb: Xameneinin 56 yaşlı oğlu Müctəba Xamenei və İran İslam İnqilabının banisi Ayətullah Ruhullah Xomeyninin nəvəsi Həsən Xomeyni.
Müctəba Xamenei atasının sərt siyasi xəttini davam etdirən namizəd kimi tanınır. Həsən Xomeyni isə islahatçılarla yaxın münasibətləri və daha yumşaq, xarici dünyaya açıq mövqeyi ilə fərqlənir.
Mənbələr bildirir ki, mövcud hərbi vəziyyətdə daha “barışdırıcı” və daxili narazılıqları yumşalda biləcək liderə ehtiyac hiss olunur. Bu baxımdan Həsən Xomeyni bu günlərdə daha real namizədə çevrilib.
Bununla belə, Xamenei indiyə qədər oğlunun varis olmasına qarşı çıxıb və İranda monarxik idarəyə bənzər modelin yaranmasını istəmədiyini iddia edib.
Qeyd edək ki, İranın yeni ali lideri rəsmi olaraq 88 nəfərlik Ruhani Ekspertlər Məclisi tərəfindən seçilir.
Ekspertlər bildirirlər ki, Ali Liderin postuna namizədlər arasında əvvəllər ehtimal olunan digər şəxslər - sabiq prezidentlər Həşimi Rəfsəncani (2017), İbrahim Rəisi (2024-də helikopter qəzasında həlak olub), Sadiq Amoli Laricani isə bu gün faktiki olaraq siyasi proseslərdən kənarda qalıb.
Müharibə şəraitində yeni liderin seçilməsinin texniki və siyasi çətinlikləri də mövcuddur. Xüsusən, İsrailin hava zərbələri nəticəsində İnqilab Keşikçiləri Korpusunun bir sıra yüksək rütbəli komandirlərinin həlak olması hakimiyyətin ötürülməsində yeni risklər yaradıb.
ABŞ Prezidenti Donald Tramp isə ötən həftə sosial mediada bildirib: “Biz çox yaxşı bilirik ki, “Ali Lider” harada gizlənir. Onu vurmaq çətin deyil”.
Ekspertlər hesab edir ki, Xameneinin ölümündən sonra İran rejimi əvvəlki kimi olmayacaq və ciddi dəyişikliklər qaçılmazdır.
23-06-2025, 18:47
ABŞ böyük səhv edib - İran generalı
ABŞ-nin İran ərazisinə hücumu böyük səhv idi.
Bunu İran Silahlı Qüvvələrinin Baş Qərargah rəisi general-leytenant Əbdülrəhim Musəvi deyib.
"Biz onun nəticələri barədə dəfələrlə xəbərdarlıq etmişik. Buna mütənasib şəkildə cavab verəcəyik", - o qeyd edib.
O, ABŞ Prezidenti Donald Trampın İrana hücum qərarı ilə bütün beynəlxalq qanunları pozduğunu bildirib.
23-06-2025, 16:58
“Oyun hələ bitməyib!” - Xameneinin baş müşaviri
Nüvə obyektləri məhv edilsə belə, oyun bitməyib; zənginləşdirilmiş materiallar, bilik və siyasi iradə qalacaq.
Bu barədə İranın ali lideri Ayətullah Əli Xameneinin baş müşaviri Əli Şəmxani X sosial platformasında yazıb.
"Nüvə obyektləri məhv edilsə belə, oyun bitməyib, zənginləşdirilmiş materiallar, yerli bilik və siyasi iradə qalacaq. Qanuni müdafiə hüququ ilə siyasi və əməliyyat təşəbbüsü indi ağıllı oynayan, kor-koranə zərbələrdən yayınan tərəfdədir. Sürprizlər davam edəcək!", - Şamxani yazıb.
Şamxaninin sözləri ABŞ prezidenti Donald Trampın Amerika qüvvələrinin Fordodakı yeraltı uranın zənginləşdirilməsi zavoduna, eləcə də Natanz və İsfahandakı nüvə obyektlərinə qarşı “Gecəyarısı çəkic” əməliyyatına başladığını təsdiqlədikdən bir neçə saat sonraya təsadüf edib.
İran iyunun 22-də bildirib ki, ABŞ-ın ölkənin üç ən həssas nüvə obyektinə aviazərbələr endirməsinə baxmayaraq, onun nüvə proqramı hələ də aktivdir və zənginləşdirilmiş uran ehtiyatları toxunulmazdır.
Tramp isə sosial şəbəkədə hücumu “çox uğurlu zərbə” kimi qiymətləndirib.
23-06-2025, 16:45
“İrandakı məqsədlərimizə çatmağa çox yaxınıq” - Netanyahu
“İsrail İranda öz məqsədlərinə çatmağa çox yaxındır”.
Bu barədə İsrailin baş naziri Benyamin Netanyahu keçirdiyi mətbuat konfransında bildirib.
“Bu, bizi məhv etmək istəyən bir rejimdir və buna görə də mövcudluğumuz üçün iki xüsusi təhlükəni aradan qaldırmaq üçün bu əməliyyata başladıq: nüvə təhlükəsi və ballistik raket təhlükəsi.
Biz bu məqsədlərə çatmaq üçün addım-addım irəliləyirik, onlara nail olmağa çox yaxınıq”, - Netanyahu bildirib.
O, həmçinin qeyd edib ki, o, “yaxın dostu Trampa ABŞ Hərbi Hava Qüvvələrinin gördüyü gözəl işlərə görə təşəkkür etmək və amerikalı pilotları təbrik etmək” istəyib.
“Onlar Fordoya böyük ziyan vurublar. Bu məsələni hələ də araşdırırıq. Amma istənilən halda bu obyektlərin təhlükə yaratmayacağına zəmanət veririk. Məqsədlərimizə çatmaq üçün hər şeyi edəcəyik”.
Netanyahu əlavə edib ki, İsrail eyni vaxtda bir neçə cəbhədə fəaliyyət göstərir və İrandakı əməliyyat da Qəzza zolağında məqsədə çatmağa töhfə verir.
“Həmas təslim olsa, silahlarını yerə qoysa və bütün girovları azad etsə, Qəzzada müharibə bu gün başa çata bilər, lakin onlar bundan imtina edirlər”, - deyə o qeyd edib.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!