Azərbaycan mətbuatının fədakar jurnalistlərindən biri olan Sona Bəhrəli qızı Bağırova indiki gənc jurnalistlərə örnək olacaq mənalı həyat yolu keçib. O, 1929-cu il may ayının 1-də Bakının Bülbülə qəsəbəsində doğulub.Onun uşaqlıq illəri isə Böyük Vətən müharibəsi dövrünə təsadüf edib. Sona Bağırova 1947-ci ildə Azərbaycan Dövlət Universitetinin (indiki BDU) jurnalistika fakültəsinə daxil olur. Tələbəlik illərində tanınmış elm korifeyləri olan müəllimlərdən – Mir Cəlal Paşayevdən, Məmməd Cəfərdən, Feyzulla Qasımzadədən, Həsən Şahgəldiyevdən, İsrafil Nəzərlidən, İsmayıl Əlizadədən, Məmmədhüseyn Təhmasibdən dərs alır. Jurnalist peşəsinə ilk addımı “Kommunist” qəzetindən başlayır. “Kommunist” qəzetində ilk dəfə nəşr olunan yazısına görə qocaman jurnalist Qulam Məmmədlidən də xeyir-dua alır. Beləcə, Sona Bağırova sevdiyi peşəsinə - jurnalistikaya ilk qədəmlərini qoyur.1952-ci ildən taleyini isə “Azərbaycan gəncləri” qəzetinə möhkəm bağlayaraq, milyonlarla oxucuların rəğbətini qazanır. Onu yaxından tanıyanlar dəfələrlə qeyd ediblər ki, Sona Bağırova azərbaycanlı xanım adını ləyaqətlə daşıyaraq, jurnalist peşəsinin əsl vurğunu idi. Hələ sağlığında istedadlı publisist olmaqla bərabər, hamıya arxa və dayaq olmağa da çalışıb. Gördüyü nəcib, xeyirxah işlərin isə sayı-hesabı yoxdur. Jurnalistika sahəsində böyük məktəb yaradan Sona Bagırova Azərbaycan Qadınlar Cəmiyyətinin də fəal üzvü olub. Sona Bağırova 1991-ci il iyulun 22-də mətbuat sahəsindəki xidmətlərinə görə Əməkdar jurnalist fəxri adına layiq görülür. Ömrünün 40 ilini “Azərbaycan gəncləri” qəzetində, ötən əsrin 90-cı illərində isə “Açıq söz”, “Bakı post”, “Nəbz” qəzetlərində çalışan Sona Bağırova mətbuatımızın keşiyində təmiz əqidəsi və iti qələmi ilə məğrur dayanıb. Son dərəcə fədakar, vətəninə, yurduna bağlı olan

Sona Bağırova Qarabağ müharibəsi başlayanda isə qələmini süngüyə çevirərək, Şuşaya, Laçına, Xankəndinə gəlir. O, düşmən gülləsindən qorxmayaraq səngərlərdə əsgərlərimizin yanında olur, onların döyüş rəşadətlərindən reportajlar hazırlayır. İstedadlı qələm sahibi Sona Bağırova 2001-ci il mayın 10-da vəfat edir. Bu günlərdə Bakının Bülbülə qəsəbəsində yerləşən Nəriman Həmidov adına 208 nömrəli tam orta məktəbdə Əməkdar jurnalist Sona Bəhrəli qızı Bağırovanın 90 illik yubileyi keçirildi. Həmin gün tədbirə ziyalılar, qəsəbə sakinləri və ailə üzvləri dəvət olunmuşdu. Tədbir ilk öncə Azərbaycanın Dövlət Himni ilə başladı.Tədbiri giriş sözü ilə Nəriman Həmidov adına 208 nömrəli tam orta məktəbin direktoru Məlahət Əsədova açdı. O, Sona Bağırovanın şərəfli jurnalist ömründən, onun jurnalistikanın müxtəlif janrlarında yazdığı məqalələrindən danışdı. Yubiley tədbirinə dəvət olunan Suraxanı Rayon İcra Hakimiyyəti Başçısının İctimai-siyasi və humanitar məsələlər şöbəsinin baş məsləhətçisi Nazim Fətullayev, Suraxanı Rayon İcra Hakimiyyəti Başçısının Bülbülə qəsəbəsi üzrə nümayəndəsi Elçin Seyfullayev, coğrafiya üzrə fəlsəfə doktoru Etibar Bədəlov, yazıçı-jurnalist Fərhad Əsgəroğlu, mədəniyyət işçisi Cavad Səlimov, şairə Sumaya Məhəmmədəli qızı, Bülbülə qəsəbə Ağsaqqallar Şurasının sədri Tofiq

Babayev, Cəlal Babayev, Səkinə Həmidova, şairə Sona Məmmədova ilahiyyatçı Maya Əkbərzadə, jurnalist Günay Rəhimova, Bülbülə bələdiyyəsinin üzvü Ülviyyə Orucova çıxış edərək, dövrü mətbuatımıza imzası ilə yenilik gətirən, publisistik yazıları ilə oxucuların görüşünə gələn, Azərbaycanı qarış-qarış gəzən mübariz qadın, iti qələmli jurnalist Sona Bağırova ilə hər zaman fəxr etdiklərini qeyd etdilər. Yubiley tədbirinin sonunda Qubat Bağırov çıxış edərək, bacısı ilə bərabər unudulmaz xatirələrdən söhbət açdı. O, Sona Bağırovanın Qarabağda ezamiyyətlərdə olarkən əsgərlərimizə hər zaman mənəvi dayaq olduğunu da vurğuladı. Analı günlərin həsrətini çəkərək, kövrək xatirələrini tədbir iştirakçıları ilə bərabər bölüşən Sevinc Nagıyeva, Tamilla Ağabəyova və Sevda Xanbutayeva çıxış edərək, Sona xanımın qayğıkeş ana kimi təkcə onlara deyil, mərhəmətə və köməyə ehtiyacı olan bir çox insanlara hər zaman arxa olduqlarını söylədilər. Məktəbin musiqi müəllimi Xatirə Cananovanın rəhbərliyi altında ədəbi-musiqili kompazisiya yubiley tədbirini daha rəngarəng etdi. Şagirdlər Azərbaycana, vətənə həsr olunan şeirlər, mahnılar ifa etdilər. Şagirdlər istedadlı yazıçı Teyyub Qurbanın jurnalist Sona Bağırovanın ölümündən sonra qələmə aldığı “Bülbülədə iki Sonam” məqaləsindən parçalar da səhnələşdirdilər. Tədbirin sonunda Qubat Bağırov ailəsi adından Əməkdar jurnalist Sona Bəhrəli qızı Bağırovanın 90 illik yubileyinin təşkilinə görə Nəriman Həmidov adına 208 nömrəli tam orta məktəbin pedaqoji kollektivinə, şagirdlərə təşəkkür etdi.

Təranə Cəbiyeva