3-01-2026, 18:10
Türkiyədən Venesueladakı hadisələrə reaksiya
Türkiyə Xarici İşlər Nazirliyi Venesuelada baş verən hadisələrə münasibət bildirib.
Açıqlamada Ankaranın prosesləri yaxından izlədiyi bildirilib.
"Türkiyə Venesuelanın sabitliyinə, Venesuela xalqının rifahına böyük önəm verir.
Mövcud vəziyyətin regional və beynəlxalq təhlükəsizlik baxımından mənfi nəticələr doğurmaması üçün bütün tərəfləri təmkinli davranmağa çağırırıq.
Venesueladakı böhranın beynəlxalq hüquq çərçivəsində həll olunması istiqamətində hər cür konstruktiv töhfə verməyə hazırıq", - açıqlamada bildirilir.
3-01-2026, 17:48
Həkim, təbrik edirik!
Yanvarın birində Dünyamalı həkimin 65 yaşı tamam olub. Kurud-Kirs İcmasının üzvləri həkimi yubileyi münasibətilə təbrik edib, sağlamlıq, uzun ömür, xoş güzəran və şərəfli peşə fəaliyyətində uğurlar arzulayıblar.
Xatırladaq ki, İmaməliyev Dünyamalı Mirəli oğlu 1961-ci il yanvarın 1-də Zəngəzur mahalının Qafan rayonunun Kurud kəndində doğulub. 1968-ci ildə Ailəsi Naxçıvan Muxtar Respublikasının Culfa rayonunun Şurud kəndinə köçüb. Həmin il Şurud kənd 8 illik məktəbinin
birinci sinfinə gedib. Səkkizilliyi Şurud kəndində, 9-10-cu sinifləri isə 1978- ci ildə Bənəniyar kənd orta məktəbində bitirib. 1979- cu ildə Nəriman Nərimanov adına Azərbaycan Dövlət Tibb İnstituna qəbul olub.
1986-cı ildə institutu bitirərək Naxçıvan Respublika Uşaq Xəstəxanasında anestezioloq reanimatoloq kimi çalışıb. Dünyamalı İmaməliyev Naxşıvan şəhərindəki təcili yardım stansiyasının Təcili tibbi yardım həkimi, 1989-1993-cü illərdə Bakı Şəhər Təcili və Təxirəsalınmaz Tibbi Yardım Stansiyasının Reanimasiya qrupunun həkimi olaraq fəaaliyyət göstərib. 1993-cü ildən 1998-ci ilə qədər 8 Saylı Xəstəxananın Reanimasiya şöbəsinin müdiri olub.
Birinci dərəcəli anestezioloq reanimatoloq Dünyamalı İmaməliyev harda, hansı vəzifədə olmasından asılı olmayaraq bütün ömrünü insanlara tibbi yardım etməklə keçirib. Vicdanla, kimsədən təmənna ummadan saçlarını o yolda ağardıb. O, qanunvericilik sahəsində də xalqına xidmət göstərmək istəyib. Odur ki, 2010-cu və 2015-ci ildə parlament seçkilərinə qatılıb.
Kurud-Kirs İcmasının üzvləri yeni ildə həkimə yeni uğurlar, ailəsinə səadət, firəvan həyat arzulayırlar!
3-01-2026, 17:32
Din pərdəsi altında diktatura - İran rejimi öz sonuna yaxınlaşır?
İran İslam Respublikası bu gün öz tarixinin ən ağır və həlledici böhranlarından birini yaşayır.
Ölkənin yerli valyutası olan rialın dollar qarşısında kəskin və qarşısıalınmaz şəkildə dəyər itirməsi artıq sadəcə iqtisadi geriləmə deyil, rejimin təməllərini sarsıdan böyük bir siyasi partlayışa çevrilib.
Küçələrə axışan insanlar artıq yalnız çörək və iş naminə deyil, onilliklərdir davam edən molla diktaturasının sona çatması və fundamental siyasi dəyişikliklərin edilməsi tələbi ilə çıxış edirlər. Rejim isə hər zaman olduğu kimi, xalqın fəryadına islahatlarla deyil, qan və zorakılıqla cavab verir. Alınan son məlumatlara görə, etirazların başladığı qısa müddət ərzində azı 10 nəfər nümayişçi qətlə yetirilib, yüzlərlə insan isə ağır işgəncələrə məruz qalaraq zindanlara atılıb. Xüsusilə Tehran, Təbriz, Məşhəd, İsfahan və digər bölgələrdə etirazçıların üzərinə odlu silahlardan atəş açılır, "Bəsic" və SEPAH-ın xüsusi təyinatlı dəstələri vasitəsilə dinc əhaliyə qarşı terror tətbiq edilir. Bu amansızlıq İran rejimi üçün bir idarəetmə metodudur; xatırladaq ki, 2022-ci ildə Mahsa Əmininin hicabsız olduğu üçün əxlaq polisi tərəfindən qətlə yetirilməsindən sonra başlayan kütləvi etirazlar zamanı 2 mindən çox insan rejim qüvvələri tərəfindən vəhşicəsinə öldürülmüş, minlərlə gənc həbsxanalarda fiziki və mənəvi təzyiqlərə məruz qalmışdı.
Bu hadisələrin mərkəzində dayanan maraqlı məqamlardan biri Prezident Məsud Pezeşkianın mövqeyidir. Pezeşkianın xalqın etirazlarına qarşı daha anlayışlı yanaşmağa çalışması, etirazçıların tələbləri ilə müəyyən mənada razılaşması və iqtisadi vəziyyəti düzəltmək üçün əlindən gələni etməyə çalışdığı müşahidə olunur. Lakin İrandakı mövcud teokratik idarəetmə sistemi daxilində prezidentin səlahiyyətləri olduqca məhduddur. Əsl güc və son qərar vermə səlahiyyəti dini liderin və onun nəzarətində olan SEPAH-ın əlində cəmləşib. Pezeşkianın xalqla dialoq qurmaq cəhdləri, əslində ölkəni idarə edən "kölgə dövləti" və radikal qanad tərəfindən bloklanır. Bu da göstərir ki, İranda islahat cəhdləri sistemin daxili strukturu tərəfindən boğulur və xalqın qəzəbi birbaşa bu aşılmaz divarlara yönəlir.
İran cəmiyyətindəki qəzəbin kökündə əslində dözülməz sosial ədalətsizlik və korrupsiya dayanır. Bir tərəfdə SEPAH və hakim elitaya yaxın olan zümrələr ölkənin neft, qaz və digər təbii resurslarını inhisara alaraq milyardlarla dollarlıq sərvət içində üzür, digər tərəfdə isə sıravi vətəndaşlar ən elementar ərzaq məhsullarını və yanacağı almaqda çətinlik çəkir. Müntəzəm olaraq artan qiymətlər, hiperinflyasiya və işsizlik xalqı səfalət həddinə çatdırıb. SEPAH təkcə iqtisadiyyatı talamaqla kifayətlənmir, həm də ölkənin ekoloji gələcəyini məhv edir. Bunun ən bariz nümunəsi Urmiya gölünün qurudulmasıdır. SEPAH-ın nəzarətində olan şirkətlərin apardığı plansız su siyasəti, tikilən çoxsaylı bəndlər və gölün ətrafındakı resursların qeyri-qanuni istismarı bu nadir təbiət incisini yox olmaq təhlükəsi ilə üz-üzə qoyub. Bu, bölgədə yaşayan milyonlarla insanın, xüsusilə Azərbaycan türklərinin həyatına və sağlamlığına qarşı yönəlmiş şüurlu bir ekoloji terrordur.
Eyni zamanda, İran xalqı artıq ölkənin milyardlarla dollar vəsaitinin Suriya, Livan, Yəmən və İraq kimi ölkələrdə destruktiv fəaliyyətlərə, proksi qruplaşmaların silahlandırılmasına xərclənməsindən cana doyub. Tehranın regional hegemonluq eşqi ilə yürütdüyü bu siyasət daxildə "Nə Qəzzə, nə Livan, canım İrana qurban" şüarı ilə kəskin şəkildə rədd edilir. Xalq öz pulunun xarici ölkələrdəki terror ocaqlarına və raket proqramlarına deyil, ölkə daxilindəki xəstəxanalara, məktəblərə və infrastrukturun yenilənməsinə xərclənməsini tələb edir. İnsanlar anlayırlar ki, rejimin "xarici düşmən" obrazı yaratmaq cəhdləri, əslində daxili uğursuzluqları ört-basdır etmək üçün bir manipulyasiyadır.
Rejimin bu təcavüzkar və müdaxiləçi siyasəti Azərbaycandan da yan keçməyib. İranın rəsmi media orqanları, xüsusilə "Səhər" telekanalı və müxtəlif sosial şəbəkə seqmentləri vasitəsilə ölkəmizə qarşı apardığı çirkin ideoloji təbliğat hər kəsə məlumdur. Rejim, dini təriqət birliyi adı altında Azərbaycandakı müəyyən kütlələri manipulyasiya etməyə, dövlətimizin dünyəvi quruluşunu hədəf almağa və ölkə daxilində qarışıqlıq yaratmağa cəhd göstərirdi. Lakin Azərbaycan dövlətinin qətiyyətli siyasi iradəsi, xalqın dövlətçilik ənənələrinə sadiqliyi və hüquq-mühafizə orqanlarının həyata keçirdiyi effektiv tədbirlər sayəsində bu "inqilab ixracı" cəhdləri və xəyanətkar şəbəkələr ifşa olunmuşdu. Azərbaycanın müstəqil xarici siyasəti və inkişaf yolu İranın teokratik rejimi üçün bir təhdid kimi qəbul edilir, çünki bu, "İslam modeli"nin uğursuzluğunu daha qabarıq şəkildə üzə çıxarır.
Nəticə etibarilə, 1979-cu ildə "ədalət" və "azadlıq" vədləri ilə qurulan, İslam dəyərlərini siyasi alətə çevirən bu sistem, bu gün öz xalqının qanını tökən, qonşuları ilə düşmənçilik yürüdən və daxildən tamamilə çürümüş sıradan bir avtoritar rejimə çevrilib. Pezeşkian kimi fiqurların fədakar cəhdləri belə bu böyük dağıntının qarşısını ala bilmir, çünki sistem artıq öz-özünü bitirməkdədir. Daxili dayaqları tamamilə laxlayan, gənclərin nifrətini qazanan və beynəlxalq aləmdə təcrid olunan İran rejimi artıq yolun sonuna yaxınlaşır. Tarix sübut edir ki, xalqın iradəsinə və qonşu dövlətlərin suverenliyinə hörmət etməyən heç bir diktatura əbədi ola bilməz. İranın gələcəyi artıq hakimiyyət daxilindəki intriqalarda deyil, küçələrdə öz azadlığı üçün canını fəda edən insanların əlindədir.
3-01-2026, 16:50
Venesuela Prezidenti və xanımı barədə bu ittihamlar irəli sürülüb
ABŞ Venesuela Prezidenti Nikolas Maduro və onun həyat yoldaşı Siliya Floresini narkoterrorizmdə ittiham edib.
Bu barədə ABŞ-nin baş prokuroru Pamela Bondi "X" sosial şəbəkə hesabında paylaşım edib.
Nikolas Maduroya qarşı narkoterrorçuluq məqsədilə sui-qəsd, kokainin idxalı üzrə sui-qəsd, avtomat silahlar və dağıdıcı qurğulara sahib olma, habelə bu silah və qurğulara sahib olmaq üçün sui-qəsd maddələri üzrə ittihamlar irəli sürülüb.
Bildirilir ki, onlar yaxın zamanda ABŞ ərazisində, Amerika məhkəmələrində ABŞ ədalət sistemi qarşısında cavab verəcəklər.
3-01-2026, 16:25
Prezident ailəsi ilə birgə Şahdağda - FOTO
Prezident İlham Əliyev ailəsi ilə birlikdə Şahdağa gedib.
Bu barədə dövlət başçısının nəvəsi Əli Ağalarov sosial şəbəkə hesabında paylaşım edib.
O, Prezident İlham Əliyev və anası Leyla Əliyevanın da yer aldığı fotoya “Bu gün babamla xizək sürdük” - sözlərini əlavə edib.
3-01-2026, 15:38
Məntəqə rəisi və maşinist dövlət qurumunun yanacağını mənimsəyib
“Azərbaycan Dəmir Yolları” QSC-nin 2 il öncə həyata keçirdiyi nəzarət tədbirləri öz nəticəsini verib. Belə ki, ADY-nin vaxtilə mövcud olmuş struktur bölməsi – Yanacaq və enerji resurslarının idarə edilməsi departamentinin İmişli təminat məntəqəsinin rəisi Eldəniz Sadıqov və Qatarların idarə edilməsi xidmətinin İmişli magistral lokomotivlərin idarə edilməsi sahəsinin maşinist təlimatçısı Famil Soltanovun əlbir olaraq lokomotivlərin hərəkətinin təmin edilməsi üçün ADY tərəfindən ayrılmış yanacaq və yağı mənimsədikləri aşkar edilib".
Bu barədə “Azərbaycan Dəmir Yolları” QSC-dən bildirilib.
Qeyd olunub ki, ADY törədilmiş qanunsuz əməl barədə tədbirlər görülməsi üçün Baş Prokurorluğa müraciət edib və müraciətə əsasən Baş prokuror yanında Korrupsiyaya qarşı Mübarizə Baş İdarəsində istintaq aparılıb.
Müəyyən edilib ki, E.Sadıqov və F.Soltanov 15 yanvar 2022-ci il – 06 iyun 2023-cü il tarixləri aralığında marşrut vərəqələrinə faktiki olaraq həyata keçirilməmiş marşrutlar qeyd edərək təminat məntəqəsindən yanacaq və yağı götürməklə mənimsəmiş, bununla da ADY-yə külli miqdarda ziyan vurublar. Lənkəran Ağır Cinayətlər Məhkəməsinin hökmü ilə hər iki şəxs həbs edilib.
Qeyd edilib ki, vəzifə səlahiyyətlərindən sui-istifadə edərək mənimsəmə hallarına yol verilməməsi, bu cür halların aşkar edilməsi və qarşısının alınması məqsədilə son illərdə ADY tərəfindən nəzarət tədbirləri gücləndirilib: "Həmçinin görülən mühafizə tədbirləri nəticəsində kənar şəxslər tərəfindən ADY-yə aid sahələrdə oğurluq və oğurluğa cəhd hadisələri 3 dəfə azalıb. Belə ki, 2023-cü ildə 120, 2024-cü ildə 87, 2025-ci ildə isə 40 belə hadisə qeydə alınıb, bu hadisələrin 2023-cü il və 2025-ci il üzrə ümumilikdə 50 faizinin, 2024-cü ildə isə 70 faizinin qarşısı vaxtında alınıb. ADY bu cür qanunsuz hallarla mübarizə tədbirlərini gücləndirməyə davam edəcək".
3-01-2026, 14:48
Maduro ABŞ-da mühakimə olunacaq
Maduro ABŞ məhkəməsində cinayət ittihamları ilə mühakimə olunacaq.
Bu barədə senator Mayk Linin Dövlət katibi Rubioya istinadən məlumt verib.
O, əlavə edib ki, ABŞ-ın Venesuelaya qarşı bundan sonra zərbələr endirməyi planlaşdırmır.
3-01-2026, 14:45
Qədim Azərbaycan kəndində 37 dərəcə şaxta qeydə alınıb
Qərbi Azərbaycanın (indiki Ermənistan Respublikası) Ağbaba mahalı ərazisində yerləşən Qızıl Qoç kəndində (indiki Aşotsk) ötən gecə mənfi 37 dərəcə şaxta qeydə alınıb.
Bu barədə Ermənistanın Hirometeorologiya və Monitorinq Mərkəzi məlumat yayıb.
Xatırladaq ki, 1878-ci ildə kəndin Azərbaycan türklərindən ibarət əhalisi qovulmuş və Türkiyədən gəlmə ermənilər ərazidə məskunlaşdırılıb.
3-01-2026, 14:12
Prezidenti pula görə kim satıb?
ABŞ hakimiyyəti Venesuela prezidenti Nikolas Maduronun yerini deyən şəxsə 50 milyon dollar mükafat elan etmişdi.
Bu gün prezidentin və xanımının həbsi məhz informatorun onların yerini deməsi sayəsində qısa zamanda uğurla yekunlaşıb. Həmin məlumatı öterən şəxsin kimliyi açıqlanmır.
Onun Maduronun yaxın ətrafından biri olduğu bildirilir.
3-01-2026, 14:03
Sabah külək güclənəcək - XƏBƏRDARLIQ
Yanvarın 4-də Bakıda və Abşeron yarımadasında, eyni zamanda bəzi rayonlarda gözlənilən küləkli hava şəraiti ilə bağlı sarı xəbərdarlıq verib.
Bu barədə Milli Hidrometeorologiya Xidməti məlumat yayıb.
Bildirilib ki, Bakıda və Abşeron yarımadasında, Daşkəsən, Gəncə, Samux, Goranboy, Naftalan, Neftçala, Xızı, Mingəçevir, Oğuz, Şəki, Şamaxı, Qobustanda qərb küləyi əsəcək, küləyin sürəti 13.9-20.7 m/san təşkil edəcək.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Zəngilanın dirçəliş
və qayıdış dövrü
Azərbaycan tarixinin ən şanlı səhifəsi olan Vətən müharibəsi bizə təkcə torpaqlarımızı deyil, ləyaqətimizi, qürurumuzu qaytardı. Həmin qürurun ən parlaq ünvanlarından biri də Zəngilandır. 2020-ci il sentyabrın 27-də başlanan Zəfər yürüşü zamanı şərqdən, Cəbrayıl istiqamətindən düşmənə vurulan sarsıdıcı zərbələr nəticəsində Azərbaycan Ordusu 30-dan çox yaşayış məntəqəsini azad edərək Zəngilanın inzibati hüdudlarına çatdı. Oktyabrın 18-də rayonun tam azad edilməsi uğrunda genişmiqyaslı əməliyyata start verildi və cəmi iki gün sonra, oktyabrın 20-də Müzəffər Ali Baş Komandan, Prezident İlham Əliyev xalqa müraciətində Havalı, Zərnəli, Məmmədbəyli, Həkəri, Şərifan, Birinci Muğanlı kəndlərinin və Zəngilan şəhərinin işğaldan azad edildiyini elan etdi. Beləliklə, Zəngilan döyüşləri nəticəsində 1 şəhər, 4 qəsəbə və 49 kənd düşmən tapdağından xilas edildi və bununla da 132 kilometrlik Azərbaycan-İran dövlət sərhədi tam bərpa olundu. İşğalın bitməsindən dərhal sonra sərhəd boyunca zəruri istehkam və mühafizə işlərinə başlanıldı.
Qərbi zəngəzurlular Zəngilan şəhidliyində
Bu tarixi qələbənin əbədiləşdirilməsi üçün 2020-ci il noyabrın 26-da “Zəngilanın azad olunmasına görə” medalı təsis edildi və 6974 hərbi qulluqçumuz bu medalla təltif olundu. Prezidentin 31 iyul 2023-cü il tarixli Sərəncamı ilə isə 20 oktyabr tarixi Zəngilan şəhəri günü kimi rəsmiləşdirildi. Zəngilanın azad olunması Böyük Qayıdışın başlanğıcı oldu. Bu gün dövlətin ən böyük hədəfi həmin torpaqları yenidən həyatla doldurmaqdır. 2026-cı il 1 oktyabr tarixinə olan məlumata görə, Zəngilan şəhərində 84 ailə, yəni 339 nəfər, Ağalı kəndində 234 ailə, yəni 1017 nəfər, Məmmədbəyli kəndində isə 179 ailə, yəni 903 nəfər öz doğma ocağına qayıdıb. Köçürülən ailələr peşə və bacarıqlarına uyğun olaraq müxtəlif dövlət qurumlarında, tikinti şirkətlərində, tikiş fabrikində və digər sahələrdə işlə təmin edilirlər.Bu qayıdışın dünyaya nümunə olan simvolu isə Ağalı kəndidir. Ağalı təkcə Azərbaycanda deyil, dünyanın ən müasir kəndlərindən biri hesab olunur. Burada “ağıllı kənd” konsepsiyası tam şəkildə tətbiq edilib. Dayanıqlı inkişafın təmin olunması üçün sosial-iqtisadi xidmətlər ən yüksək texnologiyalarla qurulub. Kəndin enerji təminatı ekoloji cəhətdən tam təmizdir, Həkəri çayı üzərində 3 turbindən ibarət Arximed tipli su elektrik stansiyası və gücü 325 kilovat olan günəş panelləri quraşdırılıb. Evlərdə istilik xərclərini azaltmaq üçün kombinə edilmiş sistemlər, mətbəx sobası və yüksək səmərəli elektrod boilerlər var. Suyun isidilməsi üçün günəş kollektorlarından, çirkab suların təmizlənməsi üçün bioloji təmizləmə qurğularından istifadə olunur.
Kənddə GPON texnologiyası ilə yüksək sürətli internet, İP TV, video müşahidə kameraları, ağıllı işıq dirəkləri və avtomatik hava müşahidə stansiyaları var. Əhalinin rahatlığı üçün Tele-səhiyyə, E-təhsil və digər elektron xidmətlər, ASAN, DOST, məktəb, bağça, tibb məntəqəsi, kiçik və orta biznesə dəstək mərkəzləri fəaliyyət göstərir. Ümumi sahəsi 2 hektardan çox olan park salınıb. Bütün bunlar onu göstərir ki, Ağalı kəndi sadəcə yaşayış məntəqəsi deyil, gələcəyin kənd modelidir. Nazirlər Kabinetinin 30 oktyabr 2023-cü ildə təsdiq etdiyi Baş Plana əsasən şəhərin 2040-cı ilədək inkişafı üçün böyük vəsait ayrılıb. 2022-ci ildə təməli qoyulan 104 mənzilli ilk yaşayış kompleksinin açılışı 2026-cı ildə olub. Kompleksin ərazisi 2 hektardan artıqdır və burada 12 bina, o cümlədən 4 ədəd üçmərtəbəli 60 mənzilli və 8 ədəd ikimərtəbəli 44 mənzilli evlər tikilib.
Azad Zəngilanın qonaqları
Zəngilan Beynəlxalq Hava Limanı bu bölgənin inkişafı üçün mühüm faktora çevrilib. Zəngəzur dəhlizinin hava infrastrukturu ilə gücləndirilməsi baxımından hava limanı strateji əhəmiyyət daşıyır. Eyni zamanda Horadiz-Zəngilan-Ağbənd dəmir yolunun inşası da böyük strateji əhəmiyyətə malikdir. Bu yol azad edilmiş torpaqlara həm vətəndaşların qayıdışı, həm də yüklərin daşınması üçün tarixi imkan yaradır. Artıq yolun birinci mərhələsi üzrə böyük hissə tamamlanıb və Araz İqtisadi Zonası Sənaye Parkına yüklər daşınır. Horadiz-Cəbrayıl-Zəngilan-Ağbənd avtomobil yolunun uzunluğu 126,3 kilometrdir, illik buraxılış qabiliyyəti 15 milyon tondur və layihənin 2026-cı ilin ikinci yarısında yekunlaşdırılması nəzərdə tutulur. İşğal dövründə tövlə kimi istifadə olunan XIX əsrə aid Zəngilan şəhər məscidi Heydər Əliyev Fondu tərəfindən bərpa olunub. Bərpa-tikinti işləri çərçivəsində tarixi məscid konservasiya edilib və onun yanında düzbucaqlı planlı, iki minarəli yeni məscid inşa edilib. Yeni məsciddə 220 və 100 nəfərlik ibadət zalları yaradılıb. Rayonun gələcəyi üçün turizm və kənd təsərrüfatı da unudulmayıb. 2024-cü il mayın 18-də Ağalı kəndində, Həkəri çayı vasitəsilə yaradılmış süni gölün sahilində “Ağalı” hoteli açılıb. Zəngilan İstirahət Kompleksində 111 nömrəli hotelin təməli 2023-cü il mayın 4-də qoyulub. 2026-cı il mayın 10-da isə “Zəngilan City Park Hotel”in təməli qoyulub. Kənd təsərrüfatı sahəsində isə “Dost Aqropark” layihəsi həyata keçirilir. Azərbaycan və Türkiyə şirkətlərinin birgə layihəsi olan bu kompleks tam başa çatdıqda 500 nəfəri işlə təmin edəcək və 100 milyon dollar sərmayə qoyulacaq. Layihənin birinci mərhələsində 5200 kvadratmetr qapalı, 113 min kvadratmetr açıq tipli heyvandarlıq kompleksləri, sosial obyektlər, kafe, kinoteatr tikilib.
Beləliklə, Zəngilan bu gün sadəcə işğaldan azad edilmiş bir rayon deyil, Azərbaycan dövlətinin qüdrətinin, iradəsinin və gələcəyə olan inamının canlı rəmzidir. Burada hər daş, hər tikilən ev, hər qayıdan ailə 30 illik həsrətin sonu və Böyük Qayıdışın əbədi başlanğıcıdır.
Mahnur Hüseynova
Xırdalan şəhər 8 nömrəli tam orta ümumtəhsil məktəbinin direktoru
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!