6-08-2025, 18:19
Daha bir Hizbullah komandiri öldürüldü
İsrail Müdafiə Qüvvələri tərəfindən “Hizbullah” komandiri Hassam Kassam Ghraib öldürülüb.
Bu barədə “The Jerusalem Post” məlumat yayıb.
Bildirilib ki, o, Livanın Beka vadisində keçirilən əməliyyat zamanı zərərsizləşdirilib.
Qeyd olunub ki, Ghraib “Hizbullah” rəhbərliyinin İsrail əleyhinə verdiyi yeni açıqlamalardan sonra öldürülüb.
6-08-2025, 17:51
Xəzərin dayazlaşması müzakirə edildi
BMT-nin Dənizə çıxışı olmayan inkişaf etməkdə olan ölkələr üzrə Üçüncü Konfransı çərçivəsində Xəzəryanı dövlətlərin hökumət rəsmiləri səviyyəsində iclası keçirilib.
Bu barədə Nazirlər Kabineti məlumat yayıb.
Görüşdə Xəzər dənizinin dayazlaşmasının mənfi təsirlərini azaltmaq üçün birgə fəaliyyətin əsas istiqamətləri müzakirə olunub.
İclasda çıxış edən Baş nazirin müavini Şahin Mustafayev Xəzəryanı dövlətlər arasında ticarət dövriyyəsinin dayanıqlı artım dinamikasını qeyd edərək, bunun həm ikitərəfli, həm də çoxtərəfli formatlarda əməkdaşlığın dərinləşməsi üçün möhkəm zəmin yaratdığını bildirib.
Baş nazirin müavini cari ilin fevralında Tehranda keçirilmiş III Xəzər İqtisadi Forumunun ticarət və qarşılıqlı investisiya həcmlərinin genişlənməsi, enerji və nəqliyyat-logistika sahələrində əməkdaşlığın dərinləşdirilməsi baxımından əhəmiyyətli olduğunu qeyd edib.
Çıxışında ekoloji çağırışlara da toxunaraq qeyd etdi, su səviyyəsinin aşağı düşməsi bütün regionda narahatlıq doğurduğunu, bu problemin hələ 2022-ci il Aşqabad Sammitində Azərbaycan Prezidenti tərəfindən qaldırıldığını və Bakıda beştərəfli ekspert qrupunun ilk toplantısının təşkilinə hazırlıqların davam etdiyini vurğulayıb.
Əlavə olaraq, tədbirdə Xəzər dənizinin ekosistemində baş verən dəyişikliklərin sosial-iqtisadi və ekoloji aspektləri geniş şəkildə müzakirə olunub. Su səviyyəsindəki dəyişikliklərin sahilyanı ərazilərdəki həyat şəraitinə və regional inkişaf proseslərinə mümkün təsirləri diqqət mərkəzində olub.
Baş nazirin müavini Şahin Mustafayev qeyd etdi ki, səviyyə dəyişikliklərinin mənfi təsirlərinin minimuma endirilməsi üçün elmi-tədqiqat əməkdaşlığının genişləndirilməsi, balıqçılığın, gəmiçiliyin və biomüxtəlifliyin qorunması sahəsində birgə proqramların həyata keçirilməsi zəruridir.
İclas zamanı Xəzər dənizində baş verən dəyişikliklərin öyrənilməsi üçün ümumi standartlar və yanaşmalar formalaşdırmağa imkan verəcək çoxtərəfli qarşılıqlı fəaliyyət mexanizminin işə salınması təşəbbüsü irəli sürülüb.
6-08-2025, 17:35
Rəşad Nəbiyev Talqat Aldıbergenov ilə görüşüb
Rəqəmsal inkişaf və nəqliyyat naziri Rəşad Nəbiyev ölkəmizdə səfərdə olan Qazaxıstan Respublikası Prezidentinin müşaviri Asel Janasova və "Qazaxıstan Dəmir Yolları" Milli Şirkətinin İdarə heyətinin sədri Talqat Aldıbergenov ilə görüşüb.
Görüşdə avtomobil nəqliyyatı ilə yükdaşımalar, aviadaşımalar, gəmiqayırma sahəsində əməkdaşlıq məsələləri müzakirə edilib.
Həmçinin Orta Dəhlizin inkişafı, limanların və logistika dəhlizlərinin rəqəmsallaşdırılması barədə fikir mübadiləsi aparılıb.
6-08-2025, 17:22
Vaşinqton görüşü: İlham Əliyevlə Paşinyan “tarixi sənəd” imzalaya bilər
Avqustun 8-də ABŞ prezidenti Donald Trampın iştirakı ilə Azərbaycan Prezidenti İlham Əliyev və Ermənistan Baş naziri Nikol Paşinyanın Vaşinqtonda baş tutacaq üçtərəfli görüşü dünya mediasının diqqət mərkəzindədir.
Müxtəlif nüfuzlu beynəlxalq media orqanları bu barədə fərqli təhlil və məlumatlar təqdim edir.
"British Broadcasting Corporation" (BBC) xatırladır ki, 2024-cü ilin iyulunda Birləşmiş Ərəb Əmirliklərinin paytaxtı Əbu-Dabidə Azərbaycan Prezidenti İlham Əliyev və Ermənistanın Baş naziri Nikol Paşinyan ilk dəfə təkbətək formatda görüş keçiriblər. Bu görüş tərəflərin əvvəlki bütün təmaslarının vasitəçilər və ya beynəlxalq sammitlər çərçivəsində baş tutması fonunda mühüm dəyişiklik kimi qiymətləndirilir. BBC Vaşinqton görüşünü bu diplomatik prosesin davamı kimi dəyərləndirir.
“The Washington Post” yazır ki, Əbu-Dabidəki beş saatlıq danışıqlara baxmayaraq, heç bir sənəd imzalanmayıb. ABŞ paytaxtında keçiriləcək görüşdən sonra “nəhayət sülh sazişi”nin elan ediləcəyi gözləntiləri olsa da, nə Azərbaycan, nə də Ermənistan bu barədə təsdiq verib. Nəşr qeyd edir ki, tərəflər arasında hələ də həll olunmamış problemlər var.
“Middle East Eye” portalı yazır ki, Azərbaycan sülh sazişinin yekun bağlanması üçün Ermənistanın konstitusiyasına dəyişiklik edilməsini tələb edir. Söhbət Ermənistan 7
Konstitusiyasında Azərbaycanın ərazi bütövlüyünə zidd olan maddələrin olmasından gedir. Bu dəyişikliyin həyata keçirilməsi üçün İrəvanda ümumxalq referendumu keçirilməlidir. Portalın mənbələri hesab edir ki, Vaşinqton görüşündə tərəflər sadəcə “niyyət protokolu” (letter of intent) imzalaya bilərlər.
Ermənistanın “News.am” portalı Vaşinqton görüşünü “regionda sülh, rifah və iqtisadi əməkdaşlığı təşviq etməyə yönəlmiş üçtərəfli təşəbbüs” kimi təqdim edir. Portal bu təşəbbüsü Cənubi Qafqazda geosiyasi dəyişikliklərin mümkün başlanğıcı kimi qiymətləndirir.
“Əl-Cəzirə” isə daha ehtiyatlı mövqe sərgiləyərir. Portal qeyd edir ki, hələlik real və davamlı sülh perspektivi ilə bağlı nikbin proqnoz vermək çətindir.
Rusiyanın “Kommersant” nəşrində dərc edilən məqalədə deyilir ki, Vaşinqtonda ABŞ prezidentinin respublikaçı köməkçiləri artıq qarşıdakı görüşdən danışırlar və Ağ Evin rəhbəri üçün yeni diplomatik qələbə kimi qiymətləndirirlər. “Hazırlanan sənəd sülh müqaviləsi olmasa da, onun imzalanması faktı Ağ Evdə Donald Trampa Cənubi Qafqazda sülhməramlı kimi çıxış etmək imkanı verəcək. Moskva ilə münasibətlərdə böhran yaşayan İrəvan və Bakı ABŞ-ni regionun əsas tənzimləyicisi kimi tanımağa hazır olduqlarını nümayiş etdirirlər”, - deyə məqalədə bildirilir.
Ermənistanın “Joğovurd” qəzeti hakimiyyətə yaxın mənbələrə istinadən qeyd edir ki, Vaşinqtonda keçiriləcək növbəti görüş zamanı “tarixi irəliləyiş” kimi təqdim ediləcək sənədin imzalanması mümkündür. Qəzetin iddiasına görə, Nikol Paşinyan hakim “Vətəndaş Müqaviləsi” partiyasının iclasında ABŞ-da müəyyən bir sənədin imzalanacağı ehtimalının yüksək olduğunu bildirib. Məlumata əsasən, sözügedən sənəd Zəngəzur dəhlizi ilə bağlı ABŞ tərəfindən irəli sürülən yeni təklifi əhatə edir. Bu təklifdə “dəhliz” termini işlədilmir və heç bir səlahiyyətin ötürülməsi nəzərdə tutulmur. Bununla belə, xarici nəzarət mexanizmləri təklifə daxil edilib.
Türkiyənin "Anadolu" agentliyində dərc edilən xəbərdə isə deyilir ki, İkinci Qarabağ müharibəsindən sonra Bakının təklifi ilə sülh danışıqlarına başlayan Azərbaycan və Ermənistan 2025-ci ilin martında sülh sazişinin mətni ilə bağlı razılığa gəliblər. Agentlikdə sülhün imzalanması üçün Azərbaycanın iki əsas şərtini - Ermənistan konstitusiyasının dəyişdirilməsini və ATƏT-in Minsk Qrupunun ləğv edilməsini xatırladıb.
Ümumilikdə, beynəlxalq medianın təhlilləri Vaşinqton görüşündən böyük gözləntilərin olsa da, ehtiyatlı optimizmin hakim olduğunu göstərir. Sülh sazişinin imzalanması ehtimalı ilə yanaşı, tərəflərin sadəcə qarşılıqlı öhdəlikləri əks etdirən “niyyət sənədi” ilə kifayətlənə biləcəyi də vurğulanır.
6-08-2025, 17:15
Ombudsman minaya düşən hərbçilərlə bağlı beynəlxalq təşkilatlara çağırış etdi
Azərbaycan Respublikasının İnsan Hüquqları üzrə Müvəkkili Ombudsman Azərbaycan hərbçilərinin Kəlbəcərdə minaya düşməsi ilə bağlı beynəlxalq təşkilatlara çağırış edib.
Bu barədə Ombudsmanın Mətbuat xidmətindən məlumat verilib.
"Ermənistan tərəfindən işğaldan azad edilmiş ərazilərimizdə işğal dövründə basdırılmış minalar və partlamamış hərbi sursatlar mülki əhalinin və hərbi qulluqçuların həyat və sağlamlığına qəsd etməkdə davam edir.
Kəlbəcər rayonu ərazisində Azərbaycan Ordusunun beş hərbi qulluqçusu mina partlayışı nəticəsində müxtəlif dərəcəli bədən xəsarətləri alıb.
Azərbaycan ərazisində kütləvi şəkildə basdırılmış və bu günədək dəqiq xəritələri təqdim olunmamış minalar hər gün günahsız insanların həyata və sağlamlıqlarına böyük təhdid olaraq qalmaqdadır. Basdırılmış minalar, həmçinin keçmiş məcburi köçkünlərin öz doğma yurdlarına qayıdışına, bu ərazilərdə həyata keçirilən bərpa-quruculuq işlərinə maneə yaradır, ətraf mühitə ciddi ziyan vurmaqla bölgədə ekoloji tarazlığın pozulmasına da səbəb olur.
İşğaldan azad edilmiş ərazilərimizdə basdırılmış minaların dəqiq xəritələri barədə məlumatların təqdim olunması ilə bağlı tərəfimizdən dəfələrlə beynəlxalq təşkilatlara ünvanlanan müraciətlərin qəbul edilməsinə baxmayaraq, Ermənistan tərəfi beynəlxalq humanitar hüquq normalarının tələblərini pozaraq bu məlumatları təqdim etməkdən boyun qaçırır.
Azərbaycan Respublikasının İnsan Hüquqları üzrə Müvəkkili (Ombudsman) olaraq bir daha müvafiq beynəlxalq təşkilatları dəqiq mina xəritələrinin Azərbaycana təhvil verilməsi istiqamətində Ermənistana ciddi təsir göstərməyə və törədilən hərbi və ekoloji cinayətlərə, o cümlədən humanitar hüquq pozuntularına kəskin reaksiya verməyə çağırıram", - məlumatda qeyd olunub.
6-08-2025, 17:01
Azərbaycanda yeni tariflər təsdiqləndi
Rəqəmsal İnkişaf və Nəqliyyat Nazirliyinin Kollegiyası ümumistifadəli telekommunikasiya şəbəkəsində fəaliyyət göstərən sabit telefon telekommunikasiya operatorlarının təşkil etdiyi ölkədaxili telekommunikasiya kanallarına qoşulma və istifadə ilə bağlı tariflərin tənzimlənməsi haqqında qərar qəbul edib.
Qərarı nazir Rəşad Nəbiyev imzalayıb.
Qərara əsasən, ölkədaxili telekommunikasiya kanallarına qoşulma ilə bağlı tarif kanalın tutumdan asılı olmayaraq ƏDV daxil olmaqla 50 manat, kanallardan istifadə ilə bağlı aylıq tariflər isə aşağıdakı kimi təsdiqlənib:
Nazirliyin Hüquq şöbəsinə bu Qərarın 3 gün müddətində Hüquqi Aktların Dövlət Reyestrinə daxil edilməsi üçün Ədliyyə Nazirliyinə təqdim edilməsi tapşırılıb.
6-08-2025, 16:38
Qondarma rejimin həbsdəki üzvlərinə baş çəkə bilərik - Qızıl Aypara Cəmiyyəti
Beynəlxalq Qırmızı Xaç Komitəsi Azərbaycandakı missiyasını başa çatdırır. Azərbaycan cəmiyyətində bu təşkilatın son 33 ildəki fəaliyyəti ilə bağlı dərin narazılıq uzun müddətdir mövcuddur. Xüsusilə Qarabağ münaqişəsi zamanı Ermənistan tərəfindən girov götürülən, itkin düşən azərbaycanlılarla bağlı konkret və nəticəverici addımların atılmaması, təşkilatın neytral və humanitar missiyasına dair ciddi suallar doğurmuşdu.
Azərbaycan Qızıl Aypara Cəmiyyətinin Baş katibi Ceyhun Mirzəyev bildirib ki, Beynəlxalq Qızıl Xaç Komitəsinin Azərbaycandakı fəaliyyətini dayandırmasından sonra bu istiqamətdə işlər dayandırılmayacaq.
"Ölkədəki aidiyyəti qurumlar və Azərbaycan Qızıl Aypara Cəmiyyəti qarşılıqlı koordinasiya ilə humanitar öhdəliklərin icrasını davam etdirəcək”, - o qeyd edib.
Baş katibin sözlərinə görə, humanitar hərəkatın üç əsas üzvü var: Beynəlxalq Qızıl Xaç Komitəsi (BQXK), Beynəlxalq Qızıl Xaç və Qızıl Aypara Cəmiyyətləri Federasiyası və yerli milli cəmiyyətlər:
“Yerli cəmiyyətlər münaqişə və böhranlar zamanı digər iki qurumla koordinasiya şəklində fəaliyyət göstərir. Xüsusilə silahlı münaqişələr və siyasi qarşıdurmalar zamanı əsir və itkin düşmüş şəxslərlə bağlı fəaliyyətlər - onların dəyişdirilməsi, ailələri ilə əlaqələrin bərpası kimi öhdəliklər birbaşa Beynəlxalq Qızıl Xaç Komitəsinin mandatına daxildir. Ancaq Beynəlxalq Qızıl Xaç Komitəsinin ölkədə artıq fəaliyyət göstərmədiyi şəraitdə, bu öhdəliklərin icrası üçün müxtəlif qurumların koordinasiyalı əməkdaşlığı zərurətə çevrilir”.
Ceyhun Mirzəyev qeyd edib ki, hazırda Azərbaycanda əsir və itkin düşmüş, girov götürülmüş vətəndaşlarla əlaqədar Dövlət Komitəsi fəaliyyət göstərir və müvafiq məsələlərin həllində mühüm rol oynayır:
“Eyni zamanda, Suriyada və İraqda hərbi münaqişələrə cəlb olunmuş azərbaycanlılar, Liviyada həbsdə olan vətəndaşlarımız da var. Bundan sonra həmin şəxslərə səfirliklərimiz vasitəsilə baş çəkiləcək, onların ailələrinə göndərmək istədikləri məktublar, eləcə də son vəziyyətləri ilə bağlı məlumatlar bizim tərəfimizdən ailələrə çatdırılacaq. Bu proseslər də hökumət, xüsusilə Xarici İşlər Nazirliyi ilə koordinasiya şəklində baş tutacaq”.
Baş katib bildirib ki, bu mərhələdən sonra Azərbaycan Qızıl Aypara Cəmiyyəti hətta qondarma rejimin üzvləri ilə bağlı da müəyyən səfərləri və müşahidə fəaliyyətlərini həyata keçirə bilər. Lakin burada bəzi suallar hələ açıq qalır:
“Biz həmin şəxslərə baş çəkə bilərik. Lakin bu səfərlərin nəticəsi olaraq hazırlanacaq hesabatlar BMT və Beynəlxalq Qırmızı Xaç Komitəsi kimi beynəlxalq strukturlar tərəfindən qəbul ediləcəkmi? Bizim hansı səviyyədə, hansı standartlarla hazırladığımız hesabatlar beynəlxalq ictimaiyyət tərəfindən qəbul olunacaqmı? Bu suallar hələ açıq qalır”.
Buna baxmayaraq, Ceyhun Mirzəyev humanitar sahədəki bəzi fəaliyyətlərin - məktublaşmalar, ailə üzvləri ilə əlaqələrin bərpası, sosial inteqrasiya və s. istiqamətlərin bundan sonra da mümkün olacağını vurğulayıb:
“Biz Qızıl Aypara Cəmiyyəti olaraq, əhalinin inteqrasiya prosesinin bərpası üçün hazırıq. Beynəlxalq Qızıl Xaç Komitəsinin fəaliyyətini dayandırmasından sonra da biz dövlət strukturları, XİN və digər qurumlarla birgə, öz mandatımıza və strateji fəaliyyət planımıza uyğun olaraq, humanitar istiqamətdə işlərimizi davam etdirəcəyik. Qızıl Aypara Cəmiyyəti, digər bütün milli cəmiyyətlər kimi, dövlətə yardımçı və dəstəkçi rolu oynayır”.
6-08-2025, 16:03
25 yaşlı futbolçu vəfat etdi
Ukraynanın "Zorya" klubunun yarımmüdafiəçisi Volodimir Belotserkovets 26 yaşında vəfat edib.
Bu barədə Ukrayna Futbol Assosiasiyasının mətbuat xidməti məlumat yayıb.
Futolçunun ölümünün səbəbi açıqlanmayıb.
Qeyd edək ki, S.Belotserkovets Ukraynada “Metallist”in (Xarkov) yetirməsidir və eyni zamanda “İnqulets” klubunda çıxış edib. O, “Zorya”nın heyətində 11 oyun keçirib, bir məhsuldar ötürmə verib.
6-08-2025, 15:45
Azərbaycana qarşı informasiya hücumunu arxasında KİM DAYANIR...
Milli Məclisin Xarici müdaxilələrə və hibrid təhdidlərə qarşı komissiyası qonşu dövlətlərdən birinin ərazisindən Azərbaycana qarşı aparılan qeyri-dost fəaliyyətlərin sosial media və sosial şəbəkə platforması olan “Facebook” vasitəsilə hələ də davam etdiyini müşahidə edir.
Belə ki, bir sıra səhifələr (“Echo of Baku”, “Azeri Horizon”, “Xəbər24”, “Merry you”, “Azerbaijan Pulse”, “Az insight” və s.) vasitəsilə adıçəkilən platforma üzərindən Azərbaycan Respublikasının informasiya məkanına hədəfli müdaxilə cəhdləri edilərək ölkədə ictimai fikri çaşdırmağa, dövlətin apardığı uğurlu daxili və xarici siyasətə kölgə salmağa çalışılır.
Geosiyasi manipulyasiya xarakterli məlumatlar Azərbaycan dilində “Facebook”da paylaşıldıqdan sonra istifadəçilərdən “Telegra.ph” kimi platformalara keçid etməkləri istənilir ki, bu da öz növbəsində bir sıra istifadəçi məlumatlarının (IP ünvan, istifadə olunan cihaz və s.) ələ keçirilməsinə səbəb ola bilər:
"Vətəndaşlarımızın nəzərinə çatdırırıq ki, bu cür informasiya əməliyyatlarına qarşı müvafiq dövlət qurumları ilə əlaqələndirilmiş şəkildə daim lazımi tədbirlər görülür. Eyni zamanda, qeyd etməliyik ki, “Meta” şirkətinə edilən müraciətlər nəticəsində Azərbaycana qarşı fəaliyyət göstərən həmin səhifələrin bağlanmasına nail olunmuşdur.
Xarici müdaxilələrə və hibrid təhdidlərə qarşı komissiya vətəndaşlarımızı diqqətli olmağa, bu cür məlumatlara inanmamağa çağırır, ölkəmizə qarşı istifadə edilən hibrid təhdid metodları və alətləri ilə bağlı müntəzəm olaraq ictimaiyyəti məlumatlandırır".
6-08-2025, 15:33
Bakıdan Qaxa istirahətə gələn ailə yol qəzasına düşdü
Bakıdan Qaxa istirahətə gələn ailə yol qəzasına düşüb.
Hadisə Şəki-Qax avtomobil yolunun Qaxın Əmbərçay kəndi ərazisindən keçən hissəsində baş verib.
Bakı şəhər sakini 29 yaşlı Elşən Abdullayev idarə etdiyi avtomobillə hərəkətdə olarkən idarəetməni itirib və nəticədə avtomobil yoldan çıxaraq öncə ağaca dəyib, daha sonra isə aşıb.
Qəza zamanı sürücü Elşən Abdullayev və onun atası 70 yaşlı Eldar Abdullayev müxtəlif dərəcəli bədən xəsarətləri alaraq Qax Rayon Mərkəzi Xətəxanasına yerləşdiriliblər.
Məlumata görə, avtomobildə sürücünün anası da olub, lakin qadın xəsarət almayıb.
Faktla bağlı araşdırma aparılır.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Zəngilanın dirçəliş
və qayıdış dövrü
Azərbaycan tarixinin ən şanlı səhifəsi olan Vətən müharibəsi bizə təkcə torpaqlarımızı deyil, ləyaqətimizi, qürurumuzu qaytardı. Həmin qürurun ən parlaq ünvanlarından biri də Zəngilandır. 2020-ci il sentyabrın 27-də başlanan Zəfər yürüşü zamanı şərqdən, Cəbrayıl istiqamətindən düşmənə vurulan sarsıdıcı zərbələr nəticəsində Azərbaycan Ordusu 30-dan çox yaşayış məntəqəsini azad edərək Zəngilanın inzibati hüdudlarına çatdı. Oktyabrın 18-də rayonun tam azad edilməsi uğrunda genişmiqyaslı əməliyyata start verildi və cəmi iki gün sonra, oktyabrın 20-də Müzəffər Ali Baş Komandan, Prezident İlham Əliyev xalqa müraciətində Havalı, Zərnəli, Məmmədbəyli, Həkəri, Şərifan, Birinci Muğanlı kəndlərinin və Zəngilan şəhərinin işğaldan azad edildiyini elan etdi. Beləliklə, Zəngilan döyüşləri nəticəsində 1 şəhər, 4 qəsəbə və 49 kənd düşmən tapdağından xilas edildi və bununla da 132 kilometrlik Azərbaycan-İran dövlət sərhədi tam bərpa olundu. İşğalın bitməsindən dərhal sonra sərhəd boyunca zəruri istehkam və mühafizə işlərinə başlanıldı.
Qərbi zəngəzurlular Zəngilan şəhidliyində
Bu tarixi qələbənin əbədiləşdirilməsi üçün 2020-ci il noyabrın 26-da “Zəngilanın azad olunmasına görə” medalı təsis edildi və 6974 hərbi qulluqçumuz bu medalla təltif olundu. Prezidentin 31 iyul 2023-cü il tarixli Sərəncamı ilə isə 20 oktyabr tarixi Zəngilan şəhəri günü kimi rəsmiləşdirildi. Zəngilanın azad olunması Böyük Qayıdışın başlanğıcı oldu. Bu gün dövlətin ən böyük hədəfi həmin torpaqları yenidən həyatla doldurmaqdır. 2026-cı il 1 oktyabr tarixinə olan məlumata görə, Zəngilan şəhərində 84 ailə, yəni 339 nəfər, Ağalı kəndində 234 ailə, yəni 1017 nəfər, Məmmədbəyli kəndində isə 179 ailə, yəni 903 nəfər öz doğma ocağına qayıdıb. Köçürülən ailələr peşə və bacarıqlarına uyğun olaraq müxtəlif dövlət qurumlarında, tikinti şirkətlərində, tikiş fabrikində və digər sahələrdə işlə təmin edilirlər.Bu qayıdışın dünyaya nümunə olan simvolu isə Ağalı kəndidir. Ağalı təkcə Azərbaycanda deyil, dünyanın ən müasir kəndlərindən biri hesab olunur. Burada “ağıllı kənd” konsepsiyası tam şəkildə tətbiq edilib. Dayanıqlı inkişafın təmin olunması üçün sosial-iqtisadi xidmətlər ən yüksək texnologiyalarla qurulub. Kəndin enerji təminatı ekoloji cəhətdən tam təmizdir, Həkəri çayı üzərində 3 turbindən ibarət Arximed tipli su elektrik stansiyası və gücü 325 kilovat olan günəş panelləri quraşdırılıb. Evlərdə istilik xərclərini azaltmaq üçün kombinə edilmiş sistemlər, mətbəx sobası və yüksək səmərəli elektrod boilerlər var. Suyun isidilməsi üçün günəş kollektorlarından, çirkab suların təmizlənməsi üçün bioloji təmizləmə qurğularından istifadə olunur.
Kənddə GPON texnologiyası ilə yüksək sürətli internet, İP TV, video müşahidə kameraları, ağıllı işıq dirəkləri və avtomatik hava müşahidə stansiyaları var. Əhalinin rahatlığı üçün Tele-səhiyyə, E-təhsil və digər elektron xidmətlər, ASAN, DOST, məktəb, bağça, tibb məntəqəsi, kiçik və orta biznesə dəstək mərkəzləri fəaliyyət göstərir. Ümumi sahəsi 2 hektardan çox olan park salınıb. Bütün bunlar onu göstərir ki, Ağalı kəndi sadəcə yaşayış məntəqəsi deyil, gələcəyin kənd modelidir. Nazirlər Kabinetinin 30 oktyabr 2023-cü ildə təsdiq etdiyi Baş Plana əsasən şəhərin 2040-cı ilədək inkişafı üçün böyük vəsait ayrılıb. 2022-ci ildə təməli qoyulan 104 mənzilli ilk yaşayış kompleksinin açılışı 2026-cı ildə olub. Kompleksin ərazisi 2 hektardan artıqdır və burada 12 bina, o cümlədən 4 ədəd üçmərtəbəli 60 mənzilli və 8 ədəd ikimərtəbəli 44 mənzilli evlər tikilib.
Azad Zəngilanın qonaqları
Zəngilan Beynəlxalq Hava Limanı bu bölgənin inkişafı üçün mühüm faktora çevrilib. Zəngəzur dəhlizinin hava infrastrukturu ilə gücləndirilməsi baxımından hava limanı strateji əhəmiyyət daşıyır. Eyni zamanda Horadiz-Zəngilan-Ağbənd dəmir yolunun inşası da böyük strateji əhəmiyyətə malikdir. Bu yol azad edilmiş torpaqlara həm vətəndaşların qayıdışı, həm də yüklərin daşınması üçün tarixi imkan yaradır. Artıq yolun birinci mərhələsi üzrə böyük hissə tamamlanıb və Araz İqtisadi Zonası Sənaye Parkına yüklər daşınır. Horadiz-Cəbrayıl-Zəngilan-Ağbənd avtomobil yolunun uzunluğu 126,3 kilometrdir, illik buraxılış qabiliyyəti 15 milyon tondur və layihənin 2026-cı ilin ikinci yarısında yekunlaşdırılması nəzərdə tutulur. İşğal dövründə tövlə kimi istifadə olunan XIX əsrə aid Zəngilan şəhər məscidi Heydər Əliyev Fondu tərəfindən bərpa olunub. Bərpa-tikinti işləri çərçivəsində tarixi məscid konservasiya edilib və onun yanında düzbucaqlı planlı, iki minarəli yeni məscid inşa edilib. Yeni məsciddə 220 və 100 nəfərlik ibadət zalları yaradılıb. Rayonun gələcəyi üçün turizm və kənd təsərrüfatı da unudulmayıb. 2024-cü il mayın 18-də Ağalı kəndində, Həkəri çayı vasitəsilə yaradılmış süni gölün sahilində “Ağalı” hoteli açılıb. Zəngilan İstirahət Kompleksində 111 nömrəli hotelin təməli 2023-cü il mayın 4-də qoyulub. 2026-cı il mayın 10-da isə “Zəngilan City Park Hotel”in təməli qoyulub. Kənd təsərrüfatı sahəsində isə “Dost Aqropark” layihəsi həyata keçirilir. Azərbaycan və Türkiyə şirkətlərinin birgə layihəsi olan bu kompleks tam başa çatdıqda 500 nəfəri işlə təmin edəcək və 100 milyon dollar sərmayə qoyulacaq. Layihənin birinci mərhələsində 5200 kvadratmetr qapalı, 113 min kvadratmetr açıq tipli heyvandarlıq kompleksləri, sosial obyektlər, kafe, kinoteatr tikilib.
Beləliklə, Zəngilan bu gün sadəcə işğaldan azad edilmiş bir rayon deyil, Azərbaycan dövlətinin qüdrətinin, iradəsinin və gələcəyə olan inamının canlı rəmzidir. Burada hər daş, hər tikilən ev, hər qayıdan ailə 30 illik həsrətin sonu və Böyük Qayıdışın əbədi başlanğıcıdır.
Mahnur Hüseynova
Xırdalan şəhər 8 nömrəli tam orta ümumtəhsil məktəbinin direktoru
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!