7-09-2022, 20:30
ABŞ nüvə daşıya bilən raketini sınaqdan keçirdi
ABŞ ordusu qitələrarası ballistik raketi sınaqdan keçirib. Bu barədə ABŞ Hərbi Hava Qüvvələri məlumat yayıb. Rusiya ilə gərginlik fonunda keçirilən sınaqlar Kaliforniyadakı Vandenberq aviabazasında baş tutub. Hərbçilər eksperimental döyüş başlığı ilə təchiz edilmiş "Minuteman III" ballistik raketini buraxıblar. Qeyd edilir ki, raketlər nüvə tipli döyüş başlıqları daşıya bilər. "Bu sınaq buraxılışı ABŞ-ın nüvə çəkindirmə siyasətinin təhlükəsiz, etibarlı və effektiv olduğunu nümayiş etdirmək məqsədi daşıyan müntəzəm və dövri fəaliyyətlərin bir hissəsidir", - deyə açıqlamada bildirilir. Qeyd edək ki, "Minuteman III" 50 ildir xidmətdədir və hazırda ABŞ nüvə arsenalında yeganə qitələrarası ballistik raketdir. Raketlər ABŞ-ın Vayominq, Şimali Dakota və Montanadakı üç hərbi bazasında yerləşir. ABŞ arsenalına, həmçinin "Trident" adlı sualtı qayıqlardan və strateji bombardmançılardan buraxılan nüvə silahları daxildir.
7-09-2022, 20:27
Ərdoğan 5 günlük səfərlə ABŞ-a gedir
Türkiyə Prezidenti Rəcəb Tayyib Ərdoğan gələn həftə ABŞ-a səfər edəcək. Bu barədə Türkiyə Prezidentinin mətbuat xidməti məlumat yayıb. Səfər sentyabrın 17-dən 22-dək davam edəcək. O, ABŞ-da bir sıra dövlət rəsmləri ilə görüşlər keçirəcək. Ərdoğanın ABŞ Prezidenti Co Baydenlə görüşüb-görüşməyəcəyi barədə məlumat verilməyib.
7-09-2022, 20:25
Üç ölkə ruslara viza verilməməsi barədə razılığa gəldi
Litva, Latviya və Estoniya rusların və belarusluların öz sərhədləri vasitəsilə Avropa İttifaqına girişini məhdudlaşdırmaq barədə razılığa gəliblər. Bu barədə Latviyanın xarici işlər naziri Edqars Rinkeviç bildirib. İstisnalar yalnız yük maşını sürücüləri, diplomatlar, ailə və humanitar səbəblərə görə gələn vətəndaşlara aiddir. "Qərarlar milli hökumətlər tərəfindən milli prosedurlara uyğun olaraq qəbul ediləcək və qüvvəyə minəcək", - Rinkeviç qeyd edib.
7-09-2022, 20:23
Ata evdən qaçan qızını namus üstündə öldürüb
Bir neçə gündür ki, itkin kimi axtarışda olan Ağsu sakini qətlə yetirilib. Belə ki, rayon sakini, 1989-cu il təvəllüdlü Aybəniz Abdullayeva sentyabrın 2-də yaşadığı evdən çıxaraq bir daha geri qayıtmayıb. Bu gün 33 yaşlı Aybənizin qətlə yetirildiyi məlum olub. Araşdırma zamanı onun atası Nazim Əliyev tərəfindən öldürülməsi müəyyən edilib. Butov.az-ın əldə etdiyi məlumata görə, Aybəniz Abdullayeva Ağsunun Pirhəsənli kəndinin sakini olub. O, bir neçə il öncə həmin kənddə yaşayan bibisi oğlu ilə ailə həyatı qurub. Onların 7 yaşlı bir oğlu var. A.Abdullayevanın həyat yoldaşı Bakıda işləyir, o, ara-sıra Ağsuya gedərək ailəsinə baş çəkirmiş. Qadın ərinin Bakıda olduğu gün - sentyabrın 2-də heç kimə demədən evdən qaçaraq Abşeron rayonuna gəlib. Aybəniz bir neçə gün kimliyi hələlik açıqlanmayan tanışının evində qalıb. Qızının evdən qaçmasından xəbər tutan Nazim Əliyev dərhal axtarışlara başlayıb. O, A.Abdullayevanın yerini müəyyən edərək, Abşerona yollanıb. N.Əliyev bu gün səhər saatlarında qızının qaldığı evi taparaq, onu bıçaqla qətlə yetirib. Qadının meyiti bu gün səhər saatlarında Bakı-Sumqayıt avtomobil yolunun kənarında aşkarlanıb. İlkin ehtimala görə, cinayət hadisəsi namus üstündə törədilib. Qeyd edək ki, faktla bağlı Abşeron rayon prokurorluğunda Cinayət Məcəlləsinin 120.1-ci (qəsdən adam öldürmə) maddəsi ilə cinayət işi başlanıb. Nazim Əliyev şübhəli şəxs qismində tutularaq istintaqa cəlb edilib. İş üzrə istintaq davam edir.
7-09-2022, 20:20
"Bəziləri İrəvanı yox, Bakını seçir" - Putin
“Rusiya biznesinin Ermənistan və Avrasiya İqtisadi İttifaqının digər ölkələrinə köçməsinə normal münasibət bəsləyirəm”. Bunu Rusiya Prezidenti Vladimir Putin Şərq İqtisadi Forumunda çıxışı zamanı deyib. Putin qeyd edib ki, əgər onlara orada işləmək rahatdırsa, getmələri normaldır: "Bəziləri İrəvanı deyil, Bakını seçirlər. Qazaxıstanda da çox yaxşı maliyyə zonası yaradılıb. Adətən İT sahəsi ilə bağlı biznes nümayəndələri ölkədən gedirlər”. Prezident onu da qeyd edib ki, Rusiya biznesinin xeyrinə olan hər bir şeyi alqışlayır: "İrəvanda işləyib, faktiki olaraq Moskvada yaşamaq olar, buna heç nə mane olmur. Gedənlərin bir çoxu artıq geri qayıdıb, onlar başa düşüblər ki, burada qorxulu heç nə baş vermir, hər şey sabitdir. Kiməsə Ermənistanda işləmək xoşdursa, buyursun, getsin".
7-09-2022, 20:18
Putin təzyiq göstərsə də, Lukaşenko müharibə istəmir
Rusiya Ukraynanın şimalında ikinci cəbhənin açılması üçün Belarusa təzyiq göstərir. Buna baxmayaraq, Belarus Prezidenti Alekdandr Lukaşenko müharibəyə girməkdən yayınır. Bu barədə istefada olan ukraynalı general-leytenant İqor Romanenko bildirib. Onun sözlərinə görə, belaruslular Ukraynadakı işğala qoşulmaq üçün xeyli sayda hərbçi hazırlasalar da, onlar əslində, hərbi əməliyyatların aktiv mərhələsinə daxil olmamaq üçün hər şeyi edirlər.
7-09-2022, 20:16
“Qarabağ” “Trabzonspor”un futbolçusu ilə anlaşdı
“Qarabağ” “Trabzonspor”dan ayrılan Benqali-Fode Koyta ilə anlaşıb. Bu barədə “Qafqazinfo”ya futbolçunun özü məlumat verib. O bildirib ki, artıq Azərbaycan təmsilçisi ilə razılıq əldə edib: “Mən “Qarabağ”a gəlirəm”. Qeyd edək ki, Benqali-Fode Koyta peşəkar karyerasına Fransanın “Monpelye” klubunda başlayıb. O, icarə əsasında “Lans” və “Le Havre”də oynayıb. 2013-cü ildə “Kann” klubuna keçib. 2 il burada oynadıqdan sonra İngiltərə “Bləkbörn”ünə transfer olunub. 2016-ci ildə isə Koyta Türkiyənin “Kasımpaşa” klubuna keçib. Burada 5 il çıxış edib və 100 oyuna 27 qol vurub. Ötən il isə o, “Trabzonspor” transfer olunub. Trabzonluların heyətində Koyta 18 oyuna qol vura bilməyib.
7-09-2022, 20:13
“Liz Trass da Conson kimi rüsvay olacaq” – Medvedev
Böyük Britaniyanın yeni baş naziri Liz Trass sələfi Boris Conson kimi vəzifəsini rüsvayçılıqla tərk edəcək. Bunu Rusiya Federasiyası Təhlükəsizlik Şurasının sədr müavini Dmitri Medvedev “Telegram” kanalında bildirib. “Yeni Baş nazirin siyasət, tarix, coğrafiya haqqında elementar təsəvvürləri yoxdur. O, sadəcə Rusiyaya hər şeydə qalib gəlmək istəyən səriştəsiz rusofobdur. Digər yandan, öz sərsəm sanksiyalarına görə yaranan enerji böhranı və ərzaq inflyasiyasını sanksiyalardan əl çəkmədən son qoymaq istəyir. Bütün bunlar mənim bu proqnozuma əsas verir”, - Medvedev Trassı ittiham edib. Qeyd edək ki, Liz Trass ötən gündən etibarən Böyük Britaniyanın baş naziri kimi fəaliyyətə başlayıb.
7-09-2022, 20:11
Rusiya Avropa İttifaqına sanksiya tətbiq etdi
Rusiya Avropa İttifaqının yüksək səviyyəli hərbi rəhbərlərini "persona non-qrata" elan edib. Bu barədə Rusiya Xarici İşlər Nazirliyinin saytında məlumat yer alıb. Bundan əlavə, məhdudiyyətlər hüquq-mühafizə orqanlarının yüksək rütbəli əməkdaşlarına, eləcə də Ukraynaya arsenal tədarükü ilə məşğul olan silah və hərbi texnika istehsalı üzrə Avropa təşkilatlarının nümayəndələrinə şamil olunub. XİN-dən bildirilib ki, Rusiyaya qeyri-dost hərəkətlərə sərt cavab verəcək.
7-09-2022, 20:09
Serblər Türkiyəyə pasportsuz gedə biləcəklər
Serbiya və Türkiyə arasında vətəndaşların səyahətlərinin şəxsiyyət vəsiqəsilə həyata keçirməsinə dair müqavilə imzalanıb. Butov.az xəbər verir ki, hazırda Türkiyə Prezidenti Rəcəb Tayyib Ərdoğan Serbiyada səfərdədir. Səfər zamanı Prezident Sarayında Ərdoğan və serbiyalı həmkarı Aleksandr Vuçiçin təkbətək görüşü keçirilib, daha sonra iki ölkə arasında müxtəlif sahələrdə əməkdaşlığa dair müqavilələr imzalanıb. Mətbuata birgə bəyanatla çıxış edən prezidentlər ikitərəfli əlaqələrin inkişafında məmnunluq ifadə ediblər. Ərdoğan bildirib ki, Serbiya ilə Türkiyə arasında vətəndaşların gediş-gəlişinin şəxsiyyət vəsiqəsi ilə həyata keçirilməsi barədə razılıq əldə olunub.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Zəngilanın dirçəliş
və qayıdış dövrü
Azərbaycan tarixinin ən şanlı səhifəsi olan Vətən müharibəsi bizə təkcə torpaqlarımızı deyil, ləyaqətimizi, qürurumuzu qaytardı. Həmin qürurun ən parlaq ünvanlarından biri də Zəngilandır. 2020-ci il sentyabrın 27-də başlanan Zəfər yürüşü zamanı şərqdən, Cəbrayıl istiqamətindən düşmənə vurulan sarsıdıcı zərbələr nəticəsində Azərbaycan Ordusu 30-dan çox yaşayış məntəqəsini azad edərək Zəngilanın inzibati hüdudlarına çatdı. Oktyabrın 18-də rayonun tam azad edilməsi uğrunda genişmiqyaslı əməliyyata start verildi və cəmi iki gün sonra, oktyabrın 20-də Müzəffər Ali Baş Komandan, Prezident İlham Əliyev xalqa müraciətində Havalı, Zərnəli, Məmmədbəyli, Həkəri, Şərifan, Birinci Muğanlı kəndlərinin və Zəngilan şəhərinin işğaldan azad edildiyini elan etdi. Beləliklə, Zəngilan döyüşləri nəticəsində 1 şəhər, 4 qəsəbə və 49 kənd düşmən tapdağından xilas edildi və bununla da 132 kilometrlik Azərbaycan-İran dövlət sərhədi tam bərpa olundu. İşğalın bitməsindən dərhal sonra sərhəd boyunca zəruri istehkam və mühafizə işlərinə başlanıldı.
Qərbi zəngəzurlular Zəngilan şəhidliyində
Bu tarixi qələbənin əbədiləşdirilməsi üçün 2020-ci il noyabrın 26-da “Zəngilanın azad olunmasına görə” medalı təsis edildi və 6974 hərbi qulluqçumuz bu medalla təltif olundu. Prezidentin 31 iyul 2023-cü il tarixli Sərəncamı ilə isə 20 oktyabr tarixi Zəngilan şəhəri günü kimi rəsmiləşdirildi. Zəngilanın azad olunması Böyük Qayıdışın başlanğıcı oldu. Bu gün dövlətin ən böyük hədəfi həmin torpaqları yenidən həyatla doldurmaqdır. 2026-cı il 1 oktyabr tarixinə olan məlumata görə, Zəngilan şəhərində 84 ailə, yəni 339 nəfər, Ağalı kəndində 234 ailə, yəni 1017 nəfər, Məmmədbəyli kəndində isə 179 ailə, yəni 903 nəfər öz doğma ocağına qayıdıb. Köçürülən ailələr peşə və bacarıqlarına uyğun olaraq müxtəlif dövlət qurumlarında, tikinti şirkətlərində, tikiş fabrikində və digər sahələrdə işlə təmin edilirlər.Bu qayıdışın dünyaya nümunə olan simvolu isə Ağalı kəndidir. Ağalı təkcə Azərbaycanda deyil, dünyanın ən müasir kəndlərindən biri hesab olunur. Burada “ağıllı kənd” konsepsiyası tam şəkildə tətbiq edilib. Dayanıqlı inkişafın təmin olunması üçün sosial-iqtisadi xidmətlər ən yüksək texnologiyalarla qurulub. Kəndin enerji təminatı ekoloji cəhətdən tam təmizdir, Həkəri çayı üzərində 3 turbindən ibarət Arximed tipli su elektrik stansiyası və gücü 325 kilovat olan günəş panelləri quraşdırılıb. Evlərdə istilik xərclərini azaltmaq üçün kombinə edilmiş sistemlər, mətbəx sobası və yüksək səmərəli elektrod boilerlər var. Suyun isidilməsi üçün günəş kollektorlarından, çirkab suların təmizlənməsi üçün bioloji təmizləmə qurğularından istifadə olunur.
Kənddə GPON texnologiyası ilə yüksək sürətli internet, İP TV, video müşahidə kameraları, ağıllı işıq dirəkləri və avtomatik hava müşahidə stansiyaları var. Əhalinin rahatlığı üçün Tele-səhiyyə, E-təhsil və digər elektron xidmətlər, ASAN, DOST, məktəb, bağça, tibb məntəqəsi, kiçik və orta biznesə dəstək mərkəzləri fəaliyyət göstərir. Ümumi sahəsi 2 hektardan çox olan park salınıb. Bütün bunlar onu göstərir ki, Ağalı kəndi sadəcə yaşayış məntəqəsi deyil, gələcəyin kənd modelidir. Nazirlər Kabinetinin 30 oktyabr 2023-cü ildə təsdiq etdiyi Baş Plana əsasən şəhərin 2040-cı ilədək inkişafı üçün böyük vəsait ayrılıb. 2022-ci ildə təməli qoyulan 104 mənzilli ilk yaşayış kompleksinin açılışı 2026-cı ildə olub. Kompleksin ərazisi 2 hektardan artıqdır və burada 12 bina, o cümlədən 4 ədəd üçmərtəbəli 60 mənzilli və 8 ədəd ikimərtəbəli 44 mənzilli evlər tikilib.
Azad Zəngilanın qonaqları
Zəngilan Beynəlxalq Hava Limanı bu bölgənin inkişafı üçün mühüm faktora çevrilib. Zəngəzur dəhlizinin hava infrastrukturu ilə gücləndirilməsi baxımından hava limanı strateji əhəmiyyət daşıyır. Eyni zamanda Horadiz-Zəngilan-Ağbənd dəmir yolunun inşası da böyük strateji əhəmiyyətə malikdir. Bu yol azad edilmiş torpaqlara həm vətəndaşların qayıdışı, həm də yüklərin daşınması üçün tarixi imkan yaradır. Artıq yolun birinci mərhələsi üzrə böyük hissə tamamlanıb və Araz İqtisadi Zonası Sənaye Parkına yüklər daşınır. Horadiz-Cəbrayıl-Zəngilan-Ağbənd avtomobil yolunun uzunluğu 126,3 kilometrdir, illik buraxılış qabiliyyəti 15 milyon tondur və layihənin 2026-cı ilin ikinci yarısında yekunlaşdırılması nəzərdə tutulur. İşğal dövründə tövlə kimi istifadə olunan XIX əsrə aid Zəngilan şəhər məscidi Heydər Əliyev Fondu tərəfindən bərpa olunub. Bərpa-tikinti işləri çərçivəsində tarixi məscid konservasiya edilib və onun yanında düzbucaqlı planlı, iki minarəli yeni məscid inşa edilib. Yeni məsciddə 220 və 100 nəfərlik ibadət zalları yaradılıb. Rayonun gələcəyi üçün turizm və kənd təsərrüfatı da unudulmayıb. 2024-cü il mayın 18-də Ağalı kəndində, Həkəri çayı vasitəsilə yaradılmış süni gölün sahilində “Ağalı” hoteli açılıb. Zəngilan İstirahət Kompleksində 111 nömrəli hotelin təməli 2023-cü il mayın 4-də qoyulub. 2026-cı il mayın 10-da isə “Zəngilan City Park Hotel”in təməli qoyulub. Kənd təsərrüfatı sahəsində isə “Dost Aqropark” layihəsi həyata keçirilir. Azərbaycan və Türkiyə şirkətlərinin birgə layihəsi olan bu kompleks tam başa çatdıqda 500 nəfəri işlə təmin edəcək və 100 milyon dollar sərmayə qoyulacaq. Layihənin birinci mərhələsində 5200 kvadratmetr qapalı, 113 min kvadratmetr açıq tipli heyvandarlıq kompleksləri, sosial obyektlər, kafe, kinoteatr tikilib.
Beləliklə, Zəngilan bu gün sadəcə işğaldan azad edilmiş bir rayon deyil, Azərbaycan dövlətinin qüdrətinin, iradəsinin və gələcəyə olan inamının canlı rəmzidir. Burada hər daş, hər tikilən ev, hər qayıdan ailə 30 illik həsrətin sonu və Böyük Qayıdışın əbədi başlanğıcıdır.
Mahnur Hüseynova
Xırdalan şəhər 8 nömrəli tam orta ümumtəhsil məktəbinin direktoru
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!