4-02-2023, 15:38
Ermənistan-Rusiya münasibətləri gərginləşir
Ermənistan-Rusiya münasibətləri yenidən gərginləşmə mərhələsinə qədəm qoyub. Rusiya Xarici İşlər Nazirliyi dəfələrlə Avropa İttifaqı (Aİ) müşahidəçilərinin Ermənistanda yerləşdirilməsi ilə bağlı narahatlığını bildirib. Rəsmi Moskva son iki həftədə ikinci dəfə bəyan edib ki, Kollektiv Təhlükəsizlik Müqaviləsi Təşkilatı (KTMT) da Ermənistanda sülhməramlı missiya yerləşdirməyə hazırdır. Xarici işlər naziri Lavrov bu barədə əvvəlcə yanvarda keçirilən mətbuat konfransında, sonra isə dünən yerli mətbuata müsahibəsində danışıb. O bəyan edib ki, Rusiyanın Ermənistanda KTMT missiyasının yerləşdirilməsi təklifi hələ də aktualdır, əgər rəsmi İrəvan hələ də maraqlıdırsa, o zaman missiya bir-iki gün ərzində yerləşdirilə bilər. "Bu plan çoxdan hazır idi, lakin erməni tərəfi bizi tələsdirmədi", - Lavrov deyib. Rəsmi İrəvan isə KTMT-ni üzərinə götürdüyü öhdəlikləri yerinə yetirməməkdə ittiham edir. Paşinyan iqtidarı Azərbaycanla sərhəddə baş verən sentyabr döyüşləri zamanı Ermənistana hərbi dəstək tələb etmişdi. Son müsahibəsində Lavrov Ermənistan hakimiyyətinin arqumentinə cavab verib ki, KTMT-də vahid mövqe yoxdur. Yəni qurumun bütün üzvləri Ermənistana hərbi dəstək verilməsində maraqlı olmayıb. Nikol Paşinyan bu ilin əvvəlində keçirdiyi mətbuat konfransında bildirmişdi ki, İrəvan KTMT-nin 2023-cü ildəki hərbi təlimlərinə ev sahibliyi etməyəcək. Paşinyan əsas kimi Bakının Qərblə danışıqlarına istinad edib ki, “Azərbaycan həmin təlimləri təhdid kimi qəbul edir və qabaqlayıcı tədbirlər görür”. Moskva Ermənistan hökumətinin Qərbə meyillənməsindən narazıdır, Kreml bildirir ki, nə üçün İrəvan strateji tərəfdaşının qəzəbinə səbəb ola biləcək addım atıb Aİ müşahidəçilərini ölkəyə dəvət etmək yolunu seçdi... Qeyd edək ki, Lavrovun son açıqlamalarında gələcəkdə eskalasiyanın mümkünlüyü ilə bağlı eyhamlar da var idi. Keçmiş deputat, politoloq Arman Abovyan “Hraparak”a açıqlamasında Paşinyan hökumətini Rusiya ilə münasibətləri pisləşdirməkdə qınayıb: “Bəli, strateji tərəfdaşla - KTMT ilə bağlı həll olunmamış məsələlər var. Lakin onlar müzakirələr yolu ilə həll olunmalıdır. Tərəfdaşla danışmalısınız, amma kameralar qarşısında yox, bağlı qapılar arxasında”. Arman Abovyan bildirib ki, Paşinyan hakimiyyəti Qərblə Rusiya arasında qarşıdurmanı Ermənistan ərazisinə gətirib və bu fakt ölkə üçün ontoloji risklər ehtiva edir: “Bəs Aİ-nin müşahidəsi bizə nə verir? Aİ-nin baş diplomatı Jozef Borrel şəxsən Azərbaycana qarşı sanksiyaların tətbiq olunmayacağını elan edib. Azərbaycan Avropa ilə qaz müqavilələrini ayda bir dəfə yeniləyir. Belə çıxır ki, müşahidəçilər yalnız izləməyə gəlir”.
3-02-2023, 23:42
Rəisi zəlzələdən zərər çəkmiş azərbaycanlılarla bağlı tapşırıq verdi
İran prezidenti İbrahim Rəisi fevralın 3-də zəlzələdən zərər çəkmiş Xoy şəhərində əhalinin vəziyyəti ilə bağlı Qərbi Azərbaycan vilayətinin qubernatoru ilə telefon danışığı aparıb və yenidənqurma işlərinin sürətləndirilməsini istəyib. Bu barədə İranın “Mehr” agentliyi məlumat yayıb. Bildirilib ki, İran prezidenti telefon danışığı zamanı soyuq hava ilə əlaqədar müvəqqəti yerləşdirmə düşərgələrinin və sığınacaqların sayının artırılması və insanların ehtiyaclarının ödənilməsi barədə göstəriş verib. Qərbi Azərbaycan vilayətinin qubernatoru da öz növbəsində Rəisiyə son yardım vəziyyəti haqqında ətraflı hesabat təqdim edib. Onun sözlərinə görə, indiyədək Xoy şəhərində 60 müvəqqəti məskunlaşma düşərgəsi yaradılıb və bu düşərgələrin sayı 100-ə çatdırılacaq. Son zəlzələ nəticəsində şəhər və kənd yerlərində 12 minə yaxın yaşayış binasının dağıldığını deyən qubernator əlavə edib ki, indiyədək əhali arasında 25 mindən çox çadır paylanıb. Xatırladaq ki, yanvarın 28-də İranın Qərbi Azərbaycan vilayətinin Xoy şəhərində 5,9 bal gücündə zəlzələ baş verib. Zəlzələnin episentri 175 min əhalisi olan Xoy şəhərindən 23 kilometr cənub-şərqdə yerləşib. Güclü zəlzələ nəticəsində azı 3 nəfər ölüb, 900-dən çox insan yaralanıb. Qərbi Azərbaycan vilayətinin qubernatorunun sözlərinə görə, zəlzələ 70 kənddə binalara 20-50 faiz ziyan vurub. Zəlzələdən zərər çəkənlərin əsasən azərbaycanlılar olduğu bildirilir.
3-02-2023, 22:59
ABŞ-dan Gürcüstana 140 tonluq hərbi yardım
ABŞ Gürcüstana 140 ton hərbi yardım yollayıb. Bu barədə ABŞ-ın Gürcüstandakı səfirliyi feysbuk səhifəsində məlumat verib. "Bu gün biz Gürcüstanın Müdafiə Nazirliyinə 140 ton təhlükəsizlik yardımı çatdırdıq. Birləşmiş Ştatlar Gürcüstanla strateji tərəfdaşlığa sadiq qalır və Gürcüstanı gücləndirməyə davam edəcək", - deyə səfirliyin paylaşımında qeyd olunub.
3-02-2023, 19:40
Əhməd müəllimin xeyir-duası
Kənd toya hazırlaşırdı. 10 gündən sonra Əhməd müəllimin oğlu Pənahın toyu olacaqdı. Əhməd müəllim kənddə elə adam idi ki, dilindən heç kəs bir acı söz eşitməmişdi. Onun oğlunun toyunda iştirak etməyi hər kəs səbrsizliklə gözləyirdi.
Əhməd müəllim səhər evdən çıxıb məktəbə gedəndə poçtalyonun verdiyi kağız onu məyus etdi. Oğlu Pənah hərbi təlimə çağrılmışdı.
Evə qayıtdı. Yoldaşı Sayalı xala Əhməd müəllimin belə tez qayıtmasının səbəbini soruşanda istədi ki, çağırışı gizlətsin, ancaq mümkün deyildi.
-Ay Sayalı Pənahı hərbi təlimə çağırıblar. Allah axırını xeyir eləsin. Ancaq necə edək, biz bu toy ərəfəsində bunu Pənaha necə deyək.
Sayalı xala kədərlənsə də çalışdı ki, büruzə verməsin. Pənah eşitməsin. Ancaq artıq gec idi. Pənah içəri otaqdan hər şeyi eşidirdi.
Otağa keçib anasının üzünə baxdı, dönüb atasına dedi: - Ata, çağırilmışam, gedib iştirak edəcəyəm. Burda nə var ki. Toy təxirə salına bilər, ancaq Vətən üçün çağırış təxirə salına bilməz. Kənddə belə bir ailədən bundan başqa hərəkət gözləmək olmazdı. Əhməd müəllim ailəsi ilə şagirdlərinə bir nümunə idi.
Pənah yaxınları və kənd camaatı ilə görüşüb hərbi təlimə yola düşdü. "N" saylı hərbi hissədə kəşfiyyatçı kimi döyüşlərə başladı. Onun döyüş yolu Füzulidən başlayaraq Zəngilana kimi davam etdi. Zəngilan uğrunda gedən döyüşlər zamanı düşmən gülləsi onun döyüş yoldaşı Tahiri ağır yaraladı. Güllə dolu kimi yaşır, Tahir isə yaralı halda açıq mövqedə qalıb. Pənah bir anda səngərdən çıxıb Tahiri qucağına alıb geri qayıtdı. Ancaq arxadan yağan güllələr onun da kürəyinə dəydi. Tahiri səngərə ata bilsə də özü səngərə çata bilmədi.
Pənahın Şəhidlik zirvəsinə yüksəldiyi vaxtdan iki il keçib. Kənddə bu iki il ərzində heç kəs toy etməyib. Heç kəsin Pənahdan sonra Əhməd müəllimin üzünə çıxıb toy edirəm deməyə üzü gəlmir. Qonşu kənddən Vaqifin oğlu Həzi kənddən Mustafa kişinin qızı Vəsiləni oğluna istəyib. Aralarında aparılan söhbət belə olub ki, toy olmadan qızı evdən sakitcə çıxarıb aparsınlar. Toy mərasimini oğlan evi öz kəndlərində etsin.
Mustafa kişi toy axşamı Əhməd müəllimin evinə gəlir. Əhməd müəllim evdə yoldaşı Sayalı xanım ilə oturub söhbət edirdilər. Mustafa kişinin gəlişini çox xoş qarşıladılar. Mustafa kişi astaca, utancaq səslə, Əhməd müəllim, qadan alım, səndən xeyir-dua alıb qızı sabah yola salmaq istəyirəm. Əhməd müəllim Mustafa kişini yola saldıqdan sonra üzünü Sayalı xanıma tutub deyir:
_Ay Sayalı, kənd camaatı bizim hörmətimizi ki, belə saxlayırlar gəl sabah biz də öz adımıza layiq hərəkət edək. Səhər açılan kimi Əhməd müəllimin gözü yolda idi ki, qonşu kənddən gələnlərdən xəbəri olsun. Və nəhayət toy adamlarının Mustafa kişi gilə getdiyini gördü. Toy maşınlarının belə sakit gəlib keçməsi müəllimi daha da sıxdı.
Sayalı xanımı da götürüb Mustafa kişinin qapısına getdi. Əhməd müəllim o vaxt çatdı ki, gəlin qapıdan çıxmaq üzrədi. Camaatla salamlaşıb keçdi Mustafa kişinin yanına. Dedi Ay Mustafa kişi indi sən icazə ver gəlini mən bir qədər gecikdirim. Hər kəs həyəcanla Əhməd müəllimə baxır ki, indi nə olacaq. Əhməd müəllim Vaqif kişidən xahiş etdi ki, bir maşın getsin və tez toyçuları gətirsin. Maşın getdi və yarım saat keçməmiş toyçular gəldilər. Əhməd müəllim üzünü xalqa tutub dedi:
- Mənim əziz xalqım, bilirsiniz ki, iki il öncə mən oğlum üçün toy etmək istəyirdim. Pənah getdi döyüşə və Şəhidlik zirvəsinə yüksəldi. Pənah bu zirvəyə yüksəldikdən sonra tək mənim yox hamınızın oğlunuz oldu. Bu kəndin hər bir gənci də Pənahın qardaş və bacılarıdır. O Vətən deyib yola düşdü ki, bu bacılarının namusunu qorusun, qardaşları sabahlarını xoş günlərə açsin. O, Şəhid oldu ki elindən, obasından toy səsi əskik olmasın. Çox sağ olun ki, mənim yolumu saxladınız. İndi isə mən sizdən xahiş edirəm ki, Pənahın yurdundan toy səsini əskik etməyin. Və üzünü zurnaçıya tutub uca səslə: çal Qəzənfər, bir el havası çal!
İki ildən sonra ilk dəfə zurna səsinə həsrət qalmış kənd yenidən toy libası geyindi. Əhməd müəllim yoldaşı Sayalı xanımla göz yaşı və kədərini xalqdan gizlədərək onlar üçün nə qədər ağır olsa da birlikdə qol qaldırıb oynadılar ki, Pənahın yurdundan sevinc əskik olmasın.
Polad POLADOV
3-02-2023, 17:27
Məqsədimiz Cənubi Qafqazın sabitlik və inkişaf bölgəsi olmasıdır - Çavuşoğlu
Türkiyənin xarici işlər naziri Mövlud Çavuşoğlu Azərbaycan və Türkiyənin Ermənistanla münasibətlərindən danışıb. Nazir argentinalı həmkarı ilə keçirdiyi mətbuat konfransında bu mövzuya toxunub. "Ermənistan-Azərbaycan müharibəsindən sonrakı sülh addımları ilə bağlı həmkarımı məlumatlandırdım. Biz Azərbaycan və Türkiyə olaraq ortaq addım atmaq məsələsində səmimiyik. Ermənistanın da məsafə qət etməsi bu məqsədə yönələn önəmli addım olacaq. Məqsədimiz Cənubi Qafqazın da sabitlik və inkişaf bölgəsi olmasıdır", - deyə XİN başçısı bildirib. Nazir həm də Ukrayna müharibəsində sülhə nail olmağın vacibliyini vurğulayıb.
3-02-2023, 17:23
Serbiya prezidenti Qərbin Ukraynaya tank göndərməsinə münasibət bildirdi
Serbiya prezidenti Aleksandr Vuçiç Qərb ölkələrinin Ukraynaya tank tədarükü həyata keçirməsinə münasibət bildirib. Vuçiç bunun Rusiyanın xeyrinə olacağını düşündüyünü açıqlayıb. "Məncə, bu, Rusiya cəmiyyətini birləşdirəcək və əməliyyatlara ictimai dəstək böyüyəcək. Düşünürəm ki, Ukraynaya tank göndərilməsi Rusiyanın xeyrinə olacaq", - deyə o bildirib. Qeyd edək ki, tarixən Rusiyanın müttəfiqi hesab olunan Serbiya son vaxtlar Ukraynanı dəstəkləyən bəyanatlarla gündəmə gəlir.
3-02-2023, 17:19
Səfirliyimizə qarşı törədilən terror aktının qəhrəmanları təltif olundu
Fevralın 3-də Prezident İlham Əliyev Azərbaycan Respublikasının İran İslam Respublikasındakı səfirliyinə qarşı törədilmiş terror aktının qarşısının alınmasında iştirak etmiş şəxslərin təltif olunması ilə bağlı Sərəncam imzalayıb. Sərəncama əsasən, yanvarın 27-də Azərbaycanın İrandakı səfirliyinə qarşı törədilmiş terror aktının qarşısının alınması zamanı həyat və sağlamlıq üçün real təhlükə şəraitində xidməti borcu yerinə yetirərkən mərd və qətiyyətli hərəkətlərinə görə Tağıyev Vasif Natiq oğlu 1-ci dərəcəli “Rəşadət” ordeni ilə təltif olunub. Həmçinin Əsgərov Orxan Rizvan oğlu (ölümündən sonra) və İmanov Mahir Kamil oğlu “Vətən uğrunda” medalına layiq görülüblər.
3-02-2023, 17:15
Azərbaycan bərpaolunan enerji ixracatçısı potensialına malikdir - Aİ komissarı
Bərpaolunan enerjiyə marağımız o deməkdir ki, biz qazdan başqa digər enerji mənbələri üzərində etibarlı tərəfdaşlarımızla əməkdaşlığımızı genişləndirmək istəyirik. Yeni Yaşıl Enerji Məşvərət Sırasının fəaliyyətə başlaması həmin yeni istiqamət üzrə bu gün tərəfdaşlar arasında razılığın olmasını aydın şəkildə göstərir. Bunu Avropa İttifaqının energetika məsələləri üzrə komissarı xanım Kadri Simson fevralın 3-də Bakıda Cənub Qaz Dəhlizi Məşvərət Şurası çərçivəsində keçirilən nazirlərin 9-cu və Yaşıl Enerji Məşvərət Şurası çərçivəsində nazirlərin 1-ci iclaslarında çıxışında deyib. “Azərbaycanda bərpaolunan enerjinin, xüsusən də dənizdə külək enerjisinin istifadə edilməmiş potensialı yaxşı məlum olan faktdır. Buna görə Azərbaycan Avropa İttifaqına bərpaolunan enerji və hidrogenin ixracatçısına çevrilmək potensialına malikdir. Bizim enerji naminə proqramımız bərpaolunan enerji güclərinin qurulmasını və şəbəkəyə qoşulmasını gücləndirmək üçün Azərbaycanı artıq dəstəkləyir. Avropa İttifaqı masa üzərinə öz nouhau texnologiyasını və özəl sərmayələri qoyur”, - deyə Aİ komissarı əlavə edib.
3-02-2023, 17:11
ABŞ-dan ərazi qarşılığında sülhün bərqərar olması təklifini almamışıq - Peskov
"Kreml Qərbin neft məhsullarının idxalına yeni embarqosuna mənfi münasibət bəsləyir, bu, bazarların daha da disbalansına gətirib çıxaracaq. Qərbin neft məhsullarının tədarükünə tətbiq etdiyi yeni embarqo fonunda Rusiya öz maraqlarını yaranan risklərdən qorumaq üçün tədbirlər görür". Bunu Rusiya prezidentinin sözçüsü Dmitri Peskov deyib. "Krımın təhlükəsizliyi etibarlı şəkildə təmin edilir, lakin Donbas hələ tam qorunmur, bu da olmalıdır. Biz ABŞ-dan Ukraynada ərazi qarşılığında sülhün təmin olunması barədə heç bir təklif almamışıq. Kreml Serbiya rəhbərliyinə Qərb tərəfindən görünməmiş təzyiqləri anlayır və Vuçiçin mövqeyini yüksək qiymətləndirir. Kreml Rusiya ilə Serbiya arasında münasibətlərin yüksələn xətlə inkişaf edəcəyini gözləyir", - deyə o söyləyib. Sözçü Putinin parlament fraksiyalarının rəhbərləri ilə ayrıca görüşlərinin nəzərdə tutulduğunu da açıqlayıb.
3-02-2023, 17:05
İsveçsiz NATO-ya daxil olmayacağıq - Finlandiya naziri
Finlandiya baş naziri Sanna Marin ölkəsinin NATO-ya üzvlük prosesindən danışıb. O, Finlandiyanın İsveçsiz NATO-ya daxil olmayacağını bəyan edib. "Finlandiya və İsveç NATO üzvlüyü üçün birgə müraciət edib və hamı maraqlıdır ki, biz birlikdə daxil olaq. Hər iki ölkə bütün kriteriyalara cavab verir. Biz istəyirik ki, Türkiyə və Macarıstan tez ratifikasiya etsinlər. Xeyli səbəblər var ki, bunlara görə biz birgə müraciət etmişik və eyni vaxtda NATO üzvü olmağa ümid edirik", - deyə Marin bildirib. Qeyd edək ki, Türkiyə terrorla mübarizədə dəstək vermədikləri üçün bu ölkələrin NATO üzvlüyünə veto qoyacağını açıqlayıb.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Zəngilanın dirçəliş
və qayıdış dövrü
Azərbaycan tarixinin ən şanlı səhifəsi olan Vətən müharibəsi bizə təkcə torpaqlarımızı deyil, ləyaqətimizi, qürurumuzu qaytardı. Həmin qürurun ən parlaq ünvanlarından biri də Zəngilandır. 2020-ci il sentyabrın 27-də başlanan Zəfər yürüşü zamanı şərqdən, Cəbrayıl istiqamətindən düşmənə vurulan sarsıdıcı zərbələr nəticəsində Azərbaycan Ordusu 30-dan çox yaşayış məntəqəsini azad edərək Zəngilanın inzibati hüdudlarına çatdı. Oktyabrın 18-də rayonun tam azad edilməsi uğrunda genişmiqyaslı əməliyyata start verildi və cəmi iki gün sonra, oktyabrın 20-də Müzəffər Ali Baş Komandan, Prezident İlham Əliyev xalqa müraciətində Havalı, Zərnəli, Məmmədbəyli, Həkəri, Şərifan, Birinci Muğanlı kəndlərinin və Zəngilan şəhərinin işğaldan azad edildiyini elan etdi. Beləliklə, Zəngilan döyüşləri nəticəsində 1 şəhər, 4 qəsəbə və 49 kənd düşmən tapdağından xilas edildi və bununla da 132 kilometrlik Azərbaycan-İran dövlət sərhədi tam bərpa olundu. İşğalın bitməsindən dərhal sonra sərhəd boyunca zəruri istehkam və mühafizə işlərinə başlanıldı.
Qərbi zəngəzurlular Zəngilan şəhidliyində
Bu tarixi qələbənin əbədiləşdirilməsi üçün 2020-ci il noyabrın 26-da “Zəngilanın azad olunmasına görə” medalı təsis edildi və 6974 hərbi qulluqçumuz bu medalla təltif olundu. Prezidentin 31 iyul 2023-cü il tarixli Sərəncamı ilə isə 20 oktyabr tarixi Zəngilan şəhəri günü kimi rəsmiləşdirildi. Zəngilanın azad olunması Böyük Qayıdışın başlanğıcı oldu. Bu gün dövlətin ən böyük hədəfi həmin torpaqları yenidən həyatla doldurmaqdır. 2026-cı il 1 oktyabr tarixinə olan məlumata görə, Zəngilan şəhərində 84 ailə, yəni 339 nəfər, Ağalı kəndində 234 ailə, yəni 1017 nəfər, Məmmədbəyli kəndində isə 179 ailə, yəni 903 nəfər öz doğma ocağına qayıdıb. Köçürülən ailələr peşə və bacarıqlarına uyğun olaraq müxtəlif dövlət qurumlarında, tikinti şirkətlərində, tikiş fabrikində və digər sahələrdə işlə təmin edilirlər.Bu qayıdışın dünyaya nümunə olan simvolu isə Ağalı kəndidir. Ağalı təkcə Azərbaycanda deyil, dünyanın ən müasir kəndlərindən biri hesab olunur. Burada “ağıllı kənd” konsepsiyası tam şəkildə tətbiq edilib. Dayanıqlı inkişafın təmin olunması üçün sosial-iqtisadi xidmətlər ən yüksək texnologiyalarla qurulub. Kəndin enerji təminatı ekoloji cəhətdən tam təmizdir, Həkəri çayı üzərində 3 turbindən ibarət Arximed tipli su elektrik stansiyası və gücü 325 kilovat olan günəş panelləri quraşdırılıb. Evlərdə istilik xərclərini azaltmaq üçün kombinə edilmiş sistemlər, mətbəx sobası və yüksək səmərəli elektrod boilerlər var. Suyun isidilməsi üçün günəş kollektorlarından, çirkab suların təmizlənməsi üçün bioloji təmizləmə qurğularından istifadə olunur.
Kənddə GPON texnologiyası ilə yüksək sürətli internet, İP TV, video müşahidə kameraları, ağıllı işıq dirəkləri və avtomatik hava müşahidə stansiyaları var. Əhalinin rahatlığı üçün Tele-səhiyyə, E-təhsil və digər elektron xidmətlər, ASAN, DOST, məktəb, bağça, tibb məntəqəsi, kiçik və orta biznesə dəstək mərkəzləri fəaliyyət göstərir. Ümumi sahəsi 2 hektardan çox olan park salınıb. Bütün bunlar onu göstərir ki, Ağalı kəndi sadəcə yaşayış məntəqəsi deyil, gələcəyin kənd modelidir. Nazirlər Kabinetinin 30 oktyabr 2023-cü ildə təsdiq etdiyi Baş Plana əsasən şəhərin 2040-cı ilədək inkişafı üçün böyük vəsait ayrılıb. 2022-ci ildə təməli qoyulan 104 mənzilli ilk yaşayış kompleksinin açılışı 2026-cı ildə olub. Kompleksin ərazisi 2 hektardan artıqdır və burada 12 bina, o cümlədən 4 ədəd üçmərtəbəli 60 mənzilli və 8 ədəd ikimərtəbəli 44 mənzilli evlər tikilib.
Azad Zəngilanın qonaqları
Zəngilan Beynəlxalq Hava Limanı bu bölgənin inkişafı üçün mühüm faktora çevrilib. Zəngəzur dəhlizinin hava infrastrukturu ilə gücləndirilməsi baxımından hava limanı strateji əhəmiyyət daşıyır. Eyni zamanda Horadiz-Zəngilan-Ağbənd dəmir yolunun inşası da böyük strateji əhəmiyyətə malikdir. Bu yol azad edilmiş torpaqlara həm vətəndaşların qayıdışı, həm də yüklərin daşınması üçün tarixi imkan yaradır. Artıq yolun birinci mərhələsi üzrə böyük hissə tamamlanıb və Araz İqtisadi Zonası Sənaye Parkına yüklər daşınır. Horadiz-Cəbrayıl-Zəngilan-Ağbənd avtomobil yolunun uzunluğu 126,3 kilometrdir, illik buraxılış qabiliyyəti 15 milyon tondur və layihənin 2026-cı ilin ikinci yarısında yekunlaşdırılması nəzərdə tutulur. İşğal dövründə tövlə kimi istifadə olunan XIX əsrə aid Zəngilan şəhər məscidi Heydər Əliyev Fondu tərəfindən bərpa olunub. Bərpa-tikinti işləri çərçivəsində tarixi məscid konservasiya edilib və onun yanında düzbucaqlı planlı, iki minarəli yeni məscid inşa edilib. Yeni məsciddə 220 və 100 nəfərlik ibadət zalları yaradılıb. Rayonun gələcəyi üçün turizm və kənd təsərrüfatı da unudulmayıb. 2024-cü il mayın 18-də Ağalı kəndində, Həkəri çayı vasitəsilə yaradılmış süni gölün sahilində “Ağalı” hoteli açılıb. Zəngilan İstirahət Kompleksində 111 nömrəli hotelin təməli 2023-cü il mayın 4-də qoyulub. 2026-cı il mayın 10-da isə “Zəngilan City Park Hotel”in təməli qoyulub. Kənd təsərrüfatı sahəsində isə “Dost Aqropark” layihəsi həyata keçirilir. Azərbaycan və Türkiyə şirkətlərinin birgə layihəsi olan bu kompleks tam başa çatdıqda 500 nəfəri işlə təmin edəcək və 100 milyon dollar sərmayə qoyulacaq. Layihənin birinci mərhələsində 5200 kvadratmetr qapalı, 113 min kvadratmetr açıq tipli heyvandarlıq kompleksləri, sosial obyektlər, kafe, kinoteatr tikilib.
Beləliklə, Zəngilan bu gün sadəcə işğaldan azad edilmiş bir rayon deyil, Azərbaycan dövlətinin qüdrətinin, iradəsinin və gələcəyə olan inamının canlı rəmzidir. Burada hər daş, hər tikilən ev, hər qayıdan ailə 30 illik həsrətin sonu və Böyük Qayıdışın əbədi başlanğıcıdır.
Mahnur Hüseynova
Xırdalan şəhər 8 nömrəli tam orta ümumtəhsil məktəbinin direktoru
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!