21-05-2023, 17:40
Moldovadakı mitinqə 80 min nəfər qatıldı
Mayın 21-də Moldovanın paytaxtı Kişineunun mərkəzində keçirilən Böyük Avropa Yığıncağına 75-80 min nəfər qatılıb. Bu barədə Moldova Baş Polis Müfəttişliyinin mətbuat katibi Diana Fetko məlumat verib. O həmçinin qeyd edib ki, tədbirdə asayişi təmin edən hüquq-mühafizə orqanları insident qeydə almayıblar. Prezident Maya Sandu tərəfindən elan edilən mitinqdə dövlət başçısının özü və sırf bu tədbir üçün ölkəyə səfər edən Avropa Parlamentinin sədri Roberta Metsola çıxış ediblər. Qeyd edək ki, mitinq iştirakçıları ölkənin Avropaya inteqrasiyasını dəstəkləyən qətnamə qəbul ediblər. Sənəddə qeyd olunur ki, Moldova Avropa İttifaqının tamhüquqlu hissəsi olmağa çalışır, bu, sabitliyə zəmanət verə və ona öz potensialını reallaşdırmağa imkan verə bilər.
21-05-2023, 17:01
Xaricdə səs verən türklərin sayı açıqlandı
Türkiyədə mayın 28-də keçiriləcək prezident seçkilərinin ikinci turu çərçivəsində indiyədək xarici ölkələrdə yaşayan 717 612 nəfər səs verib. Bu barədə Türkiyə Ali Seçki Komissiyası (YSK) məlumat yayıb. Bildirilib ki, xaricdəki nümayəndəliklərdə səsvermə prosedurları mayın 24-də başa çatacaq, gömrükdə isə mayın 28-i saat 17:00-dək (Bakı vaxtı ilə 18:00-dək) davam edəcək. Qeyd edək ki, Azərbaycanda yaşayan və işləyən Türkiyə vətəndaşlarının qardaş ölkədə mayın 28-də keçiriləcək prezident seçkilərinin ikinci turu üzrə səsverməsi başlayıb. Mayın 20-də Bakı vaxtı ilə səhər saat 08:00-dan etibarən seçki məntəqələri açılıb. Üç gün davam edəcək proses Türkiyənin Bakıdakı səfirliyinin, eləcə də Gəncə və Naxçıvandakı Baş konsulluqlarının binasında təşkil olunub. Azərbaycanda yaşayan türkiyəli seçicilərin sayı 6 600 nəfərə yaxındır. Səsvermə bütün ünvanlarda mayın 22-i saat 22:00-da başa çatacaq.
21-05-2023, 15:00
Bugün keçirilən imtahanla bağlı DİM məlumat yaydı
Bu gün II ixtisas qrupu (o cümlədən III ixtisas qrupu üzrə DT və TC altqruplarının hər ikisini seçənlər üçün coğrafiya fənni) üzrə ali təhsil müəssisələrinə qəbul imtahanı keçirilib. Dövlət İmtahan Mərkəzindən bildirilib ki, imtahan 17 şəhər və rayonda təşkil olunub. İmtahan keçirilən şəhər və rayonlarda 116 imtahan binası, 2096 imtahan zalı ayrılıb. İmtahanların idarə olunmasına 116 ümumi imtahan rəhbəri, 342 imtahan rəhbəri, 2623 nəzarətçi-müəllim, 354 buraxılış rejimi əməkdaşı, 116 bina nümayəndəsi ayrılıb. İmtahan prosesinin idarə olunması üçün DİM-də operativ qərargah fəaliyyət göstərib, müntəzəm olaraq imtahanın keçirildiyi binalarla əlaqə saxlanılıb və imtahanın gedişi nəzarətdə olub. Bütün binalarda imtahan təlimata uyğun şəkildə keçirilib, iştirakçılara öz bilik səviyyələrini nümayiş etdirmələri üçün zəruri şərait yaradılıb. İmtahanda 30 nəfər fiziki məhdudiyyətli (I qrup gözdən əlil, eşitmə əngəlli və digər) abituriyent də iştirak edəcək. Bu abituriyentlərin rahat şəkildə imtahan verməsi üçün imtahan binalarında ayrıca zallar ayrılıb, gözdən əlillər üçün tapşırıqların oxunması, cavab vərəqinin doldurulması və s. işlər üçün fərdi nəzarətçilər təyin edilib. Hərəkət məhdudiyyətli abituriyentlərin bina və zala daxil olması və rahat şəkildə hərəkəti üçün də xüsusi şərait yaradılıb. İmtahanda istifadə olunmuş qapalı və kodlaşdırıla bilən açıq tipli test tapşırıqlarının doğru cavab etalonları yaxın saatlarda Mərkəzin “Teleqram” kanalına (//t.me/stateexamcenter), digər sosial şəbəkə hesablarına və saytına yerləşdiriləcək. Bu gün saat 15:00-da DİM-in “Youtube” vasitəsilə canlı yayım ediləcək və Mərkəzin məsul əməkdaşları, ekspertlər tərəfindən həm III, həm də II ixtisas qrupu üzrə imtahanlarda istifadə olunmuş test tapşırıqları ilə bağlı geniş izahat veriləcək. Abituriyentlər suallarını şərhlərdə yaza bilərlər. Mayın 22-dən etibarən DİM-də imtahan protokolları və materialların emalına başlanılacaq. İmtahanlarda istifadə olunan yazılı cavab tələb edən açıq tipli tapşırıqların yoxlanılması uzun müddət tələb etdiyindən nəticələrin yaxın 2 həftə ərzində elan olunması nəzərdə tutulur.
21-05-2023, 14:02
Gimnastımız Avropa çempionatını üçüncülüklə başa vurdu
Bədii gimnastika üzrə 39-cu Avropa çempionatında Azərbaycan yığması daha bir medal qazanıb. Fərdi yarışlarda Zöhrə Ağamirova topla hərəkətlərin icrasında bürünc medal əldə edib. Qeyd edək ki, ölkəmizdə keçirilən Avropa çempionatına bu gün yekun vurulacaq.
21-05-2023, 12:54
Sabahın hava proqnozu
Azərbaycanda sabaha olan hava proqnozu açıqlanıb. Milli Hidrometeorologiya Xidmətindən verilən məlumata görə, Bakıda və Abşeron yarımadasında əsasən yağmursuz hava şəraiti hökm sürəcək. Şimal-qərb küləyi əsəcək. Havanın temperaturu gecə 12-17° isti, gündüz 22-27° isti olacaq. Atmosfer 756 mm civə sütunundan 759 mm civə sütununa yüksələcək. Nisbi rütubət 60-70% olacaq. Azərbaycanın rayonlarında bəzi yerlərdə arabir yağış yağacağı gözlənilir. Əsasən şimal və qərb rayonlarında leysan xarakterli olacağı, şimşək çaxacağı, dolu düşəcəyi ehtimalı var. Axşama doğru tədricən kəsiləcək. Bəzi yerlərdə duman olacaq. Qərb küləyi əsəcək. Havanın temperaturu gecə 12-17° isti, gündüz 24-29° isti, dağlarda gecə 3-8° isti, gündüz 10-15° isti olacaq.
21-05-2023, 12:36
İranla Pakistan sərhədində atışma baş verib
İranın Sistan və Bəlucistan əyalətinin Pakistanla sərhədində azı 6 iranlı sərhədçi ölüb. Bu barədə “Tasnim” agentliyi məlumat yayıb. Bildirilib ki, sərhəddə baş verən insident zamanı sərhəd qoşunlarının daha iki zabiti yaralanıb. Bazar günü gecə adı açıqlanmayan terrorçu birləşmənin üzvləri Seravan sərhəd alayının məsuliyyət zonasında İranın ərazisinə daxil olub. Toqquşmalar nəticəsində radikallar İran-Pakistan sərhədini keçərək İran ərazisini tərk etməyə məcbur olublar. Qeyd edək ki, terrorçu birləşmənin sıralarında da itkilərin olduğu, lakin onların dəqiq sayının məlum olmadığı bildirilib.
21-05-2023, 12:21
Zelenski ilə Baydenin görüşünün detalları açıqlandı
Ukrayna Prezidenti Volodimir Zelenski amerikalı həmkarı Cozef Baydenlə görüşüb. Ukrayna Prezidenti Volodimir Zelenski ABŞ-dən Ukraynaya artıq 37 milyard dollardan çox olan güclü maliyyə yardımına, habelə amerikalı həmkarı Cozef Baydenin elan etdiyi 375 milyon dollar məbləğində yeni hərbi yardım paketinə görə təşəkkür edib. “Xalqımızdan böyük təşəkkürlər. Mən şadam ki, bizim belə güclü münasibətlərimiz var”, - Ukrayna lideri bildirib. O, ABŞ Prezidentinin beynəlxalq aviasiya koalisiyasına dəstək qərarını xüsusən qeyd edib. Liderlər Ukraynanın müdafiə qabiliyyətinin gücləndirilməsi istiqamətində gələcək əməkdaşlığı, həmçinin Ukrayna sülh formalunun gerçəkləşdirilməsi məsələsini müzakirə ediblər. Prezidentlər Ukraynanın yenidən qurulması və bərpası layihələri ətrafında fikir mübadiləsi aparıblar. Volodimir Zelenski ayrıca Ukraynanın Avro-Atlantik inteqrasiyası və NATO-nun Vilnüs sammitinə hazırlıq məsələlərinə də toxunub. Dövlət başçısı ölkəsinin Alyansa daxil olmasından öncə Ukrayna üçün təhlükəsizlik təminatının alınmasının vacibliyini qeyd edib.
21-05-2023, 12:02
Zelenskinin Baxmutun işğalını təkzib etdiyi iddia olunur
Ukrayna Prezident Ofisi dövlət başçısı Volodimir Zelenskinin guya Baxmutun rusiyalılar tərəfindən ələ keçirildiyinin təsdiqlədiyinə dair mediada yayılan məlumatı təkzib edib. Bu barədə Ukrayna Prezident Ofisinin mətbuat katibi Sergiy Nikoforov feysbukda yazıb. Mətbuat katibi Zelenskiyə ünvalanan sualın fərqli olduğuna işarə edib:
“– Rusiyalılar bildiribər ki, Baxmutu alıblar. Prezidentin cavabı:
– Fikrimcə, yox.
Beləliklə, Prezident Baxmutun alındığını təkzib edib”. Həmin sualın verildiyi anın görüntüləri də KİV-də yayılıb. “Cənab Prezident, Baxmut hələ də Ukraynanın əlindədir? Rusiyalılar bildiriblər ki, Baxmutu alıblar”, - jurnalist bildirib. Zelenski isə “Fikrimcə, yox” deyə cavab verib.
21-05-2023, 10:33
Bayden Ukraynaya yeni hərbi yardım paketini açıqladı
ABŞ Prezidenti Co Bayden Ukraynaya yeni hərbi yardım paketini açıqlayıb. Bu barədə "Reuters" agentliyi məlumat yayıb. Qeyd edək ki, Bayden Yaponiyada keçirilən "G7" sammitində Ukrayna Prezidenti Vladimir Zelenski ilə görüşü zamanı ABŞ-nin Kiyevin hərbi gücünü gücləndirmək üçün hər şeyi etdiyini bildirib, həmçinin artilleriya və zirehli maşınlar üçün sursatların daxil olacağı yeni hərbi yardım paketini açıqlayıb.
21-05-2023, 10:17
Zelenski amerikalı həmkarıyla görüşdü
Ukrayna Prezidenti Volodimir Zelenski amerikalı həmkarı Cozef Baydenlə görüşüb. Bu barərdə Ukrayna lideri teleqramda paylaşım edib. Görüşlə bağlı təfərrüatlar hələlik verilməyib. Qeyd edək ki, bu il “G7”yə Yaponiya sədrlik edir və mayın 19-dan 21-dək Hirosimada Qrupun sammitini keçirir. Bu şəhər 6 avqust 1945-ci ildə ABŞ-nin nüvə bombasına məruz qalıb. Cozef Bayden Hirosimaya səfər edən ikinci ABŞ Prezidenti olub.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!