Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının sədri, Millət vəkili Azay Quliyev özünün Fz-səhifəsində 100 yaşlı erməni uydurması ilə bağlı Almaniya hökumətinin mövqeyinə münasibət bildirib:
Almaniya hökuməti bu həftə ikinci dəfə məni yaxşı mənada təəccübləndirdi. Xanım Merkelin Ermənistan-Azərbaycan, Dağlıq Qarabağ münaqişəsi ilə bağlı verdiyi müsbət bəyanatından sonra Almaniyanın Xarici İşlər Nazirliyi qondarma erməni soyqırımı ilə bağlı hökumətə göndərilən sorğuya çox obyektiv və ədalətli şəkildə cavab verdi:
1) 1915-1916-cı il hadisələrinə qiymət vermək ilk növbədə Türkiyənin və Ermənistanın problemidir.
2) Bu məsələni araşdırmaq üçün tarixçilərdən ibarət komissiyanın yaradılmasını ən doğru addım hesab edirik.
3) BMT-nin “Soyqırım cinayətinin qarşısının alınması və cəzalandırılması haqqında” konvensiyası 1951-ci ildə qüvvəyə minmiş və Almaniya 1955-ci ildə bu konvensiyaya qoşulmuşdur. Bu konvensiyanın geriyə qüvvəsi yoxdur.
4) 1915-1916-cı il hadisələrinin 100 illiyi ilə bağlı erməni diasporu tərəfindən həyata keçiriləcək tədbirlər haqqında məlumat hökumətə daxil olub. Rəsmi şəkildə bildirik ki, Alman hökuməti bu mövzuda hər hansı bir anma mərasimi keçirməyi planlaşdırmır.
Bax belə. Çox dəqiq və aydın şəkildə 100 yaşı olan erməni uydurmasının üzərindən alman hökuməti beləcə bir qara xətt çəkmiş oldu.
Belə cəsarətli və obyektiv, eyni zamanda tarixi qərar verdiyinə görə Almaniya hökumətinə və xarici işlər nazirliyinə dərin təşəkkür düşür.
Hesab edirəm ki, Almaniyanın bu açıqlaması digər ölkələrə, xüsusilə Avropa İttifaqının üzv dövlətlərinə bir nümunə olacaq və ermənlilərin planlaşdırıdığı “soyqırım şousuna” ciddi zərbə vuracaqdır.
Türkiyə indi bir az rahat nəfəs ala bilər.
Almaniyanın bir həftə içərisində verdiyi bu iki bəyanat Dağlıq Qarabağ probleminin həllinə Almaniyanın (o cümlədən Aİ) ciddi diqqət ayıracağı və 2015-ci ildə status kvonun dəyişilməsinə öz töhvəsini verəcəyi haqqında ümidləri artırır.
Bu ümidlərin nə qədər özünü doğruldacağını isə təbii ki, zaman göstərəcək.