27-01-2023, 23:13
"KompUsta" layihəsi həyata keçirilib.
Azərbaycan Respublikasının Gənclər Fondunun “İdeyanı Reallaşdır 2022” fərdi qrand müsabiqəsinin qalibi olmuş “KompUsta” layihəsi həyata keçirilib. Layihə çərçivəsində Yevlax gəncləri üçün kompüter və kompüter avadanlıqları ilə işləmə bacarıqları üzrə təlimlər keçirilib. İştirakçılar “Komputer qurğuları və avadanlıqları ilə tanışlıq”, “Komputer hissələri və sistem blokun daxili quruluşu ilə tanışlıq”, “Komputerin daxili hissələri üzərində görülə bilən işlər”, “Şəbəkələr, onların qurulması və istifadə imkanları” və “Komputer və kompüter avadanlıqlarına qulluq” mövzuları üzrə biliklər əldə etməklə onları əyani tətbiqetmə imkanı qazanıblar. Layihə çərçivəsində keçirilən təlimlərin yekununda iştirakçılara sertifikatlar təqdim olunub.
Layihənin məqsədi komputer qurğuları və avadanlıqları, onların iş prinsipi, komputerin daxili quruluğu və hissələri haqqında Yevlax rayonundan olan 16-25 yaş arası gənclərin maarifləndirilməsi, gənclərin komputer sistemləri və avadanlıqları ilə işləmə bacarıqlarının inkişaf etdirilməsi, gənclərin komandada işləmə bacarıqlarının yüksəldilməsindən ibarətdir. Layihə çərçivəsində keçirilən təlimlər iştirakçılara birbaşa, digər gənclərə dolayı yolla təsir etməklə cəmiyyətin fəal üzvləri olan gənclərin əmək bazarında uğurla təmsil olunmalarına fayda verəcəkdir.
27-01-2023, 22:53
Qərbi Azərbaycan İcması Azərbaycanın İrandakı səfirliyinə qarşı törədilən terror aktını qınayıb
Qərbi Azərbaycan İcması Azərbaycan Respublikasının İran İslam Respublikasındakı səfirliyinə edilmiş silahlı hücumu şiddətlə qınayır.
İcmanın mətbuat xidmətindən bildirilib ki, silahlı hücum nəticəsində şəhid olmuş Azərbaycan Respublikasının hərbi qulluqçusu, əslən Qərbi Azərbaycanın Göyçə mahalının Nərimanlı kəndindən olan baş leytenant Orxan Əsgərovun ailəsinə, yaxınlarına və xidmət yoldaşlarına dərin hüznlə başsağlığı verir və yaralananlara şəfa diləyirik.
Elçilərin toxunulmazlığına dair İslam ehkamlarına və beynəlxalq normalarına hörmətsizliyin və xarici dövlətlərin səfirliklərinə xain hücumların İranda ənənəyə çevrilməsi təəssüf doğurur.
İcma tutduğu vəzifəsindən asılı olmayaraq, bu hücumun sifarişçilərinin, təşkilatçılarının və icraçılarının dərhal həbsini və tərəfsiz ədalət məhkəməsinə təslim olunmasını tələb edir.
27-01-2023, 22:34
Avropa İttifaqından baş verən hadisəylə bağlı başsağlığı
Avropa İttifaqı Azərbaycanın İrandakı səfirliyinə silahlı hücumla bağlı başsağlığı verib. Bu barədə Aİ-nin Xarici siyasət və Təhlükəsizlik məsələləri üzrə üzrə Ali Nümayəndəsinin sözçüsü Peter Stano bildirib. "Aİ Azərbaycanın İrandakı səfirliyinə hücumla bağlı Azərbaycan XİN-ə və Azərbaycan xalqına başsağlığı verir. Diplomatik nümayəndəliklərə hücumlar qəbuledilməzdir. Biz qəlbən həlak olan şəxsin ailəsinin yanındayıq. Yaralıların tezliklə sağalmasını arzulayırıq. Ətraflı istintaq aparılacağına və cavabdehliyə ümid edirik", - deyə Peter Stano vurğulayıb.
27-01-2023, 22:31
Ceyhun Bayramov iranlı həmkarı ilə danışdı
27 yanvar 2023-cü il tarixində Azərbaycan Respublikasının İran İslam Respublikasındakı Səfirliyinə qarşı terror hücumu ilə əlaqədar xarici işlər naziri Ceyhun Bayramov ilə İran İslam Respublikasının xarici işlər naziri Hüseyn Əmir Abdullahian arasında telefon danışığı baş tutub. Nazir Ceyhun Bayramov 1 nəfər əməkdaşın şəhid olduğu və 2 nəfər əməkdaşın yaralandığı İrandakı səfirliyimizə olan terror hücumunu qətiyyətlə pisləyib və şiddətlə qınayıb. “Diplomatik münasibətlər haqqında Vyana Konvensiyası”ndan irəli gələrək İran tərəfinin Səfirliyin binasını hər cür hücumlardan qorunmasının və onun əməkdaşlarının təhlükəsizliyinin təmin edilməsinin İran tərəfinin vəzifəsi olduğunu qarşı tərəfə bir daha xatırlanıb. İranın səlahiyyətli qurumları tərəfindən terror aktını törədən şəxsin tezliklə məsuliyyətə cəlb olunması, terror aktının hərtərəfli araşdırılması, cinayətin təşkili və törədilməsində əli olan digər iştirakçıların müəyyənləşdirilməsi və cəzalandırılması qarşı tərəfdən tələb olunub. İran xarici işlər naziri Abdullahian həlak olan şəxsin ailəsinə, Azərbaycan rəhbərliyinə və xalqına baş sağlığı diləklərini çatdırıb. İranın aidiyyəti səlahiyyətli qurumları tərəfindən dərhal hadisəyə reaksiya verildiyini, hazırda isə aidiyyəti hüquq-mühafizə orqanları tərəfindən məsələnin araşdırıldığı, Səfirliyimizin və heyətinin təhlükəsizliyinin ən yüksək səviyyəyə qaldırıldığını diqqətə çatdırıb. Saxlanılan şəxsə qarşı silah daşımaq və diplomatın qətlə yetirilməsi üzrə cinayət işi açıldığını, onun yüksək cəzaya məruz qalacağını bildirib. Səfirliyin yerləşdiyi ərazidən məsul olan İranın diplomatik polis qurumunun fəaliyyətinin araşdırıldığı qeyd edilib. Bu hadisə nəticəsində iki ölkə arasında münasibətlərin daha da gərginləşməyəcəyinə İran naziri tərəfindən ümid ifadə olunub.
27-01-2023, 22:16
Rəisi terror aktıyla bağlı təhqiqat aparılmasını əmr etdi
İran prezident İbrahim Rəisi Azərbaycanın Tehrandakı səfirliyinə silahlı hücumu pisləyib. Məlumatı İranın siyasi məsələlər üzrə vitse-prezidenti Məhəmməd Cəmşidi özünün tvitter hesabında paylaşıb. Onun bildirdiyinə görə, İbrahim Rəisi məhkəmə və polis orqanlarına məsələ ilə bağlı hərtərəfli araşdırma aparmağı tapşırıb. “Qardaş və qonşu Azərbaycanın səfirliyinə hücumla bağlı faciəvi hadisəni pisləmək istərdim”, – Məhəmməd Cəmşidi qeyd edib. "Bu kədərli xəbəri eşidəndən dərhal sonra Ayətullah Rəisi bu barədə hərtərəfli təhqiqat aparılmasını əmr etdi və hökumətə, Azərbaycan xalqına və mərhum diplomatın ailəsinə başsağlığı və rəğbətini bildirdi, yaralananların tezliklə sağalmasını arzuladı", - Cəmşidi əlavə edib.
27-01-2023, 17:47
Səfirliyimizə hücum edən şəxsin görüntüləri yayılıb
Bu gün səhər saatlarında Azərbaycanın İrandakı səfirliyinə silahlı hücum edən şəxsin görüntüsü yayılıb. Hadisəni törədən şəxsin İran vətəndaşı Yasin Hüseynzadə olduğu bildirilir. Onun fotosu yerli teleqram kanallarında paylaşılıb. İstintaqın ilkin məlumatına görə, təxminən 50 yaşlı terrorçu səfirliyin binasına daxil olaraq mühafizə xidmətinə atəş açıb. Belə ki, o, “Kalaşnikov” markalı avtomat silahla mühafizə xidmətinin rəisi Orxan Əsgərovu qətlə yetirib, daha iki nəfəri isə yaralayıb. Yaralıların vəziyyəti qənaətbəxşdir. Hadisə ilə bağlı araşdırma aparılır.
27-01-2023, 17:43
İranda yaşayan ermənilər Azərbaycana qarşı askiyaya başlayıblar
İranda yaşayan ermənilər Azərbaycan əleyhinə aksiyaya başlayıblar. Aksiya paytaxt Tehranda keçirilir. Azərbaycan səfirliyinə xain hücumun təşkil olunduğu ərəfədə ermənilərin aksiya keçirməsi təxribat məqsədi daşıyır. Belə ki, İranda yaşayan bir qrup erməni sakin Laçın dəhlizinin açılması ilə bağlı absurd tələblər irəli sürüb.
27-01-2023, 17:39
İrəvanla Bakı arasında danışıqların təşkilinə hazırıq - Rusiya XİN
Rusiya digər xarici oyunçulardan fərqli olaraq, Qarabağdakı vəziyyəti yerində həll etməyə çalışır. Bunu Rusiya Xarici İşlər Nazirliyinin sözçüsü Mariya Zaxarova bildirib. Laçın dəhlizindəki vəziyyətə toxunan Zaxarova vurğulayıb ki, Rusiya Müdafiə Nazirliyi Qarabağdakı sülhməramlıların komandanlığı və Xarici İşlər Nazirliyi ilə əməkdaşlıq edərək bütün maraqlı tərəflərlə daim əlaqə saxlayır. Rusiyanın İrəvanla Bakı arasında danışıqların təşkilinə hazır olduğunu bir daha vurğulayan Zaxarova deyib ki, Moskva bu hazırlıq barədə əvvəllər tərəfləri məlumatlandırıb və açıq şəkildə danışıb. "Hesab edirik ki, yerlərdə vaxtaşırı yaranan fəsadlar danışıqlar prosesinin bir növ dondurulması üçün maneəyə, səbəbə çevrilməməlidir. Nəqliyyat kommunikasiyalarının açılması, sərhədin delimitasiyası, sülh müqaviləsinin bağlanması, vətəndaş cəmiyyəti xətləri üzrə təmaslar da daxil olmaqla normallaşma üçün hansısa yolla işi bərpa etmək lazımdır”, - Zaxarova əlavə edib. Onun sözlərinə görə, gərginliyi azaltmağa çağıran bəyanatlarla məhdudlaşan əksər xarici oyunçulardan fərqli olaraq, Rusiya “yerdə” həll yolları axtarır və humanitar yardım göstərir. "Biz Rusiya, Ermənistan və Azərbaycan liderlərinin 9 noyabr 2020-ci il tarixli bəyanatına uyğun olaraq Laçın dəhlizinin blokunu tamamilə açmağa çağırırıq. Və biz Bakı və İrəvana müraciət edərək mövcud fikir ayrılıqlarını aradan qaldırmaq üçün siyasi iradə nümayiş etdirməyə çağırırıq".
27-01-2023, 17:35
Türkiyə can dostu və qardaşı Azərbaycanın yanındadır - Ərdoğan
"Azərbaycanın Tehrandakı səfirliyində mühafizə əməkdaşının şəhid olduğu hücumu şiddətlə qınayıram". Bunu Türkiyə Prezidenti Rəcəb Tayyib Ərdoğan twitter hesabında yazıb. "Azərbaycanlı qardaşlarımıza başsağlığı verir, yaralılara şəfa diləyirəm. Türkiyə can dostu və qardaşı Azərbaycanın yanındadır", - deyə Ərdoğan dəstək paylaşımında vurğulayıb. Qeyd edək ki, 27 yanvar 2023-cü il tarixində Bakı vaxtı ilə səhər saat 8:30 radələrində Azərbaycan Respublikasının İran İslam Respublikasındakı Səfirliyinə silahlı hücum olub. Hücum edən şəxs kalaşnikov markalı avtomat silahla mühafizə postunu yararaq, mühafizə xidmətinin rəisini qətlə yetirib. Səfirliyin iki nəfər mühafizə əməkdaşı da hücumun qarşısını alarkən yaralanıblar.
27-01-2023, 17:31
İranın Azərbaycandakı səfirindən törədilən terror aktına münasibət
Yanvarın 27-də İran İslam Respublikasının
Azərbaycan Respublikasındakı səfiri Seyid Abbas Musəvi Azərbaycanın İrandakı Səfirliyinə qarşı terror hücumu ilə əlaqədar olaraq Azərbaycan Xarici İşlər Nazirliyinə çağırılıb. Bu barədə XİN-dən məlumat verilib. Görüşdə Azərbaycanın Tehrandakı Səfirliyinə qarşı törədilmiş silahlı basqının, terror aktının şiddətlə qınanıldığı, diplomatik nümayəndəliklərə qarşı bu kimi hücumların qəbuledilməz olduğu və “Diplomatik Münasibətlər haqqında Vyana Konvensiyası”ndan irəli gələrək nümayəndəliyin binasını hər cür hücumlardan qorumaq və onun əməkdaşlarının təhlükəsizliyinin təmin edilməsinin qəbul edən tərəfin vəzifəsi olduğu qarşı tərəfin diqqətinə çatdırılıb. Bu xüsusda, İranın səlahiyyətli qurumları tərəfindən terror aktını törədən şəxsin tezliklə məsuliyyətə cəlb olunması, terror aktının hərtərəfli araşdırılması, cinayətin təşkili və törədilməsində əli olan digər iştirakçıların müəyyənləşdirilməsi və cəzalandırılması qətiyyətlə tələb olunub. Görüşdə habelə, son zamanlar İranda ölkəmiz əleyhinə planlı şəkildə anti-Azərbaycan kampaniyasının aparılmasından təəssüf hissi keçirildiyi, baş verənlərin onsuz da mürəkkəb olan münasibətləri daha da gərginləşdirdiyi diqqətə çatdırılıb. İran səfiri Seyid Abbas Musəvi Azərbaycan səfirliyinə qarşı baş verən silahlı hadisəni kəskin şəkildə pisləyərək baş verənlərdən dərin kədər hissi keçirdiyini, səfirlik əməkdaşının ailəsinə, eləcə də Azərbaycan hökumətinə və xalqına dərin hüznlə başsağlığı verdiyini bildirib. Səfir görüşdə habelə İranın aidiyyəti səlahiyyətli qurumları tərəfindən dərhal hadisəyə reaksiya verildiyini, hazırda isə aidiyyəti hüquq-mühafizə orqanları tərəfindən məsələnin araşdırıldığı, ətraflı məlumatın istintaq prosesi başa çatdıqdan sonra ictimaiyyətə açıqlanacağını vurğulayıb.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!