13-10-2022, 14:34
BAKIDA DEPUTATIN TƏŞƏBBÜSÜ İLƏ BEYNƏLXALQ KONFRANS BAŞLAYIB
Beynəlxalq konfrans “Yaşıl iqtisadiyyat və ekoloji imperativlərə doğru yol: yeni çağırışlar, imkanlar və perspektivlər” mövzusunda keçirilir
Oktyabrın 12-də Azərbaycan Respublikası Milli Məclisinin Təbii ehtiyatlar, energetika və ekologiya komitəsinin sədri Sadiq Qurbanovun təşəbbüsü və fəxri sədrliyi, Elm və Təhsil Nazirliyinin dəstəyi, Azərbaycan Dövlət İqtisad Universiteti (UNEC), Yıldız Texnik Universitesi, AETN İdarəetmə Sistemləri İnstitutu və Beynəlxalq Texniki Strateji İdarəetmə və İdarəçilər Dərnəyinin birgə təşkilatçılığı ilə “Yaşıl iqtisadiyyat və ekoloji imperativlərə doğru yol: yeni çağırışlar, imkanlar və perspektivlər” mövzusunda beynəlxalq elmi-praktiki konfrans öz işinə başlayıb.
Tədbirin açılışında elm və təhsil naziri Emin Əmrullayev, ekologiya və təbii sərvətlər naziri Muxtar Babayev, UNEC-in rektoru professor Ədalət Muradov, energetika nazirinin müavini Samir Vəliyev, bp-nin vitse prezidenti Bəxtiyar Aslanbəyli, Türkiyənin əmək və əhalinin sosial müdafiəsi nazirinin müavini Prof.Dr. Lüftihak Alpkan, Beynəlxalq Liderlik, Texnologiya, Yenilik və İdarəetmə Konfransının sədri professor Cemal Zehir, digər dövlət rəsmiləri, elm və təhsil müəssisələrinin rəhbərləri, nümayəndələr iştirak ediblər.
Beynəlxalq konfransın açılışından öncə qonaqlar UNEC tələbələrinin əl işlərindən ibarət “Ekoloji” qida, “Yaşıl” kitab, “Yaşıl” geyim və moda, “Yaşıl texnologiya” adlı sərgini ziyarət ediblər, eləcə də Kitabxana İnformasiya Mərkəzinin fondunda olan “yaşıl” iqtisadiyyat və ekologiyadan bəhs edən kitablarla tanış olublar.
UNEC-in rektoru professor Ədalət Muradov Prezident İlham Əliyevin müəyyənləşdirdiyi sosial-iqtisadi inkişafa dair Milli Prioritetlərinin Azərbaycan qarşısında duran ən mühüm vəzifələrdən birinin təmiz ətraf mühit və “yaşıl artım” ölkəsinə çevrilmək olduğuna diqqət çəkərək, elm və təhsil müəssisələrinin üzərinə bu istiqamətdə mühüm vəzifələrin düşdüyünü deyib. 3 gün davam edəcək konfransda aparılacaq müzakirələrin və əldə olunacaq nəticələrin iqtisadi artıma, iqtisadi davamlılığının artırılmasına və beynəlxalq aləmdə mövcud mövqelərin daha da möhkəmləndirilməsinə mühüm təsir göstərəcəyindən əminliyini ifadə edib. Rektor 2030-cu ilədək “yaşıl universitet”ə keçidi hədəfləyən UNEC-də “yaşıl iqtisadiyyat”la bağlı görülən işlərdən də söz açıb. İlk dəfə olaraq, “yaşıl iqtisadiyyat” ixtisası üzrə magistratura proqramının hazırlanacağını vurğulayıb.
Milli Məclisin Təbii ehtiyatlar, energetika və ekologiya komitəsinin sədri Sadiq Qurbanov qlobal iqlim dəyişikliklərinin ölkələrin iqtisadiyyatına, ətraf mühitə, eləcə də qlobal qida təhlükəsizliyinə, regional təhlükəsizlik sistemlərinə neqativ təsirlərindən söz açıb. Hazırda yaşıl iqtisadiyyata keçidin bütün dünyanı aktual çağırışlar qarşısında qoyduğunu bildirib.
Elm və təhsil naziri Emin Əmrullayev konfransın mövzusunun aktuallığına diqqət çəkərək, ölkədə texniki, texnoloji sahələr, xüsislə mühəndislik ixtisasları üzrə mütəxəssis hazırlığına marağın getdikcə artdığını diqqətə çatdırəb. Nazir elm və təhsil mərkəzlərində yaşıl iqtisadiyyat, ekoloji təmiz mühitlə bağlı tədqiqatların aparılmasının vacibliyini vurğulayıb.
Ekologiya və təbii sərvətlər naziri Muxtar Babayev iqtisadiyyatın sürətli inkişafının ekoloji mühitə təsirindən söz açaraq, bu sahənin qlobal çağırışlar qarşısında qaldığını deyib. Nazir alternativ enerji vasitələrindən istifadənin genişləndirilməsi, təbii sərvətlərdən səmərəli istifadənin vacibliyindən bəhs edib. Eləcə də Böyük Qayıdış çərçivəsində işğaldan azad edilmiş ərazilərdə bərpa olunan enerjinin tətbiqi istiqamətində aparılan islahatlardan danışıb.
Energetika nazirinin müavini Samir Vəliyev bərpa olunan enerji mənbələrinin ölkənin inkişafında strateji prioritet kimi müəyyənləşdirdiyini bildirərək, ölkədə külək və günəş enerjisinin tətbiqi istiqamətində görülən işlər, həmçinin Azərbaycanın “yaşıl artım” ölkəsi, “yaşıl” enerjinin istehsalçısı və ixracatçısı kimi həyata keçirdiyi layihələrdən söz açıb.
Tədbirdə çıxış edən BP-nin Xəzər regionunda xarici əlaqələr və kommunikasiyalar üzrə vitse-prezidenti Bəxtiyar Aslanbəyli, millət vəkili Soltan Məmmədov, Türkiyənin əmək və sosial müdafiə nazirinin müavini professor Lütfihak Alpkan, ASELSAN-ın Korporativ idarəetmə üzrə vitse-prezidenti professor Hakan Karataş, Türkiyənin əmək və əhalinin sosial müdafiəsi nazirinin müavini, konfransın həmsədri Prof.Dr. Cemal Zehir və digər çıxış edənlər “Yaşıl iqtisadiyyat” prinsipləri əsasında davamlı inkişafın təmin edilməsi, ətraf mühitin sağlamlaşdırılması, yaşıllıqların sürətli bərpası və artırılması, su ehtiyatı və dayanıqlı enerji mənbələrindən səmərəli istifadə edilməsi barədə fikirlərini bölüşüblər, konfransda əldə olunan nəticələrin bu istiqamətdə əhəmiyyətli olacağını deyiblər.
Sonra çıxış edən konfrans iştirakçılarına plaketlər təqdim olunub.
UNEC-in departament direktoru professor Zahid Məmmədovun moderatorluğu ilə keçirilən beynəlxalq konfrans öz işini dəyirmi masada iqtisadi siyasət, “yaşıl” iqtisadiyyat, “yaşıl” təhsil və “yaşıl” universitet, təbii ehtiyatların idarə edilməsi üzrə siyasət, davamlı inkişaf, iqtisadi, demoqrafik artımın ətraf mühitə təsiri, su resurslarından səmərəli istifadə, alternativ və bərpa olunan enerji mənbələrindən istifadə, “yaşıl” texnologiyaların tətbiqi, “yaşıl” nəqliyyat vasitələrindən istifadə, “yaşıl” maliyyə, işğaldan azad edilmiş ərazilərin "yaşıl" iqtisadiyyat potensialı mövzularında müzakirələrlə davam etdirib.
Dəyirmi masadan sonra konfrans iştirakçılarının iştirakı ilə ağacəkmə aksiyası keçirilib.
Beynəlxalq konfrans oktyabrın 14-dək davam edəcək.
13-10-2022, 14:31
Ermənistan müqaviləli hərbçilərin maaşını artırır
Ermənistanda döyüş tapşırıqlarını yerinə yetirən müqaviləli əsgərlərin maaşı artırılacaq. Butov.az xəbər verir ki, Ermənistan hökumətinin cümə axşamı keçirilən iclasında “Hərbi xidmət və hərbi qulluqçunun statusu haqqında” qanuna müvafiq dəyişikliklərin edilməsi haqqında layihə təsdiqlənib. Müdafiə naziri Suren Papikyan qanun layihəsini təqdim edərkən bildirib ki, döyüş tapşırıqlarının planlaşdırılması, monitorinqi və yerinə yetirilməsində bilavasitə iştirak edəcək hərbi qulluqçular əlavə ödənişlər alacaqlar. Əlavə ödənişi almaq üçün isə onlar üç ildə bir dəfə sertifikatlaşdırmadan keçməlidirlər. Əlavə ödənişin həcmi hökumətin qərarı ilə müəyyən ediləcək, söhbət ikiqat, bəzən isə daha çox artımdan gedir. Baş nazir Nikol Paşinyan deyib ki, bu, peşəkar orduya keçidin mərhələlərindən biridir.“Biz hərbçilərə bilik və bacarıq baxımından tələblər qoyuruq. Öz növbəmizdə hərbi qulluqçulara bütün sosial təminatları verməliyik. Bu o deməkdir ki, xidmətə hazır olan hərbçilərin mənzilləri, yüksək maaşları olmalı, ailələri tibbi xidmətlərdən yararlanmalı, uşaqları isə təhsil almaq imkanı qazanmalıdır”, - Paşinyan bildirib. Öz növbəsində müdafiə naziri əlavə edib ki, azı 6 ay xidmət etmiş çağırışçılara attestasiyadan keçmək imkanı yaradılacaq və müvafiq maaşlar təklif olunacaq. Müdafiə naziri Suren Papikyan deyib ki, məqsəd müqaviləli hərbi xidmətin cəlbediciliyini və marağını artırmaqdır, bunun üçün onlar müqavilə əsasında hərbi xidmətdə olan zabitlər, kiçik rütbəli zabitlər və sıravi hərbi qulluqçular üçün mükafat təyin etməyi planlaşdırırlar.
13-10-2022, 14:29
DİN-dən "Qarabağ"ın oyunu ilə bağlı çağırış
Daxili İşlər Nazirliyi (DİN) bu gün baş tutacaq “Qarabağ” - “Olimpiakos” oyunu ilə bağlı vətəndaşlara çağırış edib. DİN-dən verilən məlumata görə, oyunla əlaqədar stadionun daxilində, ətrafında vətəndaşlarımızın və xarici azarkeşlərin təhlükəsizliyinin təmin edilməsi məqsədilə polis əməkdaşları və Daxili Qoşunların hərbi qulluqçuları tərəfindən bütün zəruri tədbirlər həyata keçirilir. "Əziz futbolsevərlər, xahiş olunur ki, Tofiq Bəhramov adına Respublika stadionu istiqamətində gələrkən şəxsi avtomobillərə deyil, ictimai nəqliyyata üstünlük verəsiniz. Bundan başqa oyunun keçirildiyi əraziyə 1 saat əvvəl gəlməyiniz də tövsiyə olunur", - məlumatda vurğulanıb.
13-10-2022, 14:26
NATO Ukraynaya dəstəyi artırır
"Biz dəstəyimizi artıracağıq, xüsusən də Ukraynaya daha çox hava hücumundan müdafiə sistemi təqdim edəcəyik". Bunu NATO baş katibi Yens Stoltenberq Brüsseldə Alyansa üzv ölkələrin müdafiə nazirlərinin görüşü çərçivəsində ABŞ-ın müdafiə naziri Lloyd Ostinlə birgə brifinqdə deyib."Mən ABŞ-ın Ukraynaya göstərdiyi misli görünməmiş dəstəyi, eləcə də avropalı müttəfiqlər, Kanada və tərəfdaşlarının Ukraynaya göstərdiyi misilsiz dəstəyi alqışlayıram. Həm də inanıram ki, bu, NATO müttəfiqləri və tərəfdaşlarının verdiyi çox mühüm mesajdır. Biz Ukraynanın müdafiəsi üzrə Təmas Qrupunda lazım olduğu qədər Ukraynanın tərəfində olacağıq”, - Stoltenberq bildirib.
13-10-2022, 14:24
Sərhəd missiyası bu gün Ermənistana gəlir
Avropa İttifaqının (Aİ) mülki missiyası bu gün Ermənistana səfər edəcək. Bu barədə Ermənistan Xarici İşlər Nazirliyi məlumat yayıb. Bildirilib ki, Avropa İttifaqının missiyası Azərbaycanla sərhəddə humanitar missiyanın həyata keçiriləcəyi konkret yerləri ziyarət edəcək. Xatırladaq ki, Avropa İttifaqının Ermənistana missiya göndərməsi barədə razılıq Praqada əldə olunub. Ötən həftə Avropa İttifaqına üzv ölkələrin səfirləri Ermənistana mülki missiya göndərmək barədə razılığa gəliblər. Müvafiq qərar Siyasət və Təhlükəsizlik Komissiyasının qapalı iclasında qəbul edilib. Missiya Azərbaycanla sərhəddə yerləşdiriləcək. Məqsəd etimad yaratmaq, eləcə də sərhədlərin delimitasiyası prosesini təşviq etməkdir.
13-10-2022, 14:22
“Bavariya” Çempionlar Liqasında rekorda imza atdı
Almaniyanın “Bavariya” klubu UEFA Çempionlar Liqasının qrup mərhələsinin oyunlarında ən uzun məğlubiyyətsizlik seriyasına görə turnirin rekorduna imza atıb. Butov.az xəbər verir ki, Almaniya klubu Çempionlar Liqasının qrup mərhələsində ardıcıl 11 oyunda qalib gəlib. Əvvəllər turnirdə iştirak edən komandaların heç biri belə nailiyyət əldə edə bilməyib. Belə ki, oktyabrın 12-də Çempionlar Liqasının qrup mərhələsinin dördüncü turunun oyununda “Bavariya” Çexiyanın “Viktoriya Plzen” klubunu 4:2 hesabı ilə məğlub edib. Yulian Nagelsmanın komandasının heyətində Leon Goretska dubla, Sadio Mane və Tomas Müller hərəyə bir qola imza atıblar. Qeyd edək ki, “Bavariya” 4 oyundan sonra 12 xalla C qrupunun turnir cədvəlinə başçılıq edir. O, beşinci turda “Barselona” ilə qarşılaşacaq.
13-10-2022, 14:17
Ukrayna ordusu ruslara ağır zərbələr vurub
Ukrayna Silahlı Qüvvələrinin hava hücumundan müdafiə bölmələri Rusiyanın 4 helikopterini və 26 pilotsuz uçuş aparatını vurub. Bu barədə Ukrayna Silahlı Qüvvələrinin Baş Qərargahı "Facebook" səhifəsində məlumat yayıb."Müdafiə qüvvələrinin aviasiyası son sutka ərzində düşmənə 32 zərbə endirib. Silah və hərbi texnikanın cəmləşdiyi 25-dən çox ərazinin, eləcə də düşmənin 7 zenit-raket kompleksinin vurulduğu təsdiqlənib. Bundan başqa, hava hücumundan müdafiə bölmələrimiz də düşmənə atəş açıb. Nəticədə, düşmənin 4 helikopteri və 26 PUA-sı vurulub”, - məlumatda qeyd olunub.
13-10-2022, 14:15
Makrondan Ermənistana dəstək, Azərbaycana ittiham
Fransa prezidenti Emmanuel Makron Ermənistan və Azərbaycan arasında baş vermiş son toqquşmalara görə Rusiyanı ittiham edib. Butov.az xəbər verir ki, “Reuters”in məlumatına görə, Makron sərhəddə baş vermis sentyabr döyüşlərini Rusiyanın “məqsədli təxribat”ının nəticəsi adlandırıb. Onun sözlərinə görə, bütün bunlar Rusiyanın “Qafqaz regionunda və onun hüdudlarından kənarda vəziyyətin sabitliyini pozmaq səyləri çərçivəsində” baş verib.“Son iki ildə sərhəddə nələr baş verir... Guya sərhədi 5 min rus əsgəri qoruyur, amma bir neçə əsrdir davam edən bu münaqişədən ruslar sui-istifadə edərək, Azərbaycanın xeyrinə oyun oynadılar, Ermənistanı zəiflətməyə çalışdılar”, - Makron bildirib. “Nə baş verdiyini görürsünüz? Bu, Rusiyanın sabitliyi pozmaq cəhdidir, Qafqazda qarışıqlıq yaratmaq istəyir, məqsəd bizim hamımızı qeyri-sabit vəziyyətə salmaqdır”. Makron əmin edib ki, Fransa Ermənistanı tək qoymayacaq.“Ermənistan bizim unikal əlaqəmiz olan ölkədir. Azərbaycan sərhəd boyu bir neçə yerdən hücuma keçib. Biz buna görə onları qınadıq. Biz erməniləri tək buraxmayacağıq”, - Fransa prezidenti əlavə edib. O xatırladıb ki, Fransanın və Avropa Şurası rəhbərinin vasitəçiliyi ilə Praqada Avropa Siyasi Birliyinin sammiti çərçivəsində Ermənistan və Azərbaycan liderlərinin görüşü baş tutub.“Bu sammit Ermənistanın baş nazirinə həm də müasir tarixdə ilk dəfə Türkiyə prezidenti ilə görüşməyə imkan verdi”, - deyə Makron qeyd edib. “Avropa İttifaqı qaz tədarükü ilə bağlı saziş imzaladığına görə qurumun Azərbaycana qarşı hansısa formada tolerantlığı varmı” sualına cavabında Makron qeyd edib ki, Fransa Azərbaycandan qaz almır. “Əlbəttə, bir neçə Avropa ölkəsi ilə qaz sazişləri var. Amma mən sizə Fransa və Avropanın səsi haqqında danışıram və deyirəm ki, bizim dəyərlərimiz və prinsiplərimiz nə qazla, nə də neftlə alına bilməz”.
13-10-2022, 14:13
Qarabağı minalardan təmizləmək üçün 25 milyard dollar lazımdır
Azərbaycan dünyada mina ilə ən çox çirklənmiş ölkələr sırasındadır. İlkin hesablamalara görə, Ermənistan işğal zamanı bir milyondan çox mina basdırıb. Bunu Azərbaycan Prezidenti İlham Əliyev Astanada keçirilən AQFET-in VI Zirvə Toplantısında çıxışı zamanı deyib. Dövlət başçısı bildirib ki, İkinci Qarabağ müharibəsinin başa çatmasından keçən iki il ərzində 250-dən çox Azərbaycan vətəndaşı mina partlayışları zamanı həlak olub və ya ağır yaralanıb: “Beynəlxalq mütəxəssislərin hesablamalarına görə, Azərbaycana ərazilərin minalardan təmizlənməsi məsələsini həll etmək üçün təxminən 30 il və 25 milyard ABŞ dolları lazımdır”.
13-10-2022, 14:11
Çempionlar Liqasının 1/8 finalçıları
UEFA Çempionlar Liqasının qrup mərhələsində 4-cü tura yekun vurulub. Butov.az xəbər verir ki, A,B,C və D qruplarında ümumilikdə 8 qarşılaşma baş tutub. A qrupunda “Napoli” İtaliyada “Ayaks”ı qəbul edib. Altı qolluq qarşılaşmadan inamlı qələbə ilə ayrılan Neapol təmsilçisi pley-offa vəsiqəni rəsmiləşdirib. “Liverpul” isə Şotlandiyada “Reyncers”in qonağı olub və darmadağına sevinib. B qrupunda Madrid “Atletiko”su “Brügge” ilə üz-üzə gəlib. Bu oyunda qapılara qol vurulmayıb. Digər görüşdə “Bayer” “Portu”nu qəbul edib. Qonaqlar bu oyundan inamlı qələbə ilə ayrılıblar. Bu nəticələrdən sonra “Brügge” də 1/8 finala vəsiqəni təmin edib. Günün maraqla gözlənilən matçı C qrupunda “İnter”lə “Barselona” arasında olub. Altı qolun qeydə alındığı bu matçda qalib müəyyənləşməyib. Qrupun autsayderi “Viktoriya” (Plzen) isə “Bayern”lə görüşüb. Münhenlilər səfərdən inamlı qələbə ilə dönüblər. Nəticədə Almaniya çempionu 1/8 finala vəsiqə qazanıb. D qrupunda “Tottenhem” “Ayntraxt”ı, “Sportinq” isə Marsel “Olimpik”ini qəbul edib. İngiltərə klubu evdə, Fransa təmsilçisi isə səfərdə qələbə qazanıb.
UEFA Çempionlar Liqası
Qrup mərhələsi, 4-cü tur
12 oktyabr
A qrupu
Napoli (İtaliya) – Ayaks (Niderland) 4:2
Qol: Lozano, 4. Raspadori, 16. Kvaratsxeliya, 62-pen. Osimhen, 90 – Klaassen, 49. Berqveyn, 83.
Reyncers (Şotlandiya) – Liverpul (İngiltərə) 1:7
Qol: Arfild, 17 – Firmino, 24; 55. D.Nunes, 66. Salah, 76; 80; 81. Elliot, 87.
Xal: Napoli – 12. Liverpul – 9. Ayaks – 3. Reyncers – 0.
B qrupu
Atletiko (Madrid, İspaniya) – Brügge (Belçika) 0:0Bayer (Almaniya) – Portu (Portuqaliya) 0:3
Qol: Qaleno, 6. Taremi, 53-pen; 64-pen.
Xal: Brügge – 10. Portu – 6. Atletiko – 4. Bayer – 3.
C qrupu
Viktoriya (Plzen, Çexiya) – Bayern (Almaniya) 2:4
Qol: Vikanova, 62. Kliment, 75 – Mane, 10. Müller, 14. Qoretska, 25; 35.
Barselona (İspaniya) – İnter (İtaliya) 3:3
Qol: Dembele, 40. Levandovski, 82; 90+2 – Barella, 50. L.Martines, 63. Qozens, 89.
Xal: Bayern – 12. İnter – 7. Barselona – 4. Viktoriya – 0.
D qrupu
Tottenhem (İngiltərə) – Ayntraxt (Almaniya) 3:2
Qol: Son, 20; 36. Keyn, 28-pen – Kamada, 14. Alidu, 87.
Sportinq (Portuqaliya) – Olimpik (Marsel, Fransa) 0:2
Qol: Genduzi, 20-pen. A.Sançes, 30.
Xal: Tottenhem – 7. Olimpik – 6. Sportinq – 6. Ayntraxt – 4.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!