Füzulidə silah-sursat aşkarlandı

Füzuli rayonunda silah-sursat aşkar edilib.
DİN-in Mətbuat Xidmətinin Bərdə regional qrupundan verilən məlumata görə, Füzuli Rayon Polis Şöbəsinin əməkdaşları tərəfindən rayonun işğaldan azad edilmiş ərazisində hərbi silah-sursatın aşkar olunması istiqamətində tədbirlər davam etdirilir.
Polis əməkdaşlarının keçirdikləri tədbirlər zamanı 10 avtomat, 4 qumbaraatan, 2 pulemyot və 1510 müxtəlif çaplı patron götürülərək aidiyyəti üzrə təhvil verilib.

XİN Ermənistana xəbərdarlıq etdi

Azərbaycan Xarici İşlər Nazirliyi (XİN) Ermənistana xəbərdarlıq edib.
Bu barədə Xarici İşlər Nazirliyindən məlumat verilib.
XİN-in bölgədəki son vəziyyətə dair bəyanatında bildirilib ki, qanunsuz hərbi birləşmələr tərəfindən davamlı şəkildə törədilən hərbi təxribatlar, o cümlədən son vaxtlar daha da intensivləşən və mülki uçuşları hədəf alan radioelektron müdaxilələr dözülməzdir və yolverilməzdir.
"Son günlər baş verən bütün bu təxribatlara görə məsuliyyət Azərbaycan ərazilərində qanunsuz hərbi mövcudluğu davam etdirən, separatizmi təşviq edən və reinteqrasiya səylərinə əngəl törədən Ermənistan və onun rəhbərliyinin üzərinə düşür", - bəyanatda qeyd edilib.

XİN bəyanat yaydı

Azərbaycan Respublikası 30 ilə yaxın müddətdə Ermənistanın hərbi təcavüzü, ərazilərimizin işğalı, qoca, qadın, uşaq demədən azərbaycanlılara qarşı kütləvi qırğınlar törədilməsi ilə üzləşib, bir milyona yaxın azərbaycanlı məcburi köçkün və qaçqına çevrilib.
Bu barədə Azərbaycan Xarici İşlər Nazirliyinin bölgədəki son vəziyyətə dair bəyanatında bildirilib.
Qeyd olunub ki, BMT Təhlükəsizlik Şurasının 1993-cü ildə qəbul etdiyi dörd qətnamədə Azərbaycanın suverenliyinin və ərazi bütövlüyünün tanınmasına və işğalçı qüvvələrin Azərbaycan ərazilərini dərhal tərk etməsinin tələb olunmasına baxmayaraq, Ermənistan bütün bu çağırışlara heç bir məhəl qoymayıb, əksinə işğala əsaslanan status kvonu daha da möhkəmləndirərək, işğal etdiyi ərazilərdə Azərbaycan xalqının tarixi və mədəni irsini qəsdən məhv edib, qanunsuz məskunlaşdırma siyasəti həyata keçirib. Ermənistan rəhbərliyi “Qarabağ Ermənistandır və nöqtə” kimi təxribatçı açıqlamalar verərək, Azərbaycanı “yeni ərazilər naminə yeni müharibə” ilə hədələyib.
2020-ci ildə 44 günlük Vətən müharibəsində Azərbaycan xalqı Prezident, müzəffər Ali Baş Komandan cənab İlham Əliyevin rəhbərliyi altında tarixi zəfər qazanaraq torpaqlarımızın işğalına son qoyub. 30 illik işğala və məşəqqətlərə baxmayaraq, Azərbaycan tərəfi Vətən müharibəsindən qısa müddət sonra iki ölkə arasında bir-birinin ərazi bütövlüyü, suverenliyi və sərhədlərinin qarşılıqlı tanınması və hörmət edilməsi əsasında münasibətlərin normallaşmasına dair baza prinsipləri və sülh müqaviləsi təklifi ilə çıxış edib. Ermənistan tərəfinin Azərbaycanın sülh təşəbbüslərinə uzun müddət cavab verməməsinə və müxtəlif bəhanələrlə prosesi ləngitməsinə baxmayaraq, Azərbaycan tərəfi qətiyyət göstərərək sülh müqaviləsi, sərhədlərin delimitasiyası və kommunikasiyaların açılması istiqamətində təşəbbüslərin irəlilədilməsi üçün xoşməramlı səylərini davam etdirib.
Bununla yanaşı, Azərbaycan hakimiyyət orqanları tərəfindən Qarabağ bölgəsinin yerli erməni sakinləri ilə dialoq istiqamətində ardıcıl addımlar atılıb, yeni Laçın yolunun tikintisi, Laçın ərazisində kiçik SES-lərdən istifadə, Sərsəng su anbarının istifadə və idarəolunması istiqamətində bir sıra təmaslar və erməni sakinlərlə dialoq ilkin dövrlərdə öz müsbət töhfəsini verib. Ermənistan tərəfi isə bunun əksinə, “beynəlxalq mexanizm çərçivəsində Bakı-Xankəndi danışıqları vasitəsilə Qarabağ ermənilərinin hüquq və təhlükəsizliyinin təmin edilməsi” kimi əsassız təkliflə çıxış edərək, Azərbaycan və yerli erməni sakinlər arasında təmaslara maneçilik törədib və faktiki olaraq ölkəmizə qarşı ərazi iddialarını başqa ad altında davam etdirib.
10 noyabr 2020-ci il bəyanatının bütün hərbi fəaliyyətlərin dayandırılmasına dair müddəasına və digər beynəlxalq öhdəliklərə zidd olaraq, Ermənistan tərəfindən Azərbaycan ərazilərinin intensiv minalanması halları, Azərbaycan ərazilərinə 2021-ci il istehsalı olan minalar gətirərək basdırması, beynəlxalq ictimaiyyətin Ermənistanın məqsədli şəkildə mina təhdidinə göz yumması nəticəsində 2020-ci ilin noyabr ayından bəri iki nəfər jurnalist daxil 303 nəfər azərbaycanlı mina qurbanına çevrilib.
Ermənistan öhdəliklərinə zidd olaraq, silahlı qüvvələrini torpaqlarımızdan tam olaraq çıxarmayaraq, bunun əksinə Laçın yolu vasitəsilə onların rotasiyasını həyata keçirib, silah-sursatla təchiz edib, onların Ermənistanın dövlət büdcəsi hesabına maliyyələşməsini davam etdirib, Azərbaycanın təbii sərvətlərinin talan edilməsi ilə məşğul olub.
Azərbaycan öz sərhədlərinə nəzarət və Ermənistanın qeyri-qanuni fəaliyyətinin qarşısını almaq məqsədilə, özünün suveren ərazilərində Laçın sərhəd buraxılış məntəqəsi təsis edib. Azərbaycan tərəfindən erməni sakinlərin, Beynəlxalq Qızıl Xaç Komitəsinin (BQXK) və Rusiya sülhməramlı kontingentinin sərhəd buraxılış məntəqəsindən keçidinin təmin olunmasına baxmayaraq, Ermənistan tərəfi ərazilərimizdə qeyri-qanuni fəaliyyətini davam etdirmək məqsədilə, bölgədə saxta “gərgin humanitar vəziyyət” barədə iddialar yayıb. Eyni zamanda, 15 iyun tarixində sərhədçilərimizin atəşə tutulması, qaçaqmalçılığa cəhd edilməsi, yük avtomobillərinin 26 iyul tarixində Azərbaycan ərazilərinə icazəsiz göndərilməsi kimi təxribatlar törədib.
Azərbaycan tərəfinin erməni sakinlərin ehtiyaclarının qarşılanması üçün “Ağdam-Xankəndi” yolundan və digər alternativ yollardan istifadə daxil olmaqla, bir sıra təkliflər irəli sürməsinə və onların Avropa İttifaqı, BQXK tərəfindən dəstəklənməsinə baxmayaraq, erməni tərəfinin bu təkliflərə qarşı çıxması, alternativ yollara beton maneələr düzməklə əraziyə girişi bloklaması Ermənistanın humanitar vəziyyət barədə iddialarının siyasi şantaj və manipulyasiya olduğunu bir daha göstərib.
Ermənistanın məqsədi bölgəyə üçüncü tərəfləri cəlb etmək, gərginliyin coğrafiyasını genişləndirmək və sülh prosesini iflasa uğratmaqdan ibarətdir.
Bütün bunlar, xüsusilə də, qanunsuz hərbi birləşmələr tərəfindən davamlı şəkildə törədilən hərbi təxribatlar, o cümlədən son vaxtlar daha da intensivləşən və mülki uçuşları hədəf alan radio-elektron müdaxilələr dözülməzdir və yolverilməzdir.
Son günlər baş verən bütün bu təxribatlara görə məsuliyyət Azərbaycan ərazilərində qanunsuz hərbi mövcudluğu davam etdirən, separatizmi təşviq edən və reinteqrasiya səylərinə əngəl törədən Ermənistan və onun rəhbərliyinin üzərinə düşür.
30 il ərzində Azərbaycan ərazilərinin işğalına göz yuman bir sıra ölkələrin və beynəlxalq təşkilatların Azərbaycana qarşı qərəzli bəyanatlar verməsi qəbuledilməzdir. Həmin ölkələr və beynəlxalq təşkilatlar son üç il ərzində Azərbaycan ərazilərində erməni silahlı qüvvələrinin mövcudluğuna, Ermənistanın kommunikasiyaların açılmasına maneçilik törətməsinə də etinasız yanaşıblar. Ermənistanın manipulyasiyalarına aldanıb qərəzli bəyanatlar verən ölkələrdən və beynəlxalq təşkilatlardan Azərbaycanın suverenliyinə və ərazi bütövlüyünə hörmət etməyi, ölkəmizin daxili işlərinə qarışmamağı və ikili standartlar siyasətinə son qoymağı tələb edirik.
Azərbaycan özünün Qarabağ bölgəsində yaşayan erməni sakinlərin hüquqlarını ölkə Konstitusiyası əsasında təmin edəcək, öz suverenliyi və ərazi bütövlüyünə qarşı istənilən addımın qarşısını qətiyyətlə alacaqdır.

Cüdoçularımız 3 qızıl medal qazandı

Sloveniyanın Maribor şəhərində 25-28 iyul tarixlərində XVII Avropa Gənclər Olimpiya Festivalının cüdo üzrə fərdi yarışları keçirilib.
Azərbaycan turnirdə 12 çəki dərəsində 8 oğlan və 4 qız cüdoçu ilə təmsil olunub. Cüdoçularımız fərdi yarışlarda ümumilikdə 3 qızıl, 2 gümüş və 4 bürünc medal əldə edib.
Turnirin ilk günündə oğlanlar arasında -50 kq. çəkidə Nihad Məmişov və -55 kq. çəkidə Ayxan Mirzəzadə yarışın bürünc medallarını əldə ediblər. Qızlar arasında isə -44 kq. çəkidə Məryəm Bayramzadə yarışı 7-ci yerdə tamamlayıb.
Yarışın ikinci günündə qızlar arasında -48 kq. çəkidə Vüsalə Hacıyeva və -52 kq. çəkidə Xədicə Qədəşova bütün rəqiblərinə qalib gələrək yarışın qızıl medallarına sahib olublar. Oğlanlar arasında isə -60 kq. çəkidə Məhəmməd Musayev və -66 kq. çəkidə Cəsur İbadlı yarışda bürünc medal qazanıblar.
Yarışın üçüncü günündə oğlanlar arasında -73 kq. çəki dərəcəsində Süleyman Şükürov Festivalın gümüş medalını qazanıb.
Fərdi yarışların sonuncu günündə oğlanlar arasında -90 kq. çəkidə Aslan Kotsoyev bütün rəqiblərini məğlub edərək qızıl medal əldə edib. +90 kq. çəkidə Ramazan Əhmədov isə yarışın gümüş medalını qazanıb.
Qeyd edək ki, bu gün EYOF-un komanda yarışları keçiriləcək. Komanda yarışlarında Azərbaycan yığması 4 qız və 6 oğlan cüdoçu ilə təmsil olunacaq.

DAİM AXTARIŞDA OLAN NƏCİB, YARADICI İNSAN

ARAZ YAQUBOĞLU – 50

Son illərdə yaxından tanıdığım, daim əyani və müasir texniki vasitələrlə ünsiyyətdə olduğum, ixtisasca mühəndis, eyni zamanda ədəbi-bədii ictimaiyyətə peşəkar jurnalist, publisist, şair, tədqiqatçı kimi yaxşı tanış olan Araz Yaquboğlunun 50 illik yubileyi ərəfəsində onun zəngin, çoxşaxəli yaradıcılıq məziyyətləri və insani keyfiyyətləri haqqında bir neçə söz demək istədim.
Türk dünyasına Miskin Abdal, Ağ Aşıq Allahverdi, Aşıq Alı, Dədə Ələsgər, Şair Məmmədhüseyn, Növrəs İman və b. kimi poetik dühalar bəxş etmiş, əsrlərlə qədim, zəngin tarixi olan Göyçə ədəbi məktəbinin bir çox tanınmış poeziya ocaqları mövcuddur ki, onların içərisində Daşkənd kəndində Həsən Xəyallı ocağı xüsusi yer tutur. Poetik gücünü sələflərindən götürən bu ocaq XX əsr Göyçə ədəbi mühitinin göstəricisi olaraq ədəbiyyatımıza onlarca istedadlı yazarlar yetişdirmişdir. Bu ocağın bünövrəsini qoymuş şair Həsən Xəyallı, onun istedadlı yazar övladları-Molla Əmirxan, Nəbi Həsənoğlu, Eldar Həsənli, xüsusilə ixtisasca riyaziyyatçı olan, ilhamlı qələmə, dərin poetik və publisistik yaradıcılığa malik, şifahi və yazılı ədəbiyyatımızı gözəl bilən görkəmli şair Sərraf Şiruyə, cavan yaşlarında dünyasını dəyişmiş, fitri istedad sahibi, şair Aqil İman Göyçə ədəbi irsinin, müasir milli ədəbiyyatımızın layiqli nümayəndələridir. Onların övladları, ədəbi varisləri bu gün uğurla yazıb-yaradan istedadlı şairlər-Aqşin Hacızadə, Qılman İman, Əli Məhərrəmov, haqqında bu yazını qələmə aldığım Araz Yaquboğlu və digər yazarlar bu nurlu ocağın qüdrətli davamçılarıdır.
Hər kəs həyatında müxtəlif xarakterli insanlarla rastlaşır, ünsiyyət qurur, yoldaşlıq edir. Onların arasında öz etibarı, vəfası, ali xüsusiyyətləri ilə seçilən üç, dörd, çox zaman ancaq bir nəfərlə dostluq əsl etalona çevrilər. Belə insanlar müqəddəsliyi, sədaqəti, fədakarlığı, qüdrəti, xoş rəftarı, təvazökarlığı, yüksək mədəniyyəti və s. ali keyfiyyətləri özündə cəm edər və əhatəsinə də təlqin etməyə müvəffəq olar. Araz Yaquboğlu kimi!
Araz Yaquboğlu yüksək mənəviyyatı, intellekti və mədəniyyəti olan əsl azərbaycanlıdır. O yorulmaq bilməyən çox zəhmətkeş, çalışqan, yaradıcı bir tədqiqatçıdır. Onun yaradıcılığı çoxşaxəlidir, həm folklorumuzu, klassik poeziyamızı, ədəbiyyatımızın tarixi şəxsiyyətlərinin yaradıcılığını tədqiq və təhlil edən, eyni zamanda innovativ sahədə uğurlar qazanan gözəl bir elm adamıdır, ziyalıdır. Daim öz işindən zövq alan, ancaq heç vaxt öyünməyən, həmişə öyrənməyə can atan təvazökar araşdırmaçıdır. Onun qələminin məhsulu oxunaqlı, mükəmməl, mövzu və məna baxımından geniş, dərin və zəngindir. Söylədiklərimi bir neçə misalla oxucuların nəzərinə çatdırmağa çalışacam.

Onun “Bütöv Azərbaycan” qəzetində dərc olunmuş “Analar anasını xatırlayarkən” yazısını insan ürəyinin dərin qatlarına təsir edən səmimi, nisgilli, nurlu, kədərli hisslərsiz oxumaq mümkün deyil. Bu yazını mən Göyçədə və Yeni Daşkənddə həyatın bütün gözəlliklərini və məşəqqətlərini görmüş, Vətən uğrunda şəhid və qəhrəman oğullar bəxş etmiş bir analar Anasının vəfatıyla bağlı Araz bəyin özünəməxsus istedadlı qələmiylə yazdığı tarixçəni “Qəriş xalanın hekayəti” adlandırardım. Onun Qəriş xala haqqında kədərli notlara köklənmiş bu fikirləri-“Daha mənim doğulduğum kənddə anamdan başqa kimim qaldı ki? Heç kimim. Heyif sizdən, ağsaqqallar, ağbirçəklər. Mən sizlə nəfəs alır, sizlə qürur duyur, sizə görə kəndə can atırdım”-insan qəlbini təlatümə salır, riqqətə gətirir. Araz Yaquboğlunun bu yazısı Göyçənin Daşkənd, Bərdənin Yeni Daşkənd əhalisinin, bütün insanlarının məhəbbətini və hörmətini qazanmış, hamının onu Qəriş ana, nənə, xala kimi çağırdığı Gülavatın Şükür qızı Məhərrəmova haqqında yazılmış bir essedir, vəfatının ağır təsirindən yaranmış, sevgi ilə xatirələrə bürünmüş rekviemdir. Araz bəy bu çox təsirli yazısında Molla Əmirxan–Qəriş ailəsinə mənsub olan “Qəriş xalanın çolpalı xəngəli”, “Əmirxan əminin qoç payı”ndan bəhs edən, onlara bənzər çoxsaylı mütəəssir olunacaq epizodlarda bu ailənin bütöv göyçəlilərə məxsus olan səxavətini və xeyirxah xasiyyətlərini açıb göstərə bilmişdir.
Araz Yaquboğlu Qəriş xalanın vəfatına həsr etdiyi yazısını bu sətirlərlə bitirir: “Dəfndən qayıdıb qapıya gələndən sonra gözlərim qarşısında sanki beş Qəriş xala gördüm. Onda dedim ki, bir daha Allah sənə rəhmət eləsin, Analar anası! Sən fani dünyanı tərk etsən də, yerində özün kimi beş ana qoyub getdin. Yerin cənnət olsun, Qəriş xala!” İstedadlı yazıçı-publisist qələmindən çıxmış bu hekayəti oxuyarkən mən Araz bəyin bu sözlərinə qoşularaq ona, mərhumun doğma və yaxınlarına, Yeni Daşkənd camaatına dərin hüznlə başsağlığı verir, Gülavatın Anaya -Qəriş xalaya Allahdan rəhmət diləyirəm!
Bu yaxınlarda Azərbaycanda olarkən Araz Yaquboğlunun bədii ifadə baxımından və tarix nöqteyi-nəzərdən maraqlı olan “Ömrün şəhidlik zirvəsi” adlı kitabını diqqətlə oxudum. Araz bəy əvəzolunmaz bir iş görüb. Kitab Göyçə mahalının Daşkəndli şəhidlərinə, ilk növbədə bu gün Bərdə rayonunda Yeni Daşkənd məktəbinin onun adını daşıyan qəhrəman şəhid Yasif Kərimova və məşhur el sərkərdəsi Daşkəndli Məşədi Qasımın xatirəsinə həsr olunub. Daşkəndin kitabda göstərilən qədər çoxsaylı şəhid verməsini təsəvvür etmirdim. Başqa müəlliflərin şəhidlərə həsr olunmuş səmimi, həqiqi ürək ağrısıyla qələmə aldıqları şeir və özgə səpkili yazılarının da kitaba salınması, real faktlara əsaslanan məlumat və hekayətlər onun əhəmiyyətini bir qədər də artırıb. Kitabın müəllifi tək adi bir kənd tarixinə yox, Göyçə mahalı, Qərbi Azərbaycan salnaməsinə dəyərli, minnətdarlıq hissi doğuran töhfə verib.
Yeri gəlmişkən, Azərbaycan radiosu kitaba xüsusi maraq göstərərək, onun əsasında uğurlu veriliş hazırlayıb və efirə buraxıb.
Bu il Göyçənin Daşkənd kəndinin insanlarının mənfur qonşular tərəfindən deportasiyasından 70 il ötür. Bildiyiniz kimi, illər boyu havadarlarının himayəsi altında “dənizdən-dənizə” siyasəti ilə sayıqlayan mənfur qonşularımız tərəfindən Qərbi Azərbaycanın başqa bölgələrində olduğu kimi bir neçə dəfə Göyçə camaatı da deportasiyaya məruz qalmışdır. 70 il əvvəl Göyçəsindən didərgin salınmış Daşkəndin 130 ailəsi Qarabağın Bərdəsində çöl-biyabanda 7 çinar ağacı ətrafında məskunlaşaraq, öz ağır zəhməti, səyi, fədakarlığı, əzm və iradəsi ilə öz orta məktəbinə, dövlət və sosial strukturlarına malik olan bu gün şahidi olduğumuz öz Göyçəsoylu adını daşıyan artıq 750 ailədən ibarət, 2768 nəfər əhalini birləşdirən gözəl məkan, kənd qura, yarada bilmişlər. Qərbi Azərbaycan torpaqlarının, o cümlədən Göyçənin zəngin tarixi-mədəni irsinin öyrənilməsi, təbliğ olunması, onların təbiətini, adət-ənənələrini, milli-mədəni dəyərlərini, görkəmli şəxsiyyətlərinin həyat və yaradıcılığını tədqiq etmək, gələcək nəsillərə çatdırmaq xüsusi əhəmiyyət kəsb edir və bu sahədə alimlərimiz, yaradıcı insanlarımız qarşısında mühüm vəzifələr qoyur. Bu zəmində Araz Yaquboğlunun Daşkəndin tarixi salnaməsini yaratmaq əzmində gördüyü böyük məna daşıyan çoxsaylı işləri, ilk növbədə bu mövzudan – 2023-cü ildə əsasının qoyulmasının, deportasiya olunmasının 70 ili tamam olan Yeni Daşkənd kəndinin tarixindən, əhalisindən, o cümlədən tanınmış ziyalılarından, qəhrəman övladlarından, qələm sahiblərindən bəhs edən irihəcmli (480 səh.) “Daşkənddən Yeni Daşkəndə” kitabı bir örnək kimi xüsusi minnətdarlıqla qeyd olunmalıdır.
Araz Yaquboğlu daim televiziya və radio verilişlərinin qonağı olmaqla, öz dəyərli araşdırmalarını tamaşaçılar və dinləyicilər ilə bölüşür. Onun Dünya TV-də “Ozan dünyası” verilişində Şair Məmmədhüseyn, İctimai TV-də “Ozan məclisi” verilişində Aşıq Nuriddin, 105 FM Radioda “El havası” verilişində məşhur zurnaçı Zamaxan Qəhrəmanov, “Vətən yaşasın” verilişində Yeni Daşkəndli şəhid Ziyafət Balıyev, “Yurd yeri” verilişində Göyçə aşıqları haqqında, “O kənd bizim kəndimizdi” verilişinin Daşkəndə həsr olunmuş üç sayında söylədiyi fikirlər, etdiyi dəyərli təkliflər və tövsiyələr olduqca önəmlidir. Onun uzun illər boyu apardığı araşdırmalar, tədqiqatlar əsasında tariximizi özümüzə qaytaran maraqlı faktların, məlumatların, toponimlərin, verilişlərdə müzakirə olunan insanların həyatından bəhs edən naməlum faktların üzə çıxarılması, yer-yurd yerlərinin coğrafiyasının, təbiətinin, ayrı-ayrı hadisələrin xatirələrinin geniş oxucu, seyrçi və dinləyici kütləsinin nəzərinə çatdırılması böyük əhəmiyyət kəsb edir.
Burada adı çəkilən “Yurd yeri” verilişinə mən böyük maraq hissilə qulaq asdım. Veriliş Göyçə ədəbi mühitinə, İnternetin, xüsusilə Vikipediyanın Qərbi Azərbaycanın toponimlərini, yer, yurd adlarının tarixi faktlarla araşdırması işində əhəmiyyətinə həsr olunmuşdu. Verilişə dəvət olunmuş Araz Yaquboğlu söhbətin mövzusunu dərindən bilmək bacarığı və yüksək professionallığı ilə Göyçə ədəbi tarixinin müəyyən örtülü məqamlarını faktlarla, ustalıqla açıqlamağa nail oldu. O Miskin Abdal, Şair Məmmədhüseyn, Aşıq Hacı Bayramov yaradıcılığından maraqlı, cəlbedici söhbətlər apardı. Bu verilişdə mən sanki yenə Göyçəyə gedib qayıtdım. Hətta aşıq musiqisinin pərəstişkarı olmağıma baxmayaraq, mən “Heydəri” aşıq havasının nə cür səsləndiyinə bu verilişdə qulaq asdım.

Araz Yaquboğlu eyni zamanda çoxsaylı şeirlər müəllifidir. O, öz şeirlərini “Ədəbi İrəvan” almanaxında, “Ekspress”, “Bütöv Azərbaycan” və digər qəzetlərdə, dərgilərdə dərc etdirmişdir. Bu şeirlərdə səmimilik, lirika, poetik fikirlər diqqəti cəlb edir.
Göyçə həsrəti Araz bəyin misralarında kədərli, nisgilli notlarla səslənir:

Ayrı düşüb saz mağardan,
Zurna səsi gələr hardan?
O, tər güllü yaylaqlardan,
Çiçək üzə bilmirəm mən.

Araz çəkər möhnətini,
Dilə salar söhbətini.
Yozum sənin həsrətini,
Hansı sözə, bilmirəm mən.

Şair, qəlbinə çox yaxın olan Molla Əmirxanı bu cür təsvir edir:

Hazır bir kitabdı, aç varaq-varaq,
Neçə qərinədən verəcək soraq.
Uzaqdan vüqarlı görünən bir dağ,
Alınmaz qalaydı Molla Əmirxan.

Əmisi şair Sərraf Şiruyəyə zəmanədən belə şikayətlənir:

Gözüm, könlüm olsa da tox,
Sevincim az, kədərim çox.
Nə adətdi, kef-damaq yox –
Yadda qalan pis gün olur.

Çox gənc ikən dünyasını dəyişmiş istedadlı şair Aqil İmanla bağlı kədərini bu sətirlərlə ifadə edir:

Sənsiz ürəklər üzgündü,
Neçə baхışlar süzgündü.
Qəlblər fələkdən küskündü,
İncə qananım, hardasan?

Rəqiyə nənəsini şair aşağıdakı səmimi misralarla yada salır:

Qəlbimin aynasıydı,
Anamın anasıydı.
Babamın parasıydı
Mənim Rəqiyə nənəm.

Sevindirici haldır ki, Araz bəy şeirlərində ona dogma, yaxın, yaxşı tanış olan mövzuların poetik təsvirini verməyə çalışır.
Araz Yaquboğlunun böyük məna kəsb edən elmi axtarışları xüsusi qeyd olunmalıdır. Onun “Filologiya məsələləri”, “Yeni nəsil Azərbaycan aşıqları–II” toplularında, “Elmi axtarışlar”, “Ozan dünyası”, “Xəzan” jurnallarında “Aşıq Abbasəli Nəzərov”, “Aşıq Əli Şairov”, “Aşıq İslam Yarpızlının həyat və yaradıcılığı haqqında”, “Aşıq Orucun sazlı-sözlü dünyası”, “Dərdli Cavada cavab”, “El şairi Muxayıl Göyçəli”, “Hər sözü dillərdə bal olan şair”, “El şairi Qəmgin Fəzi” və s. adlı məqalələrdə haqlarında heç bir araşdırma, tədqiqat aparılmamış aşıqların, şairlərin həyat və yaradıcılığı tədqiq edilmiş, onlar haqqında olan səthi və yanlış məlumatlara əsaslı şəkildə, ciddi mənbələrlə aydınlıq gətirilmişdir. Zənnimcə, bu elmi məqalələr aşıq poeziyasının, el şairlərinin yaradıcılığının tədqiqi baxımından ədəbiyyatşünaslıqda özünəməxsus yer tutur.
Araz bəyin İkinci Dünya müharibəsində iştirak etmiş Göyçə aşıqlarının həyat və yaradıcılığına həsr olunmuş məqalələri də təqdirəlayiqdir. Yeri gəlmişkən, qeyd etmək istərdim ki, Araz Yaquboğlu Göyçənin 5 kəndinin – Daşkənd, Qoşabulaq, Nərimanlı, Kəsəmən, Bala Məzrə kəndlərinin Böyük Vətən müharibəsində həlak olan və itkin düşən sakinlərinin taleyini diqqət və həssaslıqla araşdırmış, onların nəticələrini “Azərbaycan Respublikası Xatirə Kitabı”nın müxtəlif cildlərində nəşr etdirmişdir. Onun uzun illər boyu nəsil şəcərələri ilə bağlı apardığı araşdırma işləri nəticəsində “Daşkənddən Yeni Daşkəndə” kitabında 52 nəsil şəcərəsi işıq üzü görmüşdür.
Araz Yaquboğlunun Azərbaycan dilində olan Vikipediyanın, Vikikitabın, Vikisitatın və Vikimənbənin idarəçisi qismində ölkəmizin tarixinin, milli-mədəni dəyərlərinin, coğrafiyasının, təbii gözəlliklərinin, görkəmli şəxsiyyətlərinin, yaddan çıxmış, naməlum həqiqətlərinin dünya ictimaiyyətinə çatdırılmasında gördüyü bənzərsiz işləri minnətdarlığa layiq olmaqla xüsusi qeyd edilməlidir. 2023-cü ilə olan məlumata görə, Araz müəllim Azərbaycanca Vikipediyada 7000-dən çox səhifənin yaradıcısı, ümumi Vikimedia layihələrində isə 440 000-dən çox redaktəyə sahibdir. Hal-hazırda, o Azərbaycanca Vikipediyada 270 000 redaktə ilə birinci sıradadır.
Araz müəllim 2021-ci ildən Aşıq Ələsgərin 200 illik yubileyi ilə əlaqədar 2020-ci ildə yaradılmış 150 nəfərdən çox poeziya, saz-söz sənəti sevdalılarını birləşdirən “Dədə Ələsgər 200”, yubiley ilindən sonra isə “Dədə Ələsgər Ədəbi Məclisi”nə çevrilmiş vatsap qruplarının moderatoru, admini kimi hər gün yorulmadan uğurla fəaliyyət göstərir. Bu qruplarda Aşıq Ələsgər yaradıcılığının və bütövlükdə Dədə Qorquddan başlayaraq bu günə qədər folklorumuzun, aşıq poeziyasının məşhur və az tanınan simalarının həyat və yaradıcılığının öyrənilməsi, təhlil və tədqiqi, müzakirəsi işinin təşkilatçısı kimi onun aparıcı rolunu xüsusi qeyd etmək istərdim.
Yaşadığımız əsrin iti sürəti, informasiya və texnologiya axınının gücü Araz Yaquboğlunun yaradıcılıq və fəaliyyətində öz əksini göstərir. Bir Vikipediya idarəçisi kimi onun verdiyi töhfələr bir örnəkdir. Gördüyü təmənnasız işlər, onun necə bir şərəfli insan, qeyrətli vətəndaş olmağından xəbər verir. Həyatda hər kəs doğulub boya-başa çatdığı yurd-yuvasını, şəhərini-kəndini, onun təbiətini, havasını-suyunu, insanlarını çox sevir, onun bir qarışını belə qürbətin zənginliyinə dəyişməyə təhəmmül etmir. Əslən Göyçə mahalının, zəngin ədəbi mühiti, ədəbi şəxsiyyətləri ilə seçilən Daşkənd kəndindən olan Araz müəllim Bərdə rayonunun Yeni Daşkəndində tanınmış mühəndis Yaqub Hacıyevin ailəsində dünyaya göz açmışdır. Hələ uşaqkən Göyçəyə iki-üç dəfə qonaq kimi gedib gəlmişdir. Lakin bu qısa səfərlərdə o, bu doğma diyarın hər cığırını-yolunu, çayını-bulaqlarını, dağını-qayasını, saz-söz adamlarını xüsusi istedadla yaddaşına həkk etmişdir. Gələcək araşdırma – tədqiqatçılığın təməli də məhz bu dövrlərdən başlamışdır. Sonralar, o, qürbətdə qalan Göyçəmizin görünən tərəfi kimi, çox təəssübkeşliklə, təbii olaraq, bu mahalın tarixi şəxsiyyətləri, saz-söz adamları haqqında məqalələr yazmış, çıxışlar etmiş, kitablar çap etdirmişdir.

Araz Yaquboğlu bir çox istedada malik olan ziyalılarımızdandır. 10-cu sinifdə oxuyarkən Bərdə rayonu üzrə keçirilən riyaziyyatdan fənn olimpiadasında I yeri tutmuş, respublika olimpiadasında iştirak etmək hüququ qazanmışdır. Orta məktəbi bitirdikdən sonra Azərbaycan İnşaat Mühəndisləri Universitetinə daxil olmuş, onun “Sənaye və mülki tikinti” ixtisasını əla qiymətlərlə bitirmişdir.
O, hələ tələbə ikən universitet üzrə keçirilən “Materiallar müqaviməti” fənni üzrə olimpiadada I yeri tutmuş, haqqında “İnşaatçı kadrlar uğrunda” qəzetində “Nümunəvi tələbə” başlıqlı məqalə dərc olunmuşdur. Qeyd etmək yerinə düşərdi ki, Texniki Universitetlərdə “Materiallar müqaviməti” fənni ən çətin fənlərdən biri hesab olunur. Buna görə Araz bəyin bu fənn üzrə l yer qazanması nailiyyəti yüksək dəyərə malikdir!
Araz Yaquboğlu çox məhsuldar yazardır. “Elin yaddaşında yaşayan ömür” (2006), “Bir kökün budaqları” (2006), “Daşkənd aşıqları və şairləri” (2008), “Tələbə dünyası” (2011), “Ömrün şəhidlik zirvəsi” (2012), “Bitməyən ömür” (2013), “Elin Şiruyəsi, sözün sərrafı” (2016), “Daşkənddən Yeni Daşkəndə” (2023) və “Sazın-sözün sorağında” (2023) adlı kitabların müəllifi, onlarla kitabın redaktorudur.
Qəzet və jurnal səhifələrində, internet resurslarında mütəmadi olaraq maraqlı elmi, publisistik, araşdırma, xatirə yazılarına, o cümlədən tədqiqatı aparılmamış çoxsaylı aşıq və el şairlərinin həyat və yaradıcılığı haqqında xüsusi əhəmiyyət kəsb edən məqalələrinə görə Araz Yaquboğlu Azərbaycan Jurnalistlər Birliyinin və Azərbaycan Aşıqlar Birliyinin üzvü seçilmişdir. O, “Laçın yurdu” jurnalında baş redaktorun müavini, “Dədə Ələsgər ocağı” İctimai Birliyi idarə heyətinin üzvü, “Dədə Ələsgər Ədəbi Məclisi”nin adminidir. Aşıq Ələsgər veb-saytının fəal yaradıcılarındandır.
Zəngin və maraqlı yaradıcılığına, faydalı ictimai fəaliyyətinə görə Araz Yaquboğlu “Qızıl qələm” media mükafatı, “Laçın” döş nişanı, “Dədə Ələsgər Ocağı” İctimai Birliyinin Fəxri fərmanı və “Aşıq Ələsgər – 200” yubiley medalı ilə təltif olunmuşdur.
Araz müəllim eyni zamanda nümunəvi, qayğıkeş ailə başçısıdır. Bir oğlu, bir qızı var. Oğlu Təhmasib Azərbaycan Dövlət İqtisad Universitetini və onun magistraturasını, qızı Firuzə isə Bakı Dövlət Universitetini və onun magistraturasını fərqlənmə diplomları ilə bitirmişlər. Maraqlı bir haşiyə. Bir neçə il qabaq Vikipediyada cəlbedici bir hal baş vermişdi. Belə ki, Vikipediyada keçirilən “Mövzulu ay”da (“Olimpiya oyunları ayı”) ilk üçlüyü bir ailənin üzvləri tutmuşdular. Diqqət çəkən hal isə bu olmuşdur ki, Azərbaycanca Vikipediyanın 13 idarəçisindən biri olan Araz Yaquboğlunu Vikipediya istifadəçiləri olan oğlu və qızı qabaqlayaraq 1-ci və 2-ci yerləri bölüşmüşdülər (Vikipediyada idarəçi statusu, istifadəçi statusundan yuxarı pillədir). Ataya isə 3-cü yer nəsib olmuşdu. Əminliklə deyərdim, Araz Yaquboğlunun ailəsi “Vikipediyaçılar ailəsi” hesab edilə bilər. Araz bəyin övladlarından əlavə kiçik qardaşı Elməddin Hacıyev də fəal Vikipediya istifadəçilərindən biridir.
Araz Yaquboğlu yaradıcı şəxsdir, onu bu gördüyü yaradıcı işlərə nə məcbur edən var, nə də sifarişlə yazandır. O sərbəst düşüncəli jurnalist, əvəzsiz tədqiqatları və araşdırmaları ilə mənəvi dəyərlərimizə çoxsaylı töhfələr verən, milli Vikipediyamızın zənginləşməsində xüsusi xidmətləri olan, geniş dünyagörüşlü, prinsipial, ətrafda baş verən proseslərə özünəməxsus fikri olan ziyalılarımızdandır. Araz müəllim qayğıkeş ailə başçısı, yüksək daxili mədəniyyətə, dəyərli insani keyfiyyətlərə, kövrək, olduqca xeyirxah ürəyə malik, mənəvi dünyası ruhuma çox yaxın olan gözəl, bənzərsiz insandır! Onun içindəki “MƏN”, vicdanının səsinin, düşüncələrinin, ruhunun təsiri, diktəsiylə qələmə sarılaraq gerçəkləşir. Bu şərəfli, yaradıcı yolda bizlər – dostları və həmkarları, çox yaradıb, az danışan, səmimi, təvazökar və alicənab, sözündə, amalında və əməlində məsuliyyətli, dürüst, daim axtarışda olan, nəcib, yaradıcı insan Araz Yaquboğlunu 50 illik yubileyi münasibətilə təbrik edir, doğma və yaxınlarının, onu sevən dostlarının əhatəsində ona möhkəm cansağlığı, yeni-yeni yaradıcılıq uğurları diləyirik!

Ələddin Allahverdiyev,
Professor, Moskva.
Redaksiyadan: Yaradıcı kollektivimiz qəzetimizin təəssübkeşi və fəal əməkdaşı Araz Yaquboğlunu 50 illik yubileyi münasibətilə ürəkdən təbrik edir, ona həyatının bütün sahələrində uğur arzulayır.

Unudulmaz görüş

Biz həyatımız boyu çox yerlər gəzir, müxtəlif fikirli, əqidəli insanlarla görüşürük. Zaman keçdikcə gəzdiyimiz yerlərin və görüşdüyümüz insanların çoxu heç bir iz qoymadan yaddaşımızdan silinib gedir. Elə insanlar da var ki, onları həmişə hörmət və məhəbbətlə xatırlayır, ehtiramla anırıq. Azərbaycan xalqının görkəmli din xadimlərindən, övliyalarından biri olan Hacı Seyid Mirtaha ağa belə unudulmaz insanlardan idi.
Mirtaha ağa ilə tanışlığımın maraqlı tarixi var. 2010-cu il iyunun 19-da Tərtər rayonunun Çaylı kəndi istiqamətində erməni mövqelərinin içərisinə girib təkbaşına 6 saat döyüşərək düşmənin 150-dən çox əsgər və zabitini məhv edən, özü də qəhrəmancasına şəhid olan və ölümündən sonra Azərbaycan Respublikasının Prezidenti İlham Əliyevin Sərəncamı ilə Azərbaycanın Milli Qəhrəmanı adına layiq görülən Azərbaycan Milli Ordusunun giziri İbrahimov Mübariz Ağakərim oğlunun vali deynləri ilə görüşmək üçün iki gün sonra- iyunun 21-də Biləsuvara getmişdim. Onları ziyarət edəndən sonra Mirtaha ağanın oğlu Mirsahib ağa məni evlərinə dəvət etdi. Həmin gün mənə Mirtaha ağa ilə görüşmək, çörək kəsmək, onun maraqlı söhbətlərinə qulaq asmaq nəsib oldu.
Mənim şair olduğumu biləndə Mirtaha ağa bir şerimi dinləmək istədi. Mən Həcc ziyarətinə gedən bir dostuma həsr etdiyim aşağıdakı şerimi oxudum:

Qardaş, yola düşürsən müqəddəs torpaqlara,
Qəlbində apardığın iman qorusun səni.
Dan üzü möminlərin alnına sığal çəkən,
Hira dağından qalxan duman qorusun səni.

Döz Tanrının yolunda məşəqqətə, cəfaya,
Salam apar bizlərdən Məkkə, Mərvə, Səfaya,
Qədir gecələrində Məhəmməd Mustafaya,
Nazil olan müqəddəs Quran qorusun səni.

Həzrəti peyğəmbərə Cəbrayıl gətirən din,
Əlinin Zülfüqarı köməyin olsun sənin,
Kərbəla çöllərində baban İmam Hüseynin,
Yaralarından axan o qan qorusun səni.

Fatimeyi-Zəhranın haqqa gedən yolları,
On iki imamımız əhli-beyt oğulları,
Əbülfəzil Abbasın qələm olan qolları,
Qeybə çıxan Sahibəzzaman qorusun səni.

Məzahirəm, dərs aldım mövlam verən butadan,
Tanrı hifz etsin səni hər bəladan, xətadan,
Özü dursun arxanda yeri-göyü yaradan,
Allahımız Qadiri-Sübhan qorusun səni.

Şeiri dinləyəndən sonra Mirtaha ağa ayağa durdu, boynumu qucaqlayıb alnımdan öpdü. Bununla da mənim Mirtaha ağa ilə möhtəşəm dostluğum başladı.
Hacı Seyid Mirtaha ağa 1927-ci ildə Yardımlı rayonunun onun ulu babalarının adı ilə adlandırılan Xəlifəli (indiki Perimbel) kəndində müqəddəs bir seyid ocağında anadan olmuşdu. Onların Yardımlıda məskunlaşmasının maraqlı tarixi var.
Mirtaha ağanın mənsub olduğu nəsil dördüncü şiə imamı Zeynalabidin əleyhissalamın nəslindən idi. İslam tarixindən bildiyimiz kimi Əməvilərin hakimiyyəti illərində (661-750), xüsusən də Müaviyyə ibn Əbu Süfyanın və onun oğlu Yezidin xəlifəliyi dövründə İmam Əli əleyhis-səlamın övladlarına qarşı çox amansız qanlı qırğınlar başlandı. 681-ci ildə İmam Hüseyn Kərbəla çölündə qətlə yetirildi. Bu hadisədən sonra İmam Hüseynin nəslindən olanlar Ərəbistandan İslam dünyasının onlar üçün təhlükəsiz olan yerlərinə köçdülər. Xəlifə Kamal və Xəlifə Qiyas adlı iki qardaş da indiki Yardımlı rayonunun ərazisinə köçərək orada məskunlaşdılar. Bu qardaşlardan Xəlifə Kamalın övladı olmadı. Xəlifə Qiyasın isə çoxlu övladları dünyaya gəldi. Onlar məskən saldıqları yeri babalarının adı ilə Xəlifəli adlandırdılar. Sonralar kəndə Perimbel adı verilmişdi.
Perimbel cənnətə bənzəyən gözəl bir məkan idi. Kəndin Qiblə tərəfində Qızıl qaya, Şərqində isə İlicur qayası yerləşirdi. El arasında deyirdilər ki, Qızıl qayadan daş düşəndə yağış yağar, İlicur qayasından daş düşəndə gün çıxar. Insanların on illərlə apardıqları müşahidənin nəticəsi kimi yaranan bu deyimlər xalqın yaddaşında hələ də yaşamaqdadır.

Perimbel kəndində Xan daşı, Elçi daşı, Yezid daşı, Əhd ağacı kimi maraqlı tarixi abidələr olub. Xan daşı bu yerlərin hakiminin adı ilə bağlı olub. Elçi daşı da adından göründüyü kimi elçiliyə gələnlərin adı ilə bağlıdır. Köhnə zamanlarda kənd əhli Kərbəla müsibətini səhnələşdirəndə bir nəfəri Yezidin qiyafəsinə salıb Yezid daşının üstündə oturdardılar. Əhd ağacına gəlincə adamlar bu ağacın budaqlarından tutub Allaha niyyət edərmişlər.
Perimbel kəndinin qoynunda çağlayan Zəmzəm suyunu xatırladan Göznarı bulağı isə Tanrının bu torpağa bəxş etdiyi ilahi bir nemət idi.
Seyid Mirtaha ağanın ulu babası Xəlifə Qiyasın müqəddəs qəbri də Perimbel kəndindədir. 1920-ci ildə Azərbaycanda Sovet hökuməti qurulanda Perimbel kəndi böyük bir seyid ocağı kimi bütün Azərbaycanda məşhur idi. Bolşeviklər insanların hörmətlə ziyarət etdikləri bu qəbri dağıtmaq istəyirlər. Kəndə xeyli rus əsgəri gətirilir. Gecə bir fırtına, tufan qopur. Səhər adamlar və əsgərlər görürlər ki, qəbrin üstündə təqribən 50 ton çəkisi olan yumru bir daş peyda olub. Rusların komandiri camaatdan soruşur ki, gecə bu daşı buraya kim qoyub? Sonra da deyir ki, bu Allahın işidir və əsgərləri ilə birlikdə kəndi tərk edir. Həmin daş Xəlifə Qiyasın qəbrinin üstündə hələ də durur.
SSRİ dövründə islam dininə qarşı sərt qadağaların qoyulmasına, din xadimlərinin cəzalandırılmasına baxmayaraq Perimbel kəndi bir seyid ocağı kimi öz fəaliyyətini və nüfuzunu qoruyub saxlayırdı. Bolşeviklər necə olursa-olsun bu ocağı məhv etmək istəyirdilər. 1936-cı ildə kənddə Dalqov soyadlı bir hökumət nümayəndəsinin başçılığı ilə xeyli dağıntı törədildi və dindarlar cəzalandırıldılar. 1953-cü ildə isə Azərbaycan Kommunist Partiyası Mərkəzi Komitəsinin I katibi Mircəfər Bağırovun göstərişi ilə Perimbel kəndi tamamilə dağıdıldı. Kəndin sakinləri ata-baba yurdlarını tərk etdilər. Sonralar onlardan bəziləri yavaş-yavaş Perimbelə qayıdaraq öz yurdlarında yaşamağa davam etdilər. Seyid Mirtaha ağanın ailəsi bir müddət Salyan rayonunda yaşadı. 1955-ci ildə Ağa öz ailəsi ilə birlikdə indiki Biləsuvar rayonunun Bəydili kəndinə köçərək orada məskunlaşdı.
Seyid Mirtaha ağanın doğulduğu ocaqda həmişə Quran oxunar, namaz qılınardı. Mirtaha ağa da dünyaya göz açdığı gündən ata ocağında əzan səsi ilə yuxuya gedib, əzan səsi ilə də yuxudan oyanmışdı. Bu səsin sədaları altında böyüyən Mirtaha ağanın qəlbində hələ uşaq yaşlarından böyük olan Allaha, müqəddəs Quranımıza, İslam dininə qarşı bir iman ocağı alovlanmağa başlamışdı. Nəticədə o, öz həyatını islam dininin öyrənilməsinə və təbliğinə həsr etmişdi. Mirtaha ağa uzun müddət respublikamızın cənub bölgəsində böyük nüfuz sahibi olan Molla Hüseyndən dərs almış, islam dininin incəliklərini öyrənmişdi.
Özü də bir şəriət alimi kimi formalaşdıqdan sonra Mirtaha ağa istər islam dininin təbliğinin yasaq olduğu SSRİ dövründə, istərsə də Azərbaycan müstəqillik qazandıqdan sonra yorulmaq bilmədən dinimizin təbliği ilə məşğul olmuşdu.
Sonralar mən bir neçə dəfə ağanı ziyarət etdim. 2011-ci il oktyabr ayının 18-də Mübariz İbrahimovun qəhrəmanlığına həsr etdiyim “Mübariz dastanı” kitabının təqdimatını keçirmək üçün xalq şairi İlyas Tapdıq və uşaqlıq dostum Hüseynov Rafiq Hüseyn oğlu ilə Biləsuvara gedəndə biz bir daha Mirtaha ağanın qonağı olduq, onun söhbətlərinə qulaq asdıq. Burada şair İlyas Tapdıqla Ağanın arasında maraqlı bir söhbət oldu. İlyas Tapdıq Ağadan soruşdu:
-Ağa, siz də, Mübariz İbrahimov da peyğəmbər nəslindənsiniz. Siz onun qəhrəmanlığını necə qiymətləndirirsiniz?
Seyid Mirtaha ağanın gözləri doldu. Gözlərinin yaşını silərək cavab verdi:
-Mübarizdə bir İmam Əli qeyzi vardı. Kaş ki, Kərbəla müsibətində babası İmam Hüseynin yanında olaydı. Sinəsini kafirlərin babasına atdığı oxların qabağına verərdi. Qarabağda da kafirlər bir-birinə arxa durdular, Azərbaycan torpaqlarını işğal etdilər. Mübariz öz qəhrəmanlığı, şəhadəti ilə bütün Azərbaycan gəncliyinə örnək oldu. Gün gələcək, Azərbaycan gəncləri onun yolu ilə gedərək torpaqlarımızı düşmən tapdağından azad edəcəklər.
Ağanın peyğəmbərcəsinə dediyi sözlər öz yerini tutdu. 2020-ci il sentyabr ayının 27-də başlanan və cəmisi 44 gün davam edən Vətən müharibəsində Azərbaycan oğulları Mübarizin işini davam etdirərək erməni hərbi birləşmələrini biabırçı şəkildə darmadağın edərək Şuşanı, Laçını və Qarabağın başqa şəhər və kəndlərini düşmən tapdağından azad etdilər.
2018-ci il iyul ayının 29-da Mirtaha ağanın insanlığa məhəbbətlə dolu olan ürəyi dayandı. Onun pak ruhu fani dünyadan əbədi dünyaya uçdu. Allah rəhmət etsin!

Mən 2022-ci il iyul ayının 29-da Biləsuvarda Seyid Mirtaha ağanın anım günündə iştirak etdim. Həmin gün Biləsuvar torpağı sanki bu tədbirdə iştirak edən imanlı insanların üzlərindəki ilahi nurla işıqlanmışdı. Bu Allahın peyğəmbər nəslindən olan Seyid Mirtaha ağanın ruhuna bir lütfü idi.
Yaşadığımız 2023-cü ilin iyul ayının 29-da Seyid Mirtaha ağanın dünyasını dəyişməsinin beş ili tamam olacaq. Mən onun əziz xatirəsi qarşisinda baş əyir, ona Ulu Tanrıdan rəhmət diləyirəm. Ağanın şəxsiyyətinə olan hörmət və sevgimi 28 iyun 2023-cü il tarixdə, Qurban bayramı günü yazdığım bir şeirlə ifadə edirəm:
Göz açmışdı dünyaya Xəlifəli yurdunda,
Peyğəmbər nəvəsiydi Seyid Mirtaha ağa!
İman nuru səpirdi qaranlıq ürəklərə,
Bir Tanrı töhvəsiydi Seyid Mirtaha ağa!

Ürəyində arzular ömrün uşaq çağından,
Tutdu Əhd ağacının müqəddəs budağından,
İçdi Zəmzəm suyunu Göznarı bulağından,
Hikmət xəzinəsiydi Seyid Mirtaha ağa!

Çox sevdi Qızılqaya, İlicur qayasını,
Qorudu, pak saxladı nəfsini, mayasını,
Dinini, imanını, ruhunu, həyasını,
Saflıq nişanəsiydi Seyid Mirtaha ağa!

Məclislərə girəndə coşardı bulaq kimi,
Alışardı, yanardı müqəddəs ocaq kimi,
Haqsızlığın önündə dayanardı dağ kimi,
Həqiqətin səsiydi Seyid Mirtaha ağa!

Yolunu göstərərdi düz yolundan azanın,
Üzdə gülüb, arxada dosta quyu qazanın,
Düşmən üstə yeriyən Əli-Əl-Mürtəzanın,
Qeyziydi, nərəsiydi Seyid Mirtaha ağa!

Hüseyni sinəsiylə qoruyan igidlərin,
Sübhəcən əldə silah uyumayan mərdlərin,
Kərbəla çöllərində can verən şəhidlərin,
Sonuncu nəfəsiydi Seyid Mirtaha ağa!

Şəhidlik zirvəsinə qalxan Əliyi-Əsgərin,
Qızmar günün altında, önündə mənfur şərin,
Bir içim sudan ötrü alışan körpələrin,
Yaşamaq həvəsiydi Seyid Mirtaha ağa!

Öpərdi ləçəyindən güllərin, çiçəklərin,
Carçısıydı ən təmiz, müqəddəs diləklərin,
Qədir gecələrinin bəzəyi mələklərin,
Sevgisi, nəğməsiydi Seyid Mirtaha ağa!

Məzahir, saflıq vardı o insanın canında,
İlqar-iman yaşatdı iliyində, qanında,
Məqamı var Behiştdə, Əhli-Beytin yanında,
İnsanlıq zirvəsiydi Seyid Mirtaha ağa!

Seyid Mirtaha ağanın ruhu şad olsun!
XÜSUSİ XATIRLATMA: Hörmətli dostlar! Əziz oxucular! Bu yaxınlarda Seyid Mirtaha ağanın dünyasını dəyişməsinin beş ili tamam olacaq. Hər il olduğu kimi, bu il də iyulun 29-da Seyid Mirtaha ağanın əziz xatirəsi Biləsuvar rayonunun Bəydilli kəndində anılaraq adına ehsan veriləcək, ruhuna dualar oxunacaq! Hər kəs dəvətlidir! Allah rəhmət eləsin!


Məzahir Alıyev,
şair-şərqşünas,
AYB-nin üzvü

“Malibo”nun “Qəzər”i

"Malibo" MMC Tikinti şirkəti aldatdığı müştəriləri necə şantaj edir?
Əziz oxucular, bu yaxınlarda Aslanova Narxanım adında müəllimə al qan içində redaksiyamıza üz tutub. Məlum olub ki “Malibo” MMC adlanan “Tikinti şirkəti”nin rəhbərləri vətəndaşı o qədər süründürməçiliyə, get gələ salıb aldadıblar ki, axırda canından bezərək özünə qəsd etmək qərarına gəlib.
Məsələnin təfərrüatına varanda hiss olunur ki, adamları rahatlıqla aldatmaq üçün əvvəlcə vətəndaşla ədəb ərkanlı, qanunauyğun müqavilə bağlayırlar. “Malibo” MMC ilə Narxanım Aslanovanın arasında bağlanan kimi:
18 iyun 2018- ci il Azərbaycan Respublikası Nazirlər Kabinetinin 25 fevral 2016 və Bakı Şəhər Nəsimi Rayon İcra Hakimiyyəti başçısının 280 saylı tarixli, 86 saylı 03 noyabr 2017-ci il tarixli sərəncamını əsas tutaraq, bir tərəfdən öz nizamnaməsinə əsasən fəaliyyət göstərən "Malibo" “Tikinti şirkəti” adlandırılacaqdır və digər tərəfdən "Əmlak mülkiyyətçisi"adlandırılacaq Bakı şəhəri, Nəsimi rayonu, R.Rza 101 ünvanında yerləşən yaşayış sahəsinin mülkiyyətçisi Aslanova Narxanım Şami qızı bir yerdə "Tərəflər"adlandırılacaqlar, aşagıdakı şərtlərlə bu müqaviləni bagladılar.
1.1."Tərəflər" Azərbaycan Respublikası Nazirlər Kabinetinin 25 fevral 2016-cı il tarixli, 86 saylı Qərarının 1.3. maddəsinin tələblərinin və bu Müqavilənin icrası ilə əlaqədar olaraq aşağıda göstərilən məzmunda üzərlərinə öhdəlik götürürlər:
1.1.1."Əmlak mülkiyyətçisi" bu müqaviləyə əsasən öz mülkiyyətində olan Bakı şəhəri, Nəsimi rayonu, Rəsul Rza küçəsi 101 ünvanında yerləşən 15,0 kv.m.(faktiki sahə 35,3 kv.metr) ibarət yaşayış sahəsini sökülmək üçün "Malibo" MMC-yə təhvil verməyi, bu Müqavilə ilə şərtləndirilmiş müddətdə və qaydada "Tikinti şirkəti" tərəfindən həmin ərazidə yeni inşa ediləcək çoxmənzilli hündürmərtəbəli yaşayış evində onun üçün nəzərdə tutulmuş mənzili qəbul etməyi öhdəsinə götürür.
1.1.1.1 "Tikinti şirkəti" söküləcək mənzilin 35,3 kv.metr olan hissəsinə nəzərdə tutulmuş 20% əlavə edilərək 42,4 kv.metr təşkil edir.
1.1.1.2 "Tikinti şirkəti" tərəfindən "Əmlak istifadəçisi"-nə 27,6 kv.metr hədiyyə olunur.
1.1.2."Tikinti şirkəti" Bakı şəhəri, Nəsimi rayonu, Rəsul Rza küçəsi 101 ünvanında yerləşən "Əmlak mülkiyyətçisi"-nin mülkiyyətində olan yaşayış sahəsinin sökülməsini və həmin ərazidə yeni çoxmənzilli, hündürmərtəbəli yaşayış binasının tikintisini həyata keçirərək inşa etdiyi binada 70,0 kv.metr, təmirli mənzili "Əmlak mülkiyyətçisi"-nin mülkiyyətinə verməyi öhdəsinə götürür.
1.2."Tikinti şirkəti" inşa edəcəyi çoxmənzilli, hündürmərtəbəli yaşayış binasının tikintisi başa çatdırana və " Əmlak mülkiyyətçisi"- ni təmirli mənzil ilə təmin edən günədək onun müvəqqəti yaşayışını təmin etmək məqsədi ilə "Əmlak mülkiyyətçisi"- nə kompensasiya şəklində aylıq 500 (beş yüz) manat məbləğində kirayə haqqını əvvəlcədən ilk ödəniş gününə istinad edilməklə üç ayda1(bir) dəfə ödəyir. "Əmlak mülkiyyətçisi"-nin kommunal borcları oldugu halda "Tikinti şirkəti" həmin məbləğləri ona veriləsi kirayə haqqlarından tutaraq ödənişlərini təmin edəcəkdir.
Müqavilənin şərtlərinə baxdıqda çox humanist görünür. Hətta “Malibo” qarşı tərəfə hədiyyə vəd edir. Bəs əslində vəziyyət necədir? N. Aslanova niyə canına qəsd edir? Gəlin özündən eşidək:
"Əmlak mülkiyyətçisi "olaraq Nəsimi rayonu Rəsul Rza küçəsi 101 də olam mənzilim bütün əşyalarımla birlikdə sökülərək, yerlə- yeksan olunmuşdur. Beləliklə onlar mənim mülkiyyətçi hüququmu ilk işə başlayan gündən pozmuşdular. Azərbaycan Respublikasının Konstitusiyasına görə Mülkiyyət toxunulmazdır və hər cür qəsdlərdən qorunur. Qeyri- qanuni müdaxilələrdən qorunmasına dövlət tərəfindən təminat verilir. Mülkiyyətçi özgənin qanunsuz sahibliyindən öz əmlakını geri tələb edə bilər. Lakin"Malibo” MMC-şirkəti vətəndaşların hüquqlarını pozaraq onları aldadır. Mənə gəlincə isə son dəfə müqavilədə göstərilmiş 70 kv.metr sahəsi olacaq evimin yerini öyrənmək üçün 05.07.2023- cü il tarixində S.Əsgərova 97 ünvanında yerləşən “Malibo” MMC şirkətinin ofisinə getdim ki, mənə məxsus olan mənzilin yerini göstərsinlər. Mən dəfələrlə mənzilimin yerini onlardan şoruşduqca mənə həmin binada veriləcəyini deyərək aldadıblar. Çünki mənim mənzilimin yeri yüksək qiymətə olduğu üçün kənar şəxslərə satılır, mənə isə həmin binada yer vermirlər.
Müqavilədə 24 ay müddətinə tikintisinin başa çatdırılması nəzərdə tutulan binanın tikintisi 5 ildir davam edir.
Həmin bu “Malibo” şirkətinin ofisində oturan Namiq adlı şəxsin özbaşınalıqlarını, qanunsuzluqlarını gördükdə 37 il iş təcrübəsi olan bir müəllim kimi, onların qarşısında çarəsiz qalıb ölümü seçərək özümə qəsd etmək qərarına gəldim. Damarlarımı kəsdiyim üçün təcili tibbi yardım çağırıldı. 1 saylı Şəhər Klinik Xəstəxanasına çatdırıldım. Qoluma 20 tikiş qoyuldu. 21- ci polis bölməsindən polis əməkdaşları çağırıldı, sabahı günü Nəsimi rayon prokurorluğuna çağırılaraq hadisənin necə baş verdiyini danışdım. Lakin nə mənim pozulan hüququm bərpa olundu, nə də hüquq pozanlar cəzalandırıldı.
Öz adamları olan Namiq adlı şəxs vətəndaşların hüquqlarını kobudcasına pozaraq onları aşağılayır. Mənə və övladlarıma hədə qorxu gələrək şantaj edir. İş yerlərimizə böhtan dolu məktublar yazaraq əmlakımızdan imtina etməyə təhrik edir. Mən yol ilə gedərkən çox qorxu hissi keçirirəm ki, onlar mənim və övladlarımın həyatına son qoya bilərlər. Çünki bunlar özlərini qoçu kimi aparırlar. Hər kəsə müxtəlif vasitələrlə təsir edirlər. Əgər mənim və ailəmin başına bir hadisə gələrsə bilinsin ki, səbəbkarı yuxarıda adı çəkilən "Malibo" şirkətinin sahibi, keçmiş millət vəkili olan Əsabil və onun qardaşı Vüqar Qasımovlardır.
Şikayətlə bağlı əməkdaşımız “Malibo”nun ofisində Mamiqlə görüşüb. Həqiqətən vətəndaşın müqavilədə nəzərdə tutulan hüququnun pozulduğunun və əməkdaşımızı da aldatmağa cəhd etdiklərinin şahidi olub.
Əminik ki, aidiyatı olan dövlət orqanları vətəndaş Narxanım Aslanovanın pozulmuş əmlak hüququnun bərpasına yardımçı olacaq, vətəndaşlara qarşı haqsızlıq edənlər öz yerlərini biləcəklər.

“Bütöv Azərbaycan” qəzeti
28 iyul 2023

Azad olunan ərazilərin bərpası üçün vəsait 12 milyard manata çatacaq

Bu ilin sonuna işğaldan azad olunan ərazilərin bərpası üçün sərf edilən vəsaitin həcmi 12 milyard manata çatacaq.
Bunu Qarabağ iqtisadi rayonuna daxil olan işğaldan azad edilmiş ərazilərdə (Şuşa rayonu istisna olmaqla) Azərbaycan Respublikası Prezidentinin xüsusi nümayəndəsi Emin Hüseynov deyib.
Bərpa və yenidənqurma prosesinin çox sürətlə getdiyini deyən Emin Hüseynov bu vəsaitin ildən-ilə artacağını vurğulayıb.
İşğaldan azad olunan ərazilərdə yaradılan infrastruktur layihələri ilə bağlı məlumat verən Emin Hüseynov həmin ərazilərin böyük kənd təsərrüfatı, iqtisadi və turizm potensialının olduğunu və bərpa prosesi başa çatdıqdan sonra bu potensiallardan geniş istifadə olunacağını bildirib.

Nəqliyyatın təkminləşdirilməsiylə bağlı iclas keçirildi

Baş nazir Əli Əsədovun sədrliyi ilə Nəqliyyatı Əlaqələndirmə Şurasının iclası keçirilib, ölkədə, xüsusilə də Bakı şəhərində nəqliyyat sisteminin təkmilləşdirilməsi və səmərəli işinin təşkil edilməsi ilə bağlı aidiyyəti qurumların rəhbərlərinin məruzələri dinlənilib, müvafiq tapşırıqlar verilib.
Bu barədə Nazirlər Kabinetindən bildirilib.
İclasda ölkədə yol və nəqliyyat infrastrukturunun yaxşılaşdırılması, Bakı şəhərində tıxac probleminin həlli, ictimai nəqliyyatda əlçatanlığın artırılması və ictimai nəqliyyatın idarəedilməsi sisteminin optimallaşdırılması, Bakı metropoliteninin inkişaf etdirilməsi, yol hərəkəti təhlükəsizliyinin təmin edilməsi və digər məsələlər müzakirə olunub.
Şuranın sədri, Azərbaycanın rəqəmsal inkişaf və nəqliyyat naziri Rəşad Nəbiyevin məruzəsi dinlənilib.
Azərbaycan Prezidentinin tapşırığına uyğun olaraq icra olunan ölkədə nəqliyyat mobilliyinin transformasiyası və Bakı metropoliteninin potensialının qiymətləndirilməsi proqramlarının icrasına dair təqdimatlar keçirilib.

Danimarkada Quran yenidən yandırıldı

Danimarkada ifrat sağçı qruplaşmanın üzvləri yenidən müqəddəs Quran kitabını yandırıb.
Aksiya paytaxt Kopenhagendə yerləşən məscidin qarşısında baş tutub.
Aksiya iştirakçıları islam əleyhdarı və ifrat millətçi fikirləri ilə tanınan “Danske Patrioter (Danimarka Patriotları)” qruplaşmasının üzvləri olub.
Polisin nəzarəti altına baş tutan aksiya zamanı qruplaşma üzvləri İslam əleyhinə şüarlar səsləndiriblər. Aksiya sosial mediada canlı yayımlanıb.