14-09-2025, 11:12
İranda güclü zəlzələ
İranın Fars əyalətində 4,7 bal gücündə zəlzələ baş verib.
Yeraltı təkanlar səhər saatlarında Kənartəxte şəhərində, 16 kilometr dərinlikdə qeydə alınıb.
Xatırladaq ki, dünən də Fars əyalətinin Xeşt şəhərində eyni gücdə zəlzələ baş vermişdi.
Hazırda dağıntılar və mümkün itkilərlə bağlı məlumat açıqlanmayıb.
14-09-2025, 10:11
Ukrayna Rusiyanın ən böyük neft zavodunu vurdu
Ukrayna Silahlı Qüvvələri Rusiyanın Leninqrad vilayətində yerləşən Kirişi Neft Emalı Zavoduna hücum edib.
Bu barədə vilayətin qubernatoru Aleksandr Drozdenko bildirib.
Onun sözlərinə görə, Kirişi şəhəri yaxınlığında üç pilotsuz uçuş aparatı vurulub.
Lakin onların qalıqları müəssisənin ərazisinə düşərək yanğına səbəb olub.
Məlumata görə, yanğın qısa müddətdə söndürülüb. Hadisə nəticəsində tələfat və ya xəsarət alan olmayıb.
Qeyd edək ki, Kirişi Neft Emalı Zavodu Rusiyanın ən iri müəssisələrindən biridir və ildə təxminən 20 milyon ton neft emal etmək gücünə malikdir.
14-09-2025, 09:10
Kiyev yaxınlığında silsilə partlayışlar
Sentyabrın 13-ü axşam saatlarında Ukraynanın Kiyev vilayətində silsilə partlayışlar baş verib.
Bu haqda Kiyev Regional Hərbi Administrasiyası məlumat yayıb.
"Kiyev vilayəti daxilində Rusiyanın hava hədəfləri qeydə alınmayıb və hava hücumu siqnalı verilməyib. Hadisə yerində fövqəladə hallar xidmətinin əməkdaşları işləyir. Bütün lazımi tədbirlər görülür. Daha ətraflı məlumat daha sonra veriləcək", - məlumatda deyilir.
13-09-2025, 20:50
Sabiq nazir barədə həbs qərarı verildi
Vəzifə səlahiyyətlərindən sui-istifadə və qanunsuz gəlirlərin leqallaşdırılmasında təqsirləndirilən Gürcüstanın keçmiş müdafiə naziri Xuanşer Burçuladze barəsində həbs qətimkan tədbiri seçilib.
Bununla da hakim Eka Barbakadze ittiham tərəfinin vəsatətini təmin edib.
Bundan əvvəl müdafiə tərəfi zaminə buraxılması ilə bağlı məhkəməyə vəsatət vermiş, hakim təmin etməmişdi.
13-09-2025, 20:45
Polşa Rusiyaya görə hərəkətə keçdi
Ukraynanın qərbində Rusiya pilotsuz təyyarələrinin mövcud hücum təhlükəsi səbəbindən Polşa və NATO qırıcıları ölkə səmasına qalxıb.
Bu barədə Polşa Silahlı Qüvvələrinin Əməliyyat Komandanlığı məlumat yayıb.
"Hava məkanımızın təhlükəsizliyini təmin etmək məqsədilə Polşa Silahlı Qüvvələrinin Əməliyyat Komandanlığının rəisi bütün lazımi prosedurlara başlayıb. Yerüstü hava hücumundan müdafiə və radar kəşfiyyat sistemləri yüksək hazırlıq vəziyyətinə gətirilib", - məlumatda deyilir.
Polşanın şərqindəki Lyublin hava limanı da ölkənin Hərbi Hava Qüvvələrinin keçirdiyi əməliyyatla əlaqədar uçuşlar üçün müvəqqəti bağlanıb.
Bundan əvvəl Polşanın Baş naziri Donald Tusk bundan əvvəl telegram kanalında bildirib ki, Polşa ilə sərhədə yaxın ərazidə fəaliyyət göstərən Rusiya pilotsuz təyyarələrinin təhdidinə görə, Polşa və müttəfiqlər tərəfindən profilaktik hava əməliyyatı başlayıb.
13-09-2025, 20:37
Bir-iki günə tamamilə fərqli məlumatlar eşidəcəyik - Zelenski
Ukrayna prezidenti Volodimir Zelenski Rusiyanın şərq cəbhəsində üstünlük qazandığı barədə bütün açıqlamaları “dezinformasiya” adlandırıb və Moskvanın hərbi uğursuzluqlarını informasiya hücumları ilə kompensasiya etdiyini bildirib.
Zelenski bu sözləri Viktor Pinçukun təşəbbüsü ilə təşkil edilən YES 2025 illik konfransında səsləndirib.
Onun sözlərinə görə, Rusiya ordusunun say üstünlüyü və dronlardan istifadə etməsi vəziyyəti çətinləşdirir, lakin Ukrayna cəbhə xəttinə nəzarəti saxlayır və rusların irəliləyişini dayandırır:
“Ruslar dezinformasiya kampaniyasını döyüş meydanından daha yaxşı aparırlar. Onlar şərq haqda bu qədər danışırlarsa, deməli, məhz orada məhv ediləcək. Bir-iki günə tamamilə fərqli məlumatlar eşidəcəyik”.
Zelenski bildirib ki, Moskva təzyiqi artırsa da, Sumsı, Novopavlovski və Pokrovski istiqamətlərindəki bütün hücumlar iki ay ərzində darmadağın edilib.
Zelenski həmçinin iddia edilən “üç aya şərqi ələ keçirəcəklər” bəyanatlarına cavab verib:
“Ağ Evdə eşitdiyim kimi, guya onlar üç aya şərqi işğal edəcəklər, yalandır. Onların bunu illərlə etməsi də mümkün olmayacaq. Amma heç kim illərlə müharibə aparmaq istəmir”.
Prezidentin sözlərinə görə, Kreml informasiya hücumlarına daha çox güvənir, çünki döyüş meydanında uğur qazana bilmir.
13-09-2025, 17:39
Rusiyaya sanksiya tətbiq etməyə hazıram - Tramp
ABŞ prezidenti Donald Tramp NATO ölkələrini Rusiya neftinin alınmasını dayandırmağa və Çinə yüksək tariflər tətbiq etməyə çağırıb.
Bu barədə Tramp “Truth Social” şəbəkəsində paylaşım edib.
Onun sözlərinə görə, bu addımlar Moskvanın Pekindən asılılığını zəiflədəcək və müharibənin sonunu yaxınlaşdıracaq.
“Hazıram ciddi sanksiyalar tətbiq etməyə hazıram, amma yalnız o halda ki, NATO ölkələri eyni addımı atsın və Rusiya neftini almağı dayandırsın. Bəzi dövlətlərin hələ də bu nefti alması şokedicidir və danışıqlarda mövqeyi zəiflədir. Əlavə olaraq, NATO Çinə 50-100 faiz tariflər tətbiq etməli, müharibə bitəndən sonra isə bunları ləğv etməlidir. Bu, Rusiyanın Çindən asılılığını qıracaq”.
O, həmçinin iddia edib ki, əgər özü prezident olsaydı, müharibə heç vaxt başlamazdı:
“Bu, Trampın müharibəsi deyil, Bayden və Zelenskinin müharibəsidir. Mən sadəcə onu dayandırmaq və minlərlə həyat xilas etmək istəyirəm. Yalnız ötən həftə 7 mindən çox insan həyatını itirib”.
Tramp qeyd edib ki, NATO onun planına əməl etsə, müharibə qısa müddətdə başa çatacaq: “Əks halda siz yalnız mənim, həmçinin ABŞ-ın vaxtını, enerjisini və pullarını itirirsiniz”.
13-09-2025, 17:10
Polşada Baş nazirin maşınını oğurladılar
Polşada baş nazir Donald Tuska məxsus avtomobili oğurlamaqda şübhəli bilinən şəxs saxlanılıb.
Bu barədə RMF FM məlumat yayıb.
Məlumata görə, hadisə ilə bağlı saxlanılan şəxs 41 yaşlı Polşa vətəndaşıdır. O, daha əvvəl də fırıldaqçılıq və sağlamlığa, həmçinin insan həyatına qarşı cinayətlərdə adının hallanması ilə hüquq-mühafizə orqanlarının diqqətini çəkib.
Şübhəli şəxs Qdansk hava limanında, Bolqaristana uçuşa bir neçə dəqiqə qalmış saxlanılıb.
Məlumata görə, əməliyyata sərhəd xidmətinin xüsusi müdaxilə qrupu da cəlb olunub.
Şübhəlinin evində aparılan axtarış zamanı istintaq üçün əhəmiyyət kəsb edən materiallar aşkarlanıb və müsadirə edilib.
13-09-2025, 15:09
“Hamburger” və “dondurma” sözlərini qadağan etdi
Şimali Koreya lideri Kim Çen İn ölkədə “çox Qərb mənşəli” hesab olunan sözlərin istifadəsinə qadağa qoyulması barədə göstəriş verib.
Bu barədə məlumatı "The Sun" yayıb.
Məlumata görə, Vonson kurortunda Rusiya və Çin turistləri ilə işləyən bələdçilərə Qərbdən və Cənubi Koreyadan gələn ingiliscə terminlərdən istifadə etməmək tapşırılıb.
Bununla bağlı bir sıra məşhur ifadələrə alternativ adlar təklif edilib. Məsələn, “hamburger” bundan sonra "dajin-gogi gyeopppang", yəni “çörək arası ət” kimi təqdim olunacaq, “dondurma” "eseukimo" adlandırılacaq, "karaoke" aparatları isə “ekran müşayiəti maşınları” kimi tanıdılacaq.
Daha əvvəl KXDR-ə səfər etmiş rusiyalı turistlər bildiriblər ki, təyyarədə onlara “Kim Çen İn reseptli burger” təqdim olunub və bu yemək “milli nailiyyət” kimi qələmə verilib.
13-09-2025, 14:24
Rusiya raketləri Londona da, Madridə da sürətlə çata bilər
NATO baş katibi Mark Rutte Rusiya raketlərinin yalnız Şərqi Avropa ölkələri üçün deyil, bütün alyans üçün təhlükə yaratdığını bildirib.
O, bu barədə “Şərqin mühafizəçisi” əməliyyatının başlanması ilə bağlı keçirilən mətbuat konfransında deyib.
“Bəziləri elə bilir ki, Londonda və ya Madriddə yaşamaq daha təhlükəsizdir, nəinki Tallində. Bu, belə deyil”.
Ruttenin sözlərinə görə, Rusiyanın yeni nəsil hipersəs raketləri səs sürətini beş dəfə üstələyir:
“Onlar Madrida və ya Londona Tallin və ya Vilnüsdən cəmi 5–10 dəqiqə gec çatır”.
NATO baş katibi əlavə edib ki, alyans üzvləri vəziyyəti elə qəbul etməlidirlər ki, sanki bütün dövlətlər şərq cəbhəsində yerləşir.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Zəngilanın dirçəliş
və qayıdış dövrü
Azərbaycan tarixinin ən şanlı səhifəsi olan Vətən müharibəsi bizə təkcə torpaqlarımızı deyil, ləyaqətimizi, qürurumuzu qaytardı. Həmin qürurun ən parlaq ünvanlarından biri də Zəngilandır. 2020-ci il sentyabrın 27-də başlanan Zəfər yürüşü zamanı şərqdən, Cəbrayıl istiqamətindən düşmənə vurulan sarsıdıcı zərbələr nəticəsində Azərbaycan Ordusu 30-dan çox yaşayış məntəqəsini azad edərək Zəngilanın inzibati hüdudlarına çatdı. Oktyabrın 18-də rayonun tam azad edilməsi uğrunda genişmiqyaslı əməliyyata start verildi və cəmi iki gün sonra, oktyabrın 20-də Müzəffər Ali Baş Komandan, Prezident İlham Əliyev xalqa müraciətində Havalı, Zərnəli, Məmmədbəyli, Həkəri, Şərifan, Birinci Muğanlı kəndlərinin və Zəngilan şəhərinin işğaldan azad edildiyini elan etdi. Beləliklə, Zəngilan döyüşləri nəticəsində 1 şəhər, 4 qəsəbə və 49 kənd düşmən tapdağından xilas edildi və bununla da 132 kilometrlik Azərbaycan-İran dövlət sərhədi tam bərpa olundu. İşğalın bitməsindən dərhal sonra sərhəd boyunca zəruri istehkam və mühafizə işlərinə başlanıldı.
Qərbi zəngəzurlular Zəngilan şəhidliyində
Bu tarixi qələbənin əbədiləşdirilməsi üçün 2020-ci il noyabrın 26-da “Zəngilanın azad olunmasına görə” medalı təsis edildi və 6974 hərbi qulluqçumuz bu medalla təltif olundu. Prezidentin 31 iyul 2023-cü il tarixli Sərəncamı ilə isə 20 oktyabr tarixi Zəngilan şəhəri günü kimi rəsmiləşdirildi. Zəngilanın azad olunması Böyük Qayıdışın başlanğıcı oldu. Bu gün dövlətin ən böyük hədəfi həmin torpaqları yenidən həyatla doldurmaqdır. 2026-cı il 1 oktyabr tarixinə olan məlumata görə, Zəngilan şəhərində 84 ailə, yəni 339 nəfər, Ağalı kəndində 234 ailə, yəni 1017 nəfər, Məmmədbəyli kəndində isə 179 ailə, yəni 903 nəfər öz doğma ocağına qayıdıb. Köçürülən ailələr peşə və bacarıqlarına uyğun olaraq müxtəlif dövlət qurumlarında, tikinti şirkətlərində, tikiş fabrikində və digər sahələrdə işlə təmin edilirlər.Bu qayıdışın dünyaya nümunə olan simvolu isə Ağalı kəndidir. Ağalı təkcə Azərbaycanda deyil, dünyanın ən müasir kəndlərindən biri hesab olunur. Burada “ağıllı kənd” konsepsiyası tam şəkildə tətbiq edilib. Dayanıqlı inkişafın təmin olunması üçün sosial-iqtisadi xidmətlər ən yüksək texnologiyalarla qurulub. Kəndin enerji təminatı ekoloji cəhətdən tam təmizdir, Həkəri çayı üzərində 3 turbindən ibarət Arximed tipli su elektrik stansiyası və gücü 325 kilovat olan günəş panelləri quraşdırılıb. Evlərdə istilik xərclərini azaltmaq üçün kombinə edilmiş sistemlər, mətbəx sobası və yüksək səmərəli elektrod boilerlər var. Suyun isidilməsi üçün günəş kollektorlarından, çirkab suların təmizlənməsi üçün bioloji təmizləmə qurğularından istifadə olunur.
Kənddə GPON texnologiyası ilə yüksək sürətli internet, İP TV, video müşahidə kameraları, ağıllı işıq dirəkləri və avtomatik hava müşahidə stansiyaları var. Əhalinin rahatlığı üçün Tele-səhiyyə, E-təhsil və digər elektron xidmətlər, ASAN, DOST, məktəb, bağça, tibb məntəqəsi, kiçik və orta biznesə dəstək mərkəzləri fəaliyyət göstərir. Ümumi sahəsi 2 hektardan çox olan park salınıb. Bütün bunlar onu göstərir ki, Ağalı kəndi sadəcə yaşayış məntəqəsi deyil, gələcəyin kənd modelidir. Nazirlər Kabinetinin 30 oktyabr 2023-cü ildə təsdiq etdiyi Baş Plana əsasən şəhərin 2040-cı ilədək inkişafı üçün böyük vəsait ayrılıb. 2022-ci ildə təməli qoyulan 104 mənzilli ilk yaşayış kompleksinin açılışı 2026-cı ildə olub. Kompleksin ərazisi 2 hektardan artıqdır və burada 12 bina, o cümlədən 4 ədəd üçmərtəbəli 60 mənzilli və 8 ədəd ikimərtəbəli 44 mənzilli evlər tikilib.
Azad Zəngilanın qonaqları
Zəngilan Beynəlxalq Hava Limanı bu bölgənin inkişafı üçün mühüm faktora çevrilib. Zəngəzur dəhlizinin hava infrastrukturu ilə gücləndirilməsi baxımından hava limanı strateji əhəmiyyət daşıyır. Eyni zamanda Horadiz-Zəngilan-Ağbənd dəmir yolunun inşası da böyük strateji əhəmiyyətə malikdir. Bu yol azad edilmiş torpaqlara həm vətəndaşların qayıdışı, həm də yüklərin daşınması üçün tarixi imkan yaradır. Artıq yolun birinci mərhələsi üzrə böyük hissə tamamlanıb və Araz İqtisadi Zonası Sənaye Parkına yüklər daşınır. Horadiz-Cəbrayıl-Zəngilan-Ağbənd avtomobil yolunun uzunluğu 126,3 kilometrdir, illik buraxılış qabiliyyəti 15 milyon tondur və layihənin 2026-cı ilin ikinci yarısında yekunlaşdırılması nəzərdə tutulur. İşğal dövründə tövlə kimi istifadə olunan XIX əsrə aid Zəngilan şəhər məscidi Heydər Əliyev Fondu tərəfindən bərpa olunub. Bərpa-tikinti işləri çərçivəsində tarixi məscid konservasiya edilib və onun yanında düzbucaqlı planlı, iki minarəli yeni məscid inşa edilib. Yeni məsciddə 220 və 100 nəfərlik ibadət zalları yaradılıb. Rayonun gələcəyi üçün turizm və kənd təsərrüfatı da unudulmayıb. 2024-cü il mayın 18-də Ağalı kəndində, Həkəri çayı vasitəsilə yaradılmış süni gölün sahilində “Ağalı” hoteli açılıb. Zəngilan İstirahət Kompleksində 111 nömrəli hotelin təməli 2023-cü il mayın 4-də qoyulub. 2026-cı il mayın 10-da isə “Zəngilan City Park Hotel”in təməli qoyulub. Kənd təsərrüfatı sahəsində isə “Dost Aqropark” layihəsi həyata keçirilir. Azərbaycan və Türkiyə şirkətlərinin birgə layihəsi olan bu kompleks tam başa çatdıqda 500 nəfəri işlə təmin edəcək və 100 milyon dollar sərmayə qoyulacaq. Layihənin birinci mərhələsində 5200 kvadratmetr qapalı, 113 min kvadratmetr açıq tipli heyvandarlıq kompleksləri, sosial obyektlər, kafe, kinoteatr tikilib.
Beləliklə, Zəngilan bu gün sadəcə işğaldan azad edilmiş bir rayon deyil, Azərbaycan dövlətinin qüdrətinin, iradəsinin və gələcəyə olan inamının canlı rəmzidir. Burada hər daş, hər tikilən ev, hər qayıdan ailə 30 illik həsrətin sonu və Böyük Qayıdışın əbədi başlanğıcıdır.
Mahnur Hüseynova
Xırdalan şəhər 8 nömrəli tam orta ümumtəhsil məktəbinin direktoru
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!