Bakının Nəsimi rayonundakı Hüseynbala Əliyev küçəsi, ev 4, mənzil 8-də kirayədə yaşayan İsmayıl Əhmədov "azərbaycaninfo.com" saytının redaksiyasına gələrək üzləşdiyi ciddi problem barədə məlumat verib. Onun dediyinə görə, 1988-ci il təvəllüdlü oğlu Əmiraslan Əhmədov idmançı olub və 3 dəfə Azərbaycan çempionu adını qazanıb. Bu il iyunun 20-dən 21-nə keçən gecə oğlu qəza nəticəsində dünyasını dəyişib: "Oğlum Səbinə Quliyevaya məxsus 90 LG 556 dövlət nömrəli "Hunday Elantra" markalı avtomobillə iyulun 20-dən 21-nə keçən gecə saat 03:03 radələrində Suraxanı rayonunun Hövsan qəsəbəsindən Zığ şosesi ilə hərəkət edirmiş. Maşında Səbinə Quliyeva da oğlumla birlikdə olub. Ancaq yol polisi tərəfindən təqib edildiyi üçün sürəti artırıb. Zığ şosesindən Heydər Əliyev adına Hava limanına gedən yoldakı tuneldən çıxarkən avtomobil ağır qəzaya uğrayıb. Səbinə Quliyeva salamat qalsa da, oğlum ağır yaralanıb. Amma təqib edən yol polisi al qan içində olan oğlumu xəstəxanaya çatdırmaq əvəzinə hadisə yerindən uzaqlaşıb. Nəticədə daha çox qan itirən oğlum dünyasını dəyişib. Onu da deyim ki, qəza anı da, yol polisinin təqib etməsi də, polis avtomobilinin hadisə yerindən necə uzaqlaşması da kameraya düşüb".
İsmayıl Əhmədov deyir ki, hadisə baş verəndən sonra Suraxanı rayon Polis İdarəsinin müstəntiqi Namiq Məmmədov tərəfindən araşdırmalara başlanılıb. Amma sonradan iş Əflatun adlı başqa bir müstəntiqə həvalə edilib: "Bur neçə aydır ki, iş davam edir. Lakin oğlumu təqib edən yol polisindən və avtomobildən hələ də xəbər yoxdur. Ona görə də mən oğlumun ölümünə səbəb olan "qaişnik"in məsuliyyətə cəlb olunmasını tələb edirəm. Mən ölkə prezidenti cənab İlham Əliyevdən, Daxili Işlər naziri Ramil Usubovdan xahiş edirəm ki, bu məsələyə obyektiv baxılması üçün əllərindən gələn köməkliyi əsirgəməsinlər".
P.S. Butov.az saytının verdiyi məlumata görə, “azərbaycaninfo.com” məsələnin daha dəqiq öyrənilməsi üçün jurnalist araşdırmasına başlayıb.

Orxan