5-05-2023, 18:35
HAMLETİN ŞƏHİDLİYİNİN 29-CU İLDÖNÜMÜDÜR
Hamlet Səlim oğlu Səlimov 1962 - ci il noyabrın 5 – də Qafan rayonunun Müsəlləm kəndində anadan olub. Orta məktəbi doğulduğu kənddə bitirib, Qafan şəhər 68 - saylı peşə məktəbində sürücülük peşəsi üzrə təhsilini davam edib.
1981 – ci ildə həqiqi hərbi xidmətə çağrılaraq, Xabarovski şəhərində əskəri xidmət keçir. Hərbi xidmətini başa vurduqdan sonra doğma kəndlərinə qayıdıb.
İşləmək məqsədi ilə Əli Bayramlı (indiki Şirvan ) şəhərinə gələrək Dövlət Rayon Elektrik Stansiyasında DRES-də işə başlayıb.
1988-ci ildə Hamlet Səlimovun valideyinləri doğma ata-baba ocaqlarından didərgin düşərək, Əli Bayramlı ( indiki Şirvan) şəhərinə pənah gətirirlər. Talelərinə qaçqınlıq yazılmış Səlimovlar ailəsi o vaxtdan Əli Bayramlıda (indiki Şirvanda) məskunlaşıb yaşayırlar.
1993 – cü il iyun ayının 5 – də Hamlet Səlimov ailə həyatı qurur. 1994 – cü ilin mart ayında İlqar adlı oğlu dünyaya gəlir. Ata olduğu üçün hamıdan çox sevinən Hamlet Səlimovun bu sevinci çox çəkmir...
1994 – cü il aprel ayının 18 – də Səlimov Hamlet Əli Bayramlı ( indki Şirvan ) Şəhər Hərbi Komissarlığına çağırılır. Elə həmin gün də döyüşlərə göndərilir.
Hamletin döyüş yolu Goranboy torpaqlarında yağıların bir çox hücumlarına sinə gələrək , cəmi 18 gün çəkir. Burada gedən bir neçə döyüş əməliyyatında yaxından iştirak edir.
Hamlet Səlimov 1994 - cü il may ayının 5 – də Goranboy rayonunun Tapqaraqoyunlu kəndi ətrafında gedən döyüşdə düşmənin bir neçə canlı qüvvəsini məhv edərək, düşmən tərəfindən snayperdən açılan güllə nəticəsində qəhrəmancasına həlak olur, şəhidlik zirvəsinə ucalır.
Əli Bayramlıdakı ( indiki Şirvandakı ) Şəhidlər Xiyabanında dəfn edilir.
2021 – ci ilin noyabrın 5 - də şəhidimizin 59 – cu yaş günündə bacı və qardaşlarının övladları tərəfindən onun yaşadığı evin divarına xatirə lövhəsi vurulub. 2022-ci il Noyabrın 5 -də şəhidin 60 illik yubileyi Şirvan Gənclər Evinin təşkilaçılığı ilə şəhər səviyyəsində qeyd edilmişdir.
05 May 2023 – cü il Hamlet Səlimovun şəhid olmasının 29-cu ildönümüdür.
Oğul dərdi yaman olur,
Ağlama Şəhid anası.
Ana, dərdə yanan olur,
Ağlama Şəhid anası.
Gözlərinin nuru getdi,
Fələk sənə zülüm etdi.
Nurəddinin qurban getdi,
Ağlama Şəhid anası.
Səni çox ağlatdı zaman,
Bala dərdi olur yaman.
Şəhid oldu Hamlet balan
Ağlama Şəhid anası.
El dərdidir dərdin sənin,
Gedib əldən igidlərin,
Oğul sənin, şəhid mənim,
Ağlama Şəhid anası.
Bax bu şəhid cavanlara,
Bu dərdlərə dözmür ana.
Qurbanam şəhid balana,
Ağlama Şəhid anası.
Tək deyilsən bu vətəndə,
Oğul dərdi var sinəndə.
Dərdinə şərikəm mən də,
Ağlama Şəhid anası.
Şeir Fatma xanım Məmmədli tərəfindən iş yoldaşı şəhid Hamlet Səlimovun anası mərhum Qəmsi xanıma və digər şəhid iş yoldaşlarına ithafən yazılmışdır.
Ülviyyə BAĞIROVA
5-05-2023, 18:17
“Hadrut” yarımstansiyası və Rəqəmsal İdarəetmə Mərkəzi istifadəyə verildi
Mayın 5-də “Hadrut” qovşaq yarımstansiyası və Rəqəmsal İdarəetmə Mərkəzi istifadəyə verilib. Azərbaycan Respublikasının Prezidenti İlham Əliyev açılış mərasimində iştirak edib. “Azərişıq” Açıq Səhmdar Cəmiyyətinin sədri Vüqar Əhmədov dövlətimizin başçısına görülən işlər barədə məlumat verdi. Qeyd edək ki, yeni inşa edilən “Hadrut” qovşaq yarımstansiyasının təməli 2021-ci il oktyabrın 9-da Prezident İlham Əliyev tərəfindən qoyulub. Bildirildi ki, “Şükürbəyli”, “Hadrut” və “Şuşa” yarımstansiyaları arasında yaradılan 35 kV-luq dairəvi elektrik təchizat sxeminə daxil olan 35/0,4 kV-luq 2x1600 kVA gücündə yeni “Hadrut” qovşaq yarımstansiyası Hadrut qəsəbəsində qurulacaq müxtəlif təyinatlı infrastrukturun elektrik enerjisinə tələbatını ödəyəcək. Həmçinin yeni qovşaq yarımstansiyası Xocavənd rayonunun bir hissəsinin, Şuşa və ətraf ərazilərin elektrik təchizatının etibarlılığını və dayanıqlılığını təmin edəcək. Yarımstansiyada Rəqəmsal Elektrik Şəbəkələrinin İdarəolunması Mərkəzinin yaradılması elektrik enerjisinin paylanması prosesinə fasiləsiz nəzarətin təmin edilməsinə, enerji səmərəliliyinə, elektrik enerjisinin fasiləsizliyinə və keyfiyyətinin artırılmasına zəmin yaradacaq. Zərurət yaranarsa, “Hadrut” qovşaq yarımstansiyası vasitəsilə Cəbrayıl, Qubadlı, Zəngilan rayonlarını da elektrik enerjisi ilə təchiz etmək mümkün olacaq. Prezident İlham Əliyev yarımstansiyanı işə saldı. Qeyd olundu ki, Təlim-Tədris Kompleksində Beynəlxalq tədbirlərin keçirilməsi üçün bütün zəruri şərait nəzərə alınıb. Kompleksin Regional Tədris Mərkəzində yerli və xarici təlimçilərin iştirakı ilə elektroenergetika sahəsi üzrə ixtisaslı kadrların hazırlığı, bərpaolunan enerji mənbələrinin tətbiq və istismar qaydaları, peşə vərdişlərinin əldə edilməsi, real iş şəraitində təlimlər və ustalıq yarışlarının təşkili nəzərdə tutulur. Mərkəz təlim-tədris zalından və təlim poliqonundan ibarətdir. Tədris zalı 35/0,4 kV-luq müasir şəbəkə modelinin, 35 və 0,4 kV-luq fiberoptik kabellərin, kompozit şüşə-lifli dayaqların tətbiq sahələri, perspektiv inkişafı və üstünlüklərinin əyani şəkildə təqdim edilməsi üçün nəzərdə tutulub. Burada, həmçinin xüsusi dayaqlarda şəbəkədə istifadə edilən element və ləvazimatlar qurulub. İşğaldan azad edilmiş ərazilərdə Yaşıl enerji mənbələrinin (işlək günəş və külək enerji qurğuları) tətbiqinə dair real işlək model də tərtib edilib, həm personalın, həm də gələcəkdə fəal istehlakçıların maarifləndirilməsi təlimlərində istifadəsi nəzərdə tutulub. Eyni zamanda, Elektroenergetika sahəsində əldə edilmiş tarixi nailiyyətləri əks etdirən elektron guşə və əyani vəsait stendləri, müasir uçot cihazları (SMS, Smart, NFC-sayğacları) və müasir təhlükəsizlik texnikası, idarəetmə plakatları təqdim edilir. Məlumat verildi ki, beynəlxalq tədbirlər poliqonu isə peşə ustalığı yarışları və müasir texnologiyaların əyani nümayişi üçün nəzərdə tutulmuş texnoloji ərazidir. Eyni zamanda, poliqonda Günəş və külək enerjisi qurğularının quraşdırılması, istismarı və müasir idarəetmə sistemləri üçün BOEM-təlim sahəsi planlaşdırılıb. Təlim poliqonunda real iş şəraitində istifadə edilən müasir şəbəkə modeli, Yaşıl enerji elementləri (Günəş və külək enerji mənbələri) və innovativ layihə maketlərinin yerləşdirilməsi nəzərdə tutulub. Poliqon beynəlxalq peşə ustalığı yarışlarının, elektrotexniki təlim tədbirlərinin keçirilməsi və müxtəlif istiqamətlər üzrə təcrübə mübadiləsinin əyani nümayiş etdirilməsi üçün də geniş imkanlar yaradacaq. Burada yaradılan Regional Logistika Mərkəzi isə region üzrə tələb olunan nəqliyyat, xüsusi texnika və mal-materialın nəqli, təmiri və saxlanması üçün nəzərdə tutulub. Məqsəd, tələb olunan texniki vasitələrin vaxt itkisi olmadan əraziyə çatdırılması və saz vəziyyətdə saxlanmasından ibarətdir. Transformator xidmət sahəsində müasir paylayıcı şəbəkələrdə tətbiq edilən güc transformatorlarının təmiri, sazlanması və müasir cihazlarla təchiz edilməsi həyata keçiriləcək. Mərkəzi Laboratoriya smart-sayğaclar, kabel, izolyator, qurğu və avadanlıqların test-sınaq-diaqnostika tədbirlərinin həyata keçirilməsi üçün nəzərdə tutulub.
5-05-2023, 18:05
Prezident Şükürbəyli-Cəbrayıl-Hadrut avtomobil yolunun açılışında iştirak etdi
Mayın 5-də Azərbaycan Respublikasının Prezidenti İlham Əliyev Şükürbəyli-Cəbrayıl-Hadrut avtomobil yolunun 8,2 kilometrlik hissəsinin açılışında iştirak edib. Azərbaycan Avtomobil Yolları Dövlət Agentliyinin İdarə Heyətinin sədri Saleh Məmmədov dövlətimizin başçısına görülən işlər barədə məlumat verdi. Bildirildi ki, uzunluğu 42 kilometr olan köhnə yol 2,3 kilometr qısaldılaraq 39,7 kilometrlik yeni yolla əvəzlənib. Yolun hərəkət hissəsinin eni 14,5 metr, torpaq yatağının eni isə 21,5 metrdir. Dövlətimizin başçısının tapşırığına əsasən, Şükürbəyli-Cəbrayıl-Hadrut avtomobil yolu Qarabağın inkişaf planı nəzərə alınaraq dörd hərəkət zolaqlı olmaqla birinci texniki dərəcəyə uyğun inşa edilib. Yolun üzərindəki 6 körpünün tikintisi başa çatıb. Yol boyunca 18 avtobus dayanacağı quraşdırılıb. Yeni avtomobil yolu işğaldan azad edilmiş Xocavənd, Füzuli və Cəbrayıl rayonlarının ərazisindən keçir. Avtomobil yolu Hadrut qəsəbəsi və Cəbrayıl şəhəri də daxil olmaqla həmin rayonların 20-yə yaxın yaşayış məntəqəsini əhatə edəcək. Qeyd edək ki, bu yol Azərbaycan Prezidentinin 2021-ci il 29 aprel tarixli Sərəncamına əsasən inşa olunur.
5-05-2023, 17:18
Hadrutda salınacaq yaşayış məhəlləsi 28 evdən ibarət olacaq
Mayın 5-də Azərbaycan Respublikasının Prezidenti İlham Əliyev və birinci xanım Mehriban Əliyeva Hadrut qəsəbəsində salınacaq ilk yaşayış məhəlləsinin təməlinin qoyulması mərasimində iştirak ediblər. Dövlət başçısına görüləcək işlər barədə məlumat verilib. Qeyd edilib ki, ilk yaşayış məhəlləsi 28 fərdi evdən ibarət olacaq. Tikiləcək evlərin ikiotaqlı, üçotaqlı, dördotaqlı və beşotaqlı olması nəzərdə tutulur. Mənzillərin sahəsi 70-120 kvadratmetr təşkil edəcək. Bildirilib ki, Hadrut qəsəbəsində özəl sektor üçün investisiya zonasında nəzərdə tutulan evlərin tikintisi “PMD Group” MMC tərəfindən yerinə yetirilir. Dövlət başçısı Hadrut qəsəbəsində ilk yaşayış məhəlləsinin təməlini qoyub. Vətən müharibəsində şanlı Qələbə müjdəsini Azərbaycan xalqına çatdıran tarixi müraciətində Prezident, Müzəffər Ali Baş Komandan İlham Əliyevin dediyi “Məcburi köçkünlər yaxşı bilirlər ki, onların öz dədə-baba torpaqlarına qayıtması üçün biz əlimizdən gələni edəcəyik, işğaldan azad edilmiş bu torpaqları yenidən quracağıq” ifadəsi Hadrut rayonunda ilk yaşayış məhəlləsinin təməlinin qoyulması ilə bir daha təsdiqini tapır. Otuz ilə yaxın müddətdə doğma yurd-yuvalarına qovuşmaq həsrəti ilə yaşayan hadrutlular üçün ilk yaşayış məhəlləsinin təməlinin qoyulması onları bu arzularına daha da yaxınlaşdırır.
5-05-2023, 16:55
Bayden müşavirini Səudiyyə Ərəbistanına göndərir
ABŞ prezidenti Co Baydenin milli təhlükəsizlik üzrə müşaviri Ceyk Sallivan həftəsonu Səudiyyə Ərəbistanı liderləri, o cümlədən vəliəhd şahzadə Məhəmməd bin Salman, həmçinin Hindistan və BƏƏ rəsmiləri ilə danışıqlar aparmaq üçün Səudiyyə Ərəbistanına səfər edəcək. Sallivan bildirib ki, ABŞ hələ də İsrail və Səudiyyə Ərəbistanı arasında münasibətləri normallaşdırmaq üçün razılaşma üzərində işləyir. “Nəticədə tam normallaşmaya nail olmaq ABŞ-ın elan edilmiş milli təhlükəsizlik marağına əsaslanır. Niyyətlərimizin ciddiliyini bir daha təsdiq edərək, bu məsələdə göstərdiyimiz səyləri pozmamaq üçün hələlik təfərrüata varmaq fikrində deyiləm”, - o qeyd edib. Sallivanın bölgəyə səfəri Vaşinqton və Ər-Riyad arasında münasibətlərin ABŞ prezidentinin 2022-ci ilin yayında krallığa səfərindən sonra pisləşdiyi vaxta təsadüf edir. Lakin iki ölkə bir çox məsələlərdə, o cümlədən son vaxtlar Sudanla bağlı birgə işləməyə davam edir. Qeyd olunub ki, Səudiyyə və ABŞ arasında daha əvvəl yaranmış soyuqluğu və nəticədə krallığın İranla yaxınlaşmasını nəzərə alınarsa, səfər tərəflərin yaxınlaşması üçün siqnal rolunu oynamalıdır. "Mənim BƏƏ və Hindistandan olan həmkarlarım da Səudiyyə Ərəbistanına səfər edəcəklər. Biz Yeni Dehli ilə körfəz ölkələri, ABŞ və regionun qalan hissəsi arasında əməkdaşlığın yeni sahələrini müzakirə edəcəyik", - o əlavə edib.
5-05-2023, 16:19
Prezident və xanımı Hadrutda inşa ediləcək məktəbin layihəsiylə tanış oldu
Mayın 5-də Azərbaycan Respublikasının Prezidenti İlham Əliyev və birinci xanım Mehriban Əliyeva Hadrut qəsəbəsində 360 şagird yerlik tam orta məktəbin bərpa layihəsi ilə tanış olublar. Dövlətimizin başçısına və birinci xanıma layihə barədə məlumat verildi. Bildirildi ki, bərpa olunacaq məktəb 1,9 hektar ərazidə yerləşir. Əsaslı təmir və yenidənqurma işlərindən sonra məktəbdə 15 sinif otağı, idman və akt zalları, yeməkxana, kitabxana, hərbi dərs otağı, 3 laboratoriya və 2 texnologiya otağı, informatika otağı olacaq. Şagirdlərin yüksək səviyyədə təhsil almaları üçün sinif otaqları müasir avadanlıq və ləvazimatlarla təchiz ediləcək. Qeyd edək ki, Ermənistanın Azərbaycana qarşı 30 ilə yaxın davam edən hərbi təcavüzü nəticəsində işğal olunmuş rayonların təhsil infrastrukturu da tamamilə dağıdılıb. İşğaldan azad edilən ərazilərdə dağıdılan təhsil infrastrukturunun bərpası istiqamətində Prezident İlham Əliyevin müvafiq sərəncamları və tapşırıqları ilə hazırda mühüm işlər görülür. Hadrutda məktəb binasının tikintisi də bu işlərin tərkib hissəsidir.
5-05-2023, 15:50
Tuğ kəndində İnzibati Mərkəzin əsası qoyulur
Mayın 5-də Azərbaycan Respublikasının Prezidenti İlham Əliyev və birinci xanım Mehriban Əliyeva Xocavənd rayonunun Tuğ kəndində İnzibati Mərkəzin təməlinin qoyulması mərasimində iştirak ediblər. Qarabağ iqtisadi rayonuna daxil olan işğaldan azad edilmiş ərazilərdə (Şuşa rayonu istisna olmaqla) Azərbaycan Respublikası Prezidentinin xüsusi nümayəndəsi Emin Hüseynov dövlətimizin başçısına və birinci xanıma ilkin mərhələdə Tuğ kəndinin ictimai-inzibati mərkəzində inşası planlaşdırılan binalar barədə məlumat verib. Bildirilib ki, kənddə 1,63 hektar sahəni əhatə edəcək inzibati zonada ikimərtəbəli inzibati bina, klub icma və mədəniyyət mərkəzləri, restoran tikiləcək. Burada tikiləcək və bərpa ediləcək binaların ümumi sahəsi 3200 kvadratmetr olacaq. Ərazidə genişmiqyaslı abadlıq işlərinin görülməsi, yerüstü parkinq sahəsinin yaradılması nəzərdə tutulub. Bu ərazilərə bütün yol infrastrukturunun, kommunikasiya xətlərinin, o cümlədən işıq, rabitə və yüksəksürətli internetin çəkilməsi planlaşdırılır. İnzibati mərkəzdə tikinti-bərpa işlərinin gələn ilin martında başa çatdırılması nəzərdə tutulur.
5-05-2023, 14:32
COVID-19 pandemiyası statusu ləğv edildi
Ümumdünya Səhiyyə Təşkilatı (ÜST) COVID-19 pandemiyası statusunu ləğv edib. Bu barədə təşkilatın baş katibi Tedros Adhanom Qebreyesus məlumat verib. ÜST rəhbəri bildirib ki, pandemiyanın başlanğıcından bəri ən azı 20 milyon insan COVID-19 virusundan dünyasını dəyişib. Xatırladaq ki, təşkilat 30 yanvar 2020-ci ildə dünyada koronavirusun yayılması ilə əlaqədar fövqəladə vəziyyət, martın 11-də isə pandemiya elan etmişdi.
5-05-2023, 12:44
“Neftçi”nin maliyyə hesabatı müəyyənləşib - 14 milyon
“Neftçi” futbol klubunun 2022-ci il üçün maliyyə hesabatı açıqlanıb. Bu barədə klubun rəsmi saytında məlumat yayılıb. Məlumata görə, "ağ-qaralar" ötən il gəlirləri 14 milyon 127 min manat təşkil edib. Qeyd olunub ki, 2021-ci ildə bu rəqəm 13 milyon 736 min manat olub, yəni gəlirlər 391 min manat artıb.
5-05-2023, 12:25
Ermənistandan növbəti təxribat - Laçın atəşə tutuldu
Mayın 5-i saat 12:00 radələrində Ermənistan silahlı qüvvələrinin bölmələri Gorus rayonunun Dığ yaşayış məntəqəsi istiqamətində yerləşən mövqelərindən Laçın rayonu ərazisində, şərti sərhəddə yerləşən üzbəüz mövqelərimizdə mühəndis işləri görən traktoru atəşə tutub. Bu barədə Müdafiə Nazirliyindən məlumat verilib. Azərbaycan Ordusunun qeyd olunan istiqamətdə yerləşən bölmələri tərəfindən cavab tədbirləri görülüb.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!