29-07-2022, 10:59
29-07-2022, 10:51
29-07-2022, 10:34
29-07-2022, 10:20
"Nur Ocağı" Nailə Şahverdinin şeirlərini təqdim edir:
ANANIN YUXUSU
Yuxuda görmüşdü ana oğlunu,
Düşmənlə vuruşan igid əsgəri.
Bu döyüş səhnəsi qorxutdu onu,
Dəhşətli yuxuyla açdı səhəri.
Ananın ürəyi sıxıldı yaman,
Başının üstünü aldı qəm - kədər.
Yenə də qəlbində var idi güman,
Oğlundan alacaq yaxşı bir xəbər.
Bu bir həqiqətdir, bir acı gerçək,
Inamı səhv oldu, ümidi soldu.
Oğlunu bayrağa bükülmüş görcək,
Ana fəryad etdi, saçını yoldu.
Ağlama anacan, qoparma fəryad,
Bu dərdi dağ belə daşıya bilməz.
Hər kəsə əzizdir, şirindir övlad,
Göylərdə yaşayar, şəhidlər ölməz.
UCALIR GÖYLƏRDƏ ŞANLI BAYRAĞIN
Gözün aydın olsun, ey ana Vətən,
Geriyə çəkildi o azğın düşmən.
İşğalda deyilsən, nəhayət ki, sən.
Azad nəfəs alır çəmənin, dağın,
Ucalır göylərə şanlı bayrağın.
Sülh əldə elədik, bu da bir gerçək,
Fərəhlən, ağsaqqal, sevin, ağbirçək!
Hər bağın, hər bağçan açsın gül-çiçək,
Nur saçsın hər zaman sənin çırağın.
Ucalır göylərə şanlı bayrağın.
Çoxdan gözləyirdik bu gözəl anı,
Zəfərlə qurtaran bu şad zamanı.
Heç kimə vermədik Azərbaycanı.
Qoy yansın əbədi odun, ocağın,
Ucalır göylərdə şanlı bayrağın.
Mərd, igid oğullar dağıdır, sökür,
Düşmən təslim olur, belini bükür.
Azadıq, xoşbaxtıq Allaha şükür!
Yenə də bizimdir cənnət torpağın,
Ucalır göylərə şanlı bayrağın.
YARPAQLAR
Əsir dayanmadan şiddətlə külək,
Payız – yarpaqları başıma tökür.
Yaşımın üstünə yaş qoyur fələk,
Xəlvətcə ömrümün binasın sökür.
Hər yaşım artdıqca qocalıram mən,
Bir gün görəcəksən məni ağbirçək.
Saçıma dən düşüb, üzülüb bədən,
Amma ki, yaşamaq istəyir ürək.
Alır verdiyini geriyə torpaq,
Torpaqdan yaranan torpağa gedir.
Mənimtək zavallı bir sarı yarpaq,
Həyatdan doymadan onu tərk edir.
QOCALMA, ANA
Yaş üstə yaş gəlir, böyümüşəm mən.
Saçıma dən düşür, qırışır üzüm.
Yenə qulluğumda dayanmısan sən,
Təşəkkür etməyə çatmayır sözüm.
Etdin gəncliyini sən mənə qurban,
Nənnimin başında yuxusuz qaldın.
Mən hər yıxılanda deyərək"ay can",
Bağrına basaraq, könlümü aldın.
Təzədən yaz gəlib, açılır güllər,
Saçır öz ətrini çiçək hər yana.
Həftənin boyundan boy alır illər,
Bircə istəyim var, qocalma, Ana!!!
SƏN ALIN YAZIMSAN
Tez açan çiçəklər çox erkən solur,
Gəncliyin həzzi də lap qısa olur...
Demə sevgilimsən: - həsrətimsən de,
Sən alın yazımsan, qismətimsən de.
Nə qədər yansa da tonqal da sönür,
Atəşə nə düşsə tez külə dönür...
Demə alovumsan: - xiffətimsən de,
Sən alın yazımsan, qismətimsən de.
Zaman ömrümüzdən sıyrılıb gedir,
Cavanlıq anbaan bizi tərk edir...
Əbədi dünyamsan, cənnətimsən de,
Sən alın yazımsan, qismətimsən de.
SEVİRƏM SƏNİ
Sən oldun canımdan əziz, doğma can,
Yarama məlhəmsən, dərdimə dərman,
Səni qismətimə yazıb Yaradan,
Sən nə yaxşı varsan, sevirəm səni.
Ən çətin anımda yanımda qaldın,
Mənimlə bir yerdə saralıb soldun,
Sən qürub vaxtımın şəfəqi oldun,
Sən nə yaxşı varsan, sevirəm səni.
Dilimdə ah-nalə, qəlbimdə həsrət,
Gözümdə gündüz də olmuşdu zülmət.
Sən mənə bəxş etdin sevinc, səadət,
Sən nə yaxşı varsan, sevirəm səni.
Sənsiz bir qəfəsdi bu dünya mənə,
Hər bir kəs möhtacdır onu sevənə,
Allaha min şükür rast gəldim sənə,
Sən nə yaxşı varsan, sevirəm səni.
ALLAH DƏRGAHINDA
Yalvardım Allaha qorusun səni,
Səndən uzaq etsin dərdi, kədəri.
Yəqin ki, Yaradan eşidər məni,
Odur nizamlayan qəmi-qəhəri.
Qəlbinə dolmasın heç zaman təlaş,
Tanrı hər bir işdə köməyin olsun.
Üzündə gül açsın təbəssümün kaş
Sevinclə, fərəhlə ürəyin dolsun.
Sükuta dönməsin sinəndə həsrət,
Ömrünə yar olsun bizi yaradan.
Yurd-yuva salmasın gözündə heyrət,
O, səni qorusun bəladan hər an.
29-07-2022, 10:03
29-07-2022, 09:47
SƏN YARATDIN ŞEİRİMİZİN VƏTƏNİN
Ramiz Qusarçaylının səs-küyə səbəb olan, hadisəyə çevrilən yeni yazdığı “VƏTƏN” poeması kitabı taleyimizin və tariximizin qan yaddaşı və ruhunu əks etdirən vətənçiliyin anatomiyasıdır.Oxucu auditoriyasının böyük marağına səbəb olan bu kitab yüksək tiraj və satış sayına görə son illərin nəşrləri sırasında ən çox oxunan və reklam olunan çap məhsuludur.Nəfis tərtibat və yüksək poliqrafiya üsulu ilə nəşr olunan “Vətən” poemasını geniş anlamda həm də türklüyün İbrət Manifesti adlandırmaq olar! İbrət dərslərindən qazandıqlarımız qədər də gələcək nəsillərə verəcəklərimizin fövqündə yalnız və yalnız bir amil dayanır: Türkün yol xəritəsi!
Üçüncü min ilin fiziki varlığının yuxarı “sam” hissəsində, yəni baş qafasında yerləşən sağlı-sollu, habelə onurğa beyinlərində ən çox çaşdırılmış Saq türklüyü və Ata kultunu xilas eləmək...Çünki hər birimizin üzərində “Tarix” adlanan provokasiyalar həyata keçirirlər. Ən əsası onlardan xilas olmaqdır. Xilas olmağın yollarını isə Ramiz Qusarçaylı öz poemasında Tanrıdan gələn ilahi şeir misralarıyla böyük həvəslə qələmə almışdır. Bu mənada müəllif bizlərə çox ağır və şərəfli missiyanı daşımağı, o cümlədən, üzərimizə düşən yükü sona qədər çəkə biləcəyimizə And içməyimizi tövsiyə edir.
O, qaladığı Türk ocağını öz şeirləriylə sönməyə qoymur.Onu alovlandırır, qızışdırır, şölələndirir. Nə yaxşı ki, bu ocağın közü təkcə özümüzü yox, dünyanın hər tərəfinə səpələnmiş milyonlarla soydaşımızın Vətən sevgisini sönməyə qoymur. Bu gün o sevgini Günəş işığı qədər qəlblərdə şölələndirən Ramiz Qusarçaylı taleyimizin yeni poeziya vətəninin təməlini qoyur. Ürəklə deyə bilərəm ki, dahi söz peyğəmbərimiz Məhəmməd Füzulinin yaratdığı vətən fəlsəfəsinin bir közü də məhz Ramiz Qusarçaylının elə özüdür.
Gəl, gəzək tarixin mənbələrini,
Gəzək Vətən-Vətən türbələrini,
Gəzək kitab-kitab kitabələri,
Gəzək yazı-yazı sərdabələri,
Keçək Midiyadan, Mannadan bir də,
Dolaşaq tarixin ucqar yerini,
Açıb günə sərək arxivlərini...
İdeologiya hər bir xalqın tarix boyu düşüncələrinin yekunu və fəlsəfi tamlığıdır. Bu tamlıq isə bir xalqın poetik düşüncə tərzini və gen yaddaşında bəşəri hissin anatomiyasını formalaşdırır. Azərbaycan xalqının milli ideologiya və vətənçilik ideyasının kökündə poeziyanın rolu mən deyərdim ki, siyasi dünyagörüşün rolu qədərdi. Daha doğrusu, bir az da ondan üstündür.
Absurd həyat həqiqətlərini hər bir xalqın öz dilində təhdəlşüur məna qatlarına o dilin gücü ilə yerləşdirmək şairdən böyük məharət, ustalıq, sərrastlıq və səliqəlilik tələb edir. Əgər Azərbaycan türk dili Xl –ci əsrdən vətənçiliyin əsas qayəsi sayılırsa Ramiz Qusarçaylının bu dilin imkanları çərçivəsində qələmə aldığı “Vətən” poeması dediklərimizi mütləq mənada təsdiq etmiş olur.
Türkün Tanrı dili öz dili idi,
Qopuz dili idi,
saz dili idi,
O boyda cövlanın,
cəngin içində,
O boyda ləngərin,
rəngin içində,
Türkün təlim dili müqəddəs savaş,
Türkün savaş dili dərs dili idi,
Ancaq...
dövlət dili fars dili idi...(?!)
Vətən məsələsini ədəbiyyatda ilk dəfə qabardan Abasqulu ağa Bakıxanov olub. O, “Gülüstani-irəm” əsərində vahid Vətən problemini qoyub və bölünmüş Vətənin faciəsini göstərib.
XlX əsrdə Azərbaycan tarixi ədalətsizlik nəticəsində ikiyə bölünərək Rus və Fars imperiyaları tərəfindən işğal edildi. Vətənçilik Azərbaycan ziyalılarının təfəkküründə bu işğaldan sonra gündəmə gəldi. Əslində vətənimiz ikiyə yox, ona qədər bəlkə də iki yüz yerə parçalanmışdı. Bir ucu Arazdan yuxarı Arran (Kürün şimalındakı Şirvan, cənubundakı Albaniya – Ərsaq) Arazdan aşağıdakı Midiya (Mada-Batı) Arran-İran və Midiyanın qərbindəki qədim Borçalı (indiki Gürcüstan, Ermənistan və Urmiya –Rum mahalı) nəzərdə tutulur. Dərbəddən Börü (pers) körfəzinədək olan bir hissə böyük Cavidin xarakterizə elədiyi kimi “atəşlə suyun öpüşdüyü” müqəddəs məkana qədər hissə-hissə alınaraq 2 milyon 800 mim kv.k. dən 114.000 kv.k. qədər azalmışdı. Söylədiklərimiz əsərdə şeirin diliylə diqqətdən yayınmır.
Arazdan bu tayda,-
Azərbaycanda,
Damarı Dərbənddə,
qanı Şirvanda,
Bir əli dənizdə, bir əli dağda,
Ruhu göy üzündə,
canı torpaqda,
Sığınıb bir halal ocağa, oda,
Tarıxi qədim bir coğrafiyada,
Gözündə qığılcım,
cəngində vüqar,
Tayfalar varıydı,-
Cəsur tayfalar.
“Kəşkül”, “Əkinçi” qəzetlərində, ”Molla Nəsrəddin və “Füyuzat” jurnallarında ilk olaraq Azərbaycançılıq və Türkçülük ideyalarının təbliği vətənçilik epoxasının ilk təməl daşlarıni qoydu. Ramiz Qusarçaylının tarixi ədalətsizliyə münasibəti olduqca maraqlıdır.
Yeni rəng gəlirdi, çalar gəlirdi,
İctimai rəyə, siyasi rəyə,
Gəlirdi “Əkinçi”,
“Molla Nəsrəddin”,
“Müsəlman xeyriyyə cəmiyyətləri”,
Dövlət binaları,
“İsmayilliyyə”...
Dahi Firudin bəy Köçərli 1901-ci ildə özünün rusca ilk ədəbiyyat tarixini yazanda onun adını “Azərbaycan tatarlarının tarixi” adlandırır. O vaxt ruslar Azərbaycanlı sözünü çıxardıb “tatar” yazmışlar. Nəinki Azərbaycan sözünü, hətta XlX əsrin sonunda bu sözü xəritələrdən belə çıxardıb Qafqaz sözü ilə əvəz etmişdilər.
“Vətən” poemasında tariximizin keşməkeşli yollarına yeni baxış və analitik təhlil oxucunu vətənçilik qayəsində bir yerə toplayır. Bu birlik və həmrəylik çağrışı Vətənə səslənən şair harayıdır. Çünki Vətənin tarixi qudsal ruhların və kainatın tarixi qədərdir.
İlahi, zülmümüş Vətəni sevmək,
İlahi, ölümmüş Vətəni sevmək,
Sevən ürəklərə qara çəkiblər,
Vətən deyənlərin dili kəsilib,
Vətən deyənlərin başı kəsilib,
Vətən deyənləri dara çəkiblər,
Vətən deyənləri ağlar qoyublar,
Gözünün içində od qalayıblar,
Vətən deyənləri şaqqalayıblar.
Onu da qeyd etməliyəm ki, Azərbaycançılığı ilk dəfə Azərbaycan qayəsi adı ilə ictimai təfəkkürə Məhəmməd Əmin Rəsulzadə gətirmişdir. Müəllif əsərində bu məqamı da nəzərdən qaçırmamış, saf əxlaqına və təmiz vicdanına sadiq qalaraq tarix qarşısında öz münasibətini bildirmişdir. Gələcəkdə böyük və vahid Azərbaycan Cümhuriyyətinin yaranma nüvəsinin ilk poetik qığılcımı olan “Vətən” poeması əminəm ki, yeniliyin Ana yasası kimi misilsiz dəyərə layiq görüləcəkdir.
Böyük Məhəmməd Əmin Rəsulzadənin
Vətən harayından,
Vətən səsindən,
Vətənin Türk-islam iradəsindən,
Süzülüb gəlirdi ilk partiyalar,
İlk milli qurumlar,
milli şuralar,
Öndə “Müsəlman Gənclik Təşkilatı”ydı,
İlk milli azadlıq hərəkatıydı.
Tarixin dərin qatlarını vərəqləyən şair türkün söykökünü və yaranış bünövrəsinin rişələrini poetik duyğularla kəlmə-kəlmə, misra-misra qafiyələndirir.
Şumer,-
Altı min il eradan qabaq,
Tarixdə ən qədim sivilizasiya,
Qədim mədəniyyət, qədim od-ocaq,
İkiçayarası,-
Mesopotamiya.
Gəl,
gəzək Akkadi. Babilistanı,
Daş cizgilərində, gilyazılarda,
Yaşanır tarixin Şumer dastanı
Basma qəliblərdə. Mil yazılarda...
Şirin dili və axıcılığı olan bu poema tarixi-fəlsəfi baxımdan Azərbaycan ədəbiyyatının ən samballı poeziya nümunələrindən biri sayıla bilər. Keçmişlə bugünü və gələcəyi eyni istehkamda canlandıran şair yatmış tarıxın alt qatlarının psixoloji subyektlərini cəsarətlə açıb göstərmişdir. Şair alternativləri sevməyən tarixin doğru və düzgün, açıq və gizli sirlərini oxucuların müzakirəsinə verməklə yalanın həqiqət olmadığı qənaətini ortaya qoyaraq özünün sevdiyi Vətən idealına sadıq qalmışdır. Bu sadiqlikdə Ramiz Qusarçaylının tənhalığını və Vətən içində özünü qürbətdəki kimi hiss etməyini də qeyd etməmək insafsızlıq olardı. Əllbəttə, bu əlahəzrət tənhalıq Ramizin sözün həqiqi mənasında Ana Vətən hesab etdiyi müqəddəsliyə qanı və canı qədər rahib olmasından irəli gəlir.
Poeziya tükənəndə İnsan təklənir. İnsan təklənəndə cəmiyyət təklənir. Cəmiyyət təklənəndə isə Vətən təklənir. Ramiz poeziyanı Ruhun ehtiyacından daha çox “Vətən yaşasın”- deyə iliyinə qədər sevdiyi vətəni belə vəsf eləyir. Onun yolunda son nəfəsinədək əlindəki qələmlə vuruşmağa and içir.
Nə xırman bir, nə dən birdi,
Döyən min-min, bədən birdi,
Mən ha deyim Vətən birdi,-
İkidi Araz dilində”.
Əmir PƏHLƏVAN
29-07-2022, 08:58
Hədəfin Kitab təqdimatı
Bu günlərdə “Hədəf” liseyinin akt zalında gənc yazar Ellada Əlizadənin yeni işıq üzü görən hekayələrdən ibarət “Düşünən beyinlər” adlı kitabının təqdimatı keçirilmişdir.
Tədbiri giriş sözü ilə açan Azərbaycan Milli Elmlər Akademiyası Nizami Gəncəvi adına Ədəbiyyat İnstitutunun aparıcı elmi işçisi, filologiya üzrə fəlsəfə doktoru, tənqidçi Qürbət Mirzəzadə müəllif haqqında iştirakçılara məlumat vermiş, kitabda yer alan hekayələrin mövzusu, bədii strukturu, janr özünəməxsusluğu barədə öz düşüncələrini bölüşmüşdür.
Natiq oxucuların mühakiməsinə təqdim olunan kitabın eyni zamanda eksperiment xarakteri daşımasına diqqəti yönəltmiş, bu nəsr nümunələrinin essevari bir biçimdə qələmə alınmasını xüsusi olaraq vurğulamış, belə bir cəhdin ənənəvi yaradıcılıq təcrübəsi ilə üst-üstə düşməyən məqamlarını qeyd etmiş, kitabın heç də ədəbi ictimaiyyət və oxucular tərəfindən birmənalı qarşılanmayacağını müəllif və tədbir iştirakçılarının nəzərinə çatdırmış, gənc müəllifə yeni-yeni yaradıcılıq uğurları arzulamışdır.
Sonra söz tədbir iştirakçılarına verilmiş, şair və yazıçılardan Qorxmaz Kadusi, Nizami Zamanlı kitabın özünəməxsus xüsusiyyətlərindən geniş bəhs etmiş, müəllifin nail olduğu yaradıcılıq məziyyətləri barədə öz fikir və mülahizələrini söyləmişlər.
Nəfəs alətlərinin mahir ifaçısı Zahir Zülfüqarov kitabdakı hekayələrdə həyati gerçəkliyə, real hadisələrə müəllif yanaşmasının yeni çalarlarla ifadəsini əsas uğurlardan biri kimi qiymətləndirmişdir.
Gənc yazıçının nənəsi Ceyran Hüseynovanın, xalası Səbinə Ağayevanın, bibisi Elza Surxayevanın, bacısı Elyana Əlizadənin çıxışları, müəllif haqqında ürək sözləri tədbirin təsirli və səmimi məqamları kimi yadda qaldı.
Qaradağ rayonundakı 195№-li tam orta məktəbin təlim tərbiyə işləri üzrə direktor müavini, Azərbaycan dili və ədəbiyyat müəllimi Vəfa Hüseynova qızının məktəb illərindən başlayaraq bədii yaradıcılıq sahəsinə xüsusi həvəsindən, biliklərə səylə yiyələnmək qabiliyyətindən söhbət açmış, yazıçı və gələcəyin həkimi kimi uğurlarının bol olmasını diləmişdir.
Adı çəkilən təhsil müəsissəsinin müəllimlərindən Aytəkin Musayevanın, Elnarə Nəcəfzadənin, Aynur Qarayevanınn və Həbibə Sarızadənin gənc qələm sahibi haqqında fikirləri, “Düşünən beyinlər”lə başlanan yaradıcılıq debütü haqqında düşüncələri maraqla qarşılanmışdır.
“13 diri” hekayəsinin personajları- Azərbaycan Tibb Universitetinin II kurs tələbələri: Məhəmməd Ağabəyli, Famil Məmmədov, Aysun Verdiyeva, Nurlanə Məmişova, Fidan Vəlizadə, Əliyyə Quliyevanın adı çəkilən hekayənin ilk oxucuları kimi keçirdiyi hiss və duyğuları dilə gətirən təəssüratları tədbirə xüsusi rəng qatdı.
Sonda müəllif “Düşünən beyinlər” üzərində yaradıcılıq işindən, gələcək planlarından danışmış, təqdimat iştirakçılarına və tədbirin gerçəkləşməyində əməyi olanlara minnətdarlığını bildirmişdir.
29-07-2022, 08:47
Leyla YAŞAR yazır:" Daş adam".
Nəfəsini bir az dərib, yoluna yenidən davam etdi. Deyilən yerə az qalmışdı. Hava qaralmaga dogru getsə də, batmaq istəməyən günəş, üz - gözünü "turşudub" dayanmışdı. Küçədəki səssizlik, onun ayaqqabılarının taqqıltısını yad qonaq kimi qəbul edirdi. Xəzəllər ayagının altında xışıldadıqca ona ləzzət edir, addımlarını yeyinlədirdi. O, bu gün o müqəddəs yeri gedib görməliydi. Dildən dilə dolaşan “daş adam" əfsanəsinin hardan qaynaqlandığını heç kim bilmirdi. Soraqlaşıb öyrənmişdi. Həqiqətən də belə bir yer vardı.
- Həqiqətənmi adam daşdan imiş? - deyə özünə sual verdi.
Bu yaxınlarda onlara uzaq rayondan qonaq gələn əsgər yoldaşı Mətləb, onun hərdən cızma - qara etdiyini bilirdi. "Daş adam " dan söhbət düşəndə, bu haqda onların kəndində çox məlumatlı olduqlarını deyib, özünün gəlib öyrənməsini tövsiyyə etmişdi.
Avtobusdan Mətləbgilin kəndinin girəcəyində düşüb, Mətləbin dediyi istiqamətə gedirdi. Mətləbə zəng vurmaq üçün dayandı. Bir az nəfəsini dərdi.
- Yaxınlıqda su olsa idi, əl - üzümü yuyardım - deyib özü-özünə pıçıldadı.
Mətləbə zəng vurub evin yerini soruşdu. Sən demə qonaq çağrıldığı evin yaxınlığında imiş. Mətləb ona gələrkən rastına çıxan bulaqda əl - üzünü yumağı məsləhət gördü.
Aha, budur, uzaqdan qaraltı görünür.Bir az da getsə bulağa çatacaq, ordan Mətləbə yenidən zəng vuracaqdı.
Bulağa çatıb, çantasını yerə qoydu. Dördgözlə bulağa tamaşa etməyə başladı.
Divara yan - yana bir - birindən yaraşıqlı dörd cəngavərin şəkili vurulmuşdu. Bir - birinə bənzəyən igidlərin rəsmləri sanki canlı idi. Heyrət dolu baxışlarla oglanlara baxan Rəşadın gözü onlarla üzbəüzdə dizləri üstündə, əlləri göyə doğru uzanmış, dağınıq saçlı qadın heykəlinə sataşdı.
Rəşad burda çox dayana bilmədi. Əl - üzünə su vurmağı da unutdu. Dostuna zəng vurub, onu qarşılamağı xahiş etdi.
Artıq dostugildəydi.
Gəlişinin şərəfinə qoyun kəsmişdilər. Burdan ora stol açıb, üstünü naz- nemətlə doldurmuşdular. Mətləbin sevincinin həddi - hüdudu yox idi. Əsgər yoldaşının gəlişinə həm sevinir, həm də fərəhlənirdi.
Onun gəlişini eşidib, görməyə gələnlərin sayı getdikcə artırdı. Rəşad insanların səmimiliyinə, mehribançılığına heyran qalmaya bilmirdi.
Kəndin ağsaqqallarından olan Fateh kişi onu bağrına basıb, alnından öpdü.
- Oglum, biz sizlərlə fəxr edirik.
Mətləb ona göz vurdu:
- Babayla mehriban ol, bəlkə "daş adam " haqqında bir məlumat ala bildin.
" Daş adam " haqqında əsər yazmaq niyyətində idi.
Bu cavan oğlan yaradıcılığa yeni - yeni addımlarını qoyurdu.
Ona görə çalışırdı ki, öz dəsti - xətti ilə digərlərindən seçilsin.
Qonaqlıq gecə yarısına kimi davam etdi. Çöldəki havanın sızaqlıgını, evdə gurhagurla yanan odun peçi sındırmağa çalışırdı. Hamı peçin qırağında dövrə vurub, maraq dolu baxışlarla Fateh babaya baxırdılar.
Fateh kişi yastığa dirsəklənib, dərindən bir ah çəkib danışmağa başladı.
- Oğlum, yenə də xoş gəlmisən. Mətləb mənə danışıb, sənin istedadın barədə. Çalışacam sənə kömək edim.
Dərindən nəfəs alıb, gözlərini uzaqlara dikən Fateh babanın, bu haqda danışmaqda çətinlik çəkdiyi açıq - aydın hiss olunurdu.
- Bizim kəndin çox sakit, səmimi, mehriban insanları var. Hər kəs bir-birinə əl tutar, həm yaxşı, həm dar günündə yanında olarlar.
1992- ci il idi. Bildiyin kimi dədə - baba torpaqlarımıza göz dikən mənfur qonşularımız, müharibəyə yenidən başlamışdı.
Vətənimizin hər yerindən oldugu kimi bizim kənddən də minlərlə cavan könüllü orduya yazılıb, Vətəni qorumağa getmişdilər. Bir ailə vardı qonşuluqda. Çox sakit, mədəni ailə idi. Öz halal zəhmətləri ilə uşaqlarını böyüdürdülər. Ailənin 4 oglu vardı. Allah onları 10 il sonra vermişdi. Möcüzə idi. Bir - birindən yaraşıqlı bu igidlər, müharibə başlayar-başlamaz könüllü cəbhəyə yollandılar. Ata uşaqlar gedən günü ürək tutmasından keçindi. Yazıq ana nələr çəkdi, bir Allah bilir.
Günlərlə övladlarından xəbər tuta bilməyən ana, təklikdə darıxıb xısın - xısın aglasa da, insanlar arasında özünü tox tutur, ümüdlə uşaqların qayıdacağı günü gözləyirdi .
Fateh kişi bir az ara verib, bir qurtum isti çaydan ağzına alıb, armudu stəkanı nəlbəkisinə qoydu.
- Bizim samovar çayının dadı - tamı bir başqadı, əsas da, içində limon, yanında qənd olanda-deyib gözünü yenə uzaqlara dikdi. Sanki nəyisə xatırlamaga qorxur, danışmaga çəkinirdi.
-Hə, beləcə günlər keçib gedirdi. Cəbhədən agır xəbərlər gəlirdi. Fatma arvad hər gün qapının ağzına çıxıb, əli qoynunda övladlarını gözləyirdi.
- Bir gün kəndə xəbər yayıldı. Elsəvər şəhid olmuşdu. Nəşini gətirəcəkdilər.
- Həmin gün Fatma arvadı bir görsəydiniz. O acını yaşayan bilər. Allah düşmənimə də övlad acısı göstərməsin.
Fatma arvad qol götürüb oynadı. Hamı dəli olduğunu düşündü. Yox, yox, dəli olmamışdı.
- Bəs niyə?
- Deyəcəm.
Elsəvərin 7- si çıxmamış Ehtiramın şəhid olma xəbəri gəldi. Onu da gətirəndə Fatma arvad qol götürüb oynadı.
Çox agır mənzərə idi. İki oğlunun cənazəsinə girən qəhrəman ana , onları yoldaşının yanında dəfn etdirdi. Oglanların 4-ünün də cəbhədə düşmənə qarşı qəhrəmanlıqla döyüşdüyünü, neçə - neçə iti gəbərtdiyini bütün el-oba bilirdi. Fəxr ediləsi oğullar idi. Qalan iki oğlundan- Etibar və Ehtimaddan xəbər yox idi.
Günlər keçdikcə Fatma arvadın beli bükülür, saçları ağarırdı.
Artıq atəşkəs elan olunmuşdu. Uşaqlardan heç bir xəbər ala bilməyən ana, bir gün onları yuxuda gördüyünü bütün qohum - qonşuya sevinə - sevinə danışdı.
Yuxusunda oğlanlarının sağ olduğunu, əsirlikdə olduqlarını görmüşdü.
Həqiqətən də uşaqlar əsir düşüblərmiş.
Ana çox qürurlu , mətin qadın idi.
Bir dəfə ona niyə oğlanlarını gətirəndə oynadın, deyə sual verdilər.
Cavabı bilirsiniz nə oldu?
- Nə ?.- hər tərəfdən səs qalxdı.
- Şəhid anası olduğum üçün oynadım .
Sonralar Etibarın əsirlikdən ölüm xəbəri gəldi.
Ehtimaddan heç bir xəbər olmadı.
Ana yenə də səbrlə, inamla həyata davam edir, sonbeşik oğlunun qayıdacağı günü gözləyirdi.
Bir gün ananın oglanlarının adına bulaq tikiləsi oldu.
Ana 4 oğlunun şəklini də orda görmək istədiyini dedi.
Bir oğlunun sağ olduğunu bilə - bilə onu şəhid sayan ananın xətrinə heç kim dəymədi.
- Gələndə gördüyün bulaq həmən bulaqdı, bala.
Hər gün bulağın yanına gedən ana, orda əllərini göyə açıb, öz -özünə nəsə danışırmış. Əlləri göydə , dizləri yerdə elə ordaca gözlərini bu əbədi dünyaya yummuşdu. Orda gördüyün həmən qadın heykəli həmən ananın şərəfinə ucaldılıb.
İllər keçdi Ehtimad əsirlikdən qaça bildi.
Hamı təəccüblə Fateh kişiyə baxdı;
- Nəəəə?
-Hə, demişdim sizə xoş xəbərim var.
Əsirlikdən qaçan Ehtimad kəndə qayıtmağa utanıb Rusiyaya üz tutur, orda ailə qurur. Hal-hazırda bir oglu var.
Adı Elsevərdi.
- Ay Fateh baba, bizə bu haqda niyə deməmisən?
Mətləb incik halda agzını büzdü.
- Oğlum, dedim dostuna danışım, əsərinə yazsın.
- Hələ bu harasıdı, Elsevər bu gün sizlərin arasındadı.
- Harda, harda?
- Oğlum, bura gəl.
Hündür gülərüz oğlan otağa gəldi. Hamı heyranlıqla, həm də təəccüblə gah cavan oğlana, gah da Fateh babaya baxırdı.
- Ehtimad mənim oglumla eyni şəhərdə yaşayır.
Ehtimad orda vətənpərvər bir insan kimi tanınır. Əsirlikdə çox əziyyətlər çəkib .
Oğlumla təsadüfən görüşüblər. Bir azərbaycanlı ailəni yanğından xilas edibmiş.
Oğlum da bu qəhrəmanlığı Ehtimadın etdiyini öyrənib, tapıb onunla görüşüb.
Sonra da bunları mənə danışdı. Mən də Ehtimadı kəndə dəvət etdim.
Sağ olsun, Elsevəri göndərib .
Bir - bir hamıyla görüşən Elsevər, Fateh babanın yanında oturdu .
Fateh baba üzünü Rəşada tutub:
- Oğlum bax, mükəmməl bir əsər yaz.
- Hə, yadımdan çıxmışdı,
" daş adam" bilirsən kimdi?
- Kim?
- Həmin o Ana. 4 oğlunu Vətənə qurban edən Ana .
Allahın verdiyi o boyda dərdə mərdliklə dözən, oğlanlarının şəkli önündə daşa dönən Ana. O gündən o bulağın adı " Daş adam " olaraq qalıb.
29-07-2022, 08:43
İşıqlı Atalı
Doğayla Ruhdaşlıq: Doğanın Mənasına yetmək
Ürəyinizdə Günəş olsun!
Səhər saat 10 olar. Kəndimizdə - Kalvada, üzü Suraxanı kəndinə baxanda – Dal zəmi deyilən yerdəyəm. Bu duyğulu səhərdə Doğanın ruhuyla qovuşma – (təmas) mənim üçün bənzərsiz bir hal yaradır. Düşünürəm ki, nədən insanlar çox vaxt Doğayla, yəni Göylə (Səmayla), Günəşlə, Meşəylə, Ağacla, Çayla, Bulaqla, Yolla, Səhərlə, Gecəylə danışa bilmir? Ona görə ki, adamlar içlərindən uzaqdırlar.
Kəndlərdə evlər tikirlər, çoxu ildə iki ay gəlib qalsa, yenə yaxşıdır. Ancaq baxıram, adamları maddiyyatçılıq qayğıları alıb aparır. Təbii, mənim də maddiyyat qayğılarım var, ancaq ruhumuzu unuda bilmərik.
Adamlarda daha çox bioloji-instinktiv əhval üstündür. Ruhsal duyğular sanki qəhətə çəkilib. Doğa (Təbiət) onlara nə veribsə, onunla da yetərlənirlər. Əslində Doğa ilk baxışda bizə az şey verir. İmkanlarımız başqa məsələ. Yəni özümüzü yaratdığımız dərəcədə Doğayla insani ilişgimizi yarada bilərik. Gərək insan özünün öyrətməni olsun, Doğanın verdiyiylə yetərlənməsin, bacardığı qədər insanlıq imkanlarını aşkarlasın, var olsun. Hər kəs Doğanın verdiyi insanlıq imkanını aşkarlamır. Özünü öyrənmək – çətin işdir. Bunu bizə cəmiyyət məktəblərində öyrətmirlər. İnsan hər şeyi öyrənir, özündən başqa. Adi sayılanı başa çıxarır, özü ayağa düşür.
Doğadan öyrənmək – İnsana çox şey verər. Doğa – İnsanın öyrətmənidir dedik. Həm də İnsan Doğanın öyrətməni ola bilər haradasa. Özünü öyrənib Doğanı sevməklə, yaşatmaqla... Doğanın sükutuyla, coşğunluğuyla, şəfqətiylə, həyanlığıyla dediyini dərindən anlayıb, ipə-sapa düzüb, daha gözəl, ümidli biçimdə özümüzə yetirə bilərik. Doğa tükəndikcə biz də tükənirik.
***
İndi elə bir yerdəyəm ki, aydınlatmağa söz yetmir. Doğada halım gözəlləşir, daha da dirilir, tamlaşır. Doğanı ardıcıl anladıqca susquncasına, heyrətlə baxıram. Ruhun çılğınlıq çaları da var. Doğa onunla iç-içə olanı coşdurur, ruhlandırır, özünə yetirir.
Doğanın Mənasına yetən – Özünə yetir.
İnsanda üzə çıxan gözəlliklər hələ azdır.
Tükənməzlik – Doğanın və İnsanın əbədi birlik imkanıdır.
İnsan, yetər özündən ayrıldığın...
***
Doğa hikmətlərini asanca vermir.
Doğa ancaq onunla iç-içə olanındır.
İç-içəlik ardıcıl olsun gərək.
Ruhsal ənənəmiz ardıcıl yaransın, yenilənsin...
Doğanın ən gözəl yerində ev quran, ancaq içiylə - özüylə bir olmayan – Doğasızdır. Adamlar Doğaya daha çox yaxşıca yeyib-işmək, bu yolla ömür artırmaq imkanı kimi baxırlar.
Təkcə bu istək biz var etməz axı?
***
Doğayla Ruhdaşlıq – dərin ruhsal anlaq tələb edən bir işdir.
Gərək İnsan içəridən köklənsin. Zahiri köklənmə adamı qovuşmaya yetirməz.
Hər an ruhən Doğayla bir olmaq...
Doğaya eşq mahiyyətcə İnsanlığa eşqin tərkib hissəsidir, dünyanın mənasını anlamaq yolunda atılan ciddi addımlardan biridir. Bu yolla İnsan özünü ciddi biçimdə kökləyir: həm Doğaya baxışını müəyyən edir, həm də İnsanlıq üstə köklənir, özünə, başqasına davranışında bu, özünü göstərir.
***
Güclü İnsan Həyatı (Yaşamı) dəyişdirir.
Zaman-zaman quruluşların dəyişməsi buna örnəkdir. Ancaq Bəşərin Yaşam ölçüsü insanlığa uyğun olmadı. Yaşamı Ali ölçüyə (Ali Yaşama-Həyata) yetirmək İnsanlığın üzağlığı olacaq. Əminəm, bu ölçüyə köklənən gücünü həm də Doğadan alacaq.
***
İndiyə kimi yaşam (həyat) daha çox adamların instinktiv tələbləri əsasında var olub. İnsan bu gedişlə razılaşsınmı? Razılaşmır axı? İnsan Doğanı yaşatmadan, Yaşamı (Həyatı) dəyişdirmədən, Ali İnsani ölçüyə yüksəltmədən var ola bilərmi? Əgər bu baş tutmayacaqsa, insanın kamilləşməsinin, yüksək ölçülü bədii-mədəni sərvətlərin, yaradıcılıqların nə anlamı qalır?
Özü üçün fərd olaraq kamilləşmək həm də bəşərləşmək deməkdir. Kamillik ölçüsü Mütləq İnama, Mütləq İdraka, Mütləq Mənəviyyata, Mütləq İradəyə yetməkdir. Ancaq ali yaşam prinsipləri əsasında toplumun yaşaması baş tutmursa, artıq bu, ciddi sorunlar yaradır. Tək-tük insanlıq qayğısını yaşayanların ağrısını gerçək cəmiyyət daşıyıcılarının duymaması bu halda doğal görünür. Bu, bəşərin minillərdir davam edən ağrılı yaşamıdır.
İnsançı istək odur ki, Bəşərin halı kökündən dəyişsin. Çıxış yolu – İnsanın Mütləqə İnam Dünyabaxışı üstə var olmasıdır.
17 Bölək günü, Közərti ayı, 44-cü il, Kalva (17 iyun 2022-ci il)
29-07-2022, 08:29
Uğur uğura dayaqdır
Uğur uğura dayaqdır İnsanın həyatdakı ən böyük işi səmimiyyət aynası olmaq, doğmalıq göstərmək və qəlblərdə məskən salmaqdır. Bu proses ictimai-zəruri mənalar ehtiva edir; yəni insan özündən başqasına həyan olanda, yaxud xeyirxah əməlləri ilə cəmiyyətə fayda verəndə bütün işlər qaydasında görünür. Cəmiyyət töhfə verən insanları həmişə yüksəkdə tutub. Belələri bütün hallarda sevilir, öz bacarıqları və təşkilatçılıqları ilə daim diqqət mərkəzində dururlar. Tam səmimi deyək ki, şəxsiyyətinə dərin rəğbətimiz və hörmətimiz olan Cəvahir xanım Qaraqızı da öz əməli işində ölkə dəyərlərini milli zərurət kimi ehtiva edir, cəmiyyətə fayda gətirir.
Qısaca tanışlıq üçün deyək ki, Cəvahir Qaraqızı qədim Borçalı mahalında, Gürcüstanın Bolnisi şəhərində anadan olub. Ali təhsilli iqtisadçıdır. İyirmi ildən çoxdur ki, ölkəmizin ictimai işində fəallığı ilə diqqət çəkir. Onun bu vaxta kimi dövri mətbuatda və müxtəlif almanaxlarda şeirləri dərc olunub. "Məhsəti Şairlər Məclisi» İctimai Birliyinin sədridir. "Dünya Azərbaycanlılarının Mədəniyyət Mərkəzi" və "Dünya Azərbaycanlıları Konqresi"nin üzvüdür. "Abdulla Şaiq", "Qızıl qələm" və "Zirvə" mükafatları laureatıdır. Cəvahir xanım son illər cəmiyyət işində daha fəaldır. O, bir müddətdir qeyri-hökumət təşkilatlarının ictimai səciyyəsini xarakterizə edir, özü də ümumi inkişaf naminə bu prosesdən yararlanmağı qarşısına məqsəd qoyub. Elə buna görədir ki, hazırda məşğul olduğu iş cəmiyyətə töhfə verir. Cəvahir xanımın sədri olduğu "Məhsəti Şairlər Məclisi” İctimai Birliyi Azərbaycan Respublikası Qeyri-Hökumət Təşkilatlarına Dövlət Dəstəyi Agentliyiyin seçim qaydaları əsasında 2021-ci ildə kiçik qrant müsabiqəsinin qalibi olub. Elə bu uğurla bağlı Cəvahir xanımı təbrik edəndə, o, dedi:
- Hazırladığımız layihə “Nizami Gəncəvi ədəbi irsinin təbliği”nə dair idi və qarşımıza bölgələrdə ədəbi məclis (şeir, qəzəl, qiraət, muğam ifası) və tamaşaları təşkil etmək məqsədi qoymuşduq. Sevindirici haldır ki, biz buna nail olduq. Yəni, qrant müsabiqəsinin qalibi olanda düşündük ki, məqsədimizə nail olacağıq. İndi çox şükür, Azərbaycan ədəbi irsinin təbliği, ədəbiyyatımızın, mədəniyyətimizin, mənəviyyatımızın, milli ənənələrimizin, şifahi xalq yaradıcılığının, milli folklorumuzun yaşaması, qorunması üçün müəyyən addımlar atırıq və bu işlərin ölkə dəyərləri kimi ehtiva etməsi mühüm şərtdir. Bilirsiniz ki, Nizami irsi ədəbi irzimizin şah damarıdır. Söz sənətinin ustadı Nizami Gəncəvi yaradıcılığı təkcə 2021-ci illə deyil, hər zaman elm sahiblərinin, ədib və yazarların, mədəniyyət xadimlərinin əsas müraciət etdiyi gündəm mövzudur və bu, həmişə belə olacaq. Dahi şairin məşhur əsərləri, “Xəmsə”si dünya poetik-fəlsəfi fikrinin zirvəsində dayanmaqla kamillik axtaran zəka sahiblərinin həmişə ilham alacağı yaradıcılıq mənbəyi sayılacaq.
Nizami dərin fəlsəfi əhəmiyyət daşıyan yaradıcılıq əsərləri ilə kamillik, dürüstlük, sülh, ədalət və məhəbbəti aşiqi olmaqla, insanları fərdi inkişaf tərbiyəsinə dəvət etmiş, fərdi inkişafla, həmçinin, ədalətli cəmiyyətin qurulmasına çağırış etmişdir. Dahi mütəfəkkirin yaradıcılığının əhali kütlələrinə yaxın, sadə xalq dili ilə, müxtəlif janr və fəaliyyət növləri ilə çatdırılması, gənc nəslimizin milli-mənəvi ruhda tərbiyəsinə, milli irzimizin varisliyinin təmin olunmasına zəmanətdir. Bu baxımdan, Nizami yaradıcılığının, ədəbi irsinin təbliğində müxtəlif yeni vasitə və üsullardan istifadə zəruridir. Elə bizim layihəmizin də məqsədi regionlarda Nizami ədəbi irsinin sadə xalq kütlələrinə yeni formatlarla təbliği, regionlarda şeir, qəzəl, muğam ifaları, əsərlərdən tamaşalar daxil olmaqla ədəbi məclislərin təşkilidir və bu istiqamətdə qarşımıza qoyduğumuz əsas vəzifələr ədəbi irsimizi yaşadıb qorumaq, gənc nəslin milli mənəvi ruhda inkişafına töhvə verməkdir.
- Cəvahir xanım, layihəniz milli zərurətdən irəli gəlib və öz məqsədinizi hansı addımlarla təsdiq etmək niyyətindəsiniz?
- İndiyədək bir sıra uğurlara imza atmıhıq. Misal üçün deyim ki, 29 mart 2022-ci ildə "Məhsəti Şairlər Məclisi» İctimai Birliyi Şamaxı rayonunda “Nizami Gəncəvi ədəbi irsinin təbliği”nə dair tədbir keçirdi. Tədbir Əfzələddin Xaqani Şirvani adına Şamaxı rayon Mədəniyyət Mərkəzində baş tutdu. Tədbiri İB sədri kimi mən özüm və İsmayıllı Regional Mədəniyyət İdarəsinin Şamaxı rayonu üzrə nümayəndəsi Rəfail Tağızadə idarə edirdi. Məqsədimiz də o idi ki, Nizami Gəncəvi irsinin regionlarda təbliğinin əhəmiyyətindən danışaq, mənəvi yüksəkliyin ictimai səciyyələrdə hansı rol oynadığını yetişən nəsillərə göstərək. Açığı, tədbir boyu biz bu istəyə nail ola bildik. Çünki böyük sözün əzəli xidmətçisi olan Şamaxıda insanlar bizi çox dərindən duyur, hər fikrimizi demək olar ki, alqışlayırdılar. Bu, təbii ki, bizi çox məmnun edirdi. Elə həmin tədbirdə çıxış edənlərin özləri də bu ənənəvi və zəruri məqamı öz ifaları və sözləri ilə təsdiq etdilər.
Cəvahir xanım Bərdə rayonunda təşkil etdikləri tədbirin mahiyyətindən danışarkən dedi:
- Bərdə Rayon İcra Hakimiyyəti və Azərbaycan Respublikası Qeyri-Hökümət Təşkilatlarına Dövlət Dəstəyi Agentliyinin dəstəyi, Bərdə rayon Mədəniyyət Mərkəzinin və “Məshəti Şairlər Məclisi» İctimai Birliyinin birgə təşkilatçılığı ilə “Nizami Gəncəvi ədəbi irsinin təbliği”nə həsr olunmuş tədbirimiz də rayon ictimaiyyətinə böyük təsir göstərdi. Tədbirimiz proqramında aşağıdakı məsələlər əsas hədəf idi:
“Qarabağ” ansamblının ifasında “Koroğlu” uvertürası səslənməli, çıxışlarda layihəmizin əsas arqumenti bəlli olmalı, gənc nəsilə Nizami ədəbi ruhu aşılanmalı və s. Əminəm ki, biz buna nail olduq. Çünki hər çıxış, hər səslənən söz və fikir diqqətlə dinlənilirdi. Sanıram ki, Azərbaycan ədəbiyyatının və mədəniyyətinin inkişafında layihəmiz əsaslı addımlar atır. Çünki xalqımızın qəlbində əbədiyaşarlıq qazanmış işlər daim təbliğ olunmalıdır.
Cəvahir Qaraqızının rəhbərliyi və təşkilatçılığı ilə «Məhsəti Şairlər Məclisi» İB-nin Quba görüşü də layihənin əsas məğzi kimi məna tapır. Bu görüşdə də Nizami Gəncəvi ədəbi irsi qubalı sakinlərə böyük minnətdarlıq hissi ilə çatdırıldı. B.Səfəroğlu adına Quba rayon Mədəniyyət Mərkəzində baş tutan tədbir Nizami Gəncəvi irsinin regionlarda təbliğinin vacibliyini ehtiva etdi. Çıxış edənlər bu addımın əhəmiyyətindən danışdılar və Azərbaycan ədəbiyyatında Nizami Gəncəvinin yerinin və rolunun mahiyyətindən bəhs etdilər. Cəvahir xanım sədri olduğu İB-nin layihələrlə çıxışına dəstək olan Azərbaycan Respublikası Qeyri-Hökumət Təşkilatlarına Dövlət Dəstəyi Agentliyinin Müşahidə Şurasının sədri Azay Quliyevə, Agentliyin Müşahidə Şurasının sədr müavini Vüsal Quliyevə və Agentlikdə əməyi keçən hər kəsə təşəkkürünü bildirir. Qeyd edir ki, lahihəmizin həyata keçirdiyi bütün proqramlar gənc nəsillərin nümunəvi vətəndaş kimi yetişmələrində az da olsa rol oynayır. Düşünürük ki, bu iş vacib və zəruri işdir, çoxumuzun həyatında yeni səhifələr açır.
Beləcə, Azərbaycan Respublikası Prezidentinin 2007-ci il 13 dekabr tarixli 674 nömrəli Fərmanı ilə təsdiq edilmiş “Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurası haqqında Əsasnamə” cəmiyyət işində ümdə rol oynayır. QHT-lər işlədikləri layihənin icra dövründə qrant müqaviləsi ilə üzərinə düşən öhdəlikləri vaxtında və tələb olunan səviyyədə həyata keçirməklə, cəmiyyət işində təkanverici qüvvə kimi təsir bağışlayırlar. Və bilirik ki, gənclərin vətənpərvər ruhda tərbiyə olunması onların müstəqilliyinə təminat verən amillərdən hesab olunur. Bunun üçün gənclərin sosial qayğılarının həllinə nail olmaq mütləq şərtdir.
Nəzərə almaq lazımdır ki, dövlət qayğısından yetərincə bəhrələnən gənclərin vətənpərvər olması şübhəsizdir. Məhz Cəvahir xanımın hədəf götürdüyü işin məqsədi də elə bu rakursdadır. Cəvahir xanım Azərbaycan dövlətinin yaratdığı imkanlardan maksimum yararlanmaqla gənc nəslin layiqli vətəndaş olmalarında ümdə rol oynayır. Ona fəaliyyətində və yaradıcı işində uğurlar diləyir, can sağlığı arzulayırıq.
Hüseyn Məmmədov,
Azərbaycan Jurnalistlər Birliyinin üzvü
Uğur uğura dayaqdır İnsanın həyatdakı ən böyük işi səmimiyyət aynası olmaq, doğmalıq göstərmək və qəlblərdə məskən salmaqdır. Bu proses ictimai-zəruri mənalar ehtiva edir; yəni insan özündən başqasına həyan olanda, yaxud xeyirxah əməlləri ilə cəmiyyətə fayda verəndə bütün işlər qaydasında görünür. Cəmiyyət töhfə verən insanları həmişə yüksəkdə tutub. Belələri bütün hallarda sevilir, öz bacarıqları və təşkilatçılıqları ilə daim diqqət mərkəzində dururlar. Tam səmimi deyək ki, şəxsiyyətinə dərin rəğbətimiz və hörmətimiz olan Cəvahir xanım Qaraqızı da öz əməli işində ölkə dəyərlərini milli zərurət kimi ehtiva edir, cəmiyyətə fayda gətirir.
Qısaca tanışlıq üçün deyək ki, Cəvahir Qaraqızı qədim Borçalı mahalında, Gürcüstanın Bolnisi şəhərində anadan olub. Ali təhsilli iqtisadçıdır. İyirmi ildən çoxdur ki, ölkəmizin ictimai işində fəallığı ilə diqqət çəkir. Onun bu vaxta kimi dövri mətbuatda və müxtəlif almanaxlarda şeirləri dərc olunub. "Məhsəti Şairlər Məclisi» İctimai Birliyinin sədridir. "Dünya Azərbaycanlılarının Mədəniyyət Mərkəzi" və "Dünya Azərbaycanlıları Konqresi"nin üzvüdür. "Abdulla Şaiq", "Qızıl qələm" və "Zirvə" mükafatları laureatıdır. Cəvahir xanım son illər cəmiyyət işində daha fəaldır. O, bir müddətdir qeyri-hökumət təşkilatlarının ictimai səciyyəsini xarakterizə edir, özü də ümumi inkişaf naminə bu prosesdən yararlanmağı qarşısına məqsəd qoyub. Elə buna görədir ki, hazırda məşğul olduğu iş cəmiyyətə töhfə verir. Cəvahir xanımın sədri olduğu "Məhsəti Şairlər Məclisi” İctimai Birliyi Azərbaycan Respublikası Qeyri-Hökumət Təşkilatlarına Dövlət Dəstəyi Agentliyiyin seçim qaydaları əsasında 2021-ci ildə kiçik qrant müsabiqəsinin qalibi olub. Elə bu uğurla bağlı Cəvahir xanımı təbrik edəndə, o, dedi:
- Hazırladığımız layihə “Nizami Gəncəvi ədəbi irsinin təbliği”nə dair idi və qarşımıza bölgələrdə ədəbi məclis (şeir, qəzəl, qiraət, muğam ifası) və tamaşaları təşkil etmək məqsədi qoymuşduq. Sevindirici haldır ki, biz buna nail olduq. Yəni, qrant müsabiqəsinin qalibi olanda düşündük ki, məqsədimizə nail olacağıq. İndi çox şükür, Azərbaycan ədəbi irsinin təbliği, ədəbiyyatımızın, mədəniyyətimizin, mənəviyyatımızın, milli ənənələrimizin, şifahi xalq yaradıcılığının, milli folklorumuzun yaşaması, qorunması üçün müəyyən addımlar atırıq və bu işlərin ölkə dəyərləri kimi ehtiva etməsi mühüm şərtdir. Bilirsiniz ki, Nizami irsi ədəbi irzimizin şah damarıdır. Söz sənətinin ustadı Nizami Gəncəvi yaradıcılığı təkcə 2021-ci illə deyil, hər zaman elm sahiblərinin, ədib və yazarların, mədəniyyət xadimlərinin əsas müraciət etdiyi gündəm mövzudur və bu, həmişə belə olacaq. Dahi şairin məşhur əsərləri, “Xəmsə”si dünya poetik-fəlsəfi fikrinin zirvəsində dayanmaqla kamillik axtaran zəka sahiblərinin həmişə ilham alacağı yaradıcılıq mənbəyi sayılacaq.
Nizami dərin fəlsəfi əhəmiyyət daşıyan yaradıcılıq əsərləri ilə kamillik, dürüstlük, sülh, ədalət və məhəbbəti aşiqi olmaqla, insanları fərdi inkişaf tərbiyəsinə dəvət etmiş, fərdi inkişafla, həmçinin, ədalətli cəmiyyətin qurulmasına çağırış etmişdir. Dahi mütəfəkkirin yaradıcılığının əhali kütlələrinə yaxın, sadə xalq dili ilə, müxtəlif janr və fəaliyyət növləri ilə çatdırılması, gənc nəslimizin milli-mənəvi ruhda tərbiyəsinə, milli irzimizin varisliyinin təmin olunmasına zəmanətdir. Bu baxımdan, Nizami yaradıcılığının, ədəbi irsinin təbliğində müxtəlif yeni vasitə və üsullardan istifadə zəruridir. Elə bizim layihəmizin də məqsədi regionlarda Nizami ədəbi irsinin sadə xalq kütlələrinə yeni formatlarla təbliği, regionlarda şeir, qəzəl, muğam ifaları, əsərlərdən tamaşalar daxil olmaqla ədəbi məclislərin təşkilidir və bu istiqamətdə qarşımıza qoyduğumuz əsas vəzifələr ədəbi irsimizi yaşadıb qorumaq, gənc nəslin milli mənəvi ruhda inkişafına töhvə verməkdir.
- Cəvahir xanım, layihəniz milli zərurətdən irəli gəlib və öz məqsədinizi hansı addımlarla təsdiq etmək niyyətindəsiniz?
- İndiyədək bir sıra uğurlara imza atmıhıq. Misal üçün deyim ki, 29 mart 2022-ci ildə "Məhsəti Şairlər Məclisi» İctimai Birliyi Şamaxı rayonunda “Nizami Gəncəvi ədəbi irsinin təbliği”nə dair tədbir keçirdi. Tədbir Əfzələddin Xaqani Şirvani adına Şamaxı rayon Mədəniyyət Mərkəzində baş tutdu. Tədbiri İB sədri kimi mən özüm və İsmayıllı Regional Mədəniyyət İdarəsinin Şamaxı rayonu üzrə nümayəndəsi Rəfail Tağızadə idarə edirdi. Məqsədimiz də o idi ki, Nizami Gəncəvi irsinin regionlarda təbliğinin əhəmiyyətindən danışaq, mənəvi yüksəkliyin ictimai səciyyələrdə hansı rol oynadığını yetişən nəsillərə göstərək. Açığı, tədbir boyu biz bu istəyə nail ola bildik. Çünki böyük sözün əzəli xidmətçisi olan Şamaxıda insanlar bizi çox dərindən duyur, hər fikrimizi demək olar ki, alqışlayırdılar. Bu, təbii ki, bizi çox məmnun edirdi. Elə həmin tədbirdə çıxış edənlərin özləri də bu ənənəvi və zəruri məqamı öz ifaları və sözləri ilə təsdiq etdilər.
Cəvahir xanım Bərdə rayonunda təşkil etdikləri tədbirin mahiyyətindən danışarkən dedi:
- Bərdə Rayon İcra Hakimiyyəti və Azərbaycan Respublikası Qeyri-Hökümət Təşkilatlarına Dövlət Dəstəyi Agentliyinin dəstəyi, Bərdə rayon Mədəniyyət Mərkəzinin və “Məshəti Şairlər Məclisi» İctimai Birliyinin birgə təşkilatçılığı ilə “Nizami Gəncəvi ədəbi irsinin təbliği”nə həsr olunmuş tədbirimiz də rayon ictimaiyyətinə böyük təsir göstərdi. Tədbirimiz proqramında aşağıdakı məsələlər əsas hədəf idi:
“Qarabağ” ansamblının ifasında “Koroğlu” uvertürası səslənməli, çıxışlarda layihəmizin əsas arqumenti bəlli olmalı, gənc nəsilə Nizami ədəbi ruhu aşılanmalı və s. Əminəm ki, biz buna nail olduq. Çünki hər çıxış, hər səslənən söz və fikir diqqətlə dinlənilirdi. Sanıram ki, Azərbaycan ədəbiyyatının və mədəniyyətinin inkişafında layihəmiz əsaslı addımlar atır. Çünki xalqımızın qəlbində əbədiyaşarlıq qazanmış işlər daim təbliğ olunmalıdır.
Cəvahir Qaraqızının rəhbərliyi və təşkilatçılığı ilə «Məhsəti Şairlər Məclisi» İB-nin Quba görüşü də layihənin əsas məğzi kimi məna tapır. Bu görüşdə də Nizami Gəncəvi ədəbi irsi qubalı sakinlərə böyük minnətdarlıq hissi ilə çatdırıldı. B.Səfəroğlu adına Quba rayon Mədəniyyət Mərkəzində baş tutan tədbir Nizami Gəncəvi irsinin regionlarda təbliğinin vacibliyini ehtiva etdi. Çıxış edənlər bu addımın əhəmiyyətindən danışdılar və Azərbaycan ədəbiyyatında Nizami Gəncəvinin yerinin və rolunun mahiyyətindən bəhs etdilər. Cəvahir xanım sədri olduğu İB-nin layihələrlə çıxışına dəstək olan Azərbaycan Respublikası Qeyri-Hökumət Təşkilatlarına Dövlət Dəstəyi Agentliyinin Müşahidə Şurasının sədri Azay Quliyevə, Agentliyin Müşahidə Şurasının sədr müavini Vüsal Quliyevə və Agentlikdə əməyi keçən hər kəsə təşəkkürünü bildirir. Qeyd edir ki, lahihəmizin həyata keçirdiyi bütün proqramlar gənc nəsillərin nümunəvi vətəndaş kimi yetişmələrində az da olsa rol oynayır. Düşünürük ki, bu iş vacib və zəruri işdir, çoxumuzun həyatında yeni səhifələr açır.
Nəzərə almaq lazımdır ki, dövlət qayğısından yetərincə bəhrələnən gənclərin vətənpərvər olması şübhəsizdir. Məhz Cəvahir xanımın hədəf götürdüyü işin məqsədi də elə bu rakursdadır. Cəvahir xanım Azərbaycan dövlətinin yaratdığı imkanlardan maksimum yararlanmaqla gənc nəslin layiqli vətəndaş olmalarında ümdə rol oynayır. Ona fəaliyyətində və yaradıcı işində uğurlar diləyir, can sağlığı arzulayırıq.
Hüseyn Məmmədov,
Azərbaycan Jurnalistlər Birliyinin üzvü
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!